Read Baltic Romani Bible 2019 – Библия - Пэ Балтитко Романи чиб (Романэс) 2019 Михеё 7 Bible Online

Михеё 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Михеё 7

¹Бида ма́ндэ! Пал-дова́ со мэ, сом сы́рбы ману́ш, кон кэдэла лынаитка му́ри, сы́рбы кодолэ́, кон подкэдэла винаградо (дракх), нанэ ние́кх грозно (вэтка му́ри) тэ хав, нанэ ние́кх спяло мурина, со миро ди камэ́ла.

²Э патяибнытка мануша́ лачхэ́ илэ́са хасинэ́ пэ пхув, и нанэ чачунэ́ манушэ́н машки́р муршэндэ. Ёнэ сарэ́ подракхэна тэ прочхувэн рат, кажно (сва́ко) ману́ш чорьёлапэ пал пэ́скирэ пшалэ́стэ фэляса (сеткаса).

³Лэ́нгирэ васта́ рискирдэ́ тэ кэрэ́н биба́хт (фуипэ́н): о тхага́ри пхучэла почастунко (да́ро), о сэнда́ри (наенгиро) родэ́ла мыто (взятка), и барэ́ рая выпхэнэна лэ́нгири бибахталы мысля пэ годы́, со ёнэ камэ́на; и ёнэ адя́кэ кхэтанэ́ пиририскирэна чачипэ́н.

⁴Най фэдэды́р ману́ш лэ́ндыр исын сы́рбы канрало хру́сто, а най чачунэдыр ману́ш исын вострэдыр (чолалэдыр) тыностыр пхусадытконэ хрустэндыр; явдя́ дывэ́с Тырэ́-ракхибнарьенгиро, со Ту явэ́са тэ сэндинэс, акана́ явэ́ла лэ́нгиро конфузо (бу́нто).

⁵На патя малэ́скэ, на допатя дромэскирэ малэ́скэ (другоскэ), ракх лава́ тырэ́-москирэ кодолятыр, сави́ исын пашты пашы́л тыро́ колы́н.

⁶Пал-дова́ со о чхаво́ ладжакирэла дадэ́с (на дэ́ла паты́в дадэ́скэ), э чхай ґаздэ́лапэ пэ ла́кирэ датэ, э бори пэ сасятэ, манушэ́скирэ вэ́рги исын мануша́ лэ́скирэ кхэрэ́стыр.

⁷Нэ мэ кокоро́ ява́ва тэ дыкха́в пэ Растэ-Дэвлэ́стэ, мэ ява́ва тэ ужакирав Дэвлэ́с, Саво́ ракхэ́ла ман; Миро Дэвэ́л шунэ́ла ман.

⁸На ра́дынпэ зоралэ́с ма́ндыр, мири́ вэргица! Ко́ли пэрава мэ, мэ усае́кх ґаздавапэ. Ко́ли мэ сом бэшто́ дро калыпэ́н, нэ Рай Дэвэ́л дэ́ла дуд (свэ́то) ма́нгэ.

⁹Мэ вырикирава холякири зор Ра́скирэ-Дэвлэ́скири, пал-дова́ со мэ кэрдём грэ́хи проти Лэ́стэ, анги́л дова́, сыр Ёв обсэндякирэла миро рэ́ндо и кэрэ́ла пир чачипэ́н ма́нгэ. Ёв вылыджала ман пэ дуд, и мэ дыкха́ва Лэ́скиро чачипэ́н.

¹⁰Тэ́ньци и мири́ вэргица явэ́ла тэ дыкхэ́л дава́, и ладж чхакирэла ла, сави́ пхэндя́ ма́нгэ: “Кай исын Рай Дэвэ́л тыро́ Дэвэ́л?” Мирэ́ якха́ явэ́на тэ дыкхэ́н ла, акана́ заштакирэна ґэрэ́нца ла, сыр бла́та пэ вули́цы (га́сы).

¹¹Дро дова́ дывэ́с, ке́ли тырэ́ ва́нты, Ерусалимо, нэвэ́стыр явэ́на тэ кэрэ́н, дро дова́-са́мо дывэ́с стату́то пал Израилё бу΄глэдыр отчхувэла ме́жа Израилёскири.

¹²Дро дова́-са́мо дывэ́с, ёнэ явэ́на плено́стыр кэ ту, мануша́лэ Израилёскирэ, Асириятыр и Египто́скирэ форье́ндыр; Египто́стыр аж кэ рэка (лэнь) Евфрато, морёстыр (дэрьявэстыр) кэ мо́рё (дэрья́в), бэрга́тыр кэ бэ́рга.

¹³Нэ доя́ пхув явэ́ла чхучи́ (пусто) пал банг кодолэгири, кон дживэ́ла пэ ла́тэ, и пал дова́ чорипэ́н, со ёнэ кэрдэ́.

¹⁴(Дэ́вла!) Чарав дэстэса Тырэ́ манушэ́н, кон исын дро ґурто Тырэ́-миштыпнаскиро, савэ́ дживэ́на кокорэ́ пэ́скэ дро вэш, машки́р Кармило: мэк ёнэ тэ чаравэнпэ пэ Васа́но и пэ Галаа́до, сыр сыс дрэ ґаратунэ́ дывэса́.

¹⁵Сыр сыс дрэ дывэса́, ке́ли ёнэ выджа́нас Египто́скирэ пхувья́тыр, сыка́в лэ́нгэ Тырэ́ ди́вна рэ́нды.

¹⁶Э на́цыи явэ́на тэ дыкхэ́н, и ёнэ явэ́на тэ ладжан сарэ́ лэ́нгирэ зоралыпнастыр, ёнэ чхувэ́на васт пэ муй пэ́скэ; лэ́нгирэ кана́ явэ́на кашукэ.

¹⁷Ёнэ явэ́на тэ чарэн (тэ лизинэн) пра́хо сыр саплын; ёнэ явэ́на тэ рэсэн яври́ лэ́нгирэ гарадэ́ штэтэ́ндыр сыр кирмэ, со исын пэ пхув. Ёнэ явэ́на тэ дарэ́н Ра́стыр-Дэвлэ́стыр, амарэ́ Дэвлэ́стыр. Лэ́ндэ явэ́ла трашаибэ́н анги́л Ту́тэ, Дэ́вла.”

¹⁸Кон исын Кадасаво́, Дэ́вла, сыр Ту сан? Кон отмэкэ́ла чорипэ́н и промэкэла чорэ́ рэ́нды манушэ́нгэ Лэ́скирэ мэкнэ́ миштыпна́стыр, савэ́ ячнэ́пэ? Ту на явэ́са ўса́ды (сак) тэ рикирэс холы́, пал-дова́ со Ту радынэсапэ тэ сыкавэс ла́ска.

¹⁹Тыро́ ило́ нэвэ́стыр пэрэ́ла пал амэ́ндэ, и Ту штакирэса (злэса) амаро́ чорипэ́н, и Ту чхурдэса сарэ́ амарэ́ грэ́хи дро хорипэ́н морёскиро (дэрьявэ́скиро).

²⁰Ту сыкавэса чачипэ́н Яково́скэ, и ла́ска Авраамо́скэ (Абрамоскэ), пал со Ту совлахадян амарэ́ дадэ́нгэ дрэ дывэса́ ґаратунэ́.