Read Baltic Romani Bible 2019 – Библия - Пэ Балтитко Романи чиб (Романэс) 2019 Наумо 3 Bible Online

Наумо 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Наумо 3

¹Бида пэ ратвало фо́ро! Ёв исын пхэрдо́ хохаибнаса и чорибнаса, дро саво́ на пириячэна тэ чорэн.

²Шунэлапэ зоралэ́с, сыр марэла чхупны, и чхинэла кан, сыр ро́ты праста́на (грюкинэна), сыр уклистэ́ грая грымитынэна, сыр марибны́тка вурдэна́ подухтэна!

³Уклистэнгирэ халадэ́ сы́гэс вурняна зяиндлэ курталэнца, марибны́тка бустя́ отмарнапэ зяиндлэ курталэнца; бут исын замардэ́, бут бут исын мулэ́ тру́пы, со нашты́ тэ погинэс: — ёнэ обштавэнапэ пир тру́пы.

⁴Дава́ пал биладжакунэ́-джувлякирэ бут грэ́хи, сави́ исын хуланы пэ човахано джиныбэ́н; сави́ здэлас на́цыи пал пэ́скиро биладжаипэ́н, и кхэри́тка ро́ды и пал ла́киро човахано джиныбэ́н.

⁵“Акэ, Мэ сом проти ту́тэ”, — ракирэ́ла янголэ́нгирэ-болыбна́скиро Рай Дэвэ́л: “Мэ ґазда́ва тыри́ подя пэ тыро́ муй, Мэ сыкава́ва нацыенгэ тыро́ нангипэ́н, и кралипнэнгэ тыри́ ладж.

⁶И Мэ ява́ва тэ чхурдав тэ приячэл кэ ту джунгалы мэл, Мэ кэра́ва тут адя́кэ, со ту ячэса бэдытко, и Мэ чхува́ва тут пэ сабэн сарэ́нгэ.

⁷И явэ́ла адя́кэ, со кажно (сва́ко) ману́ш, кон явэ́ла тэ дыкхэ́л тут, явэ́ла тэ нашэ́л ту́тыр, и тэ ракирэ́л: ‘Ниневи́я исын пашты чхучи́! Кон жа явэ́ла тэ тангинэ́л ясвэ́нца ла? Кай тэ латхав манушэ́н тэ подрикирэн ду́хо дрэ ту́тэ, Ниневи́е?”

⁸Ци ту фэды́р сан Но-Амоностыр[2], саво́ сыс машки́р рэ́ки (лэня́) пашы́л Нило, пашы́л саво́ тхадэнас паня́, савэскиро вало исыс сыр мо́рё (дэрья́в), и мо́рё (дэрья́в) сыс сыр ва́нта трусця́л дава́ фо́ро?

⁹Эфиопия и Еги́пто сыс да бимеракиро форо́скиро зоралыпэ́н, Копты и Ливийцы сыс лэ́скирэ помогипнаскирэ.

¹⁰Нэ лэс лыджинэ́ криг, и ёв гия́ дро пле́но, лэ́скирэ биятэ́н адя́кэ-паць розмардэ пэ котэра́ пэ трушулытка ґасы (вули́цы). Ёнэ, Асирийцы, чхурдынэ́ жре́биё пал лэ́скирэ манушэ́ндэ, савэ́ сыс дрэ паты́в и сарэ́ лэ́скирэ барэ́ рая сыс пхандлэ зандирьенца.

¹¹Ту адя́кэ-паць явэ́са маты, гарадёса, ту адя́кэ-паць явэ́са тэ родэс гарадыибэн вэргостыр.

¹²Сарэ́ форо́скирэ рикирибэна исын сы́рбы инжыритка кашта́ (дрэвы) спялонэ инжыроса: ко́ли тринскирэса лэн, тэды ёнэ пэрэ́на дро муй одолэскиро, кон камэ́ла тэ хал лэн.

¹³Дыкхэ́н! Машкир тырэ́ халадэ́ндэ исын мурша́ сыр джувля́: по́рта пэ тырэ́ пхувья́ псирады буґлэс анги́л вэргэ́ндэ: яг похала штабы пэ тыри́ по́рта.

¹⁴Пхэр пани́ ваш обчхувибэн форо́скиро! Зорьякир тырэ́ форо́скирэ рикирибэна! Джа́ пал ґлэя (глина), и штакир растворо, подкэр бов тэ обхачкирэн бара́!

¹⁵Одо́й яг похала тут, а курта́ла чингирэла тут; ёй хасякирэ́ла (ха́ла) тут сы́рбы скочко. На дыкхи́ пэ дова́, со тэ ячэн тумэ́ бутэды́р-ада́кицы бут, сыр листэнгирэ кирмэ; тэ ячэн тумэ́ бутэды́р-ада́кицы бут, сыр пхакитка скочки (саранча)!

¹⁶Ту́тэ яця́ бутэды́р тылгарьен сыр чэргэня́ пэ болыбэ́н нэ далэ́ сыр пхакитка скочки (саранча): розвурнянапэ и вурняна криг.

¹⁷Тырэ́ тхага́рья исын сыр пхакитка скочки, тырэ́ халадэ́нгирэ барыдыра́ исын сыр грасторэ (кузнечыки), савэ́ кэрэ́на гня́зды (ку́фы) дрэ вантакирэ шчэли, а сыр кхам ґаздэ́лапэ, то ёнэ вурняна пэ́скэ криг, и на джиндло́ штэ́то, кай сыс ёнэ.

¹⁸Тырэ́ чхупна́рья (пастыри) исын сутэ́, кра́лё Асирия́киро, а тырэ́ лачхэ́-родоскирэ рая (упратунэ) откхинёна штылэ́с. Тырэ́ мануша́ росчхурдынэ тэ дживэ́н пэ бэ́рги, и ние́кх на скэдэ́ла лэн.

¹⁹Тыро́ фра́нсо (рана) нашты́ тэ састякирэс, тырэ́-масэнгирэ фуя́ (язвы) исын хор. Сарэ́, кон шунэ́ла дая́ звесь пал ту́тэ, явэ́на тэ марэ́н дрэ васта́ радыма́тыр; пал-дова́ со нанэ ние́кх ману́ш, конэ́с тыро́ фуипэ́н тэ обджал ригаса.