Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 18 Bible Online

Чыслы 18 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 18

¹И пхэндя́ Рай Дэвэ́л Аароно́скэ: “Ту и тырэ́ чхавэ́ и кхэр тырэ́-дадэ́скиро ту́са лыджа́на пэ пэ́стэ отпхэныбэ́н пал бизладо пэ свэ́нто штэ́то: и ту и тырэ́ чхавэ́ ту́са лыджа́на пэ пэ́стэ грэ́хо пал бизладо пэ тумаро́ свэ́нто штэ́то.

²Адя́кэ-паць и тырэ́ пшалэ́н, Левиёскиро ро́до, тырэ́-дадэ́скиро кхэри́тко ро́до (племё), лэ пэ́скэ: мэк ёнэ тэ явэ́н паш ту́тэ и тэ кэрэ́н буты́ ту́кэ, а ту и тырэ́ чхавэ́ ту́са явэ́на паш досыкаибнаскири ша́тра;

³мэк ёнэ тэ дынаринэ́н (тэ служынэн) ту́кэ и тэ дынаринэ́н пэ сари́ ски́ния; екх, соб (кай) тэ на подджан кэ свэнтонэ́-штэтоскирэ предметы и кэ алта́рё, соб (кай) тэ на мэрэ́н и лэ́нгэ, и тумэ́нгэ.

⁴Мэк ёнэ тэ явэ́н паш ту́тэ и лыджа́на тэ дынаринэ́н дрэ скэдыибна́скири ша́тра, сарэ́ бутя́ пир ша́тра; а яви́р ману́ш нашты́ тэ подджа́л кэ тумэ́.

⁵Адя́кэ дынаринэ́н пэ свэ́нто штэ́то и пашы́л алта́рё, соб (кай) тэ на явэ́л буты́р холы́ пэ Израилёскирэ чхавэ́ндэ;

⁶пал-дова́ со тумарэ́ пшалэ́н, Левитэ́н, Мэ лыём Израилёскирэ чхавэ́ндыр, и дыём лэн тумэ́нгэ, дро да́ро Ма́нгэ, Ра́скэ-Дэвлэ́скэ, соб (кай) ёнэ тэ кэрэ́н свэ́нто буты́ пашы́л скэдыибна́скири ша́тра;

⁷и ту, и тырэ́ чхавэ́ ту́са, дыкхэ́н пал тумари́ свэнтыма дро саро́, со исын алтарёскиро и со исын андра́л пал шы́рма, и дынаринэ́н; тумэ́нгэ дава́ Мэ дрэ да́ро свэ́нто дынарибэ́н, а яви́р ману́ш, и саво́ подджа́ла, отдыно́ явэ́ла мэрибна́скэ.

⁸И пхэндя́ Рай Дэвэ́л Аароно́скэ: “Ѓа́да, Мэ допатява ту́кэ тэ дыкхэ́с, сыр янэ́на свэ́нто дыибэ́н ґаздыпнаса Ма́нгэ; сарэ́стыр, со янэ́на Израилёскирэ чхавэ́, Мэ дыём ту́кэ и тырэ́ чхавэ́нгэ, ваш тумаро́ рашаипэн, сыр упхэныбэ́н пэ ве́ко.

⁹Ѓа́да, со исын тыро́ самонэ барэ́ яныбнаскирэ свэнтыматыр, со янэ́на пэ яг: кажно лэ́нгиро маруно́ яныбэ́н, и кажно лэ́нгиро свэ́нто яныбэ́н пал грэ́хо, и кажно свэ́нто яныбэ́н пал лэ́нгири банг, со ёнэ янэ́на Ма́нгэ, дава́ тэ явэ́л сыр бари свэнтыма ту́кэ и тырэ́ чхавэ́нгэ.

¹⁰Пэ са́мо свэ́нто штэ́то хан дава́, сарэ́ мурша́ сашты́ тэ хан, дава́ мэк тэ явэ́л ваш ту́кэ.

¹¹И ґа́да, ишчо (инкэ́) со ту́кэ: лэ́нгирэ свэнтонэ́ яныбнаскирэ ту́кэ да́ры и свэ́нта дыибэна́ ґаздыпнаса сарэ́ Израилёскирэ чхавэ́ндыр. Мэ дыём ту́кэ свэ́нто дыибэ́н, и тырэ́ чхавэ́нгэ, и тырэ́ чхаенгэ ту́са сыр упхэныбэ́н пэ ве́ко; кажно жужо́ ману́ш дро тыро́ кхэр сашты́ (могинэ́ла) тэ хал дава́.

¹²Саро́ фэдыршонэ алеёстыр и саро́ фэдыршонэ винаградостыр и марэстыр, лэ́нгирэ пэ́рва барьякирдэ́ (пло́ды), савэ́ ёнэ янэ́на Ра́скэ-Дэвлэ́скэ, Мэ дыём лэн ту́кэ.

¹³Саро́ пэ́рво, со дэ́ла лэ́нгири пхув, савэ́ ёнэ янэ́на Ра́скэ-Дэвлэ́скэ, мэк тэ явэ́н тырэ́; кажно жужо́ (чысто) ману́ш дро тыро́ кхэр сашты́ (могинэ́ла) тэ хал дава́.

¹⁴Саро́ совлахадо пэ Израилёскири пхув, мэк тэ явэ́л тыро́.

¹⁵Сарэ́, савэ́ роскушэна дакири лочови́ дрэ кажно лоч (плоть), сави́ янэ́на Ра́скэ-Дэвлэ́скэ, манушэ́ндыр и кхэритконэ́ мурдалэ́ндыр (ското́стыр), мэк тэ явэ́л тырэ́; екх англатуно́ (пэ́рво) манушэ́ндыр исын банго́ тэ явэ́л выкиндло, и англатуно́ нажужэ́ кхэритконэ́ мурдалэстыр тэ явэ́л выкиндло;

¹⁶а выкиныбэ́н пал лэ́ндэ: лэн екхэ чхонэстыр пир тыри́ тими́н, лэ выкиныбэ́н пандж шэ́кели рупэ́са, пир свэ́нто шэ́келё, саво́ дрэ биш геры;

¹⁷нэ пал пэрвонэ́ тыкнорэстэ гурумнендыр [гурувэндыр-р.с.], и пал пэрвонэстэ бакрэ́ндыр, и пал пэрвонэстэ бузнэндыр, на лэ выкиныбэ́н: ёнэ исын свэ́нта; лэ́нгирэ ратэ́са обчхув алта́рё, и ада́й лэн хачкир сыр свэ́нто дыибэ́н, дро гудло́ тхув, лачхо́ Ра́скэ-Дэвлэ́скэ;

¹⁸А мас лэ́нгиро приджалапэ ту́кэ, адя́кэ-паць сыр колы́н свэнтонэ́ дыибна́стыр тринскирибнаса и право (чачо́) псико́ приджалапэ ту́кэ.

¹⁹Кажно свэ́нто дыибэ́н ґаздыпнаса, саво́ Израилёскирэ чхавэ́ янэ́на Ра́скэ-Дэвлэ́скэ, Мэ отда́ва ту́кэ, и тырэ́ чхавэ́нгэ, и чхаенгэ тырэнгэ ту́са сыр упхэныбэ́н дро ве́ко, дава́ исын завето лондэскиро пэ ве́ки анги́л Растэ-Дэвлэ́стэ, саво́ сыс дыно́ ваш ту́кэ и родо́скэ тырэ́скэ ту́са.”

²⁰И тэ́ньчи пхэндя́ Рай Дэвэ́л Аароно́скэ: “Пэ лэ́нгири пхув ту́тэ на явэ́ла право пэ мэкно́ миштыпэ́н, и паш на явэ́ла ту́кэ машки́р лэ́ндэ; Мэ сом паш тыри́ и мэкно́ миштыпэ́н тыро́ машки́р Израилёскирэ чхавэ́ндэ.”

²¹А Левиёскирэ чхавэ́нгэ, ґа́да, Мэ дыём сыр мэкно́ миштыпэ́н дэ́што (дэшэнгири) ме́ра сарэ́стыр, со исын дро Израилё, пал лэ́нгиро дынарибэ́н, пал дова́, со ёнэ лыджа́на мангипэ́н дрэ скэдыибна́скири ша́тра;

²²и палдава́ Израилёскирэ чхавэ́ нашты́ буты́р тэ подджан кэ скэдыибна́скири ша́тра, соб (кай) тэ на кэрэ́н грэ́хо и тэ на мэрэ́н:

²³мэк Леви́ты тэ кэрэ́н рашаитко буты́ дрэ скэдыибна́скири ша́тра и тэ лыджа́н пэ пэ́стэ лэ́нгиро грэ́хо. Дава́ явэ́ла упхэныбэ́н пэ ве́ки дрэ тумарэ́ ро́ды; машки́р Израилёскирэ чхавэ́ндэ ёнэ на дорэсэ́на миштыпна́скири ме́ра;

²⁴адя́кэ, сыр дэ́што паш Израилёскирэ чхавэнгири, сави́ ёнэ янэ́на дро свэ́нто яныбэ́н Ра́скэ Дэвлэ́скэ, Мэ да́ва Левитэ́нгэ дрэ миштыпна́скири ме́ра, палдава́ Мэ и пхэндём лэ́нгэ, машкира́л Израилёскирэ чхавэ́ндэ ёнэ на дорэсэ́на миштыпна́скири ме́ра.”

²⁵И пхэндя́ Рай Дэвэ́л Мойза́скэ, ракири́:

²⁶“Дэ тэ джинэ́н Левитэ́нгэ и пхэн лэ́нгэ: ‘Ке́ли тумэ́ явэ́на тэ лэн Израилёскирэ чхавэ́ндыр дэ́што ме́ра, сави́ Мэ дыём тумэ́нгэ лэ́ндыр дро мэкно́ миштыпэ́н, тэды янэ́н лэ́стыр свэ́нто дыибэ́н ґаздыпнаса Ра́скэ-Дэвлэ́скэ, дэ́што ме́ра дэшэнгирьятыр,

²⁷и загиндло явэ́ла тумэ́нгэ дава́ тумаро́ свэ́нто яныбэ́н, сыр маро́ гумностыр и сыр мол (вино) пресостыр;

²⁸адя́кэ и явэ́на тумэ́ тэ янэ́н свэ́нто дыибэ́н ґаздыпнаса Ра́скэ-Дэвлэ́скэ сарэ́ тумарэ́ дэштонэ мерэндыр (пашэндыр), савэ́ явэ́на тэ лэн Израилёскирэ чхавэ́ндыр, и явэ́на тэ дэн лэ́ндыр свэ́нто дыибэ́н Ра́скирэ-Дэвлэ́скиро раша́скэ Аароно́скэ;

²⁹сарэ́стыр, со дэлэлапэ тумэ́нгэ, янэ́н свэ́нто дыибэ́н ґаздыинаса Ра́скэ-Дэвлэ́скэ, сарэ́ фэдыршонэстыр, со сыс свэнцякирдо.’

³⁰И пхэн лэ́нгэ: ‘Ке́ли тумэ́ янэ́на сарэ́ фэдырша далэ́стыр, тэды дава́ явэ́ла загиндло Левитэ́нгэ, сыр дыно́ (гиваобкэрибнаскирэ шурнатыр) гумностыр и сыр дыно́ пресостыр;

³¹тумэ́ сашты́ (могинэ́на) тэ хан дава́ пэ кажно штэ́то, тумэ́ и тумарэ́ чэ́карья (семействы), пал-дова́ со дава́ исын плэскирибэн пал тумарэ́ бутя́ дрэ скэдыибна́скири ша́тра;

³²и тумэ́ на лыджа́на пал дава́ грэ́хо, ке́ли янэ́на фэдыршо сарэ́стыр; и тумэ́ на магирэна свэнцякирдо Израилёскирэ чхавэ́нца и на мэрэ́на тумэ́.