Read Baltic Romani Bible 2019 – Библия - Пэ Балтитко Романи чиб (Романэс) 2019 Софония 3 Bible Online

Софония 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Софония 3

¹Бида пэ дава́ фо́ро, дро саво́ мануша́ бунтуинэна проти Дэвлэ́стэ и, савэ́нгэ нашты́ тэ допатяс, савэ́ притасавэ́на явирэ́н.

²Дро дава́ фо́ро на кандэ́на зан Ра́скирэ-Дэвлэ́скири, на камэ́на, соб (кай) Ёв тэ пирисыклякирэл лэн. Адалэ́ мануша́ на допатяна Ра́скэ-Дэвлэ́скэ, ёнэ на джа́на пашылэды́р кэ Дэвэ́л.

³Лэ́скирэ тхага́рья (кня́зи) машки́р лэ́ндэ исын сы́рбы шчэра́ (левы), со рыкинэна; лэ́нгирэ сэнда́рья исын сы́рбы бэльвэлитка рува́, савэ́ на ячкирэна ни екх кокалкицо ваш атасятуно дывэ́с.

⁴Лэ́скирэ проро́ки исын балвалитка, савэ́нгэ нашты́ тэ патяс, лэ́скирэ рашая́ магирэна свэ́нто штэ́то; ёнэ пхагирэна Мойза́скиро Зако́но, сыр камэ́на.

⁵Нэ чачипна́скиро Рай Дэвэ́л исын машки́р дава́ фо́ро, Ёв на кэрэ́ла пир начачипэ́н. Кажно зло́ко Ёв янэ́ла Пэ́скиро чачипэ́н пэ дуд, лэс ухты́лла (до́си): нэ начачунэ мануша́ на джинэ́на ладжаипэ́н.

⁶“Мэ хасякирдём манушы́тка на́цыи (народы)”, — ракирэ́ла Рай Дэвэ́л, — “лэ́нгирэ зоралэ́ ва́нты фэнштрорэнца пхагирдэ́ дрэ руи́ны; Мэ кэрдём адя́кэ, со пэ лэ́нгирэ вули́цы (га́сы) яця́ чхучо́, и нико́н на джа́ла пашы́л. Лэ́нгирэ фо́рья исын пхагирдэ́, со ние́кх ману́ш нанэ, со ние́кх ману́ш на дживэ́ла”.

⁷Мэ пхэндём форо́скирэ манушэ́нгэ: “Чачэс, тумэ́ фэ́ни (то́ка) дарэ́н Ма́ндыр, соб (кай) Мэ тэ пирисыклякирав тумэн”, соб (кай) тумарэ́ кхэра́ тэ на явэ́н хасякирдэ́, соб (кай) Мэ на сэндякирав пхарэ́с тумэн. Нэ ёнэ тася́рлэс (ра́нэс) уштынэ́, и кэрдэ́ саро́ бипатывакирэс.

⁸“Палдава́ ужакирэн Ман”, — ракирэ́ла Рай Дэвэ́л, — “кэ/ жы́ко дава́ дывэ́с, дро саво́ Мэ ява́ва тэ бангякирав. Миро припхэныбэ́н исын дасаво, соб (кай) тэ кэдав кхэтанэ́ кралипэна́ тэ вычхував пэ лэ́ндэ Мири́ холы́, сари́ Мири́ бари холын; пал-дова́ со Мирэ́-зэвлыныпнаскири яг похала сари́ пхув.

⁹Тэ́ньци Мэ да́ва палэ манушэ́нгэ жужэ́ (чыста) ушта́ и годы́, соб (кай) ёнэ могинэ́нас тэ кхарэ́н лав Ра́скирэ-Дэвлэ́скиро, тэ дынаринэ́н Лэ́скэ дро екх псико́.

¹⁰Дурипнастыр пал рэ́ки (лэня́) дрэ Ефиопия, Мирэ́ мангипнаскирэ (поклонники), Мирэ́ чхая́ Мирэ́ росчхурдынэ манушэ́ндыр, янэ́на Ма́нгэ свэ́нта дыибэна́.

¹¹Дро дова́ Дывэ́с тумэ́, Мирэ́ мануша́лэ, на явэ́на тэ ладжан ни савэ́ тумарэ́ рэндэ́ндыр, дрэ савэ́ тумэ́ кэрдэ́ чорипэ́н проти Ма́ндэ; адя́кэ, сыр тэ́ньчи Мэ ла́ва криг тумарэ́ машкиралыпнастыр кодолэ́н, кон древа́н радынэ́лапэ пэ́скирэ пхутькирибнастыр, и буты́р тумэ́ на явэ́на тэ задэнпэ пэ Мири́ свэ́нто бэ́рга.

¹²И Мэ мэкава машки́р тумэ́ндэ ковлэ́-илэ́скирэ и напхутькирдэ манушэ́н, и ёнэ явэ́на тэ допатян дро лав Ра́скирэ-Дэвлэ́скиро.

¹³Мануша́, кон яця́пэ Израилёстыр, на явэ́на тэ кэрэ́н начачипэ́н и тэ ракирэ́н хохаибэ́н, и на латхэлапэ хоханы чиб дро лэ́нгиро муй. Ёнэ явэ́на тэ чаравэнпэ и тэ пасён, и ние́кх на явэ́ла тэ трашавэл лэн.

¹⁴Ра́дынпэ и ба́га, чха́ё Сионо́скири! Дэ го́дла, о Израиле! Древа́н ра́дынпэ и кэр ра́дыма пэ́скирэ илэскэ, о чхай Сионо́скири!

¹⁵О Рай Дэвэ́л лыя́ криг пхаро́ сэ́ндо пэ ту́тэ, Ёв традыя́ криг тырэ́ вэргос. Кра́ли Израилёскиро, о Рай Дэвэ́л исын машки́р тумэ́ндэ, тумэ́ буты́р на явэ́на тэ дыкхэ́н бари биба́хт.

¹⁶Дро дова́ дывэ́с явэ́ла пхэндло́ Ерусалимоскэ: “На дар, Сио́но, мэк тэ на пэрэ́н тэлэ́ тырэ́ васта́ сыр бизорья́кирэ”.

¹⁷О Рай Дэвэ́л, тыро́ Дэвэ́л, исын ту́са, Ёв исын Зоралыпнаскиро тэ зракхэ́л тут; Ёв явэ́ла древа́н тэ радынэ́лпэ радыма́са, Ёв дэ́ла рама́нё (миро) ту́кэ Лэ́скирэ ласкатыр, Ёв явэ́ла тэ радынэ́лпэ ту́тыр весёлымаса (лошаса).

¹⁸“Мэ ява́ва тэ скэдав лэн”, — ракирэ́ла Рай Дэвэ́л, — “савэ́ тугинэна пал упхэндлэ свэ́нки, кон исын машки́р тумэ́ндэ, пэ савэ́ндэ банг исын сыр ґа́мо.

¹⁹Акэ, дрэ дава́ часо Мэ роскэдавапэ кодолэнца сарэ́нца, Кон притасадя тумэн, Мэ зракха́ва лангалэн, и Мэ кэдава кхэтанэ́ адалэн, савэ́ традынэ криг. Мэ барьякирава и Мэ да́ва паты́в лэ́нгэ пэ кажно пхув, пэ сави́ ладжакирдэ́ лэн.

²⁰Дро дава́ часо Мэ яна́ва тумэн палэ, и адя́кэ-паць Мэ скэда́ва тумэн. Мэ да́ва паты́в тумэ́нгэ и ґазда́ва тумэн машки́р сарэ́ манушэ́ндэ пэ пхув, ке́ли Мэ яна́ва палэ тумарэ́ пленонэн анги́л тумарэ́ якха́”, — пхэндя́ Рай Дэвэ́л.