Read Baltic Romani Bible 2019 – Библия - Пэ Балтитко Романи чиб (Романэс) 2019 Амосо 5 Bible Online

Амосо 5 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Амосо 5

¹Шунэ́н дава́ лав, савэ́са мэ, Амосо, ява́ва тэ тугинав ясвэ́нца пал тумэ́ндэ, мануша́лэ Израилёскирэ кхэрэ́стыр.

²Пыя́ тэрны́ патывалы́ джувлы́ (дева) Израилёскири: ёй буты́р на ґаздэ́лапэ. Ёй исын пашты, и нанэ ние́кх ману́ш тэ ґаздэл ла.

³Палдава́ адя́кэ ракирэ́ла Рай Дэвэ́л: “Дро фо́ро, саво́ дэ́лас тысёнцы манушэ́н пэ марибэ́н, ячэ́напэ шэл мурша́, дро фо́ро, саво́ дэ́лас шэл манушэ́н, ячэ́напэ дэш мурша́ ваш кхэрэ́скэ Израилёскирэскэ.”

⁴Палдава́ адя́кэ ракирэ́ла Рай Дэвэ́л кхэрэ́скэ Израилёскирэскэ: “Тумэ́ родэ́н Ман и явэ́на джидэ́.

⁵На родэ́н Вефиль, и на заджа́н дро Галга́ло и на псирэ́н кэ Вирса́вия (Бершэба), пал-дова́ со Гилгалоскирэ мануша́ джа́на дро пле́но, а Вефилятор нисо́ на ячэ́лапэ.”

⁶Родэ́н Рас-Дэвлэ́с и тумэ́ явэ́на тэ дживэ́н, соб (кай) Ёв тэ на кэрэ́л адя́кэ, со яг пэрэ́ла сы́гэс пэ кхэр Ёзаскиро, и хачкирэ́ла сарэ́са лэс адя́кэ, со на явэ́ла ние́кх тэ мурдякирэл яг дрэ Вефиль.

⁷Тумэ́, кон пирикэрэла чачуно́ сэ́ндо пэ трута (отрава), а чачипэ́н чхурдэна пэ пхув,

⁸родэ́н Лэс, Кон создыя́ чэргэненгири група Плеады (Эфта́-чэргэнитко) и Орионо (Чэргэня́ пэ Васто́ко). Кон парувэла зэр (тень) мэрибнаскири пэ ясно зло́ко (ра́нко), Кон кэрэ́ла адя́кэ, со дывэ́с ячэ́ла сыр калы рат. Кон кхарэ́ла кэ Пэ панинга́ морёскирэ (дэрьявэ́скирэ), и Ёв росчхувэла лэн пир сари́ пхув, — Рай Дэвэ́л исын Лэ́скиро лав.

⁹Ёв кэрэ́ла адя́кэ, со хасибэ́н сы́гэс пэрэ́ла пэ зоралэстэ, и Ёв янэ́ла хасибэ́н пэ дия́.

¹⁰Тумэ́ нашты́ тэ дыкхэ́н пэ кодолэстэ, кон сыкавэ́ла банг тумэ́нгэ пашы́л по́рта и тумэ́ дыкхэ́на вучипна́са пэ кодолэстэ, кон ракирэ́ла чачипэ́н.

¹¹Палдава́, со тумэ́ штакирэна (притасавэ́на) чорорэс, и тумэ́ лэ́на лэ́стыр почасту́нки гивэса; на дыкхи́ пэ дова́, со тумэ́ чхудэ́ кхэра́ вычингирдэ барэстыр, тумэ́ усае́кх на явэ́на тэ дживэ́н дрэ лэ́ндэ; тумэ́ почхудэ дрэ пхув шука́р винаграды́тка унты (сады), нэ тумэ́ на явэ́на тэ пьен мол (вино) лэ́ндыр.

¹²Пал-дова́ со Мэ джино́м, со тумэ́ кэрдэ́ бут чорипэна, и тумэ́ндэ исын бут грэ́хи: тумэ́ притасавэ́на чачунэ́ манушэ́н и лэ́на мыты (взятки); тумэ́ рискирэна пэ риг чачипэ́н чорорэ́-манушэ́нгири пэ сэ́ндо [пашы́л форо́скири по́рта-ю.о.].

¹³Палдава́ барэ́-годя́киро ману́ш явэ́ла штыл дро далэ́ дывэса́, пал-дова́ со дава́ исын бибахтало́ часо.

¹⁴Родэ́н лачхипэ́н, а на фуипэ́н, соб (кай) тумэ́ тэ дживэ́н, и палдава́ Рай Дэвэ́л, янголэ́нгирэ-болыбна́скиро Дэвэ́л, явэ́ла тумэ́нца, сыр тумэ́ и ракирэ́на.

¹⁵Бидыкхэн тумэ́ чорипэ́н (биба́хт), нэ выкэдэн лачхипэ́н, и тумэ́ кэрэ́н адя́кэ, соб (кай) тэ явэ́л чачипэ́н пашы́л по́рта (вра́ты) форо́скири, сашты́ тэ явэ́л, со Рай Дэвэ́л, янголэ́нгирэ-болыбна́скиро Дэвэ́л, явэ́ла тэ тангинэ́л одолэ́н, кон ячэ́лапэ манушэ́ндыр Езаскирэндыр (Иосифостыр).”

¹⁶Палдава́ адя́кэ ракирэ́ла Рай Дэвэ́л, янголэ́нгирэ-болыбна́скиро Дэвэ́л Сарэзорья́киро: “Зорало́ ровибэн явэ́ла пэ сарэ́ вули́цы (га́сы), и мануша́ явэ́на тэ припхэнэн пэ сарэ́ дрома́: ‘Дэ́вла! О Дэвлалэ!’ И ёнэ явэ́на тэ кхарэ́н пхувья́кирэ бутярьен тэ тугинэн зоралэ́с, и кадасавэн, кон исын спецы тэ тугинэн ровибнаса.

¹⁷Дрэ сарэ́ винаграды́тка унты (сады) явэ́ла зорало́ ровибэн, пал-дова́, со Мэ проджава машки́р лэ́ндэ,” — ракирэ́ла Рай Дэвэ́л.

¹⁸Бида явэ́ла пэ тумэ́ндэ, кон древа́н камэ́ла, соб (кай) тэ явэ́л дывэ́с Ра́скирэ-Дэвлэ́скиро! Саво́ лачхипэ́н тумэ́ ужакирэ́на дывэсэ́стыр Ра́скирэ-Дэвлэ́стыр? Дава́ ж явэ́ла калыпэ́н, а на дуд.

¹⁹Дава́ явэ́ла сы́рбы дова́, ко́ли ману́ш насця шчэрэстыр (левостыр), и рич пирилыя лэс, ци сы́рбы ману́ш, саво́ гия́ андрэ́ кхэр, причхудя пэ́скиро васт кэ ва́нта, и сап дандырдя лэс.

²⁰Нау́што дывэ́с Ра́скирэ-Дэвлэ́скиро исын на калыпэ́н, а дуд? Хор калыпэ́н, нанэ ни сави́ ясныма, и на зяинэла.

²¹Мэ бидыкхава, Мэ дыкха́ва вучипна́са пэ тумарэ́ свэнкитка дывэса́, и Мэ на сунгава (на сунгавава) гудло́ кхандыпэн (парфуны), со ячэ́ла тумэ́ндэ пэ скэдыибэна.

²²На дыкхи́ пэ дова́, со тумэ́ янэ́на цэ́ла схачкирибнаскирэ свэ́нта дыибэна́ и свэ́нта дыибэна́ гивэстыр, Мэ на прилава лэн. И Мэ на кэра́ва паты́в тумарэ́ свэнтонэ́ дыибнэнгэ тэ парикирэ́н тумарэ́ тхулэ гуруворэнца

²³Дурьякирэн Ма́ндыр шумо (глумо) тумарэ́ гилендыр, пал-дова́ со Мэ на ява́ва тэ шунав мелодия тумарэ́ гусленца (арфэнгири),

²⁴нэ мэк чачуно́ сэ́ндо тэ чхувэлпэ сы́рбы паня́, и чачипэ́н сыр сы́гно рэ́кица (лэнори́).

²⁵Ци янэ́нас тумэ́ Ма́нгэ свэ́нта яныбэна́ и марунэ яныбэна́ пэ чхучи́ пхув штардэша́ бэрш, о кхэр Израилёскиро?

²⁶Нэ тумэ́ адя́кэ-паць (тожэ) янэ́нас пэ́са ша́тра Молохоскири и чэргэн тумарэ́ дэвлорэскири, Ремфанос муенца, со тумэ́ кэрдэ́ ваш пэ́скэ.

²⁷Палдава́ Мэ бичхава́ва тумэн дро пле́но пал Дама́ско”, — ракирэ́ла Рай Дэвэ́л, Кон кхарэ́лапэ янголэ́нгирэ-болыбна́скиро Дэвэ́л.