Read Baltic Romani Bible 2019 – Библия - Пэ Балтитко Романи чиб (Романэс) 2019 Ёна 4 Bible Online

Ёна 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Ёна 4

¹Нэ Енаскиро ило́ зоралэ́с пхадия далэ́стыр, и ёв холя́сыя.

²И ёв мангдя́пэ Ра́скэ-Дэвлэ́скэ и пхэндя́ ёв: “О Раё Дэ́вла! Саро́ дава́ на пир мирэ́ лава́, со мэ пхэндём, ке́ли мэ ишчо (инкэ́) со́мас пэ пэ́скири пхув? Палдава́ мэ и насцём вагэдыр (ґарэдыр) кэ Фарсисо: пал-дова́ со мэ на джиндём, со Ту сан лачхэ́-дескиро Дэвэ́л, Саво́ сыкавэ́ла ла́ска, Саво́ ле́нтэс холясо́ла и кэрэ́ла бут-бут лачхипэ́н, Кон жалинэла тэ кэрэ́л бэдыпэн.

³Палдова́ акана́, Раё Дэ́вла, лэ, мэ зоралэ́с манга́ва Тут, миро джиибэ́н ма́ндыр, пал-дова́ со фэды́р исын ваш ма́нгэ тэ мэрав, сыр тэ джива́в.”

⁴Тэды Рай Дэвэ́л пхэндя́: “Нау́што дава́ исын мишто́ ваш ту́кэ тэ холясос?”

⁵И гия́ криг Ёна форо́стыр и бэсця́ пэ вастокитко риг пэ фо́ро, и одо́й ёв кэрдя́ пэ́скэ буда (кушча) и бэсця́ тэл лэ́стэ дрэ зэр (засенка), соб (кай) тэ дыкхэ́л, со явэ́ла фороса.

⁶И Рай Дэвэ́л барьякирдя хру́сто и кэрдя́ адя́кэ, со ёв ґаздыя́пэ упрэдыр Ёнастыр адя́кэ, соб (кай) ёв тэ могинэл (тэ саштынэлас) тэ дэл зэр (засенка) пэ лэ́скиро шэро́ тэ ракхэ́л лэс лэ́скирэ пхарипнастыр.” И Ёна древа́н яця́ радо далэ́ хрустостыр.

⁷Пэ яви́р дывэ́с пэ зло́ко, о Дэвэ́л создыя́ кирмэс, и ёв подчхиндя хру́сто, и хру́сто зашутия.

⁸И сыс адя́кэ: сыр кхам ґаздыя́пэ, о Дэвэ́л яндя́ хачкирды балва́л вастоко́стыр: и кхам лыя́ тэ пэкэл пэ шэро́ Ёнаскиро адя́кэ, со лэ́скиро ило́ замыя́. Тэ́ньци ёв закамдя́ мулыпэн пэ пэ́стэ, и пхэндя́ ёв: ‘Фэды́р исын ваш ма́нгэ тэ мэрав, сыр тэ джива́в’.

⁹Тэ́ньци Дэвэ́л пхэндя́ Ёнаскэ: “Нау́што дава́ исын мишто́ ваш ту́кэ тэ холясос пэ хру́сто аж кэ мэрибэ́н!” О Ёна отпхэндя́: “Мэ миштэ́с кэра́ва, со холясыём аж кэ мэрибэ́н.”

¹⁰И пхэндя́ Рай Дэвэ́л: “Ту тангиндян (пожалиндян) хру́сто, пашы́л саво́ ту на кэрэсас пхари́ буты́, и ту на барьякирдян лэс. Ёв сыкадыя́ цэ́ло пал рат, и зашутия дро яви́р рат.

¹¹И сыр дава́ ма́нгэ трэиндя́ тэ на тангинав Ниневия, кадасаво́ баро́ фо́ро, дрэ саво́ буты́р сыр шэл тэ биш тысёнцы мануша́, савэ́ нашты́ тэ пхэнэ́н, кай исын лэ́ндэ чачо́, и лэ́нгиро зэ́рво (ле́во) васт, и адя́кэ-паць бутыпэн (множэство) кхэритконэ́-мурдалэнгиро (скотэнгиро).”