Read Baltic Romani Bible 2019 – Библия - Пэ Балтитко Романи чиб (Романэс) 2019 Амосо 3 Bible Online

Амосо 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Амосо 3

¹Шунэ́н дава́ лав, со Рай Дэвэ́л пхэндя́ проти тумэ́ндэ, чхавора́лэ Израилёскирэ, проти саро́ кхэри́тко ро́до, саво́ Мэ вылыджиём Египто́скирэ пхувья́тыр, ракири́:

²“Тумэ́ сан екх кхэри́тко ро́до сарэ́ родэндыр пэ пхув, савэ́скэ Мэ кэрдём паты́в, палдава́ Мэ пхарэ́с сэндякирава тумэн пал саро́ тумаро́ чорипэ́н.”

³Ци сашты́ дуй мануша́ тэ джа́н кхэтанэ́, ко́ли ёнэ на доракирэнапэ?

⁴Ци явэ́ла шчэр (ле́во) тэ брилинэл дро вэш, ко́ли ёв на дыкхэ́ла вари-со тэ роскушэл дандэнца? Ци явэ́ла тэ выдэл шчэр зан пэ́скирэ хашха́тыр (логовостыр) — , ко́ли ёв ничы́ на ухтылдя.

⁵Ци сашты́ чириклы тэ пэрэ́л дрэ фэлы́ (петля) пэ пхув, ко́ли тэ на явэ́л фэлы́ сеткаса пэ ла́тэ. Ци ґаздэ́лапэ фэлы́ пхувья́тыр, ко́ли тэ на ухтылэ́н нисо́ ла́са?

⁶Ко́ли тэ на башавэл зоралэ́с ро́го (труба) дро фо́ро, ци явэ́на мануша́ тэ дарэ́н? Ко́ли исын бари би́да дро фо́ро, ци дава́ исын на Дэвлэ́стыр, Кон домэкця дава́?

⁷Чачо́, Рай Дэвэ́л на кэрэ́ла нисо́ анги́л дова́, сыр Ёв сыкавэ́ла дова́, со Ёв придуминдя, Лэ́скирэ писхарье́нгэ, пророкэнгэ.

⁸Шчэр лыя́ тэ рыкинэл — кон на явэ́ла тэ дарэл? О Рай Дэвэ́л пхэндя́ — кон на явэ́ла тэ ангилпхэнэл?

⁹Подэн звесь (зан) дрэ барэ́ фэлатиня́ и пэ стрэхи кхэрэнгирэ дро Азото (пэ Филистимия), и дрэ барэ́ фэлатиня́ (колова́) пэ пхув Египто́скири и пхэнэ́н: “Кэдэнпэ кхэтанэ́ пэ бэ́рги Самариякирэ: дыкхэ́н пэ баро́ бу́нто годлэнца машки́р лэ́ндэ, и сыр притасавэ́на манушэ́н одо́й.”

¹⁰“Пал-дова́ со ёнэ на джинэ́на, сыр тэ кэрэ́н чачунэ́с, — ракирэ́ла Рай Дэвэ́л, — ‘ёнэ, савэ́ загаравэна кучипэ́н, со яндлэ́ ёнэ дрэ чори, со ёнэ нахратэс чордэ, дрэ лэ́нгирэ барэ́ фэлатиня́ (колова́).’

¹¹Палдава́ адя́кэ ракирэ́ла Рай Дэвэ́л: ‘Намал явэ́ла трусця́л дая́ сари́ пхув! Ёв отлэла зор лэ́ндыр и ёв росчорэла лэ́нгирэ барэ́ фэлатиня́ (колова́).”

¹²Адя́кэ ракирэ́ла Рай Дэвэ́л: “Сыр о чхупна́ри (пастырё) вытырдэла яви́р мо́ло и зракхэ́ла шчэроскирэ (левоскирэ) мо́стыр дуй кокалы́ ґэрэнгирэ и котэ́р канэскиро, адя́кэ-паць на́бут чхаворэ́н Израилёскирэн вытырдэна хасибнастыр, савэ́ дживэ́на кэ Сама́рия пэ яго́ро (пэ краё) чхуибнаскиро, и савэ́ исын бэштэ́ пэ яго́ро дрогонэ́ пасиндлякиро (пэ кушэтка).

¹³Шунэ́н и допхэнэн дро кхэр Яково́скиро:” — ракирэ́ла Рай Дэвэ́л, янголэ́нгиро-болыбна́скиро Дэвэ́л,

¹⁴“со Мэ дро дова́ дывэ́с пхарэ́с сэндякирава Израилё пал лэ́скирэ чорипэна, и Мэ пхарэ́с сэндякирава пал алта́ри дрэ Вефиль, и явэ́на обчингирдэ шынга́ (ро́ги) пэ алта́рё, и ёнэ пэрэ́на пэ пхув.

¹⁵И Мэ розмарава пэ котэра́ ивантытко (зимитко) кхэр кхэтанэ́ лынаитконэ кхэрэса; и пэрэ́на кхэра́ шукарибнаса слонытконэ кокалэстыр, и на явэ́на буты́р барэ́ кхэра́”, — ракирэ́ла Рай Дэвэ́л.