Read Baltic Romani Bible 2019 – Библия - Пэ Балтитко Романи чиб (Романэс) 2019 Осия 9 Bible Online

Осия 9 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Осия 9

¹На ра́дынпэ древа́н (бут), Изра́иле кэ вучипэ́н, сыр яви́р манушы́тка на́цыи (народы), пал-дова́ со ту дуриян тырэ́ Дэвлэ́стыр пир биладжакунэ́ рэ́нды (де́лы). Ту́кэ яця́ пир ило́ плэскирибэн пал биладжаипэ́н пэ кажно шу́рна (гумно).

²Шурна гиваобкэрибнаскири и пресо на чалякирэна лэн, и нэви́ мол / со́ко (хум) хохавэла лэн.

³Ёнэ на явэ́на тэ дживэ́н пэ пхув Ра́скирэ-Дэвлэ́скири, а Ефре́мо рисёла палэ кэ Еги́пто, и ёнэ явэ́на тэ хан нажужэ́ хабэна дрэ Асирия.

⁴Ёнэ на явэ́на тэ чхувэ́н ваш Ра́скэ-Дэвлэ́скэ мол (вино) сыр свэ́нто дыибэ́н, адя́кэ-паць и лэ́нгирэ свэ́нта яныбэна́ на явэ́на лачхэ́ Лэ́скэ: ёнэ явэ́на сыр маро́ пэ гараибэн, и сарэ́, кон ха́ла, лэс, явэ́на магирдэ́. Дава́ маро́ явэ́ла екх лэ́нгэ тэ явэ́н чалэ, нэ ёв на явэ́ла ваш Кхэр Ра́скирэ-Дэвлэ́скиро.

⁵Со явэ́на тумэ́ тэ кэрэ́н дро дывэ́с, ке́ли трэй тэ явэ́л скэдыибэ́н, дро дывэ́с свэнкитко Ра́скирэ-Дэвлэ́скиро?

⁶Пал-дова́ со, акэ, ёнэ джа́на криг, сыр явэ́ла хасибэ́н. О Еги́пто кэдэла лэн кхэтанэ́; О Мемфисо явэ́ла тэ гаравэл лэн. Цукнуда (стрекава)[13] лэ́ла лофо пэ лэ́нгирэ рупувэ́ барвалыпэна (кучипэна); а пхусадытка хру́сты явэ́на дрэ лэ́нгирэ ша́тры.

⁷Явнэ́ дывэса́ тэ дыкхэ́н лэн, явнэ́ дывэса́ ваш сэ́ндо: ту, Израиле, явэ́са тэ джинэ́с пал дава́! О магико исын на барэ-годя́киро; а ману́ш, саво́ россэндякирэлас дро ду́хо (фа́но), исын бигодякиро, пир дова́, со древа́н хор исын тыро́ чорипэ́н, и древа́н зорало́ исын тыро́ намалыпэн (врогима).

⁸Ци исын Ефремостэ ракхибнаскиро (стражо) тэ дыкхэ́л пал явирэндэ пала́л мирэ́ Дэвлэ́стэ? Нэ лэ́скиро проро́ко исын сы́рбы фэлы́ чириклэ-ухтылыбнаскирэстэ (птицэловстэ) пэ сарэ́ лэ́скирэ дрома́, и исын сы́рбы кхуды́ (сетка) дро кхэр лэ́скиро Дэвлэ́скиро.

⁹Ёнэ хор пынэ́ дро биладжаипэ́н, сыр дрэ дывэса́ Гивакирэ. О Дэвэ́л явэ́ла тэ рипирэл лэ́нгиро чорипэ́н, Ёв явэ́ла пхарэ́с тэ сэндякирэ́л пал лэ́нгирэ грэ́хи.

¹⁰Мэ латхём тут, о Израиле, сы́рбы винаграды́тко (дракхитко) мура пэ чхучи́ (пусто) фэ́лда; Мэ дыкхцём тумарэ́ дадэн сы́рбы пэ́рва баритка (пло́ды) пэ инжыритко дрэ́во дро пэ́скиро пэ́рво сезоно. Нэ ке́ли ёнэ гинэ́ кэ Ваалфегоро, тэды ёнэ отдынэ́ пэс ладжаипнаскэ; ёнэ ячнэ́ джунгалэ́ сы́рбы и́долы, со ёнэ камлэ́.

¹¹Ефремоскиро барипэ́н, сыр чириклы вурняла криг — на явэ́ла ни бияныпэ́н, ни пхарипэ́н, нанэ ни кхабныпэн (зачатиё).

¹²На дыкхи́ пэ дава́, со ёнэ барьякирэна пэ́скирэ чхаворэ́н (биятэ́н), нэ Мэ ла́ва криг лэн кэ палатуно́ (последнё) манушоро. Чачо́, би́да пэрэ́ла пэ лэ́ндэ, ке́ли Мэ отджава (дурьёвава) лэ́ндыр!’

¹³Нэ адя́кэ-паць мэ, Осия, дыкхцём Ефремос, саво́ сыс сыр Ти́ро, саво́ сыс почхудо пэ шука́р штэ́то. Нэ Ефре́мо лыджа́ла анги́л пэ́скирэ биятэ́н тэ замарэ́н лэн.

¹⁴Дэ лэ́нгэ, Раё Дэ́вла, — дова́, со Ту дэ́са? Дэ лэ́нгэ лочови́/ джувля́ бичхаворэнгирья, и шукэ́ цюця!’

¹⁵Рай Дэвэ́л ракирэ́ла: ‘Саро́ лэ́нгиро фуипэ́н исын дро Галга́ло, пал-дова́ со одо́й Мэ лыём зоралэ́с тэ на вырикирав лэн: пир дова́ фуипэ́н, со ёнэ кэрдэ́, Мэ традава криг лэн Мирэ́ кхэрэ́стыр, Мэ на ява́ва буты́р тэ прилав лэн. Лэ́нгирэ сарэ́ тхага́рья (кня́зи) бунтынэна.

¹⁶Ефремо́скирэ мануша́ исын дукхадэ: лэ́скирэ ко́рни (рукха́) вышутинэ, ёнэ на дэ́на пхаба́. Чачо́, лэ́ндэ буты́р на явэ́на чхаворэ́, Мэ мулякирава дрогонэ́ биятэ́н лэ́нгирэ лочовя́тыр (утробатыр).

¹⁷Миро, Осияскиро Дэвэ́л, чхувэ́ла лэн криг Пэ́стыр, пал-дова́ со ёнэ на кандынэ́ Лэс; и ёнэ явэ́на псирибна́скирэ мануша́ (скитальцы) машки́р Наюды́тка на́цыи (народы).