Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 35 Bible Online

Чыслы 35 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 35

¹И пхэндя́ Рай Дэвэ́л Мойза́скэ пэ Моавитоскирэ лошчыны (равнины) пашы́л Иорда́но проти Ерихо́но, ракири́:

²“Припхэн Израилёскирэ чхавэ́нгэ, соб (кай) ёнэ пэ́скирэ миштыпнаскирэ мератыр тэ дэн Левитэ́нгэ фо́рья, соб (кай) ёнэ одо́й тэ дживэ́н, и фэ́лды пашы́л фо́рья сарэ́ ригэ́ндыр тэ дэн Левитэ́нгэ:

³фо́рья лэ́нгэ явэ́на ваш джиибэ́н, и фэ́лды явэ́на ваш лэ́нгирэ кхэритконэ́ мурдалэ́нгэ (ваш ското), и ваш лэ́нгиро маёнко, и ваш саро́, со лэ́нгэ трэй ваш джиибэ́н;

⁴фэ́лды пашы́л фо́рья, савэ́ тумэ́ сан бангэ́ тэ дэн Левитэ́нгэ, форо́скирэ вантатыр бангэ́ тэ явэ́н пэ дуй тысёнцы куня́, дрэ сарэ́ рига́;

⁵и отмеринэн пало́ фо́ро кэ вастокоскири риг дуй тысёнцы куня́, и кэ паш-дывэсы́тко (южно) риг дуй тысёнцы куня́, и кэ западо дуй тысёнцы куня́, и кэ паш-рати́тко (северно) риг дуй тысёнцы куня́, а машкира́л тэ явэ́л фо́ро: дасавэ́ явэ́на лэ́ндэ фэ́лды пашы́л фо́рья.

⁶Форье́ндыр, савэ́ тумэ́ дэ́на Левитэ́нгэ, явэ́на шов фо́рья ваш зракхибэ́н, дрэ савэ́ тумэ́ дэ́на саштыпэн (шансо) тэ нашэ́л замарибнарискэ; и буты́р лэ́ндыр дэн штардэша́ дуй фо́рья:

⁷сарэ́ фо́рья, савэ́ тумэ́ бангэ́ тэ дэн Левитэ́нгэ, явэ́ла штардэша́ охто́ фо́рья, фэлдэнца, савэ́ явэ́на пашэыл лэ́ндэ.

⁸И ке́ли явэ́на тэ дэн фо́рья Израилёскирэ чхавэ́нгирэ миштыпнаскирэ мератыр, тэды барэстыр дэн буты́р, тыкнэстыр тыкнэды́р; кажно ро́дыцо, дыкхи́ пир миштыпна́скири ме́ра, сави́ дорэсэ́на, исын бангэ́ (мусинэна) тэ дэн фо́рья пэ́скирэ форье́ндыр Левитэ́нгэ.”

⁹И пхэндя́ Рай Дэвэ́л Мойза́скэ дасавэ́ лава́:

¹⁰“Дэ тэ джинэ́н Израилёскирэ чхавэ́нгэ и пхэн лэ́нгэ: ‘Ке́ли тумэ́ пириджана пир Иорда́но пэ Ханаано́скири пхув,

¹¹выкэдэн пэ́скэ фо́рья, савэ́ явэ́на тумэ́ндэ форьенца ваш зракхибэ́н, карик могинэ́ла тэ нашэ́л замарибнари, саво́ мулякирдя́ манушэ́с наками;

¹²и явэ́на лэ́ндэ [тумэ́ндэ-р.с.] далэ́ фо́рья ваш зракхибэ́н манушэ́нгэ, савэ́ тумэ́ндэ камэнас тэ отхан палэ (тэ отомстинэн), соб (кай) тэ на явэ́л замарибнари-ману́ш, саво́ мулякирдя́, англэды́р, сыр ёв явэ́ла анги́л манушэ́ндэ пэ сэ́ндо.

¹³Фо́рья, савэ́ тумэ́нгэ трэй тэ дэн, фо́рья ваш зракхибэ́н, исын бангэ́ тэ явэ́л тумэ́ндэ шов:

¹⁴трин фо́рья дэн пир дая́ Иорданоскири риг и трин фо́рья дэн пэ Ханаано́скири пхув; знашыбнаскирэ форьенца ваш нашаибэн бангэ́ тэ явэ́н ёнэ;

¹⁵ваш Израилёскирэ чхавэ́нгэ, и ваш манушэ́скэ, саво́ явдя́ явирэ рига́тыр, и ваш манушэ́скэ, саво́ дживэ́ла машки́р тумэ́ндэ, явэ́на далэ́ шов фо́рья ваш зракхибэ́н, соб (кай) тэ нашэ́л одори́к кажно (сва́ко) ману́ш, саво́ замардя́ (мулякирдя́) манушэ́с наками.

¹⁶Ко́ли кон пэкавэла вари-конэ́с саструнэ́ струментоса, адя́кэ, со одова́ ману́ш мэрэ́ла, — тэды ёв исын замарибнари: лэс исын бангэ́ (мусинэна) тэ отдэ́н пэ мэрибэ́н;

¹⁷и ко́ли вари-кон пэкавэла явирэ́с барэса дро васт, со́стыр сашты́ тэ мэрэс адя́кэ, со одова́ ману́ш мэрэ́ла, — тэды ёв исын замарибнари: лэс бангэ́ тэ отдэ́н пэ мэрибэ́н;

¹⁸ці, ко́ли вари-кон каштунэ струментоса пэкавэла явирэ́с, савэ́стыр сашты́ тэ мэрэс, и пэкавэла вастэ́са адя́кэ, со одова́ ману́ш мэрэ́ла, — тэды ёв исын замарибнари: лэс бангэ́ тэ отдэ́н пэ мэрибэ́н;

¹⁹ману́ш, саво́ камэ́ла тэ отхал палэ пал рат, кокоро́ сашты́ (могинэ́ла) тэ мулякирэ́л замарибнарис: сыр лэс фэ́ни (то́ка) пирилэла, кокоро́ сашты́ (могинэ́ла) тэ мулякирэ́л лэс;

²⁰ко́ли вари-кон пихнинэла (шпулэла) вари-конэ́с пир холы́, ци ками чхурдэ́ла пэ лэ́стэ вари-со адя́кэ, со одова́ ману́ш мэрэ́ла,

²¹ци дро кошыбэ́н пэкавэла лэс вастэ́са адя́кэ, со одова́ ману́ш мэрэ́ла: тэды одолэ́с манушэ́с, саво́ пэкадя́, мануша́ исын бангэ́ (мусинэна) тэ отдэ́н пэ мэрибэ́н, — ёв исын замарибнари; ману́ш, саво́ отхала палэ пал рат сашты́ (могинэ́ла) тэ мулякирэ́л замарибнарис, сыр лэс пирилэла.

²²Ко́ли ёв пихнинэла (шпулэла) лэс наками, би кошыбнаскиро, ци чхурдэ́ла пэ лэ́стэ вари-со, наками,

²³ци вари-саво́ бар, савэ́стыр сашты́ тэ мэрэс, надыкхи чхурдэ́ла пэ лэ́стэ адя́кэ, со одова́ мэрэ́ла, нэ ёв на сыс лэ́скирэ вэргоса и на камдя́ лэ́скэ фуипэ́н,

²⁴то тэды манушэ́нгиро скэдыибэ́н исын банго́ (мусинэла) тэ кэрэ́л сэ́ндо машки́р замарибнаристэ и манушэ́стэ, саво́ камэ́ла тэ отхал палэ пал рат пир саро́ упхэныбэ́н.

²⁵И манушэ́нгирэ скэдыибнаскэ трэй тэ зракхэ́л замарибнарис манушытконэ́ вастэ́стыр, саво́ камэ́ла тэ отхал палэ пал рат, и скэдыибэ́н исын банго́ лэс тэ рискирэ́л дро лэ́скиро фо́ро, кай ёв сыс дро нашыбэн, карик ёв настя́, соб (кай) ёв одо́й тэ дживэ́л кэ барэ́-рашаскиро мэрибэ́н, саво́ сыс макхно свэнтонэ́ елеёса;

²⁶ко́ли ману́ш, саво́ замардя́, выджа́ла пал фо́ро, дрэ саво́ ёв сыс дро нашыбэн, дро саво́ ёв настя́,

²⁷и латхэ́ла лэс ману́ш, саво́ камэ́ла тэ отхал палэ пал рат на дро лэ́скиро фо́ро, кай ёв сыс дро нашыбэн, и мулякирэ́ла адалэс манушэ́с, кон замардя́ кодолэ́ замарибнарис, тэды на явэ́ла пэ лэ́стэ банг пал ратэскиро прочхуибэн,

²⁸пал-дова́ со одова́ сыс банго́ (лэ́скэ трэиндя́) тэ дживэ́л дро пэ́скиро фо́ро, кай ёв сыс дро нашыбэн кэ барэ́-рашаскиро мэрибэ́н, а ке́ли мэрэ́ла баро́ раша́й, то ману́ш, саво́ замардя́, сыс банго́ тэ рисёл пэ пэ́скири пхув.

²⁹Мэк дава́ мэк тэ явэ́л тумэ́ндэ чхудэ́ законоса (статутоса) дрэ тумарэ́ ро́ды, дрэ сарэ́ тумарэ́ кхэра́.

³⁰Ко́ли вари-кон замарэла манушэ́с, тэды одолэ́ манушэ́с, исын бангэ́ тэ замарэс пир манушэ́нгирэ лава́, савэ́ дыкхнэ́; нэ екхэ якхитконэс (свидетелёс) наухтылла (надо́си), соб (кай) тэ сэндякирэн лэс пэ мэрибэ́н.

³¹И на лэн выкиныбэ́н пал замарибнаскиро ди, саво́ исын банго́ тэ мэрэ́л, нэ лэс трэй тэ отдэс мэрибна́скэ;

³²и на лэн выкиныбэ́н пал манушэ́стэ, саво́ настя́ дро зракхибнаскиро фо́ро, соб (кай) лэ́скэ тэ дэс саштыпэн тэ дживэ́л пэ пэ́скири пхув англэды́р, сыр мэрэ́ла баро́ раша́й.

³³На магирэ́н пхув, пэ сави́ тумэ́ явэ́на тэ дживэ́н; пал-дова́ со рат магирэла пхув, и пхув на жужакирэлапэ пэ яви́р (явирчанэс) ратэстыр, саво́ сыс прочхудо пэ ла́тэ, сыр ратэ́са, саво́ прочхудя лэс.

³⁴Тумэ́ нашты́ тэ магирэ́н пхув, пэ сави́ тумэ́ дживэ́на, машки́р сави́ сом Мэ: пал-дова́ со Мэ Рай Дэвэ́л джива́ва машки́р Израилёскирэ чхавэ́ндэ.’”