Read Baltic Romani Bible 2019 – Библия - Пэ Балтитко Романи чиб (Романэс) 2019 Заха́рия 10 Bible Online

Заха́рия 10 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Заха́рия 10

¹Мангэ́н Ра́стыр-Дэвлэ́стыр брышы́нд, ке́ли вэснакиро ёв трэй тэ явэ́л; Дэвэ́л зазяинэла блискавицаса и дэ́ла тумэ́нгэ ґэнсто брышы́нд, чар пэ фэ́лда.

²Пал-дова́ со тэрафимы башэна чиба́са, а зумакирибнаскирэ (вешчуны) дыкхэ́на хоханэ́с и роспхэнэна сунэ́ хоханэ́; ёнэ ковлякирэна илэ чхучипнаса (пустотаса); ваш-дова́ ёнэ псирэ́на сыр бакрэ́, савэ́нгэ исын пхаро́, пал-дова́ со нанэ чхупнарис (пастырёс).

³Пэ чхупнарьендэ захачи́я холын Мири́, и бузнэн (козлэн) Мэ ява́ва тэ мара́в; пал-дова́ со явэ́ла янголэ́нгирэ-болыбна́скиро Рай Дэвэ́л кэ ґурто Пэ́скиро, Юда́скиро кхэр, и чхувэ́ла лэн, сыр тхагаритконэ грэс пэ́скирэс пэ марибны́тко фэ́лда.

⁴Лэ́стыр явэ́ла вэнглытко бар, лэ́стыр — килоро ваш ша́тра, лэ́стыр — лу́ко тэ марэ́лпэ, лэ́стыр явэ́на тхэмэ́скирэ барыдыра́ (правители).

⁵И ёнэ явэ́на зоралэ́ мурша́, савэ́ явэ́на тэ штакирэн вэргэ́н, ко́ли исын марибэ́н, сыр мэл пэ га́са, и марэ́нпэ, пал-дова́ со Рай Дэвэ́л исын лэ́нца, и задэна ёнэ бари ладж одолэ́нгэ, савэ́ исын уклистэ́ пэ грэ́ндэ.

⁶Мэ зоралякирава кхэр Юда́скиро и зракха́ва кхэр Ёзаскиро, и Мэ рискира́ва лэн палэ, пал-дова́ со ковлыя ило́ Миро пал лэ́ндэ, и ёнэ явэ́на, сы́рбы Мэ на мэкавас лэн: пал-дова́ со Мэ Рай-Дэвэ́л лэ́нгиро, и Мэ вышунава лэн.

⁷Сыр зорало́ мурш явэ́ла Ефре́мо; тэды явэ́ла тэ зрадынэлапэ ило́ лэ́нгиро, сыр моля́тыр (виностыр); и дыкхэ́на дава́ чхавэ́ лэ́нгирэ и ёнэ явэ́на тэ радынэ́нпэ; ра́дыма явэ́ла дро лэ́нгиро ило́ ваш Ра́скэ-Дэвлэ́скэ.

⁸Мэ да́ва шоля, лэ́нгэ и скэда́ва лэн, пал-дова́ со выракхцём лэн; ёнэ явэ́на ада́кицы бутджинэ, сыр сыс англэды́р.

⁹И Мэ росчхувава тэ дживэ́н лэн машки́р манушэ́ндэ, и дрэ дуратунэ́ пхувья́, ёнэ лэ́на тэ рипирэ́н пал Ма́ндэ, и ёнэ лэ́на тэ дживэ́н пэ́скирэ чхаворэнца (биятэнца), и рисёна палэ.

¹⁰Мэ адя́кэ-паць рискира́ва лэн палэ Египто́скирэ пхувья́тыр и Асириятыр, скэда́ва лэн, и Мэ лыджа́ва лэн пэ Галаадоскири пхув и пэ Лива́но адя́кэ пэ ґара́, сыр на ухты́лла (на́доси) штэ́то ваш лэ́нгэ.

¹¹И ёнэ джа́на пир бари би́да пир мо́рё (дэрья́в) и Мэ хасякира́ва валны моритка адя́кэ, со тэрдёна сарэ́ хорипна рэкакирэ (лэнякирэ), тыкнёла Асуроскиро пхутькирибэ́н и отлэна скипетро Египто́стыр.

¹²И Мэ зоралякирава лэн дрэ Растэ-Дэвлэ́стэ, и ёнэ лэ́на тэ псирэ́н дро лав Лэ́скиро”, — ракирэ́ла Рай Дэвэ́л.