Read Baltic Romani Bible 2019 – Библия - Пэ Балтитко Романи чиб (Романэс) 2019 Чыслы 7 Bible Online

Чыслы 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Чыслы 7

¹Ке́ли Мо́йза чхудя́ ша́тра (ски́ния), и помакхця ла, и обсвэнцындя ла и алта́рё, и саро́, со трэй ваш лэ́скэ, и помакхця лэн и обсвэнциндя лэн,

²то явнэ́ Израилёскирэ барыдыра́, шэралэ́ лэ́нгирэ чэкарьендыр (сэмействэндыр), барыдыра́ пэ ро́дыцы, савэ́ пиригинэнас, и ёнэ яндлэ́ свэ́нта дыибэна́[2],

³и яндлэ́ пэ́скирэ да́ры анги́л Растэ-Дэвлэ́стэ, шов зачхакирдэ ґлябы (повозки) и дэшуду́й гурувэ́н, пир екх ґлябо дуендыр барыдырэндыр и пир екхэ гурувэстэ кажнонэ́ манушэ́стыр, и чхудэ́ дава́ саро́ анги́л ша́тра (ски́ния).

⁴И пхэндя́ Рай Дэвэ́л Мойза́скэ дасавэ́ лава́:

⁵“Лэ дава́ лэ́ндыр, дава́ явэ́ла трэй, соб (кай) тэ кэрэ́н бутя́ пашы́л скэдыибна́скири ша́тра; и отдэ́ дава́ Левитэ́нгэ, дыкхи́ пир лэ́нгири буты́.”

⁶И лыя́ Мо́йза ґлябы и гурувэ́н, и дыя́ лэн Левитэ́нгэ:

⁷дуй ґлябы и штарэн гурувэ́н дыя́ Гирсоноскирэ чхавэ́нгэ пир лэ́нгири буты́:

⁸и штар вурдэна́ и охто́ (бидуе́нгиро дэш) гурувэ́н дыя́ Мерарискирэ чхавэ́нгэ пир лэ́нгири буты́, тэл Ифамаро́скиро дыкхибэ́н, Аароно́скирэ-чхавэ́скирэ, саво́ сыс раша́й;

⁹а Каафоскирэ чхавэ́нгэ на дыя́, пал-дова́ со буты́ лэ́нгири сыс тэ лыджа́н свэ́нто штэ́то — пэ псикэ́ ёнэ сыс бангэ́ тэ лыджа́н.

¹⁰И яндлэ́ барыдыра́ свэ́нто дыибэ́н ваш алта́рё тэ обсвэнцынэн лэс дрэ лэ́скиро макхибнаскиро дывэ́с, и чхудэ́ барыдыра́ пэ́скиро яныбэ́н анги́л алта́рё.

¹¹И пхэндя́ Рай Дэвэ́л Мойза́скэ: “Пир екхэ барыдырэстэ пэ дывэ́с мэк тэ янэ́н пэ́скирэ да́ры тэ обсвэнцынэн алта́рё.”

¹²Дро пэ́рво дывэ́с яндя́ пэ́скиро о Наасо́но, Аминадаво́скиро чхаво́, Юда́скирэ родыцо́стыр;

¹³яныбэ́н (да́ры) лэ́скиро сыс: екх рупуво́ баро́ чаро́, важындя ёв шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пшэничнонэ яржэса, пиримешындло елеёса, дро маруно́ яныбэ́н,

¹⁴екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

¹⁵екх телянто, екх бакро, екхэ-бэршытко бакроро́, дро цэ́ло схачкирибэ́н,

¹⁶екх бузно дрэ свэ́нто дыибэ́н пал грэ́хо,

¹⁷и дро раманёно (ми́рно) свэ́нто дыибэ́н дуе́н гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, исын Аминадавоскирэ-чхавэ́скиро, Наасоно́скиро яныбэ́н.

¹⁸Пэ яви́р дывэ́с яндя́ да́ры о Нафанаило, Цуароскиро чхаво́, барыдыро́ Исахароскирэ родыцо́стыр;

¹⁹ёв яндя́ пэ́скирэ да́ры: екх рупуво́ баро́ чаро́ (блюдо), саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пшэничнонэ яржэса, перемешындло елеёса, дро маруно́ яныбэ́н,

²⁰екх сувнакуны́ кадила дрэ дэш шэ́кели, савэ́ сыс чхудэ́ пхэрдэ́с фимиамоса (гудлэ́ смолэнца),

²¹екхэ телянтос, екхэ бакрэ́с, екхэ́с екхэ-бэршытконэ бакрорэс, ваш цэ́ло схачкирибэ́н,

²²екхэ бузнэ́с (козлос) дро свэ́нто дыибэ́н пал грэ́хо,

²³и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Цуароскирэ-чхавэ́скиро, Нафанаилоскиро яныбэ́н.

²⁴Пэ три́то дывэ́с барыдыро́ Завулоноскирэ-чхавэ́нгиро, о Елиаво, Хелоноскиро чхаво́, яндя́ пэ́скирэ да́ры.

²⁵Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудо пхэрдэ́с пшэничнонэ яржэса, перемешиндло елеёса, дро маруно́ яныбэ́н,

²⁶екх сувнакуны́ кадила дрэ дэш шэ́кели, чхудэ́ пхэрдэ́с фимиамоса (гудлэ́ смолэнца),

²⁷екхэ гуруво́рэс, екхэ бакрэ́с, екхэ екхэ-бэршытконэ бакрорэс, ваш цэ́ло схачкирибэ́н,

²⁸екхэ бузнэ́с дро свэ́нто дыибэ́н пал грэ́хо,

²⁹и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн (козлэн), панджэ́ екхэ-бэршытконэн бакрорэ́н; ґа́да, сыс Хелоновоскирэ-чхавэ́скиро, Елиавоскиро яныбэ́н.

³⁰Пэ шта́рто дывэ́с барыдыро́ Рувимо́скирэ-чхавэ́нгиро, о Елицуро, Шэдеуроскиро чхаво́, яндя́ пэ́скирэ да́ры.

³¹Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,

³²екх сувнакуны́ кадила дрэ дэш шэ́кели, сави́ сыс чхуды́ пхэрдэ́с фимиамоса (гудлэ́ смолэнца),

³³екх гуруворо, екх бакро, екх екхэ-бэршытко бакроро́, ваш цэ́ло схачкирибэ́н,

³⁴екх бузно дро свэ́нто дыибэ́н пал грэ́хо,

³⁵и дро раманёно (ми́рно) свэ́нто дыибэ́н дуе́н гурувэ́н, панджэ́ бакрэ́н, панджэ́ бузнен и панджэ́ екхэ-бэршытконэ бакрорэ́н; ґа́да, сыс Шэдеуроскирэ-чхавэ́скиро, Елицуроскиро яныбэ́н.

³⁶Пэ па́нджто дывэ́с барыдыро́ Симеоноскирэ-чхавэ́нгиро, о Шэлумиило, чхаво́ Цуришадоскиро.

³⁷Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,

³⁸екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

³⁹екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н;

⁴⁰екх бузно дро свэ́нто дыибэ́н пал грэ́хо,

⁴¹и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, и панджэ́ екхэ-бэршытконэн бакрорэ́н; ґа́да, сыс Цуришадоскирэ-чхавэ́скиро, Шэлумиилоскиро яныбэ́н.

⁴²Пэ шо́вто дывэ́с барыдыро́ Гадо́скирэ-чхавэ́нгиро, о Елиасафо, Регуилоскиро чхаво́ яндя́.

⁴³Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир шэ́келё свэ́нто, чхудэ́ пхэрдэ́с пшэничнонэ яржэса, перемешындла алеёса, дро маруно́ яныбэ́н,

⁴⁴екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁴⁵екх гуруворо (телянто), екх бакро, екх екхэ-бэршытко бакро, дро цэ́ло схачкирибэ́н,

⁴⁶екх бузно (козло) дро свэ́нто дыибэ́н пал грэ́хо,

⁴⁷и дро раманёно (ми́рно) свэ́нто дыибэ́н: дуе гурувэ́н, панджэ́ бакрэ́н, панджэ́ бузнэн и панджэ́ екхэ-бэршытконэн бакрорэ́н; ґа́да, сыс Регуилоскирэ-чхавэ́скиро, Елиасафоскиро яныбэ́н.

⁴⁸Пэ эфта́то дывэ́с барыдыро́ Ефремо́скирэ-чхавэ́нгиро, о Елишамо, Амиудоскиро чхаво́.

⁴⁹Яныбэ́н лэ́скиро сыс: екх рупуво́ баро́ чаро́, саво́ важындя шэл тэ трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса дро маруно́ яныбэ́н,

⁵⁰екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁵¹екх гуруворо (телянто), екх бакро, екх екхэ-бэршытко бакроро́ ваш цэ́ло схачкирибэ́н,

⁵²екх бузно дро свэ́нто дыибэ́н пал грэ́хо,

⁵³и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, сыс Амиудоскирэ-чхавэ́скиро, Елишамоскиро яныбэ́н.

⁵⁴Пэ охто́то дывэ́с барыдыро́ Манасия́скирэ-чхавэ́нгиро, о Гамалиило, Педацуроскиро чхаво́.

⁵⁵Яныбэ́н лэ́скиро сыс: екх рупуво́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,

⁵⁶екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁵⁷екх гуруворо (телянто), екх бакро, екх екхэ-бэршытко бакрорэ, ваш цэ́ло схачкирибэ́н,

⁵⁸екх бузно дро свэ́нто дыибэ́н пал грэ́хо,

⁵⁹и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Педацуроскирэ-чхавэ́скиро, Гамалиилоскиро яныбэ́н.

⁶⁰Пэ еня́то (биекхэ́скиро дэ́што) дывэ́с барыдыро́ Вениаминовоскирэ-чхавэ́нгиро, о Авидано, Гидеониёскиро чхаво́.

⁶¹Яныбэ́н лэ́скиро сыс: екх рупувэ́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса, дро маруно́ яныбэ́н,

⁶²екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁶³екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,

⁶⁴екх бузно дро свэ́нто дыибэ́н пал грэ́хо,

⁶⁵и дро раманёно (ми́рно) свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да сыс Гидеониёскирэ-чхавэ́скиро, Авиданоскиро яныбэ́н.

⁶⁶Пэ дэ́што дывэ́с барыдыро́ Дано́скирэ-чхавэ́нгиро, о Ахиезэро, Амишадаёскиро чхаво́.

⁶⁷Яныбэ́н лэ́скиро сыс: екх рупувэ́ баро́ чаро́, саво́ важындя шэл трия́нда шэ́кели, екх рупуво́ тахта́й, эфта́ дэша шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,

⁶⁸екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁶⁹екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,

⁷⁰екх бузно дро свэ́нто дыибэ́н пал грэ́хо,

⁷¹и дро раманёно (ми́рно) свэ́нто дыибэ́н ми́рно дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэн бакрорэ́н; ґа́да, сыс Амишадаёскирэ-чхавэ́скиро, Ахиезэроскиро яныбэ́н.

⁷²Пэ дэшупэрво дывэ́с барыдыро́ Асироскирэ-чхавэ́нгиро, о Пагиило, Охраноскиро чхаво́ яндя́.

⁷³Яныбэ́н лэ́скиро сыс: екх рупуво́ баро́ чаро́, саво́ важындя шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, пиримешындло елеёса, дро маруно́ яныбэ́н,

⁷⁴екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁷⁵екх гуруворо (телянто), екх бакро, екх екхэ-бэршытко бакроро́, дро цэ́ло схачкирибэ́н,

⁷⁶екх бузно дро свэ́нто дыибэ́н пал грэ́хо,

⁷⁷и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн (козлэн), панджэ́ екхэ-бэршытконэ бакрорэ́н; ґа́да, сыс Пагиилоскиро, Охраноскирэ-чхавэ́скиро яныбэ́н.

⁷⁸Пэ дэшуявир дывэ́с барыдыро́ Нефалимоскирэ-чхавэ́нгиро, о Ахиро, Энаноскиро чхаво́.

⁷⁹Яныбэ́н лэ́скиро сыс: екх рупуво́ баро́ чаро́, саво́ важынэла шэл трия́нда шэ́кели, екх рупуво́ тахта́й дрэ эфтадэша́ шэ́кели, пир свэ́нто шэ́келё, чхудэ́ пхэрдэ́с пшэничнонэ яржэса, перемешындло елеёса, дро маруно́ яныбэ́н,

⁸⁰екх сувнакуны́ кадила дрэ дэш шэ́кели, чхуды́ пхэрдэ́с фимиамоса (гудлэ́ смолэнца),

⁸¹екх гуруворо (телянто), екх бакро, екх екхэ-бэршытко бакроро́, ваш цэ́ло схачкирибэ́н,

⁸²екх бузно дро свэ́нто дыибэ́н пал грэ́хо,

⁸³и дро раманёно свэ́нто дыибэ́н дуе гурувэ́н, панджэ́ бакрэ́н, панджэ́ бузнэн, панджэ́ екхэ-бэршытконэ бакрорэ́н; ґа́да, сыс Энаноскирэ-чхавэ́скиро, Ахироскиро яныбэ́н.

⁸⁴Акэ, сыс Израилёскирэ барыдырэндыр яныбэ́н тэ обсвэнцынэн алта́рё дро дывэ́с, ке́ли помакхнэ лэс: дэшуду́й барэ́ чарэ́, дэшуду́й рупувэ́ тахтая́, дэшуду́й сувнакунэ́ кадилы;

⁸⁵пир шэл тэ трия́нда шэ́кели руп дро кажно чаро́, и пир эфтадэша́ дро кажно тахта́й: и адя́кэ саро́ руп дрэ далэ́ кхорэ́ (сасу́ды) сыс дуй тысёнцы штаршэла́ шэ́кели, пир свэ́нто шэ́келё;

⁸⁶сувнакунэ́ кадилы, чхудэ́ пхэрдэ́с фимиамоса (гудлэ́ смолэнца), дэшуду́й, дрэ кажно кадила пир дэш шэ́кели, пир свэ́нто шэ́келё: саро́ сувнака́й дрэ кадилы сыс шэл тэ биш шэ́кели.

⁸⁷Дро цэ́ло схачкирибэ́н сыс дэшуду́й гуруворэ (телянты), барэ́ кхэритконэ́ мурдалэстыр (ското́стыр), дэшуду́й бакрэ́, дэшуду́й екхэ-бэршытконэн бакрорэ и пашы́л лэ́ндэ маруно́ яныбэ́н, и дро свэ́нто дыибэ́н пал грэ́хо дэшуду́й бузнэн,

⁸⁸и дро раманёно (ми́рно) свэ́нто дыибэ́н саро́ кхэритконэ́ мурдалэ́ндыр (барэ́ ското́стыр) сыс биш тэ штар гуруворэ (телянты), шовдэша́ бакрэ́, шовдэша́ бузнэ, шовдэша́ екхэ-бэршытконэ бакрорэ. Акэ, саво́ сыс яныбэ́н тэ жужакирэл алта́рё пало́ лэ́скиро макхибэн.

⁸⁹Ке́ли Мо́йза заджалас дрэ скэдыибна́скири ша́тра, соб (кай) тэ ракирэ́л Ра́са-Дэвлэ́са, то ёв шундя́ зан (глос), сави́ лэ́скэ ракирдя́ дэнкостыр (крышкатыр), саво́ сыс пэ ковчэго сыкадыибнаса (откровениёса) машки́р дуй херувимы, и Ёв ракирдя́ лэ́скэ.