Read Baltic Romani Bible 2019 – Библия - Пэ Балтитко Романи чиб (Романэс) 2019 Ереме́ё 9 Bible Online

Ереме́ё 9 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Ереме́ё 9

¹О, тэ явэ́л Миро шэро́ пхэрдо́ панингэнца, соб (кай) тэ явэ́н Мирэ́ якха́ сы́рбы ясвэнгири ґаны́нг, соб (кай) Мэ могинавас тэ ровав дывэ́с и рат пал Мирэ́-манушэ́нгиро-чхакиро хасибэ́н.

²О, тэ явэ́л Ма́нгэ штэ́то пэ чхучи́ пхув сыр дромэскирэскэ (путникоскэ), соб (кай) Мэ могинавас тэ мэкав Мирэ́ манушэ́н, и тэ джав пэ́скэ лэ́ндыр. Ёнэ сарэ́ исын биладжаипнарья, биладжаипэ́н-кэрибнаскирэ (прелюбодеи), ёнэ исын скэдынэ́ ваш здыибнаскирэ манушэ́нгэ.

³И ёнэ бандякирэна пэ́скирэ чиба́ тэ хохавэн сы́рбы лу́ко, нэ ёнэ на бидарипнаскирэ ваш патяибэ́н пэ пхув: пал-дова́ со ёнэ пириджана екхэ бибахтятыр (холя́тыр) кэ яви́р, нэ ёнэ на джинэ́на Ман, — ракирэ́ла Рай Дэвэ́л.

⁴Кажно (сва́ко) тэ рикирэ́лапэ ригаса пэ́скирэ малэстыр, и на допатя зоралэ́с дрэ пэ́скирэ пшалэ́стэ, пал-дова́ со кажно пшал заджа́ла фротымаса пэ дром явирэскэ, и кажно мал исын каля-кэрибнаскиро (плёткари).

⁵Кажно лэ́ндыр хохавэла пэ́скирэ пашатунэс, и на ракирэ́ла патяибэ́н: ёнэ высыклякирдэ пэ́скирэ чиба́ тэ ракирэ́н хохаибэ́н, и ёнэ кхинякирэна пэс, кэри чорипэ́н.

⁶Одо́й, кай ёнэ дживэ́на, машкира́л исын хохаибэ́н, ёнэ отпхэнэнапэ тэ джинэ́н Ман пир пэ́скиро хохаибэ́н’, — ракирэ́ла Рай Дэвэ́л.

⁷‘Палдава́ ракирэ́ла болыбна́скирэ-янголэ́нгиро Рай Дэвэ́л: ‘Акэ, Мэ билякирава лэн и Мэ спробинава лэн; пал-дова́ со ишчо (инкэ́) Ма́нгэ тэ кэра́в мирэ́-манушэ́нгирэ чхаса?

⁸Лэ́нгири чиб исын мулякирибнаскири буст (стре́ла), ёй ракирэ́ла хохаибэ́н. О ману́ш ракирэ́ла кучэс (раманёса) кэ пэ́скиро пашатуно пэ́скирэ чиба́са, нэ ёв андра́л пэ́стэ сы́рбы подракхэла тэ замарэ́л лэс.

⁹Ци Мэ на сэндякирава пхарэ́с лэн пал саро́ дава́, — ракирэ́ла Рай Дэвэ́л. ‘Ци Мэ на отда́ва палэ холынаса дасавэ́ нацыякэ сыр дая́?’

¹⁰Мэ, Ереме́ё, ґазда́ва роибэ́н пал бэ́рги, и мэ обровавапэ пал чараибнытка фэ́лды пэ чхучэ́ маля (степи), и мэ ява́ва тэ ракира́в ясвэ́нца пал-дова́, со чхучэ́ маля хачинэ адя́кэ, со нико́н на дэ́ла ра́да тэ джал пирда́л лэ́ндэ. Зан кхэритконэ́-жывёлэнгири (мурдалэнгири) исын на шундлы. Сыр болыбны́тка чирикля́, адя́кэ-паць и кхэри́тка мурдала́ (ското) хасинэ́, ёнэ гинэ́ криг.

¹¹Мэ кэра́ва Ерусалимо́стыр руи́ны, штэ́то, дро саво́ дживэ́на шакалы. Мэ кэра́ва Юдэя́кирэ форье́ндыр чхучо́ штэ́то, со нико́н на дживэ́ла.

¹²Кон исын годо́ ману́ш, соб (кай) ёв тэ дэл ра́да тэ ґалёл саро́ дава́? И конэ́скэ Ра́скирэ-Дэвлэ́скирэ ушта́ пхэндлэ́, соб (кай) ёв могинэлас тэ пхэнэ́л статэчнэс сарэ́нгэ? Со́скэ дая́ пхув хасия́, схачия сы́рбы шуки́ чхучи́ пхув мал адя́кэ, со нико́н на джа́ла пир ла́тэ?’

¹³И отпхэндя́ Рай Дэвэ́л: “Пал-дова́, сыр ёнэ мэкнэ́ Миро Зако́но, саво́ Мэ дыём лэ́нгэ, и сыр ёнэ на шундлэ́ Мири́ зан, и ёнэ на кэрдэ́ пир Миро Зако́но,

¹⁴а ёнэ кэрдэ́ пир пэ́скирэ пхарэ́ илэ, и отдэнас паты́в Ваалоскэ, сыр лэ́нгирэ дада́ сыклякирдэ́ лэн;”

¹⁵палдава́ адя́кэ ракирэ́ла болыбна́скирэ-янголэ́нгиро Рай Дэвэ́л, Израилёскиро Дэвэ́л: “Акэ, Мэ чалякирава кадалэ́ манушэ́н палыноса и Мэ панякирава лэн пане́са жэлучоса.”

¹⁶И Мэ росчхувава лэн тэ дживэ́н машки́р Наюдэ́ндэ, конэ́с на джиндлэ́ ни ёнэ, ни лэ́нгирэ дада́. И Мэ бичхава́ва курта́ла пал лэ́ндэ, анги́л дова́, сыр Мэ сарэ́са хасякира́ва лэн.’

¹⁷Адя́кэ ракирэ́ла болыбна́скирэ-янголэ́нгиро Рай Дэвэ́л: “Обдуминэн и кхарэ́н джувле́н, савэ́ тугинэна роибнаса, соб (кай) ёнэ могинэн тэ явэ́н; и бичхавэн пал джиндлэ́ джувлендэ, соб (кай) ёнэ могинэ́нас тэ явэ́н.

¹⁸Мэк тэ явэ́н ёнэ сыгэды́р, и мэ тэ ґаздэ́н ёнэ роибэ́н пал амэ́ндэ адя́кэ, соб (кай) тэ прастан (тэ чхувэнпэ) ясва амарэ́ якхэ́ндыр, и соб (кай) амарэ́ цымблэндыр тэ тхадэн (чхувэнпэ) паня́.

¹⁹Пал-дова́ исын шундлы зан, сыр тугинэла зоралэ́с джувлы́ Сионо́стыр: “Сыр амэн обчордэ! Сыр амэ сам ладжакирдэ́, пал-дова́ со амэ мэкцям пхув пир-дова́, со амэн традынэ криг амарэ́ кхэрэндыр!

²⁰Джувлялэ! Шунэ́н Ра́скирэ-Дэвлэ́скиро лав, и мэк тумарэ́ кана́ тэ прилэ́н Лэ́скиро лав; сыклякирэ́н тумарэ́ чхае́н тэ тугинэн роибнаса, и тэ бага́н роибнытка гиля́ екх екхэ́скэ.

²¹Пал-дова́ со мэрибэ́н джа́ла пирда́л амарэ́ фэншры и джа́ла дрэ амарэ́ фэлатиня́ тэ мулякирэ́л амарэ́ чхаворэ́н пэ ґасы (вули́цы), и тэрнэ́ манушэ́н пэ форуны́ (пло́шча) дро фо́ро.

²²Пхэн, Ереме́ё: ‘Адя́кэ ракирэ́ла Рай Дэвэ́л: “Манушэ́нгирэ тру́пы явэ́на тэ равэнпэ (тэ пасён) сыр ґнэё пэ откэрды фэ́лда, и сыр ґарбы пала́л пал гивачхиныбнаскирэстэ, и на явэ́ла буты́р нико́н тэ скэдэл лэн.”

²³Адя́кэ, ракирэ́ла Рай Дэвэ́л: “Мэк годо́ ману́ш тэ на барьякирэл пэс пэ́скирэ годыпнаса (годя́са), мэк зорало́ ману́ш тэ на барьякирэл пэс пэ́скирэ (шарэлпэ) зорья́са; и мэк барвало́ ману́ш тэ на барьякирэл пэс (тэ на шарэлпэ) пэ́скирэ барвалыпнаса:

²⁴нэ мэк ёв, кон барьякирэ́ла пэс, тэ шарэлпэ (тэ барьякирэл пэс) далэ́са, со ёв ґалёла и, со ёв джинэ́ла Ман; пал-дова́ со дава́ Мэ сом, Рай Дэвэ́л, Кон сыкавэ́ла дро́го ла́ска, чачуно́ сэ́ндо и чачипэ́н пэ пхув. Пал-дова́ со Мэ зоралэ́с радынавпэ сарэ́стыр далэ́стыр”, — ракирэ́ла Рай Дэвэ́л.

²⁵“Акэ, сыг явэ́на дывэса́”, — ракирэ́ла Рай Дэвэ́л, — ке́ли Мэ пхарэ́с сэндякирава кодолэ́н, савэ́ исын обчхиндлэ́ и савэ́ исын наобчхиндлэ:

²⁶дро Еги́пто, и дрэ Юдэ́я и дро Едомо чхаворэ́н Амоностыр и Моавостыр, савэ́ндэ яго́ры (краи́) пэ балэнгирэ пе́йсы исын обчхиндлэ́ и савэ́ дживэ́на пэ чхучи́ пхув. Пал-дова́ со сарэ́ далэ́ Наюды́тка на́цыи исын наобчхиндлэ и, саро́ Израилёскирэ-кхэрэ́скирэ-манушэ́нгиро ило́ исын на обчхиндло.”