Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 26 Bible Online

Чыслы 26 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 26

¹Пало́ дава́ марибэ́н Рай Дэвэ́л пхэндя́ Мойза́скэ и Елизароскэ, Аароно́скирэ-рашаскирэ чхавэ́скэ:

²“Пиригинэн саро́ Израилёскирэ-чхавэ́нгиро скэдыибэ́н бишэ́ бэршэ́ндыр и пхурэды́р, пир лэ́нгирэ чэ́карья (семействы), [дадэ́скири сэмэ́нца-ю.о.], сарэ́н, кон исын лахчо ваш марибэ́н дро Израилё.”

³И пхэндлэ́ лэ́нгэ Мо́йза и Елиза́ро, раша́й, пэ лошчы́на Моавитоскири пашы́л Иорда́но, проти Ерихо́но:

⁴“Пиригинэн сарэ́н манушэ́н бишэ́ бэршэ́ндыр и пхурэды́р, сыр пхэндя́ Рай Дэвэ́л Мойза́скэ и Израилёскирэ чхавэ́нгэ, савэ́ выгинэ́ Египто́скирэ пхувья́тыр:

⁵О Рувимо, англатуно́ (пэ́рво) чхаво́ Израилёскиро. Рувимо́скирэ чхавэ́ сыс: Ханохостыр стрэч (поколениё) Ханохоскири, Фалустыр Фалускири стрэч (поколениё),

⁶Хецроностыр стрэч Хецроноскири, Хармастыр стрэч Хармаскири.

⁷Ѓа́да, исын стрэ́чы Рувимо́скирэ: и пиригиндло лэн сыс штардэша́ трин тысёнцы эфташэла́ трия́нда.

⁸И Фалускирэ чхавэ́: Елиаво.

⁹Елиавоскирэ чхавэ́ сыс: Немуило, Дафано и Авироно. Дава́ сыс одолэ́ Дафано и Авироно, савэ́ кхардэ́ пэ скэдыибэ́н тэ ракирэ́н, савэ́ подракирдэ манушэ́н проти Мойзастэ и Аароностэ кхэтанэ́ Кореёскирэ манушэ́нца, ке́ли ёнэ подракирдэ манушэ́н пэ Растэ-Дэвлэ́стэ;

¹⁰и росчхакирдя пхув пэ́скирэ ушта́ и проглытындя лэн и Кореёс; кхэтанэ́ лэ́нца мынэ́ и дру́ги (мала́) лэ́нгирэ, ке́ли яг схая дуйшэла́ пандждэша́ манушэ́н, и ячнэ́ ёнэ сыр ґерты́к (знаме́ниё).

¹¹Нэ Кореёскирэ чхавэ́ на мынэ́.

¹²Симеоноскирэ чхавэ́ пир лэ́нгирэ стрэ́чы (поколении) сыс: Немуилостыр стрэч Немуилоскири, Яминостыр стрэч Яминоскири, Яхиностыр стрэч Яхиноскири,

¹³Заростыр стрэч Зароскири, Саулостыр стрэч Саулоскири.

¹⁴Ѓа́да, исын Симёноскирэ стрэ́чы: биш тэ дуй тысёнцы дуйшэла́.

¹⁵Гадо́скирэ чхавэ́ пир лэ́нгирэ стрэ́чы сыс: Цэфоностыр стрэч Цэфоноскири, Хагеёстыр стрэч Хагеёскири, Шунистыр стрэч Шунискири,

¹⁶Озниёстыр стрэч Озниёскири, Ериёстыр стрэч Ериёскири,

¹⁷Ародостыр стрэч Ародоскири, Арелиёстыр стрэч Арелиёскири.

¹⁸Ѓа́да, исын Гадо́скирэ стрэ́чы, пир лэ́нгиро пиригиныбэ́н: штардэша́ тысёнцы панджшэла́.

¹⁹Юда́скирэ чхавэ́ сыс: Иро и Онано; нэ Иро и Онано мынэ́ пэ Ханаано́скири пхув;

²⁰и Юда́скирэ чхавэ́ пир лэ́нгирэ стрэ́чы сыс: Шэластыр стрэч Шеласкири, Фаресостыр стрэч Фаресоскири, Заростыр стрэч Зароскири;

²¹и Фаресоскирэ чхавэ́ сыс: Эсромостыр стрэч Эсромо́скиро, Хамулостыр стрэч Хамулоскири;

²²Ѓа́да, исын Юда́скирэ стрэ́чы, пир гиныбэ́н лэ́нгиро: эфтадэшашов тысёнцы панджшэла́.

²³Исахароскирэ чхавэ́ пир лэ́нгирэ стрэ́чы сыс: Фоластыр стрэч Фоласкири, Фувастыр стрэч Фуваскири,

²⁴Яшувастыр стрэч Яшуваскири, Шымроностыр стрэч Шымроноскири.

²⁵Ѓа́да, исын Исахароскирэ стрэ́чы пир лэ́нгиро гиныбэ́н: шовдэша́ штар тысёнцы триншэла́.

²⁶Завулоноскирэ чхавэ́ пир лэ́нгирэ стрэ́чы сыс: Сэредостыр стрэч Сэредоскири, Елоностыр стрэч Елоноскири, Яхлеилостыр стрэч Яхлеилоскири;

²⁷ґа́да, исын Завулоноскирэ стрэ́чы пир лэ́нгиро гиныбэ́н: шовдэша́ тысёнцы панджшэла́.

²⁸Иосифо́скирэ (Ёза́скирэ) чхавэ́ пир лэ́нгирэ стрэ́чы сыс: Мана́сия и Ефре́мо.

²⁹Манасия́скирэ чхавэ́: Махиростыр стрэч Махироскири, Махиростыр бия́ндыя Галаа́до, Галаадостыр стрэч Галаадоскири.

³⁰Ѓа́да, исын Галаадо́скирэ чхавэ́: Езеростыр стрэч Езероскири, Хелекостыр стрэч Хелекоскири,

³¹Асриилостыр стрэч Асриилоскири, Шэхемостыр стрэч Шэхемоскири,

³²Шэмидастыр стрэч Шэмидаскири, Хеферостыр стрэч Хефероскири.

³³Салпаадостэ, Хефероскирэ чхавэ́стэ на сыс чхавэ́н, а екх чхая́; лава́ Салпаадоскирэ чхаенгирэ: Махла, Ноа, Хогла, Милка и Фирца.

³⁴Ѓа́да, исын Манасия́скирэ стрэ́чы, а пиригиндо лэн сыс пандждэша́ дуй тысёнцы эфташэла́.

³⁵Ѓа́да, исын Ефремо́скирэ чхавэ́ пир лэ́нгирэ стрэ́чы: Шутеластыр стрэч Шутеласкири, Бехеростыр стрэч Бехероскири, Таханостыр стрэч Таханоскири;

³⁶и ґа́да, исын Шутеласкирэ чхавэ́: Араностыр стрэч Араноскири;

³⁷ґа́да, исын Ефремо́скирэ стрэ́чы, пир лэ́нгиро гиныбэ́н: трияндадуй тысёнцы панджшэла́. Ѓа́да, исын Иосифо́скирэ (Ёза́скирэ) чхавэ́ пир лэ́нгирэ стрэ́чы.

³⁸Вениамино́скирэ чхавэ́ пир лэ́нгирэ стрэ́чы: Бэластыр стрэч Бэласкири, Ашбелостыр стрэч Ашбелоскири, Ахирамостыр стрэч Ахирамоскири,

³⁹Шэфуфамостыр стрэч Шэфуфамоскири, Хуфамостыр стрэч Хуфамоскири.

⁴⁰И Беласкирэ чхавэ́ сыс: Ардо и Наамано; Ардостыр стрэч Ардоскири, Нааманостыр стрэч Нааманоскири.

⁴¹Ѓа́да, исын Вениамино́скирэ чхавэ́ пир лэ́нгирэ стрэ́чы; а пиригиндло сыс лэн штардэша́ пандж тысёнцы шовшэла́.

⁴²Ѓа́да, исын Дано́скирэ чхавэ́ пир лэ́нгирэ стрэ́чы: Шухамостыр стрэч Шухамоскири. Ѓа́да, исын Дано́скирэ чэ́карья (семействы) пир лэ́нгирэ стрэ́чы.

⁴³И сарэ́ Шухамоскирэ стрэ́чы пир лэ́нгиро гиныбэ́н сыс: шовдэша́ штар тысёнцы штаршэла́.

⁴⁴Асироскирэ чхавэ́ пир лэ́нгирэ стрэ́чы сыс: Имнастыр стрэч Имнаскири, Ишвастыр стрэч Ишваскири, Вериятыр стрэч Верияскири;

⁴⁵Верияскирэ чхавэ́ндыр: Хеверостыр стрэч Хевероскири, Малхиилостыр стрэч Малхиилоскири;

⁴⁶Асироскирэ-чхакиро лав сыс Сара [Сэрах-ю.о.].

⁴⁷Ѓа́да, исын Асироскирэ-чхавэ́нгиро стрэ́чы, пир лэ́нгиро гиныбэ́н: пандждэша́ трин тысёнцы штаршэла́.

⁴⁸Нефалимоскирэ чхавэ́ пир лэ́нгирэ стрэ́чы сыс: Яхцэилостыр стрэч Яхцэилоскири, Гуниёстыр стрэч Гуниёскири,

⁴⁹Ецэростыр стрэч Ецэроскири, Шылемостыр стрэч Шылемоскири;

⁵⁰ґа́да, исын стрэч Нефалимоскири пир лэ́нгирэ стрэ́чы; пиригиндло лэн сыс штардэша́ пандж тысёнцы штаршэла́.

⁵¹Ѓа́да, кицы́ сыс манушэ́н, савэ́ загинэ́ дрэ Израилёскирэ-чхавэ́нгиро пиригиныбэ́н: шовшэла́ екх тысёнцо эфташэла́ трия́нда мануша́.

⁵²И пхэндя́ Рай Дэвэ́л Мойза́скэ, ракири́:

⁵³“Пир дава́ пиригиныбэ́н трэй тэ роздэс пхув сыр мэкно́ миштыпэ́н адалэ́ манушэ́нгэ пир лэ́нгиро гиныбэ́н (кицыпэн) пир лав.

⁵⁴Конэ́с буты́р, одолэ́нгэ пхув дэ буты́р; а конэ́с тыкнэды́р, одолэ́нгэ пхув дэ тыкнэды́р: кажнонэ́скэ трэй тэ дэн пхув дакицы, ци бут манушэ́н загинэ́ дро гиныбэ́н.

⁵⁵Пир жре́биё трэй тэ роздэн пхув: пир лава́ лэ́нгирэ-дадэнги́рэ ро́дыцы ёнэ исын бангэ́ тэ дорэсэн пхув;

⁵⁶пир жре́биё трэй лэ́нгэ тэ роздэн лэ́нгири пхув сыр мэкно́ миштыпэ́н, сыр бутэ́-манушэнгирэнгэ, адя́кэ и тыкнэ́-манушэнгирэнгэ.

⁵⁷Акэ, адалэ́ исын, кон загия́ дрэ гиныбэ́н Левитэнгиро пир лэ́нгирэ стрэ́чы: Гирсоностыр стрэч Гирсоноскири, Каафостыр стрэч Каафоскири, Мераристыр стрэч Мерарискири.

⁵⁸Ѓа́да, исын стрэ́чы Левиёноскирэ: стрэч Ливниёскири, стрэч Хевроноскири, стрэч Махлиёскири, стрэч Мушыёскири, стрэч Кореёскири. Каафостыр бия́ндыя Амрамо.

⁵⁹Амрамоскирэ-ромнякиро лав сыс Иохаведа, Левиёскири чхай, савья́ бияндя́ Левиёскири ромны́ дро Еги́пто, а ёй бияндя́ Амрамоскэ Аароно́с, Мойза́с и Мариам, лэ́нгирэ пхэня́.

⁶⁰И бия́ндынэ Аароностыр Надаво и Авиудо, Елиза́ро и Ифамаро;

⁶¹нэ Надаво и Авиудо мынэ́, ке́ли яндлэ́ натрэбимо яг анги́л Растэ-Дэвлэ́стэ.

⁶²И сыс пиригиндло лэн биштэ трин тысёнцы сарэ́н муршэ́н, екхэ чхонэстыр и буты́р, пал-дова́ со ёнэ на сыс пиригиндлэ кхэтанэ́ Израилёскирэ чхавэ́нца, пал-дова́ со на сыс дыно́ лэ́нгэ участко (пхув) машки́р Израилёскирэ чхавэ́ндэ пир пхув сыр мэкно́ миштыпэ́н.

⁶³Ѓа́да, исын одолэ́, савэ́н пиригиндлэ Мо́йза и Елиза́ро, раша́й, савэ́ гиндлэ́ Израилёскирэ чхавэ́н пэ Моавоскирэ лошчыны пашы́л Иорда́но, проти Ерихо́но;

⁶⁴машки́р лэ́ндэ на сыс ни екхэ манушэ́с, савэ́н гиндя Мо́йза и Ааро́но, раша́й, савэ́ гиндлэ́ Израилёскирэ чхавэ́н пэ Синаёскири чхучи́ пхув;

⁶⁵пал-дова́ со Рай Дэвэ́л пхэндя́ лэ́нгэ, со мэрэ́на ёнэ пэ чхучи́ пхув, — и на яця́пэ лэ́ндыр нико́н (никонэ́с), апри́ч Халевостэ, Ефонияскирэ чхавэ́стэ, и Исусо́стэ (Ёхошуастэ), Навиноскирэ чхавэ́стэ.