Read Baltic Romani Bible 2019 – Библия - Пэ Балтитко Романи чиб (Романэс) 2019 Заха́рия 11 Bible Online

Заха́рия 11 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Заха́рия 11

¹Откэр (псирав), Лива́но, по́рта тыри́, соб (кай) тэ похал яг тырэ́ кедры.

²Ров, кипарисо, пал-дова́ со пыя́ кедро, пал-дова́ со и барэ́ кашта́ подынэпэ; ровэ́н, дэмбы Васаноскирэ, пал-дова́ со пыя́ ґэнсто вэш.

³Зан чхупнарьенгири (пастырьенгири) исын шундлы ровибнаса, пал-дова́ со чхучия лэ́нгири вольныма; шунэлпэ холям зан тэрнэ́-шчэрэнгири, пал-дова́ со хасия́ Иорданоскиро шукарипэ́н.

⁴Адя́кэ ракирэ́ла Рай Дэвэ́л, Дэвэ́л миро: “чарав бакрэ́н, савэ́ джа́на тэл чхури,

⁵савэ́н хулая́ чхинэна би дара́киро, а одолэ́, савэ́ лэн бикиндлэ, ракирэ́на: ‘Парикирибэн Дэвлэ́скэ; мэ барвалыём!” И лэ́нгирэ чхупна́рья (пастухи) на тангинэна пал лэ́ндэ.

⁶Пал-дова́ со Мэ на лава́ буты́р тэ тангинав манушэ́н далэ́ — пхувьякирэн’, — ракирэ́ла Рай Дэвэ́л; — акэ, Мэ отда́ва манушэ́н, кажнонэс дрэ васта́ лэ́скирэ сэмэнцакэ, и дрэ васта́ лэ́скирэ крали́скэ. Ёнэ лэ́на тэ хасякирэ́н пхув, нэ Мэ на зракха́ва лэн лэ́нгирэ вастэ́ндыр’.”

⁷И Мэ чарадём бакрэ́н, савэ́ джа́на тэл чхури, бакрэ́н, чачэс, чорорэн. Мэ лыём Пэ́скэ дуй саструнэ́ дэстэ́ (жэзлы) и Мэ лыём тэ кхарав екх ‘Шук’, а яви́р — ‘Саструнэ́ Пэнты, и чарадём бакрэ́н.

⁸И Мэ хасякирдём тринэн чхупнарьен дро екх чхон; и одрисия ди Миро лэ́ндыр, сыр лэ́нгиро ди одрисия Ма́ндыр.

⁹Теньци Мэ пхэндём: “Мэ на лава́ тэ чарав тумэн. Саво́ исын тэ мэрэ́л, мэк тэ мэрэ́л, и хасибнаскиро — мэк тэ хасёл, а савэ́ ячэ́напэ, мэк тэ хан маса́ екх явирэстыр.

¹⁰И Мэ лыём Миро саструно дэсто́ — Шук — и Мэ пхагирдём лэс пэ паш, соб (кай) тэ кхосав криг завето, со счхудём Мэ сарэ́ манушэ́нца.

¹¹И сыс дэсто́ пхагирдо́ дро до дывэ́с. И тэ́ньчи ґалынэ́ чорорэ́ машки́р бакрэндэ, савэ́ ужакирдэ Ман, со дава́ сыс лав Ра́скирэ-Дэвлэ́скиро.

¹²И Мэ пхэндём лэ́нгэ: “Ко́ли тумэ́ камэ́на, дэн Ма́нгэ Миро плэскирибэн; ко́ли над — на дэн; и ёнэ важындлэ Ма́нгэ сыр плэскирибэн трия́нда рупувэ́ ловорэ.

¹³И пхэндя́ ма́нгэ Рай Дэвэ́л: “Чхурдэ лэн дрэ пири́ кхангирья́кири, — кадасави вучи́ тими́н, сави́ ёнэ дынэ́ пал Ма́ндэ! И лыём Мэ трия́нда рупуворэ и чхурдыём лэн дро Кхэр Ра́скирэ-Дэвлэ́скиро ваш манушэ́скэ, кон липинэл пирья глинатыр (глэятыр).

¹⁴И пхагирдём Мэ яви́р саструно дэсто́ Миро — Саструнэ́ Пэнты, соб (кай) тэ роспхандав пшалыпэн машки́р Юдастэ и Израилёстэ.

¹⁵И Рай Дэвэ́л пхэндя́ ма́нгэ: “Лэ ишчо (инкэ́) пэ́скэ струменто екхэскирэ дылынэ́ чхупнарьендыр.

¹⁶Пал-дова́ со, акэ, Мэ ячавава пэ дая́ пхув чхупнарис, саво́ на лэ́ла тэ пэкэлпэ пал хаськирибнаскирэндэ, и ёв на лэ́ла тэ родэ́л нашадэн, на лэ́ла тэ састякирэл насвалэн, и састэн ёв на лэ́ла тэ чаравэл, нэ ёв явэ́ла тэ хал мас тхулэнгиро, и копыты (ная) лэ́нгирэ роскушнэ пэ котэра́.

¹⁷Мэк тэ явэ́л би́да пэ джунгалэ́ пастырёстэ, саво́ ячкирэ́ла пэ́скирэ бакрэ́н! Мэк тэ чхинэл чхури васт лэ́скиро и чачи́ якх лэ́скири! Мэк тэ шутёл сарэ́са лэ́скиро васт, и мэк лэ́скири чачи́ якх сарэ́са тэ корьёл.”