Read Baltic Romani Bible 2019 – Библия - Пэ Балтитко Романи чиб (Романэс) 2019 Ереме́ё 19 Bible Online

Ереме́ё 19 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Ереме́ё 19

¹Адя́кэ пхэндя́ Рай Дэвэ́л ма́нгэ, Еремеёскэ: “Джа́ и кин кхоро́ ґлэятыр, и лэ пэ́са манушэ́нгирэ пхурыдырэн и пхурыдырэ раша́н,

²И джа́ кэ Еномоскиро [Геномоскиро-ю.о.] до́ло, саво́ исын пашы́л Пирье́нгири по́рта (Харшыфо) и пхэн зоралэ́с анги́л сарэ́ндэ лава́, савэ́ Мэ пхэна́ва ту́кэ.

³Пхэн лэ́нгэ: ‘Шунэ́н Ра́скирэ-Дэвлэ́скиро лав: Юдэя́кирэ кра́лья, джиибнарья Ерусалимо́стыр. Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: ‘Акэ Мэ яна́ва биба́хт (би́да) пэ дава́ штэ́то адя́кэ, со кажнонэ́стэ, кон шунэ́ла дава́, явэ́ла тэ кудунякирэл (тэ звенинэл) дрэ лэ́скирэ кана́.

⁴Пал-дова́ со ёнэ мэкнэ́ Ман, и ёнэ кэрдэ́ чу́жо дава́ штэ́то ваш Ма́нгэ, и ёнэ тхувалякирдэ дрогонэ́ смолэнца явирэ дэвлорэ́нгэ, савэ́н ёнэ на джиндлэ́, и лэ́нгирэ дада́, и Юдэя́кирэ кра́лья, и ёнэ пхэрдякирдэ дава́ штэ́то бибангипнаскирэ ратэ́са;

⁵и ёнэ адя́кэ-паць чхудэ́ вучэ́ штэ́ты Ваалоскэ тэ хачкирэ́н пэ́скирэ чхавэ́н дрэ яг сыр хачкирибнаскиро свэ́нто дыибэ́н Ваалоскэ, со Мэ припхэндём тэ на кэрэ́н, пал со Мэ на ракирдём, дава́ на сыс и Ма́ндэ пэ годы́.

⁶Палдава́ акэ, явэ́на дывэса́, — ракира́ва Мэ, Рай Дэвэ́л, — ке́ли дава́ штэ́то на явэ́ла тэ кхарэлпэ Тофе́то, ци Гиномэскирэ-чхавэ́нгиро до́ло, а явэ́ла тэ кхарэлпэ мулякирибнаскиро (умарибнытко) до́ло.

⁷И Мэ кэра́ва адя́кэ, со ничы́ на явэ́ла мол зракирибэ́н пэ скэдыны кэ Юдэ́я и кэ Ерусалимо пэ дова́ штэ́то, и Мэ кэра́ва адя́кэ, со ёнэ пэрэ́на куртала́тыр анги́л пэ́скирэ вэргэ́ндэ, и кодолэнгирэ вастэ́стыр, савэ́ родэ́на лэ́нгиро джиибэ́н, и Мэ кэра́ва адя́кэ, со лэ́нгирэ тру́пы Мэ да́ва сыр хабэ́н болыбнытконэ чириклэнгэ и мурдалэ́нгэ пэ пхув.

⁸И Мэ кэра́ва далэ́ форо́стыр штэ́то тэ санпэ, и тэ дивинэнпэ трашаса манушэ́нгэ, кажно (сва́ко) ману́ш, кон пашы́л проджа́ла, явэ́ла ухтылдо дивоса, и ёв явэ́ла тэ дэл шоля сабнаса, дыкхи́ долэ́ сарэ́ фра́нсы (язвы).

⁹И Мэ кэра́ва адя́кэ, со ёнэ явэ́на тэ хан лоч (плоть) пэ́скирэ чхавэ́н и чхае́н, и, кажно (сва́ко) лэ́ндыр, явэ́ла тэ хал пэ́скирэ-малэнгирэ джидэ́ маса́, ке́ли обчхувэна вэ́рги сарэ́ ригэ́ндыр, ке́ли лэ́нгэ явэ́ла пхаро́ вэргэ́ндыр, и кодолэндыр, савэ́ явэ́на тэ тасавэн лэн, и тэ родэ́н лэ́нгиро джиибэ́н.

¹⁰И ту пхагирэса кхоро́ анги́л манушэ́нгирэ якха́, савэ́ явэ́на ту́са,

¹¹и ту пхэнэ́са лэ́нгэ: — ‘Адя́кэ ракирэ́ла болыбна́скирэ-янголэ́нгиро Рай Дэвэ́л: ‘Адя́кэ-паць Мэ пхагирава кадалэ́ манушэ́н и дава́ фо́ро, сыр пхагирэна кхоро́, со нашты́ лэс нэвэ́стыр тэ кэрэ́н, и ёнэ явэ́на тэ гаравэн пэ́скирэ мулэн дро Тофе́то кэ дасаво часо (цы́ро), со на явэ́ла буты́р штэ́то тэ гаравэн.

¹²Адя́кэ Мэ кэра́ва кадалэ́ штэтоса, — ракира́ва Мэ, Рай Дэвэ́л, — и лэ́скирэ манушэ́нца, и Мэ кэра́ва кадалэ́ форо́стыр сы́рбы Тофе́то.

¹³И кхэра́ дро Ерусалимо и кральенгирэ кхэра́ дрэ Юдэ́я явэ́на магирдэ́ сы́рбы Тофе́то, — сарэ́ кхэра́, кай пэ лэ́нгирэ стрэхи тхувалякирдэ дрогонэ́ смолэнца, и вычхувэнас тхадунэ свэ́нта дыибэна́ явирэ дэвлорэ́нгэ.’”

¹⁴Тэ́ньци явдя́ Ереме́ё Тофетостыр, карик лэс бичхадя́ Рай Дэвэ́л тэ ангилпхэнэл, и ёв тэрдия́ пэ грэ́да (дво́ро), саво́ сыс дро Ра́скирэ-Дэвлэ́скиро Кхэр, и ёв пхэндя́ сарэ́ манушэ́нгэ:

¹⁵Адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ яна́ва биба́хт [бари би́да-р.с.] пэ дава́ фо́ро и сарэ́ лэ́скирэ форицы, пэ савэ́ Мэ припхэндём биба́хт, пал-дова́ со ёнэ пхарьякирдэ пэ́скирэ мэня, соб (кай) лэ́нгэ тэ на шунэ́н мирэ́ лава́.”