Read Baltic Romani Bible 2019 – Библия - Пэ Балтитко Романи чиб (Романэс) 2019 Роибэн 1 Bible Online

Роибэн 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Роибэн 1

¹Пхаро́ исын дро Ерусалимо: ёв (фо́ро) исын би манушэ́нгиро, сы́рбы пивлы (удова), сави́ сыс раны машки́р манушыпнаскирэ на́цыи! Акэ, кон сыс тхага́ри пэ пхувья́кирэ рига́, одова́ ману́ш, яця́ дынариса.

²Ёв[1] ровэла киркэс раты́, и ясва исын пэ лэ́скирэ чхама (шчоки): нанэ ние́кх подрикирибнаскиро машки́р сарэ́ндэ, конэ́скэ сыс дро́го дава́ фо́ро. Сарэ́ форо́скирэ мала́ бикиндлэ лэс, и ёнэ ячнэ́ лэ́скирэ вэргэнца (врогэнца).

³Юдэя́кирэ мануша́ гинэ́ дрэ наволя, кай мэнчынэна лэн и енэ исын пхарэ́ — бутякирэ андынаршчыки. Ёнэ дживэ́на машки́р Наюдэ́ндэ, ёнэ на откхинёна. Сарэ́, кон традынэ лэн, явнэ́ наўжакирдэс пэ лэ́ндэ, сыр лэ́нгэ яця́ пхаро́ тэ дживэ́н.

⁴Сионоскирэ дрома́ тугинэна, пал-дова́ со ние́кх на явэ́ла тэ свэнкинэл. Сарэ́ лэ́скирэ по́рты исын чхучэ́, лэ́скирэ рашая́ дэ́на ґондя́, лэ́скирэ патывалэ́ тырнэ джувле́н притасавэ́на, Сионоскэ, кокорэскэ, исын пхаро́.

⁵Лэ́скирэ намала ячнэ́ рая (ранца), лэ́скирэ вэ́рги зяинэна миштыпнаса, пал-дова́ со Рай Дэвэ́л притасадя Сионоскирэ манушэ́н пир дова́, со ёнэ кэрдэ́ бут чорипэ́н. Лэ́скирэ чхаворэ́ гинэ́ дро пле́но анги́л намалэстэ.

⁶Сари́ шук Сионоскирэ чхатыр хасия́, ла́кирэ тхага́рья ячнэ́ сы́рбы мирга (оленё), савьятэ нанэ чаритко пхув, савэ́ гинэ́ бизорья́кирэ анги́л традыпнаскирэстэ.

⁷Дрэ дывэса́, ке́ли ёнэ мэнчындлэпэ и лэн традэнас, тэды Ерусалимо рипирдя сарэ́ куч рэ́нды, со сыс ґарэдыр лэ́стэ, сыр хасинэ́ лэ́скирэ мануша́ вэргоскирэ вастэ́ндыр и ние́кх на дыя́ васт лэ́скэ. Намала дыкхнэ́ лэс и ёнэ сандлэпэ холямэс лэ́скирэ бэдыпнастыр.

⁸Ерусалимо кэрдя́ баро́ грэ́хо, палдава́ ёв яця́ магирдо́. Сарэ́, кон кутякирдэ лэс, мэкнэ́ тэ кэрэ́н паты́в; пал-дова́ со ёнэ дыкхнэ́ лэ́скиро нангипэ́н. Ёв, чачо́, дыя́ ґондя́ и гия́ криг.

⁹Лэ́скиро магирипэ́н исын пэ лэ́скирэ и́дя, ёв на думиндя пал пэ́скиро джиибна́скиро ко́нцо (яго́ро), палдава́ ёв пыя́ адя́кэ намиштэс, лэ́стэ нанэ подрикирибнаскиро. Раё Дэ́вла! Дыкх мирэ́ мэ́ньки, пал-дова́ со вэ́рго барьякирдя пэс.

¹⁰Вэ́рго (врого) диндькирдя пэ́скиро васт пир кучипэ́н, со сыс лэ́стэ; Ерусалимо дыкхця́ сыр На́юды гинэ́ андрэ́ Свэ́нто Штэ́то, конэ́скэ Ту припхэндян тэ на джа́н андрэ́ Тыри́ Кхангири́.

¹¹Сарэ́ лэ́скирэ мануша́ дэ́на ґондя́, ёнэ радэна маро́; ёнэ дынэ́ сувнакая и куч бара́ пал хабэ́н, соб (кай) тэ ракхэ́н джиибэ́н. “Дыкх, Раё Дэ́вла, обдумин, сыр санапэ холямэс ма́ндыр!” — ракирэ́ла Ерусалимо.

¹²“Сарэ́нгэ тумэ́нгэ дава́ нисо́, кон джа́ла пэ́скэ (накхэла) маму́й! Ѓа́да, дыкхэ́н: ци исын ишчо (инкэ́) вари-конэ́стэ дасави́ дукх сыр ма́ндэ — со пыя́ пэ ма́ндэ, — савья́са Рай Дэвэ́л притасадя ман дро дывэ́с, ке́ли Ёв холя́сыя зоралэ́с.

¹³Вучипна́стыр Ёв бичхадя́ яг пэ мирэ́ кокалы́, и яг лыя́ зор пэ миро фо́ро; Ёв росчхудя́ фэлы́ ваш мири́ ґэро́й и рискирдя́ ман палэ; Ёв кэрдя́ адя́кэ, соб (кай) мэ тэ явав чхучо́ (пусто), соб (кай) мэ тэ млоснёвав (тэ нашавав зор) саро́ дывэ́с.

¹⁴Рай Дэвэ́л пхандя зоралэ́с Пэ́скирэ вастэ́са ґа́мо мирэ́ чорипна́стыр; ёй исын кхуды́ и зарэсця пэ мири́ мэн. Ёв кэрдя́ адя́кэ, со мири́ зор замыя́. Ёв здыя ман дрэ васта́, савэ́ндыр мэ на могина́ва тэ ґаздавпэ.

¹⁵Рай Дэвэ́л штакирдя тэл ґэра́ сарэ́ мирэ́ зоралыпнаскирэ манушэ́н машкира́л миро фо́ро, Ёв кхардя́ кхэтанэ́ скэдыибэ́н пэ ма́ндэ тэ затасавэн сарэ́ мирэ́ тырнэн манушэ́н: Рай Дэвэ́л штакирэла сы́рбы дро пресо патываля тэрня джувля́, кон исын Юдэякири чхай.

¹⁶Палдава́ мэ и ровава, мири́ якх чхувэ́лапэ пане́са, пал-дова́ со миро подрикирибнаскиро, кон могинэлас тэ дэл палэ джиибэ́н мирэ́ дескэ, исын дур ма́ндыр. Мирэ́ чхавэ́ нашадынэ, пал-дова́ со вэ́рго пирилыя упралыпэ́н.”

¹⁷Сио́но д(з)инд(з)ькирэла пэ́скирэ васта́, нэ нанэ ние́кх тэ подрикирэ́л лэ́скиро ду́хо (фа́но). Рай Дэвэ́л припхэндя́ адя́кэ, соб (кай) тэ явэ́н лэ́скирэ мала́ трусця́л Яковостэ (Якубостэ), нэ мэ, Ерусалимо, яцём магирдо́ машки́р лэ́ндэ.

¹⁸Рай Дэвэ́л исын чачипна́скиро, пал-дова́ со да мэ кэрдём бу́нто пэ Лэ́скирэ припхэныбэна́. Шунэ́н, какана́, сарэ́ манушыпнаскирэ на́цыи, и, ґа́да, мэ пыём дро ду́хо (фа́но), а мэ, мирэ́ чхая́ и мирэ́ тырнэ мануша́ гинэ́ дро пле́но.

¹⁹Мэ кхардём одолэ́н, кон сыс мирэ́ дру́ги (мала́), нэ ёнэ хохадэ ман; мирэ́ рашая́ и мирэ́ пхурэ́ пхурдынэ пэ́стыр палатуно́ (последнё) ду́хо (фа́но) дро миро фо́ро, родыи пэ́скэ маро́ тэ ракхэ́н джиибэ́н.

²⁰Дыкх, Раё Дэ́вла, сыр бари биба́хт пыя́ пэ ма́ндэ; миро ди исын дрэ траш, миро ило́ рискирдяпэ упрэ́ дрэ ма́ндэ, пал-дова́ со мэ кэравас дова́, со мэ камамас. Яврестыр какана́ курта́ла (мечо) чингирэла шэро́, нэ кхэрэ́ исын сы́рбы мэрибэ́н.

²¹Со мэ да́ва ґондя́, со нанэ кон тэ подрикирэ́л ман. Сарэ́ мирэ́ вэ́рги шундлэ́ пал мири́ бари би́да, ёнэ радынэ́напэ далэ́стыр, со Ту кэрдя́н дава́. Бичха́в дова́ дывэ́с, со Ту, Раё Дэ́вла, пхэндя́н статэчнэс, мэк ёнэ тэ ячэ́нпэ дасавэ́-паць, сыр мэ сом.

²²Мэк саро́ лэ́нгиро фуипэ́н тэ сыкадёл анги́л Ту́тэ, и кэр лэ́нгэ дова́, со Ту кэрдя́н ма́нгэ пал миро чорипэ́н, пал-дова́ со мэ пхарэ́с дава́ ґондя́, и миро ило́ нашавэла зор.”