Read Baltic Romani Bible 2019 – Библия - Пэ Балтитко Романи чиб (Романэс) 2019 Осия 7 Bible Online

Осия 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Осия 7

¹Ке́ли Мэ састякиравас Израилё, тэды хохаибэ́н [чорипэ́н-ю.о.] Ефремоскиро откэрдяпэ / сыкадыя́ и фуипэ́н Самариякиро. Пал-дова́ со ёнэ кэрэ́на хоханэ́с, лэ́ндэ исын чора, савэ́ пхагирэна кхэра́, и розмарибнари (шайка розмарибнытко) пэрэ́ла яври́ пэ манушэ́ндэ.

²Ёнэ на думинэ́на дрэ пэ́скирэ илэ, со Мэ рипирава саро́ лэ́нгиро фуипэ́н; аканэ лэ́нгирэ рэ́нды исын трусця́л (вокруг) лэ́ндэ; ёнэ исын сарэ́ анги́л Ма́ндэ.

³Ёнэ радынэна крали́с лэ́нгирэ фуипнаса, и тхагарьен лэ́нгирэ хохаибнаса.

⁴Ёнэ хачона тэ кэрэ́н биладжаипэ́н сы́рбы бов, саво́ росхачкирдя пэкибнаскиро (пекарё) — ґа́да, ёв пирияця́ тэ кэрэ́л бутэды́р яг пало́ дова́, сыр замешындло хумэр (тясто) ґаздэ́лапэ.

⁵Пэ свэнкитко дывэ́с амарэ́ крали́стэ, э тхага́рья (кня́зи) насвалякирдэ лэс, матякирдэ моляса (виноса); и ёв лыя́ тэ тырдэл пэ́скиро васт кэ одолэ́, савэ́ холямэс санапэ лэ́стыр.

⁶Ёнэ росхачкирэна пэ́скиро ило́ сы́рбы бов, ке́ли ёнэ подракхэна тэ замарэ́н: лэ́нгиро пэкибнаскиро (пекарё) совэла сари́ рат, нэ тася́рлэс (пэ зло́ко) ёв хачола сыр бари яг.

⁷Ёнэ исын хачкирдэ́ сыр бов, и ёнэ поханэ пэ́скирэ сэндарьен. И лэ́нгирэ кра́лья пынэ́, нанэ ние́кх ману́ш машки́р лэ́ндэ тэ кхарэл Ман.

⁸О Ефре́мо кхэтанякирдяпэ (змешындя пэс) машки́р Наюдытконэ́ манушэ́ндэ; Ефре́мо исын сы́рбы парамо [маро́-р.с.], со пэкэлапэ напирискирдо.

⁹Явирэ́ — тхэмэ́скирэ (чу́жа) мануша́ поханэ лэ́скири зор, нэ ёв на джинэ́ла дова́. Лэ́стэ исын сыва бала́ ада́й и одо́й, нэ ёв на джинэ́ла дава́.

¹⁰Израилёскиро пхутькирибэ́н допхэнэ́ла дро муй лэ́скирэ манушэ́нгэ, нэ ёнэ на рисинэ́ палэ кэ Рай Дэвэ́л, лэ́нгиро Дэвэ́л, и ёнэ на родэ́на Лэс дро саро́ дава́.

¹¹Ефре́мо адя́кэ-паць исын сы́рбы дылынинько голумбо, савэ́стэ нанэ годы́: ёнэ кхарэ́на Еги́пто, нэ ёнэ джа́на кэ Асирия.

¹²И ке́ли ёнэ джа́на, Мэ чхурдава Мири́ кхуды́ (сеть) тэ ухтылав лэн; Мэ тырдава тэлэ́ лэн сыр болыбнытконэ чириклен, савэ́ исын дро фа́но (воздухо). Мэ пирисыклякирава лэн кэ дукха́, ке́ли лэ́нгиро скэдыибэ́н шунэ́ла пал дава́.

¹³Бида пэ лэ́ндэ, пал-дова́ со ёнэ отгинэ́ [нашнэ́-ю.о.] Ма́ндыр! Хасибэ́н пэ лэ́ндэ, пал-дова́ со ёнэ кэрдэ́ чорипэ́н проти Ма́ндэ! На дыкхи́ пэ дова́, со Мэ выракхцём лэн, усае́кх ёнэ ракирдэ́ хохаибэ́н проти Ма́ндэ.

¹⁴Ёнэ на кхардэ́ зоралэ́с Ман сарэ́ лэ́нгирэ илэ́стыр, ке́ли ёнэ тугиндлэ ясвэ́нца пэ пэ́скирэ чхуибэна. Ёнэ кэдэнаспэ кхэтанэ́ пал маро́ (гива́) и мол (вино), и ёнэ кэрэ́на бу́нто проти Ма́ндэ.

¹⁵На дыкхи́ пэ дова́, со Мэ сыклякирдём лэн кэ дукха́, и зоралякирдём Мэ лэ́нгирэ васта́, нэ ёнэ придуминэнас чорипэ́н проти Ма́ндэ.

¹⁶Ёнэ рисинэ́ палэ, нэ на кэ Са́мо Барыдыр; ёнэ исын сыр дошвало лу́ко. Лэ́нгирэ тхага́рья пэрэ́на куртала́тыр пал пэ́скири чиб, со ракирдя́ холямипэн (дерзости). Пэ пхув Египто́скири лэ́ндыр явэ́на тэ санпэ.