Read Baltic Romani Bible 2019 – Библия - Пэ Балтитко Романи чиб (Романэс) 2019 Езэкилё 9 Bible Online

Езэкилё 9 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Езэкилё 9

¹И пхэндя́ Ёв, соб (кай) тэ шунэ́н мирэ́ кана́, зоралэ́ заня́са: “Мэк тэ джа́н пашылэды́р одолэ́, савэ́ явэ́на пхарэ́с тэ сэндякирэн фо́ро, кажнонэ́стэ дрэ васт сыс дова́, со хасякирэ́ла кэ мулыпэн.

²Акэ, шов мануша́ джа́на упратунэ портатыр, со исын кэ паш-рат (северо). Кажнонэ́стэ (сваконэстэ) дро васт исын дова́, со хасякирэ́ла кэ мулыпэн, а машки́р лэ́ндэ сыс екх, саво́ сыс уридо́ дро похтанытко урибэ́н, конэ́стэ пашы́л лэскро симири сыс дова́, со́са чхинэна лыла́ (приборо). И явнэ́ ёнэ, и сыс тэрдэ́ пашы́л алта́рё.

³И Израилёскирэ-Дэвлэ́скири сла́ва згия херувимостыр, пэ конэ́стэ ёй сыс, кэ Кхэрэ́скиро прого. И кхардя́ Ёв манушэ́с дро похтанытко урибэ́н, конэ́стэ пашы́л лэскро симири, сыс дова́, со́са чхинэна лыла́.

⁴И пхэндя́ лэ́скэ Рай Дэвэ́л, Дэвэ́л: “Джа́ пэ́скэ машки́р фо́ро, машки́р Ерусалимо, и кэр шпэ́ра (знако) пэ чэкат одолэ́ манушэ́нгирэ, савэ́нгэ исын пхаро́ пал саро́ джунгалыпэ́н, и савэ́ пиридживэна, со кэрэ́лапэ машки́р лэ́ндэ.”

⁵А явирэ́нгэ пхэндя́ адя́кэ, соб (кай) мэ тэ шунав: “Джа́н пал лэ́стэ пир фо́ро тэ мулякирэ́н, мэк тэ на тангинэ́л тумари́ якх, мэк тэ на ковлёл тумаро́ ило́.

⁶Пхурэн и тэрнэ́ манушэ́н, патывалэ́ тэрнэ́ джувле́н и биято́с и джувле́н мулякирэ́н, нэ на чилавэн ни екх манушэ́с, пэ конэ́стэ исын шпэ́ра (знако). Лэн (зачнинэн) тэ кэрэ́н Мирэ́ свэнтонэ́ штэто́стыр.” Ёнэ лынэ́ тэ мулякирэ́н долэ́ годэ́-пхурэндыр (пхурыдырэндыр), савэ́ сыс анги́л Кхэр.

⁷И пхэндя́ Ду́хо (Фа́но) лэ́нгэ: “Магирэ́н Кхэр (Кхангири́), и пхэрдякирэн грэ́да (дво́ро) домардэ́ манушэ́нца, и выджа́н.” Ёнэ гинэ́ яври́, лынэ́ тэ замарэ́н дро фо́ро.

⁸Ко́ли ёнэ замарэнас лэн, а мэ яцёмпэ, тэ́ньчи мэ пыём пэ пэ́скиро муй, и дыём го́дла, и пхэндём: “Раё Дэ́вла, Дэ́вла! Ту чхувэ́са Тыро́ холямипэн пэ Израилё, со Ту хасякирэса саро́ Израилёскиро ячаибэ́н?”

⁹Тэ́ньци пхэндя́ Ёв ма́нгэ: “Израилёскирэ-кхэрэ́скиро и Юдэя́киро чорипэ́н исын баро́, древа́н баро́, и ада́я пхув исын пхэрды́ ратэ́са, и фо́ро исын пхэрдо́ чорипнаса, со кэрэ́нас пэхроми, долэ́стыр, со ёнэ ракирэ́на: “Мэкця́ Рай Дэвэ́л, Дэвэ́л ада́я пхув, и на дыкхэ́ла Рай Дэвэ́л, Дэвэ́л.”

¹⁰Пал дова́ на потангинэла лэн Мири́ якх, и на ковлёла Миро ило́; нэ Мэ да́ва лэнгрэ рэ́нды палэ пэ лэнгрэ шэрэ́.

¹¹Акэ, ману́ш, уридо́ дро похтанытко (ґандладытко) урибэ́н, конэ́стэ пашы́л симири сыс дова́, со́са чхинэна лыла́, дыя́ отпхэныбэ́н и пхэндя́: “Мэ кэрдём, сыр Ту припхэндян ма́нгэ.”