Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 16 Bible Online

Чыслы 16 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 16

¹О Кореё, Ицгароскиро чхаво́, Каафоскиро чхаво́, Левиёскиро чхаво́, и Дафано и Авироно, Елиавоскиро чхавэ́, и Авнано, Фалефоскиро чхаво́, Рувимовоскирэ чхавэ́,

²ґаздынэ́пэ холя́са пэ Мойзастэ, и лэ́нца Израилёскирэ чхавэ́ндыр дуйшэла́ пандждэша́ мурша́, скэдыибнаскирэ барыдыра́, савэ́н кхарэ́на пэ скэдыибэ́н, славутна мануша́.

³И скэдынэ́пэ проти Мойзастэ и Аароностэ, и пхэндлэ́ лэ́нгэ: “Ухты́лла (до́си) тумэ́нгэ, саро́ скэдыибэ́н, сарэ́ мануша́ исын свэ́нта, и машки́р лэ́ндэ исын Рай Дэвэ́л! Со́скэ тумэ́ ґаздэ́на пэс вучэды́р Ра́скирэ-Дэвлэ́скирэ манушэ́ндыр?”

⁴О Мо́йза, сыр шундя́ дава́, то пыя́ пэ пэ́скиро муй,

⁵и пхэндя́ Кореёскэ и сарэ́ манушэ́нгэ, савэ́ сыс кхэтанэ́ лэ́са, ракири́: “Атася́ сыкавэ́ла Рай Дэвэ́л, кон исын Лэ́скиро, и кон исын свэ́нто, соб (кай) тэ кэрэ́л пашылэды́р лэс кэ Пэ; и конэ́с Ёв выкэдэ́ла, одолэ́с и кэрэ́ла Ёв пашылэды́р кэ Пэ.

⁶Ѓа́да, со кэрэ́н: Кореё и сарэ́ лэ́скирэ ману́ш, лэн пэ́скэ кадилы,

⁷и атася́ чхувэ́н дрэ лэ́ндэ яг, и чхувэ́н дрэ лэ́ндэ фимиа́мо (гудлэ́ смо́лы) тэ тхувлякирэн анги́л Растэ-Дэвлэ́стэ; и конэ́с выкэдэ́ла Рай Дэвэ́л, одова́ и явэ́ла свэ́нто. Ухты́лла (до́си) тумэ́нгэ, Левиёскирэ чхавэ́!”

⁸И тэ́ньчи пхэндя́ Мо́йза Кореёскэ: “Шунэ́н, Левиёскирэ чхавэ́!

⁹Нау́што наухтылла (на́доси) тумэ́нгэ дова́, со Израилёскиро Дэвэ́л откэдыя тумэн Израилёскирэ манушэ́ндыр и кэрдя́ пашылэды́р тумэн кэ Пэ, соб (кай) тумэ́ тэ кэрэ́н буты́ пашы́л Ра́скирэ-Дэвлэ́скири ша́тра и тэ тэрдён анги́л скэдыибэ́н пэ буты́ ваш лэ́нгэ?

¹⁰Ёв кэрдя́ пашылэды́р тут кэ Пэ и ту́са сарэ́н тырэ́н пшалэ́н, Левиёскирэ чхавэ́н, и тумэ́ домарэнапэ ишчо (инкэ́) тэ ячэн рашанца.

¹¹И адя́кэ ту и сарэ́ тырэ́ мануша́ скэдынэ́пэ проти Растэ-Дэвлэ́стэ. Со исын дасаво Аароноса, со тумэ́ холя́са жалинэнапэ пэ лэ́стэ?”

¹²И бичхадя́ Мо́йза тэ кхарэ́н Дафанос и Авиронос, Елиавоскирэ чхавэ́н. Нэ ёнэ пхэндлэ́: “На джа́са!”

¹³Нау́што наухтылла (на́доси) дова́, со ту вылыджыян амэн пхувья́тыр, пэ сави́ тхадэ́ла тхуд и авги́н, соб (кай) тэ хасякирэс амэн пэ чхучи́ пхув, и ту буты́р камэ́са тэ явэс тхагариса пэ амэ́ндэ!

¹⁴Ци яндян ту амэн пэ пхув, кай тхадэ́ла тхуд и авги́н, и ци дыя́н ту дро хулаибэн фэ́лды и винаградники? Якха́ адалэ́-манушэ́нгирэ ту камэс тэ корьякирэс? Амэ на джа́са!”

¹⁵Мо́йза древа́н холя́сыя, и пхэндя́ Ра́скэ-Дэвлэ́скэ: “На ри́скир Тырэ́ якха́ пэ лэ́нгиро яныбэ́н. Мэ на лыём лэ́ндыр ни екхэ осло́с, и на кэрдём фуипэ́н ниекхэскэ лэ́ндыр.”

¹⁶И пхэндя́ Мо́йза Кореёскэ: “Атася́ ту, и сарэ́ тырэ́ мануша́, явэ́н тэ тэрдён анги́л Ра́скирэ-Дэвлэ́скиро муй, ту, ёнэ, и адя́кэ-паць Ааро́но;

¹⁷и лэн кажно (сва́ко) ману́ш пэ́скири кадила, и чхувэ́н дрэ лэ́ндэ фимиа́мо (гудлэ́ смо́лы), и янэ́н анги́л Ра́скиро-Дэвлэ́скиро муй кажно (сва́ко) пэ́скири кадила, дуйшэла́ пандждэша́ кадилы; ту и Ааро́но, кажно пэ́скири кадила.”

¹⁸И лыя́ кажно ману́ш пэ́скири кадила и чхудя́ дрэ лэ́ндэ яг, и чхудэ́ андрэ́ дрэ лэ́ндэ фимиа́мо (гудлэ́ смо́лы) тэ хачкирэ́н, и тэрдинэ́ пашы́л загиибэ́н дрэ скэдыибна́скири ша́тра; адя́кэ-паць и Мо́йза и Ааро́но.

¹⁹И скэдыя́ пэ лэ́ндэ Кореё сарэ́ манушэ́н кэ загиибэ́н дрэ скэдыибна́скири ша́тра. И сыкадыя́ Ра́скирэ-Дэвлэ́скири сла́ва сарэ́ манушэ́нгэ.

²⁰И пхэндя́ Рай Дэвэ́л Мойза́скэ и Аароно́скэ, ракири́:

²¹“Джа́н дрэ риг адалэ́ манушэ́ндыр, и Мэ хасякира́ва лэн дрэ екх мэнта (минута).”

²²Ёнэ пынэ́ пэ пэ́скирэ муя́ и пхэндлэ́: “Дэ́вла, Дэвлалэ пэ кажнонэ́-масэскиро (лочакиро) ду́хо (фа́но)! Екх ману́ш кэрдя́ грэ́хо, и Ту холясоса пэ сарэ́ манушэ́ндэ?”

²³И пхэндя́ Рай Дэвэ́л Мойза́скэ дасавэ́ лава́:

²⁴“Пхэн манушэ́нгэ: ‘Отджан сарэ́ ригэ́ндыр Кореёскирэ, Дафаноскирэ и Авироноскирэ шатрэндыр.’”

²⁵И уштыя́ Мо́йза, и гия́ кэ Дафано и Авироно, и пал лэ́стэ гинэ́ Израилёскирэ пхурыдыра́.

²⁶И пхэндя́ манушэ́нгэ: “Отджан нажужэ́-манушэ́нгирэ шатрэндыр, и на касынэнпэ ни кэ со, со исын лэ́нгиро, соб (кай) тэ на хасён тумэ́нгэ дрэ сарэ́ лэ́нгирэ грэ́хи.”

²⁷И отгинэ́ ёнэ сарэ́ ригэ́ндыр Кореёскирэ шатрэндыр, Дафаноскирэ и Авироноскирэ; а Дафано и Авироно выгинэ́ и тэрдэ́ сыс пашы́л пэ́скирэ шатрэнгирэ вудара́ пэ́скирэ джувле́нца, и пэ́скирэ чхавэ́нца, и пэ́скирэ тыкнэ́ чхаворэнца.

²⁸Тэ́ньци пхэндя́ о Мо́йза: “Далэ́стыр уджинэна, со Рай Дэвэ́л бичхадя́ ман тэ кэра́в сарэ́ далэ́ рэ́нды, а на пир пэ́скири мысля мэ кэра́ва дава́:

²⁹ко́ли ёнэ мэрэ́на, сыр сарэ́ мануша́ мэрэ́на, и пэрэ́ла пэ лэ́ндэ ка́ра, сави́, хай, судьба сарэ́ манушэ́нца: то на Рай Дэвэ́л бичхадя́ ман;

³⁰а ко́ли Рай Дэвэ́л кэрэ́ла ди́во, и пхув росчхакирэла пэ́скирэ ушта́ и накхавэла (проглытынэла) лэн и саро́, со, лэ́ндэ, и ёнэ джидэ́ зджана пэ дова́ свэ́то (дро лю́но), тэды джинэ́н, со адалэ́ мануша́ на прилынэ́ патыва́са Рас-Дэвлэ́с.”

³¹И сыс адя́кэ: сыр ёв пхэндя́ далэ́ лава́, розгия́пэ пхув тэл лэ́стэ;

³²росчхакирдя пхув пэ́скирэ ушта́, и накхадя лэн и лэ́нгирэ кхэра́, и сарэ́ Кореёскирэ манушэ́н и саро́, со лэ́ндэ сыс;

³³и гинэ́ тэлэ́ ёнэ сарэ́са, со сыс лэ́ндэ джидо́ пэ дова́ свэ́то, и учхакирдя́ лэн пхув, и хасинэ́ ёнэ пэ́скирэ манушэ́ндыр.

³⁴И сарэ́ Израильтя́ни, савэ́ сыс пашы́л лэ́ндэ, нашнэ́ лэ́нгирэ годлатыр, соб (кай), ракирдэ́ ёнэ, и амэн тэ на накхавэл пхув.

³⁵И выгия́ яг Ра́стыр-Дэвлэ́стыр и хая одолэ́н дуйшэла́ пандждэша́ муршэ́н, савэ́ яндлэ́ гудлэ́ смо́лы (фимиа́мо).

³⁶И пхэндя́ Рай Дэвэ́л Мойза́скэ, ракири́:

³⁷“Пхэн Елизароскэ, Аароно́скирэ-чхавэ́скэ, раша́скэ, мэк ёв тэ кэдэл кадилы схачкирдэ́ манушэ́ндыр, и яг тэ вычхурдэл яври́; пал-дова́ со ёнэ освэнцындлэпэ,

³⁸кадилы адалэ́-грешникэнгирэ лэ́нгирэ мэрибнаса, и мэк тэ розмарэн лэн пэ санэ бляхи (листы) тэ учхакирэн алта́рё, пал-дова́ со ёнэ яндлэ́ лэн анги́л Ра́скирэ-Дэвлэ́скиро муй, и ёнэ ячнэ́ обсвэнцындлэ; и явэ́на ёнэ ґертыкаса (сыкаибнаса) ваш Израилёскирэ чхавэ́нгэ.”

³⁹И лыя́ раша́й Елиза́ро харкунэ́ (медяна) кадилы, савэнгирэ манушэ́н Дэвэ́л схачкирдя́, и розмардэ лэн дрэ санэ бляхи (листы) тэ учхакирэн алта́рё,

⁴⁰соб (кай) тэ рипирэ́н Израилёскирэ чхавэ́, соб (кай) нико́н яви́р ману́ш, саво́ на Аароно́скирэ родо́стыр, тэ на подджа́л тэ янэл гудлэ́ смо́лы (фимиа́мо) тэ хачкирэл анги́л Ра́скирэ-Дэвлэ́скиро муй, и, соб (кай) тэ на явэ́л лэ́са, со Кореёса и лэ́скирэ манушэ́нца, савэ́ сыс лэ́са кхэтанэ́, сыр ракирдя́ лэ́скэ Рай Дэвэ́л пир Мойзастэ.

⁴¹Пэ яви́р дывэ́с саро́ Израилёскирэ-чхавэ́нгиро скэдыибэ́н лыя́ тэ ракирэ́л холя́са пэ Мойзастэ и Аароностэ, и ракирдэ́: “Тумэ́ мулякирдэ́ Ра́скирэ-Дэвлэ́скирэ манушэ́н.”

⁴²И ке́ли скэдынэ́пэ мануша́ проти Мойзастэ и Аароностэ, ёнэ рисинэ́ кэ скэдыибна́скири ша́тра (ски́ния), и ґа́да, о́блоко учхакирдя́ ла, и явдя́ Ра́скирэ-Дэвлэ́скири сла́ва.

⁴³И явнэ́ Мо́йза и Ааро́но кэ скэдыибна́скири ша́тра.

⁴⁴И пхэндя́ Рай Дэвэ́л Мойза́скэ дасавэ́ лава́:

⁴⁵“Джа́н дрэ риг адалэ́ манушэ́ндыр, и Мэ хасякира́ва лэн дрэ екх мэнта (минута).” Нэ ёнэ пынэ́ пэ пэ́скирэ муя́.

⁴⁶И пхэндя́ Мо́йза Аароно́скэ: “Лэ кадила, и чхув яг дрэ ла́тэ алтарёстыр и чхув гудлэ́ смо́лы (фимиа́мо), и лы́джа сыгнэдыр кэ мануша́, и затэрдёв пал лэ́ндэ, пал-дова́ со выгия́ холы́ Ра́стыр-Дэвлэ́стыр и яця́ хасякирибэн.”

⁴⁷И лыя́ Ааро́но, сыр припхэндя́ Мо́йза, и праста́ндыя дрэ манушэ́нгиро скэдыибэ́н, и ґа́да, лыяпэ хасякирибэн (моро́во) пэ манушэ́ндэ. И ёв чхудя́ фимиа́мо, и затэрдия пал манушэ́ндэ.

⁴⁸Тэрдия́ ёв машки́р мулэндэ и джидэндэ, и хасякирибэн пирияця́.

⁴⁹И мынэ́ хасякирибнастыр дэшуштар тысёнцы эфташэла́ манушэ́н, апри́ч адалэ́ манушэ́ндэ, савэ́ мынэ́ пир Кореёскиро рэ́ндо.

⁵⁰И рисия́ Ааро́но кэ Мо́йза кэ загиибэ́н дрэ скэдыибна́скири ша́тра, пало́ дова́, сыр хасякирибэн пирияця́.