Read Baltic Romani Bible 2019 – Библия - Пэ Балтитко Романи чиб (Романэс) 2019 Иоил 2 Bible Online

Иоил 2 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Иоил 2

¹Пхурдэ́н дро ро́го (дрэ труба) пэ Сио́но, и ґаздэ́н го́дла пэ свэ́нто Дэвлэ́скири бэ́рга; мэк сарэ́ мануша́, кон дживэ́ла пэ пхув — тэ издран, пал-дова́ со явэ́ла пашэдыр Ра́скирэ-Дэвлэ́скиро дывэ́с, акэ, ёв откэрлапэ:

²явэ́ла дава́ дывэ́с кало́ и тугитко, хмуры́тко дывэ́с ґэнстонэ калыпнаса (цямлыпнаса), сыр о́блоки пэ зло́ко (пэ ра́нко) розджанапэ палэ бэ́рги, адя́кэ-паць и явэ́на мануша́, барэ́ и зоралэ́, савэ́ на сыс векэндыр: и кадасавэ́-паць буты́р на явэ́на ние́кхвар пал лэ́ндэ машки́р манушэ́нгирэ ро́ды.

³Анги́л лэ́ндэ джа́ла яг, со похала саро́, а пала́л пал лэ́ндэ хачкирибэ́н, со пэкэла саро́. Анги́л лэ́ндэ пхув исын сы́рбы у́нта (садо) Эдэмоскири, а пала́л пал лэ́ндэ ячэ́лапэ чхучакирды мал (степ), нисо́ никай на кэрэ́лапэ лэ́ндыр.

⁴Ёнэ явэ́на выдыцён сы́рбы грая́: и ёнэ явэ́на тэ прастан сыр уклистэ́ пэ грэ́ндэ-цэлдарьендэ.

⁵Ёнэ традэ́на уклистэ́ пир бэргэнгирэ фе́ли (макушки) ґрукатоса сы́рбы марибнытконэ́ вурдэнэндыр, сы́рбы бари яг, сави́ пхарадёла, ке́ли похала пхуса, сы́рбы зоралэ́ мануша́, кон исын скэдыно́ тэ марэ́лпэ.

⁶Анги́л лэ́ндэ дара́тыр явэ́на тэ бандён дукхаса мануша́, а сарэ́ лэ́нгирэ муя́ ячэ́на парнэ́.

⁷Ёнэ праста́на сыр зоралыпнаскирэ мурша́, и ёнэ пирирэсэна пир ва́нта сыр марибнаскирэ мануша́; кажно (сва́ко) лэ́ндыр джа́ла анги́л пэ́скирэ дроморэса, и ёнэ на змарэнапэ дро строё.

⁸Ёнэ на шпулэна (пихинэна) екх екхэ́с, кажно (сва́ко) лэ́ндыр джа́ла дрэ лэ́нгири колона. И ке́ли ёнэ пэрэ́на пэ марибны́тка [коп΄и-р.с.], ёнэ на дукхавэна пэс.

⁹Ёнэ праста́на одори́к и палэ пир фо́ро; ёнэ ґаздэ́напэ пэ ва́нты прастаиндой: ёнэ зарэсэна дрэ кхэра́, ёнэ заджа́на дрэ кхэра́ пир фэнштры сыр чор.

¹⁰Пхув явэ́ла тэ издрал анги́л лэ́ндэ, и болыбэ́н тэ рискирэлпэ кхам и чхон покалёна, и чэргэня́ пириячэна тэ зяинэн.

¹¹И пхэнэ́ла зоралэ́с Рай Дэвэ́л Пэ́скирэ заня́са (глосаса) сы́рбы грумо анги́л Лэ́скиро халадыбэ́н: пал-дова́ со исын зоралыпнаскирэ Лэ́скирэ марибнаскирэ мурша́. Дывэ́с Ра́скирэ-Дэвлэ́скиро исын баро́ и древа́н трашано, и кон дэ́ла ра́да тэ вырикирэл лэс?

¹²“Палдава́ акана́”, — ракирэ́ла Рай Дэвэ́л, — “рисён кэ Мэ сарэ́ тумарэ́ илэ́стыр постоса, ровибнаса и тугаса?”

¹³И рискирэ́н тумаро́ ило́, а на урибэ́н, рисён кэ Рай Дэвэ́л, тумаро́ Дэвэ́л, пал-дова́ со Ёв исын лачхэ́-де́скиро и бут исын ла́ска Лэ́стэ. Ёв ле́нтэс (насыгэс) холясо́ла, и Ёв исын лачхэ́-илы́тко; и Ёв тангинэла (жалинэла) анги́л дова́, сыр тэ кэрэ́л биба́хт.

¹⁴Кон джинэ́ла, ци Ёв пожалинэла, и мэкэ́ла бахталыпэ́н пал Пэ́стэ, соб (кай) тумэ́ тэ янэ́н свэ́нто дыибэ́н гивэстыр, и тхадуно свэ́нто дыибэ́н Ра́скэ-Дэвлэ́скэ, тумарэ́ Дэвлэ́скэ?

¹⁵Пхурдэ́н зоралэ́с дро ро́го (трамбура) пэ Сио́но, подэн звесь (зан) пал свэ́нто посто, кхарэ́н тэ явэ́н пэ свэ́нто скэдыибэ́н,

¹⁶кэдэн манушэ́н, кэдэн кхэтанэ́ годэпхурэн (пхурыдырэн), кэдэн биятэ́н и колынытконэ тыкнэмасэн; мэк тэ джал яври́ тэрно́ лэ́скирэ коморатыр, и тэрны́ ла́кирэ штубатыр.

¹⁷Мэк рашая́, дына́рья Ра́скирэ-Дэвлэ́скирэ, тэ ровэ́н машки́р трэ́мо и алта́рё, и мэк ёнэ тэ пхэнэ́н: Пожалин Тырэ́ манушэ́н, о Раё-Дэ́вла, и на дэ Тыро́ миштыпэ́н тэ бипатывакирэн, соб (кай) Наюды́тка на́цыи тэ хулаинэн пэ лэ́ндэ, савэ́ явэ́на тэ ракирэ́н: Кай исын лэ́нгиро Дэвэ́л?’”

¹⁸Тэ́ньци Рай Дэвэ́л ячэ́ла тэ зэвлынэл пал Лэ́скири пхув, и Ёв сыкавэ́ла Пэ́скиро ило́ пал Лэ́скирэ манушэ́ндэ.

¹⁹О Рай Дэвэ́л отпхэнэ́ла и пхэнэ́ла Пэ́скирэ манушэ́нгэ: “Акэ, Мэ бичхава́ва тумэ́нгэ гив, мол (вино), и маслинитко дзэт, и тумэ́ явэ́на чалэ лэ́ндыр; и Мэ кэра́ва адя́кэ, соб (кай) Наюды́тка на́цыи буты́р тэ на бипатывалякирэн тумэн.

²⁰И Мэ дурьякирава тумэ́ндыр халадыбэ́н паш-ратитконэ́ (севернонэ) рига́тыр, и Мэ традава лэн криг пэ бипанескири и чхучи́ пхув, лэ́нгирэ муенца тэ рисён кэ васточно мо́рё (дэрья́в), и лэ́нгирэ думэнца тэ рисён кэ пал-панитко (за́падно) мо́рё (дэрья́в). Лэ́нгири кхан явэ́ла тэ ґаздэлпэ, и джунгало́ (брыдко) кхандыпэн лэ́ндыр джа́ла упрэ́, пал-дова́ со ёнэ кэрдэ́ барэ́ ди́вы.

²¹На страхадёв, о пхув, ра́дынпэ и веселинпэ (лошалёв): пал-дова́ со Рай Дэвэ́л явэ́ла тэ кэрэ́л барэ́ ди́вы!

²²На дарэ́н, мурдала́ фэлды́тка: чаритка фэ́лды пэ чхучи́ пхув дэ́на пэ́скири чар, пхабалын дэ́ла пэ́скири пхабай; инжыритка дрэвы и винаграды́тка дрэвицы дэ́на му́ри и прибарипэн.

²³Тумэ́, чхаворэ́ Сионоскирэ, радынэ́нпэ, и веселинэнпэ (лошалён) Ра́стыр-Дэвлэ́стыр, тумарэ́ Дэвлэ́стыр, соб (кай) Ёв тэ дэл лачхо́ вэснакиро брышы́нд чачипна́са, и Ёв кэрэ́ла адя́кэ, со явэ́ла брышы́нд, сыр сыс брышы́нд: вэснакиро и пал-лынаскиро (осенякиро) дро пэ́рво чхон.

²⁴Гиваобкэрибнаскирэ шурны явэ́на пхэрдэ́ гивэса, и пресы явэ́на тэ обчхувэнпэ винаградытконэ соко́са (хумэ́са) и маслинитконэ дзэтэса.

²⁵И Мэ да́ва палэ тумэ́нгэ саро́ дова́, со хая пхакитко скочко, кирмэ, бамбулы (жуки) и листэнгиро кирмо — Миро баро́ халадыбэ́н, со Мэ бичхадём пэ тумэ́ндэ.

²⁶И тумэ́ явэ́на тэ хан, кицы́ камэ́на и явэ́на чалэ, и тумэ́ явэ́на тэ шарэ́н Рас-Дэвлэ́с, тумарэ́ Дэвлэ́с, Кон кэрдя́ дивнэс тумэ́нца. И Мирэ́ манушэ́н буты́р на явэ́на тэ ладжакирэн.

²⁷И тумэ́ явэ́на тэ джинэ́н, со Мэ сом машки́р Израилё и со Мэ сом Рай Дэвэ́л, тумаро́ Дэвэ́л, и буты́р нанэ явирэ Дэвлэ́с. Мирэ́ манушэ́н буты́р ние́кхвар на ладжакирэна.

²⁸И пало́ (после) дава́ явэ́ла адя́кэ, со Мэ да́ва пхэрдэ́с Миро Ду́хо кажнонэ́ лочакэ (плотякэ); тумарэ́ чхавэ́ и тумарэ́ чхая́ явэ́на тэ ангилпхэнэн, тумарэ́ пхуранэ́ мануша́ явэ́на тэ дыкхэ́н сунэ́, и тумарэ́ тэрнэ́ мануша́ явэ́на тэ дыкхэ́н дыкхибэна.

²⁹И аж ровно адя́кэ-паць Мирэ́ писхарье́нгэ и Мирэ́ писхарицэнгэ Мэ да́ва Миро Ду́хо дрэ долэ́ дывэса́.

³⁰И Мэ сыкава́ва ди́вы пэ болыбэ́н и пэ пхув, рат и яг и тхувалэ сты́лбы.

³¹Кхам парудёла пэ калыпэ́н, и чхон парудёла пэ рат, — анги́л, сыр явэ́ла баро́ и трашано Дывэ́с Ра́скирэ-Дэвлэ́скиро.

³²И явэ́ла адя́кэ дрэ долэ́ дывэса́, со, ко́ли вари-кон явэ́ла тэ кхарэл лав Ра́скирэ-Дэвлэ́скиро, то одова́ зракхэ́лапэ; пал-дова́ со зракхибэ́н явэ́ла пэ бэ́рга Сио́но дро Ерусалимо сыр Рай Дэвэ́л пхэндя́: и ваш кодолэ́нгэ, савэ́ ячнэ́пэ, кон явэ́ла тэ кхарэл Рас-Дэвлэ́с.