Read Baltic Romani Bible 2019 – Библия - Пэ Балтитко Романи чиб (Романэс) 2019 Осия 12 Bible Online

Осия 12 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Осия 12

¹Ефре́мо чаравэлапэ балваляса и традэлапэ пал балва́л вастоко́стыр: ёв со дывэ́с прибарьякирэла хохаибэ́н и голоты́ня (разорениё). Ёнэ адя́кэ-паць кэрна доракирибэ́н (завето) Асуроса (Асирияса), и маслинитко дзэт лыджа́на кэ Еги́пто.

²О Рай Дэвэ́л адя́кэ-паць лыджа́ла чинга́рд (сэ́ндо) проти Юдастэ, и Ёв пхарэ́с явэ́ла тэ сэндякирэ́л Яково́с пал лэ́скирэ рэ́нды (де́лы), пал дова́, со ёв кэрдя́, Рай Дэвэ́л дукхавэла палэ лэс.

³Ёв ухтылэлас пэ́скирэ пшалэ́с пал кхур (пента) дро дакири лочови́ (чрево), и ёв спробиндя зорья Дэвлэ́са.

⁴Чачо́, ёв спробиндя зорья Янголоса, и ёв пиризорьякирдя Лэс; ёв рондя́ и ёв родыя бахтякирибэ́н Лэ́стыр. Ёв, Дэвэ́л, латхя́ лэс дрэ Вефи́лё и одо́й Ёв ракирдя́ амэ́нца.

⁵Дава́ исын Рай Дэвэ́л, янголэ́нгирэ — болыбна́скиро Дэвэ́л, Сарэзорья́киро, — Лэ́скиро Лав Иегова (Яхва́).

⁶И ту, Яково́скиро ўнуко (непото), рисёв палэ кэ Дэвэ́л тыро́: ракх (дыкх) тангипэ́н (лачхэ́-илы́ткима) и чачуно́ сэ́ндо, и ўса́ды (сак) ужакир лачхипэ́н тумарэ́ Дэвлэ́стыр.

⁷Мэндро исын Хананеянино, савэ́стэ исын хоханэ́ ублады́тка (весы) дро лэ́скиро васт, лэ́скэ исын пир ило́ тэ притасавэл (тэ дукхавэл).

⁸И пхэндя́ Ефре́мо: “Мэ, чачэс, яцём барвало́, мэ латхём саро́ миштыпэ́н ваш пэ́скэ: дрэ сарэ́ мирэ́ пхарэ́ бутя́ ёнэ на латхэ́на дрэ ма́ндэ нисаво́ чорипэ́н, со исын грэ́хо.”

⁹Нэ Мэ, Рай Дэвэ́л, тыро́ Дэвэ́л пхувья́тыр Египтоскирьятыр; Мэ нэвэ́стыр (снова) кэра́ва адя́кэ, со тумэ́ явэ́на тэ дживэ́н пэ буды (кушчы), сы́рбы дрэ дывэса́, савэ́ исын упхэндлэ сыр свэ́нки.

¹⁰Мэ ракирдём пророкэнгэ, Мэ прибарьякирдём дыкхибэна сыр сунэ́ ваш тумэ́нгэ: Мэ дыём бут годэ́-пхэныбны́тка (притчы) пир пророкэ́ндэ.

¹¹На дыкхи́ пэ дова́, со Галаа́до кэрэ́ла намиштэс (и́долы) сыр Авено, и лэ́скирэ мануша́ ячэ́напэ (кончынэна) нисоса, на дыкхи́ пэ дава́, со ёнэ янэ́на гурувэ́н сыр свэ́нто дыибэ́н дро Гилгало, нэ лэ́нгирэ алтарьендыр явэ́на руи́ны машки́р лесьни фэлдэнгирэ.

¹²И настя́ Яково пэ пхув Сириякири, и Израилё сыс дына́ри пал ромня́тэ, и пал ромня́тэ ёв ракхця́ бакрэ́н.

¹³О Рай Дэвэ́л вылыджия́ (яндя́) Израилё Египто́стыр пир пророкостэ, и Ёв приракхця лэс пир пророкостэ.

¹⁴О Ефре́мо дыя́ яг Ра́скирэ-Дэвлэ́скирэ холякэ киркипнастыр (росхолякирдя Рас-Дэвлэ́с); палдава́ Ёв мэкця́ пэ лэ́стэ ратэскири банг и Ёв дукхавэла палэ лэс и сыкавэ́ла лэ́скэ дая́ банг.