Read Baltic Romani Bible 2019 – Библия - Пэ Балтитко Романи чиб (Романэс) 2019 Езэкилё 47 Bible Online

Езэкилё 47 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Езэкилё 47

¹Тэ́ньци ёв (дава́-паць ману́ш) яндя́ ман (Езэкилёс) палэ кэ Кхангирья́киро вуда́р; акэ, Кхангирья́кирэ прогостыр тхадэ́ла пани́ пэ васто́ко, пал-дова́, со Кхангири́ сыс тэрды фасадоса пэ васто́ко. И пани́ тхадэлас чачэ́-Кхангирья́кирэ рига́тыр пэ паш-дывэсы́тко риг, кай сыс алта́рё.

²И вылыджия́ ёв ман паш-ратитконэ́ портакирэ дромэ́са, саво́ сыс яври́, лыджия́ кэ по́рта, сави́ сыс яври́, дромэ́са, саво́ выджа́ла пэ васто́ко; акэ, пани́ тхадэ́ла пир чачи́ (право) риг.

³Ке́ли одова́-паць ману́ш гия́ пэ васто́ко, ёв рикирэлас дро васт шэло, и ёв вымериндя тысёнцы (бара́) куня́ (локци), и лыджия́ ёв ман пиро́ пани́; пани́ сыс кэ миро кокалкицо (ладыжка).

⁴Нэвэ́стыр (нэвэ́с) ёв выгиндя́ ишчо (инкэ́) екх тысёнцо, и лыджыя ман пиро́ пани́; пани́ сыс кэ чанг. Выгиндя́ ёв нэвэ́с тысёнцо, и лыджия́ ман; пани́ подги́я кэ мири́ кусты́к (трушула).

⁵Выгиндя́ ишчо (инкэ́) тысёнцо, ада́й сыс дасаво сы́гно панынг, со нашты́ сыс ма́нгэ тэ пириджав, пал-дова́ со пани́ сыс адя́кэ хор, со трэиндя́ тэ плывинав тэ пириджав дава́ панынг сыс нашты́.

⁶И пхэндя́ ёв ма́нгэ: “Дыкх ту дава́, манушэ́скиро чхаво́?” И лыджия́ ман палэ кэ брэ́го рэкакиро (лэнякиро).

⁷Ке́ли мэ явдём палэ, акэ, пэ брэги пашы́л сы́гно рэ́кица (лэнори́) (патоко) сыс бут дрэвы екхэ и явирэ рига́тыр.

⁸И пхэндя́ ёв ма́нгэ: “Дава́ пани́ тхадэ́ла пир васточнонэ-пхувья́кири риг, джа́ла пэ фэ́лда, а сыр заджа́ла дро мо́рё (дэрья́в), и кэрэ́лапэ лэ́скиро пани́ састякирибнытко (лечэбно).

⁹Кажно джидо́ создыибэн, саво́ кхарэ́лапэ (движынэлапэ) одо́й, кай заджа́на дуй рэкицы, явэ́ла тэ дживэ́л, одо́й явэ́ла бут мачхэ́, пал-дова́, со заджа́ла одори́к дова́ пани́ и кэрэ́лапэ пани́ дрэ мо́рё (дэрья́в) састякирибнытко, и карик заджа́ла дая́ сыкно рэ́кица (лэнори́), саро́ одо́й явэ́ла джидо́.

¹⁰Явэ́на тэрдэ́ пашы́л лэ́стэ мануша́, савэ́ ухтылэна мачхэн Эн-Гадятыр (Ен-Гаддятыр) кэ Еглаимо, ёнэ явэ́на тэ зачхурдэн кхудя (сети). Одо́й явэ́ла мачхэ́, явэ́на бут мачхэ́ сыр дро Баро́ Мо́рё (дэрья́в).

¹¹Лэ́скирэ артапели (хор болоты) и чхувины (лужы), савэ́ на высастёна, явэ́на ячадэ (ячкирдэ́) ваш лонд.

¹²Пашы́л брэ́го сы́гно рэ́кица (лэнори́) (патоко), пир рэкицакирэ брэги, екхэ и явирэ рига́тыр явэ́на тэ барьён ра́зна дрэвы, савэ́ дэ́на хабэ́н: лэ́нгирэ патря (листы) на явэ́на тэ зашутён, и на пириячэна тэ янэ́н пхаба́ (пло́ды). Каждо нэво́ чхон явэ́на тэ выбарьён нэвэ, пал-дова́, со пани́ ваш лэ́нгэ тхадэ́ла свэнтонэ́ штэто́стыр; лэ́нгирэ пхаба́/пло́ды явэ́на тэ хан, а патря (листы) тэ састякирэнпэ.”

¹³Адя́кэ ракирэ́ла Рай Дэвэ́л, Дэвэ́л: “Акэ исын розгиныбэн, пир саво́ тумэ́ сан бангэ́ тэ роскэрэн пхув, соб (кай) тэ дорэсэлпэ ёй дэшудуенгэ Израилёскирэ родыцэнгэ: дуй паша́ Ёза́скэ (Иосифоскэ).

¹⁴Лэн дая́ пхув сыр мэкно́ миштыпэ́н екх и яви́р ману́ш, пал-дова́, со Мэ ґаздыём Миро васт совлахаса тэ дав дая́ пхув тумарэ́ дадэ́нгэ, кадая́ пхув исын тумаро́ мэкно́ миштыпэ́н.

¹⁵Акэ, исын пхувья́кири ме́жа: пэ паш-рати́тко яго́ро (краё), лыи Барэ́ Морёстыр пир дром кэ Хеглоно, сыр тэ джас кэ Цэдадо.

¹⁶Емафо, Берото, Сивраимо, кэ Гацар Тихоно, саво́ исын машки́р Дама́ско и Емафоскирэ штэ́ты, саво́ исын пэ Авраноскири ме́жа.

¹⁷И явэ́ла ме́жа морёстыр (дэрьявэстыр) кэ Гацар-Еноно, ме́жа пашы́л Дама́ско, а дурэды́р пэ паш-рати́тко исын штэ́то Емафо, акэ, исын паш-рати́тко риг.

¹⁸Шпэ́ра (чэрта) васточнонэ рига́тыр лыджа́н машки́р Аврано и Дама́ско, машки́р Галадо и Израилёскири пхув, пир Иорда́но, паш-ратитконэ́ рига́тыр, кэ васточно мо́рё (дэрья́в), дава́ исын васточно риг.

¹⁹Паш-дывэсы́тко риг исын паш-дывэсытконэ́ рига́тыр Тамаростыр кэ пани́, кай ханаспэ пир лава́ пашы́л Кадисо, кай тхадэ́ла ручаё кэ Баро́ Мо́рё (дэрья́в), дава́ исын паш-дывэсы́тко риг пэ паш-дывэсы́тко риг.

²⁰За́падно ме́жа — Баро́ Мо́рё (дэрья́в), паш-дывэсытконэ́ межатыр кэ штэ́то анги́л Емафо, дава́ исын за́падно риг.

²¹Роскэрэн дая́ пхув манушэ́нгэ машки́р тумэ́ндэ пэ паша́ пир Израилёскирэ ро́дыцы.

²²Роскэрэн (розделинэн) ла пиро́ жре́биё, соб (кай) тэ явэ́л дава́ тумаро́ мэкно́ миштыпэ́н явирэ — пхувьенгирэ манушэ́нгэ, савэ́ дживэ́на машки́р тумэ́ндэ, и савэ́ биянэна чхаворэ́н. Ёнэ исын бангэ́ тэ гинэнпэ машки́р Израилёскирэ чхавэ́ндэ сыр тумарэ́ мануша́, савэ́ дживэ́на, ёнэ заджа́на кхэтанэ́ тумэ́нца дрэ до́ля (бажын) машки́р Израилёскирэ ро́дыцы.

²³И явэ́ла адя́кэ: со ко́ли дживэ́ла машки́р вари-саво́ ро́дыцо явирэ-пхувьенгиро ману́ш, одо́й дэн лэ́скэ мэкно́ миштыпэ́н лэ́скиро”, — ракирэ́ла Рай Дэвэ́л, Дэвэ́л.