Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 36 Bible Online

Чыслы 36 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 36

¹Явнэ́ пхурыдыра́ дадэнги́рэ Галаадо́скирэ-чхавэ́нгирэ кхэритконэ́ родо́стыр, Махироскирэ чхавэ́скирэ, Манасия́скирэ-чхавэ́скирэ Иосифо́скирэ чхавэ́нгирэ родыцо́стыр, и ракирдэ́ анги́л Мойзастэ и анги́л тхагарьендэ, Израилёскирэ-чхавэ́нгирэ барыдырэндэ пэ стрэ́чы (поколении),

²и пхэндлэ́: “О Рай Дэвэ́л припхэндя́ амарэ́ ра́скэ тэ дэс пхув дрэ мэкнэ́-миштыпна́скири ме́ра Израилёскирэ чхавэ́нгэ пир жре́биё и амарэ́ ра́скэ пхэндло́ Ра́стыр-Дэвлэ́стыр тэ дэс миштыпна́скири ме́ра Салпаадоскири, амарэ́ пшалэскири, лэ́скирэ чхаенгэ;

³ко́ли ёнэ явэ́на чхавэ́нгирэ джувле́нца вари-савэ́ явирэ Израилёскирэ чхавэ́нгирэ-родыцо́стыр, тэды лэ́нгирэ-миштыпна́скири ме́ра отлэлапэ амарэ́ дадэнги́рэ-миштыпнаскирэ мератыр и причхувэлапэ долэ́ родыцо́скэ миштыпна́скири ме́ра, дрэ сави́ ёнэ явэ́на, и отлэлапэ долэ́стыр, со дояцяпэ пир жре́биё амарэ́ миштыпнаскирэ мератыр.

⁴И ке́ли явэ́ла Израилёскирэ-чхавэ́ндэ свэ́нко, тэды лэ́нгири миштыпна́скири ме́ра причхувэлапэ кэ долэ́-родыцоскири миштыпна́скири ме́ра, дрэ сави́ ёнэ явэ́на, и миштыпна́скири ме́ра амарэ́-дадэнги́рэ родыцо́стыр отлэлапэ лэ́нгири миштыпна́скири ме́ра.”

⁵И дыя́ Мо́йза припхэныбэ́н Израилёскирэ чхавэ́нгэ, пир Ра́скирэ-Дэвлэ́скиро лав, и пхэндя́: “Чачипэ́н ракирэ́ла Иосифо́скирэ-(Ёзаскиро) чхавэ́нгиро ро́дыцо.

⁶Ѓа́да, со ракирэ́ла Рай Дэвэ́л пал Салпаадоскирэ чхаендэ: ёнэ сашты́ (могинэ́на) тэ явэ́н долэнгирэ джувле́нца, кон исын пир ило́ лэ́нгирэ якхэнгэ, екх (фэ́ни) со ёнэ исын бангэ́ тэ явэ́н джувле́нца пир ро́дыцо дрэ пэ́скирэ дадэ́скирэ кхэри́тко ро́до (племё), соб (кай) чхавэ́ Израилёскирэ тэ прилэ́н мэкно́ миштыпэ́н, кажно пэ́скирэ дадэндыр,

⁷соб (кай) Израилёскирэ-чхавэнгири миштыпна́скири ме́ра мэкнэ́ миштыпна́стыр тэ на пириджал родыцо́стыр дро ро́дыцо; пал-дова́ со кажно (сва́ко) Израилёскирэ чхавэ́ндыр исын банго́ тэ явэ́л припхандло кэ пэ́скирэ-дадэнги́рэ родыцоскири ме́ра (пхув) мэкнэ́ миштыпна́стыр.

⁸И кажно чхай, савьякэ трэй миштыпна́скири ме́ра дрэ Израилёскирэ-чхавэ́нгиро ро́дыцо, исын банги тэ явэ́л джувля́са вари-конэскирэс пэ́скирэ дадэ́скирэ родыцо́стыр пир кхэри́тко ро́до, соб (кай) чхавэ́ Израилёскирэ тэ прилэл мэкно́ миштыпэ́н пир кажно (сва́ко) ме́ра,

⁹и, соб (кай) тэ на пириджал миштыпна́скири ме́ра родыцо́стыр дрэ яви́р ро́дыцо; пал-дова́ со кажно Израилёскирэ чхавэ́нгирэ родыцо́стыр исын банго́ тэ явэ́л припхандло кэ пэ́скири миштыпна́скири ме́ра.”

¹⁰Сыр припхэндя́ Рай Дэвэ́л Мойза́скэ, адя́кэ и кэрдэ́ Салпаадоскирэ чхая́.

¹¹И выгинэ́ Салпаадоскирэ чхая́ Махла, Фирца, Хогла, Милка и Ноа палоро́м пал лэ́нгирэ-какэнгирэ чхавэ́ндэ.

¹²Ёнэ сыс джувля́ пир кхэри́тко ро́до Манасия́скирэ-чхавэ́нгиро, Иосифо́скирэ чхавэ́скирэ, и яця́пэ лэ́нгири миштыпна́скири ме́ра дрэ лэ́нгирэ-дадэ́скирэ родыцоскиро кхэри́тко ро́до.

¹³Дава́ исын припхэныбэна́ и упхэныбэна́, савэ́ дыя́ Рай Дэвэ́л Израилёскирэ чхавэ́нгэ пир Мойзастэ пэ Моавитоскирэ лошчыны (равнины), пашы́л Иорда́но, проти Ерихо́но.