Read Baltic Romani Bible 2019 – Библия - Пэ Балтитко Романи чиб (Романэс) 2019 Авдиёс 1 Bible Online

Авдиёс 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Авдиёс 1

¹Дыкхибэ́н Авдиёскиро. Адя́кэ ракирэ́ла Рай Дэвэ́л пал Эдо́мо: амэ шундя́м звесь (зан) Мирэ́ бичхаибнаскирэ манушэ́стыр, савэ́с Мэ, Рай Дэвэ́л, бичхадём машки́р на́цыи тэ пхэнэ́л: “Уштэ́н, явэ́н тэ ґаздаспэ пэ марибэ́н проти лэ́стэ.”

²Акэ, Мэ кэрдём адя́кэ, со ту яця́н тыкно́ ро́до машки́р на́цыи; ту явэ́са дрэ бари напатыв.

³Тыро́ пхутькирдо ило́ хохадя тут, кон дживэ́ла машки́р шчэ́ли пэ бэ́рги, конэ́скиро кхэр исын вучо́; ту, саво́ ракирэ́ла дро пэ́скиро ило́: ‘Кон счхурдэла тэлэ́ ман?’

⁴На дыкхи́ пэ дова́, со ту ґаздэса пэс сыр о́рло (ки́до), и со ту кэрэ́са пэ́скиро гня́зда (ку́фо) машки́р чэргэня́, нэ и одотхы́р Мэ чхурдава тэлэ́ тут”, — ракирэ́ла Рай Дэвэ́л.

⁵“Ко́ли явэ́нас чора кэ ту, ци розмарибнаскирэ чора раты́, — со адя́кэ зоралэ́с обчордэ тут. Ци на лэнас ёнэ фэ́ни (то́ка) ада́кицы, кицы́ лэ́нгэ трэиндя́? Ко́ли явэ́нас винаградонэ-кэдыбнаскирэ (сборшчыки), со ж ёнэ на мэкэнас ту́кэ вари-кицы́ мурины?

⁶Сыр кэ Иса́во[1] саро́ сыс пириродыно? Сыр сарэ́ лэ́скирэ чораханэ штэ́ты пиридыкхнэ!

⁷Сарэ́ тырэ́ дру́ги (мала́) пир доракирибэ́н (союзо) традэ́на тут аж кэ кустыка (границы); а мануша́, кон сыс дро рама́нё (миро) ту́са, хохавэна тут, и ёнэ лэ́на упралыпэ́н проти ту́тэ; кодолэ́, савэ́ ханэ́ тыро́ маро́, чхувэ́на фэлы́ пэ ту́тэ”, — нико́н на ґалёла дава́.

⁸“Дро дова́ дывэ́с явэ́ла адя́кэ, — ракирэ́ла Рай-Дэвэ́л, — со Мэ хасякира́ва и годэ́ манушэ́н Эдомостыр, и барэ́ годярьен Исаво́скирэ бэрга́тыр.

⁹И тырэ́ зоралэ́ мурша́, о Фема́не, пхадёна дро ду́хо, со кэ екх, нэ кажно (сва́ко) ману́ш, кон исын Исаво́скирэ бэргэндыр, хасёла — мулякирэна лэс.

¹⁰Пал-дова́ со ту са́нас нахрато кэ тыро́ пшал Яково, ладжаипэ́н учхакирэ́ла тут, и ту хасёса пэ сарэ́ ве́ки.

¹¹Дро дова́ дывэ́с, со ту са́нас тэрдо́ пэ яви́р риг, дро дова́ дывэ́с, ке́ли чу́жа мануша́ лыджа́нас дро пле́но Яково́скирэ зоралэ́ халадэ́н, сыр явирэ-пхувитка мануша́ гинэ́ андрэ́ лэ́скирэ по́рты, и чхурдэнас жре́биё пал Ерусалимо, и ту са́нас екх лэ́ндыр.

¹²Нэ ту́кэ на трэиндя́ тэ дыкхэ́с холямэс пала́л пал тырэ́ пшалэ́стэ дро дывэ́с, сыр лэнас лэс лэ́скирэ пхувья́тыр; и тэ на радынэспэ хасибнастыр Юда́скирэ-чхаворэнгирэндыр, и тэ на откэрэс бу΄глэс муй сабнаса дро дова́ бибахтало́ дывэ́с.

¹³Ту́кэ на трэиндя́ тэ джас андрэ́ по́рта (вра́ты) дро дова́ дывэ́с, ке́ли бари биба́хт пыя́ пэ Мирэ́ манушэ́ндэ. Чачэс, на трэиндя́ ту́кэ тэ дыкхэ́с холямэс пала́л пэ лэ́нгирэ мэ́ньки, ци тэ причхувэс васта́ кэ лэ́нгиро миштыпэ́н, сыр сыс бари би́да лэ́ндэ.

¹⁴Ту́кэ на трэиндя́ тэ тырдёс пэ трушулытка дрома́ (перекрёстки), соб (кай) тэ замарэс (тэ мулякирэс) кодолэ́н, савэ́ нашэнас; и тэ на выдэс кодолэ́н, савэ́ ячнэ́пэ, сыр сыс бари дар лэ́нгэ.

¹⁵Пал-дова́ со сыг явэ́ла Дывэ́с Ра́скирэ-Дэвлэ́скиро пэ сарэ́ Наюды́тка на́цыи: сыр ту кэрдя́н, адя́кэ и ту́кэ явэ́ла кэрдо́; тырэ́ рэ́нды рисёна пэ тыро́ шэро́.

¹⁶Пал-дова́ со сыр тумэ́ пинэ́ пэ Мири́ свэ́нто бэ́рга, адя́кэ-паць и сарэ́ Наюды́тка на́цыи явэ́на ўса́ды (сак) тэ пьен; ёнэ явэ́на тэ пьен, и тэ накхавэн (тэ глытынэн), и лэн хасякирэна сы́рбы на сыс лэн.

¹⁷Нэ пэ бэ́рга Сионо́скири мануша́ зракхэнапэ, и ёй явэ́ла свэ́нто штэ́то. Кхэр Яково́скиро лэ́ла пэ́скэ лэ́нгиро мэкно́ миштыпэ́н.

¹⁸Мануша́ Яково́скирэ явэ́на сыр яг, а мануша́ Ёза́скирэ явэ́на сыр бари яг, нэ мануша́ Исаво́скирэ явэ́на сыр пхус: лэн подхачкирэна и схана яга́са, и ние́кх на пиридживэла, соб (кай) тэ ячэ́лпэ Исаво́скирэ кхэрэ́стыр,” — пал-дова́ со дава́ пхэндя́ Рай Дэвэ́л.

¹⁹И мануша́ паш-дывэсытконэ́ (южнонэ) рига́тыр лэ́на пэ́скэ бэ́рги Исаво́скирэ, и мануша́ пэ до́ло лэ́на пэ́скэ Филистимия, и фэ́лды Ефраимоскирэ и Самариякирэ. Э мануша́ Веньяминоскирэ лэ́на пэ́скэ Галаа́до.

²⁰И халадэ́ Израилёскирэ чхавэ́ндыр, савэ́ сыс дро пле́но, явэ́на тэ лэн пэ́скэ Ханаано́скири пхув аж кэ Сарепта, а мануша́ Израилёскирэ, савэ́ исын дро пле́но дро Сефарадо, явэ́на тэ лэн пэ́скэ фо́рья пэ паш-дывэсы́тко (южно) риг.

²¹И явэ́на зракхибнаскирэ пэ бэ́рга Сио́но тэ сэндякирэн бэ́рга Исавоскири, и явэ́ла кралипэ́н Ра́скирэ-Дэвлэ́скиро.”