Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 15 Bible Online

Чыслы 15 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 15

¹И пхэндя́ Рай Дэвэ́л Мойза́скэ, ракири́:

²“Дэ тэ джинэ́н Израилёскирэ чхавэ́нгэ и пхэн лэ́нгэ: ‘Ке́ли тумэ́ заджа́на пэ пхув тумарэ́ джиибна́скири, сави́ Мэ да́ва тумэ́нгэ,

³и явэ́на тэ янэ́н свэ́нто дыибэ́н Ра́скэ-Дэвлэ́скэ, цэ́ло схачкирибэ́н, ци тэ явэ́л свэ́нто дыибэ́н зачхиндлэ́ гурувэндыр и бакрэ́ндыр, соб (кай) тэ кэрэ́л пир совла́х, ци пир паты́в, ци дрэ тумарэ́ свэ́нки, соб (кай) тэ кэрэ́н гудло́ тхув, лачхо́ Ра́скэ-Дэвлэ́скэ,

⁴тэды, кон янэ́ла пэ́скиро свэ́нто дыибэ́н Ра́скэ-Дэвлэ́скэ, то одова́ ману́ш исын банго́ тэ янэл дро яныбэ́н марэстыр дэ́што паш ефатыр пшэничнонэ яржэстыр, перемешындло штартонэ пашэ́са гино елеё;

⁵И мол (вино) екх шта́рто паш гино ваш цэ́ло схачкирибэ́н, ци ваш зачхиндло́ свэ́нто дыибэ́н, пэ кажнонэ́ (сваконэ) бакрэстэ;

⁶а ко́ли тумэ́ янэ́на бакрэ́с дро яныбэ́н маруно́ дуй дэшта паша́ ефатыр пшэничнонэ яржэстыр, перемешындло тритонэ пашэ́са елеёскирэ гиноса.

⁷И мол тэ вычхувэс ян три́то паш гиноскиро дро гудло́ тхув, лачхо́ Ра́скэ-Дэвлэ́скэ;

⁸Ко́ли тэрнэ́ гурувэ́с янэса ваш цэ́ло схачкирибэ́н, ци сыр свэ́нто яныбэ́н зачхинэса пир совла́х, соб (кай) тэ кэрэ́лпэ, ци дро ми́рно свэ́нто дыибэ́н Ра́скэ-Дэвлэ́скэ,

⁹то тэды кхэтанэ́ гурувэса бангэ́ тэ янэ́н яныбэ́н маруно́ трин дэшта паша́ эфакирэ пшэничнонэ яржэстыр, перемешындло пашэ́са елеёскирэ гиноса,

¹⁰и мол (вино) ваш вычхуибэн ян паш гино дро свэ́нто яныбэ́н сыр гудло́ тхув, лачхо́ Ра́скэ-Дэвлэ́скэ.

¹¹Адя́кэ кэр пашы́л кажно яныбэ́н гурувэскиро и бакрэскиро, и бакрэ́с бакрендыр, ци бузнен (козэн);

¹²адя́кэ тумэ́ кэрэ́н кажно мо́ло, ада́кицы мо́лы, кицы́ тумэ́ янэ́на свэ́нто дыибэ́н.

¹³Кажно пэ́скиро ману́ш адя́кэ исын банго́ тэ кэрэ́л дава́, ке́ли янэ́ла свэ́нто дыибэ́н дро гудло́ тхув, лачхо́ Ра́скэ-Дэвлэ́скэ;

¹⁴и ко́ли явэ́ла машки́р тумэ́ндэ тэ дживэ́л ману́ш явирэ рига́тыр, ци кон бы тэ на явэ́л машки́р тумэ́ндэ дро тумарэ́ ро́ды, и янэ́ла свэ́нто яныбэ́н дро гудло́ тхув, лачхо́ Ра́скэ-Дэвлэ́скэ, тэды и ёв исын банго́ тэ кэрэ́л адя́кэ, сыр тумэ́ кэрэ́на;

¹⁵ваш тумэ́нгэ, скэдыибэ́н Ра́скирэ-Дэвлэ́скиро, и ваш манушэ́скэ, саво́ явдя́ явирэ рига́тыр, и саво́ дживэ́ла машки́р тумэ́ндэ, упхэныбэ́н екх, векоскиро упхэныбэ́н дрэ тумарэ́ ро́ды: со тумэ́, одова́-паць и ману́ш, саво́ явдя́ явирэ рига́тыр мэк тэ явэ́л анги́л Растэ-Дэвлэ́стэ;

¹⁶зако́но екх, и екх правы мэк тэ явэ́н ваш тумэ́нгэ и ваш манушэ́скэ, саво́ явдя́ явирэ рига́тыр, и дживэ́ла машки́р тумэ́ндэ.’

¹⁷И пхэндя́ Рай Дэвэ́л Мойза́скэ дасавэ́ лава́:

¹⁸“Ра́кир Израилёскирэ чхавэ́нгэ и пхэн лэ́нгэ: ‘Ке́ли тумэ́ заджа́на пэ пхув, дрэ сави́ Мэ лыджа́ва тумэн,

¹⁹и явэ́на тэ хан маро́ адолэ-пхувья́киро, тэды янэ́н маруно́ свэ́нто дыибэ́н тринскирибнаса Ра́скэ-Дэвлэ́скэ;

²⁰начатки (пэ́рва барьякирдэ́) тумарэ́ яржэстыр сыр мариклы, ґаздэ́н тринскирибнаса, ке́ли янэ́на тумэ́ дро тринскирибэн; ґаздэ́н лэс адя́кэ, сыр янэ́на ґумностыр;

²¹начаткэндыр (пэрвонэ́ мариклендыр) тумарэ́ хумэрэстыр (тястостыр) янэ́н дро ґаздыпэн триинскирибнаса Ра́скэ-Дэвлэ́скэ дрэ тумарэ́ ро́ды.

²²Ко́ли кэрэ́на тумэ́ на пир джиныбэ́н, и на кэрэ́на пир сарэ́ далэ́ припхэныбэна́, савэ́ пхэндя́ Рай Дэвэ́л Мойза́скэ:

²³“Саро́, со припхэндя́ тумэ́нгэ Рай Дэвэ́л пир Мойзастэ, долэ́ дывэсэ́стыр, дрэ савэ́ Рай Дэвэ́л ракири́ тумэ́нгэ, и англэды́р дрэ тумарэ́ ро́ды,

²⁴тэды, ко́ли пир манушэ́нгиро надодыкхибэн кэрды дош, мэк саро́ скэдыибэ́н тэ янэл екхэ гурувэ́с дро цэ́ло схачкирибэ́н ваш гудло́ тхув, лачхо́ Ра́скэ-Дэвлэ́скэ, марунэ яныбнаса и чхуибнаса лэс, пир упхэныбэ́н, и екхэ бузнэ́с (козлос) дро свэ́нто дыибэ́н пал грэ́хо;

²⁵и выжужакирэ́ла раша́й сарэ́ скэдыибна́стыр Израилёскирэ чхавэ́нгиро, и явэ́ла отмэкно лэ́нгэ: пал-дова́ со дава́ сыс дош пир наджиныбэн, и ёнэ яндлэ́ пэ́скиро свэ́нто дыибэ́н Ра́скэ-Дэвлэ́скэ, и свэ́нто яныбэ́н пал пэ́скиро грэ́хо анги́л Растэ-Дэвлэ́стэ, пал пэ́скири дош;

²⁶и явэ́ла примангло сарэ́ скэдыибнаскэ Израилёскирэ чхавэнгирэскэ и манушэ́скэ, саво́ явдя́ явирэ рига́тыр, и дживэ́ла машки́р лэ́ндэ, пал-дова́ со сарэ́ мануша́ кэрдэ́ дая́ дош пир наджиныбэн.

²⁷Ко́ли екх вари-кон кэрэ́ла грэ́хо пир наджиныбэн, тэды мэк тэ янэл екха-бэршыткона бузня дро свэ́нто яныбэ́н пал грэ́хо;

²⁸и выжужакирэ́ла раша́й ди, саво́ кэрдя́ грэ́хо анги́л Растэ-Дэвлэ́стэ, и жужо́ явэ́ла, и примангло явэ́ла лэ́скэ;

²⁹екх Зако́но мэк тэ явэ́л ваш тумэ́нгэ, сыр ваш штэтытконэ манушэ́скэ Израилёскирэ чхавэ́ндыр, адя́кэ и ваш манушэ́скэ, саво́ явдя́ явирэ рига́тыр, и дживэ́ла машки́р тумэ́ндэ, ко́ли вари-кон кэрэ́ла дош пир наджиныбэн.

³⁰Ко́ли вари-кон пэ́скирэ манушэ́ндыр ци манушэ́ндыр явирэ рига́тыр кэрэ́ла вари-со холямэ́ вастэ́са, тэды ёв, хай, калякирэла Рас-Дэвлэ́с: хасёла дова́ ди пэ́скирэ манушэ́ндыр,

³¹пал-дова́ со лав Ра́скирэ-Дэвлэ́скиро ёв бидыкхця и припхэныбэ́н Лэ́скиро на зракхця́; хасёла дова́ ди; грэ́хо лэ́скиро исын пэ лэ́стэ.’”

³²Ке́ли Израилёскирэ чхавэ́ сыс пэ чхучи́ пхув, латхнэ́ ёнэ манушэ́с, саво́ скэдэ́ла кашта́ дро саватоскиро дывэ́с;

³³и яндлэ́ лэс мануша́, савэ́ латхнэ́ лэс, скэдыи кашта́, кэ Мо́йза и Ааро́но и кэ саро́ скэдыибэ́н;

³⁴и чхудэ́ лэс ракхибнарьенгэ, пал-дова́ со на сыс ишчо (инкэ́) джиндло́, со трэиндя́ лэ́са тэ кэрэ́н.

³⁵И пхэндя́ Рай Дэвэ́л Мойза́скэ: “Банго́ исын тэ мэрэ́л адава́ ману́ш; мэк тэ марэл лэс барэ́нца саро́ скэдыибэ́н пал ста́но.”

³⁶И вылыджия́ лэс саро́ скэдыибэ́н яври́ станостыр, и мардэ́ лэс барэ́нца, и ёв мыя́, сыр припхэндя́ Рай Дэвэ́л Мойза́скэ.

³⁷И пхэндя́ Рай Дэвэ́л Мойза́скэ, ракири́:

³⁸“Ра́кир Израилёскирэ чхавэ́нгэ и пхэн лэ́нгэ, соб (кай) ёнэ тэ кэрэ́н пэ́скэ чиба́/чибья́ (кисти)пэ пэ́скирэ-иденгирэ яго́ры (краи́) дрэ лэ́нгирэ ро́ды, и пэ чиба́ (чибья́), савэ́ тэ явэ́н пэ яго́ро (пэ краё), и тэ чхувэ́н андрэ́ голубовонэ́ вылна́тыр тхава;

³⁹и явэ́на ёнэ дрэ тумарэ́ чиба́ (кисти) ваш дова́, соб (кай) тумэ́, дыкхи́ пэ лэ́ндэ, тэ пририпирэн сарэ́ Ра́скирэ-Дэвлэ́скирэ припхэныбэна́, и тэ кэрэ́н саро́ пир лэ́ндэ, и тэ на псирэ́н пала́л пал тумаро́ ило́ и пал тумарэ́ якха́, савэ́ лыджа́на тумэн кэ кэрэ́н биладжаипэ́н,

⁴⁰соб (кай) тумэ́ тэ рипирэ́н и тэ кэрэ́н саро́, соб (кай) тэ сполнинэн сарэ́ Мирэ́ припхэныбэна́ и тэ явэ́н свэ́нта анги́л тумарэ́ Дэвлэ́стэ.

⁴¹Мэ сом Рай Дэвэ́л (Яхва́) тумаро́, Саво́ вылыджыя тумэн Египто́скирэ пхувья́тыр, соб (кай) тэ явав Мэ тумаро́ Дэвэ́л: Мэ сом Рай Дэвэ́л, тумаро́ Дэвэ́л.”