Read Baltic Romani Bible 2019 – Библия - Пэ Балтитко Романи чиб (Романэс) 2019 Михеё 6 Bible Online

Михеё 6 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Михеё 6

¹Шунэ́н акана́, со Рай Дэвэ́л ракирэ́ла: “Тэрдёв пэ ґэра́, обсэндякир тыро́ рэ́ндо (де́ло) анги́л бэ́рги, и мэк бэ́ргицы тэ шунэ́н тыри́ зан.

²Шунэ́н, бэ́рги, пал со Рай Дэвэ́л сэндякирэ́ла [жалинэлапэ-ю.о.], и шунэ́н тумэ́, зоралэ́-пхувья́кирэ рикирибнытка (фундаменты), пал-дова́ со Растэ-Дэвлэ́стэ исын сэ́ндо Лэ́скирэ манушэ́нца, и Ёв лыджа́ла рэ́ндо проти Израилё.”

³О Рай Дэвэ́л ракирэ́ла: “О Мирэ́ мануша́лэ! Со Мэ кэрдём тумэ́нгэ? И сыр дава́ сыс, со сы́рбы Мэ мэнчындём тумэн? Досыкавэн [отпхэнэн-р.с.] Ма́нгэ.

⁴Пал-дова́ со Мэ вылыджиём тумэн Египто́скирэ пхувья́тыр, Мэ выракхцём тумэн писхарьенгирэ састырэндыр; и Мэ бичхадём анги́л тумэ́ндэ Мойза́с, Аронос и Мириам.

⁵О Мирэ́ мануша́лэ! Пририпирэн акана́, сыр о Вала́ко[2], кра́ли Моавитоскиро, придуминэлас чорипэ́н, и со отпхэнэ́лас лэ́скэ Валаа́мо, чхаво́ Веороскиро, и со кэрдя́пэ пэ маля (степи) машки́р Ситимо и Галга́ло, соб (кай) тумэ́ могинэ́нас сашты́ тэ уджинэ́н чачипэ́н Ра́скирэ-Дэвлэ́скиро.”

⁶Со́са тэ явав ма́нгэ анги́л Растэ-Дэвлэ́стэ, и сыр ма́нгэ тэ бандякирав шэро́ анги́л Болыбна́скирэ Дэвлэ́стэ? Ци тэ явав ма́нгэ анги́л Лэ́стэ хачкирибнаскирэ свэнтонэ́ дыибнэнца? Ци екхэ-бэршэскирэ целянтэнца?

⁷Ци явэ́ла лачхо́ Ра́скэ-Дэвлэ́скэ, ко́ли мэ яна́ва бут (тысёнцы) бакрэ́н? Ци дэш бара́ (тысёнцы) рэ́ки (лэня́) маслинитконэ дзэтэса? Ци ма́нгэ трэй тэ дав мирэ́ пэрвонэс, кон бияндёла ма́ндэ пал миро чорипэ́н, биято́с мирэ́ масэ́ндыр пало́ грэ́хо мирэ́-дескиро?’

⁸О Рай Дэвэ́л сыкадя́ ту́кэ, о манушэ, со исын лачхипэ́н, и со трэй Ра́скэ-Дэвлэ́скэ ту́тыр: тэ кэрэ́с пир чачипэ́н, тэ выкэдэс тэ кэрэ́с лачхипэ́н, и тэ дживэ́с напхутькирдэс анги́л тырэ́ Дэвлэ́стэ!

⁹Ра́скирэ-Дэвлэ́скири зан дэ́ла го́дла фороскэ Ерусалимоскэ, и годыпэ́н дэ́ла паты́в Лэ́скирэ лавэ́скэ: “Шунэ́н, кхия, и Кодолэ́с, Саво́ чхудя́ лэс.

¹⁰Ци исын ишчо (инкэ́) савэ́ кучипэна (сокровишчы) дро злыднитко кхэр, дро саво́ злыдни мануша́ яндлэ́; и тыкнякирды (кротко) ме́ра, сави́ исын джунгалы Ма́нгэ, Ра́скэ-Дэвлэ́скэ.

¹¹Сыр Ма́нгэ тэ гинав пал чачунэндэ кодолэ́н, савэ́ндэ исын начачунэ (фуй) ублады́тка (весы), и хоханэ́ пхурдынэ (гири) дро екх гоно́?

¹²Барвалэ́ мануша́ далэ́ форо́стыр исын древа́н начачунэ [нахрата-ю.о.], и кодолэ́ сарэ́, кон дживэ́ла дро дава́ фо́ро, хохавэнас, и чиб лэ́нгири исын хоханы дро лэ́нгирэ ушта́.

¹³Палдава́ Мэ адя́кэ-паць кэра́ва, со ту явэ́са ґара́ насвалы, ке́ли Мэ пэкавава тут, ке́ли Мэ кэра́ва, со ячэ́лапэ голоты́ня (чхучипэн) ту́тыр пал тырэ́ грэ́хи.

¹⁴Ту явэ́са тэ хас, нэ ту на явэ́са чалы; бокх (чхучипэн) явэ́ла андрэ́ тыро́ кужум (жэлудко). Ту явэ́са тэ лыджас криг вари-со [отчхувэса пэ́скэ-р.с.], нэ ту на зракхэ́са дова́, и кодова́, со ту зракхэ́са, Мэ да́ва тэл курта́ла.

¹⁵Ту явэ́са тэ почхувэс дрэ пхув, нэ ту на явэ́са тэ счхинэс гива́; ту явэ́са тэ тасавэс (тэ штакирэс) маслинитка му́ри, нэ ту на явэ́са тэ макхэспэ маслинитконэ дзэтэса; и ту вытасавэса винаграды́тко со́ко (хум), нэ ту на явэ́са тэ пьес мол (вино).

¹⁶Пал-дова́ со тумэ́ рикирдэпэ кэ стату́ты Амврияскирэ, и кэ сарэ́ бутя́ Ахавоскирэ кхэрэ́стыр, и тумэ́ кэрэ́на саро́ пир лэ́нгири годы́, со Мэ кэра́ва тумэ́ндыр голоты́ня (пустота), соб (кай) тэ дэн шоля тумарэ́ мануша́, и ячэ́лапэ пэ тумэ́ндэ бипатыв Мирэ́-манушэ́нгири.”