Read Baltic Romani Bible 2019 – Библия - Пэ Балтитко Романи чиб (Романэс) 2019 Заха́рия 8 Bible Online

Заха́рия 8 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Заха́рия 8

¹И сыс лав янголэ́нгирэ-болыбна́скиро, Ра́скирэ-Дэвлэ́скиро:

²“Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Росхолясыём Мэ пэ Сио́но барэ́ холына́са, и барэ́ холя́са холясыём Мэ пэ лэ́стэ’.

³Адя́кэ ракирэ́ла Рай Дэвэ́л: ‘Обрисёвава Мэ кэ Сио́но и Мэ ла́ва тэ джива́в дро Ерусалимо, и лэ́ла тэ кхарэлпэ Ерусалимо ‘чачипна́скиро фо́ро’, и бэ́рга янголэ́нгирэ-болыбна́скирэ Ра́скирэ-Дэвлэ́скири — Свэнтымакири Бэ́рга.’

⁴Адя́кэ ракирэ́ла янголэ́нгирэ-болыбна́скиро, Рай Дэвэ́л: ‘Нэвэ́стыр пхурэ́ и пхурья лэ́на тэ бэшэ́н пэ вули́цы (га́сы) дро Ерусалимо, кажно кашторэса дро васт пир дова́, со барэ́ бэрша́ лэ́нгэ.

⁵И вули́цы (га́сы) далэ́ форо́скирэ явэ́на пхэрдэ́ тэрнэ́-баршэнгирэнца и тэрнэ́-бэршэнгир΄енца, савэ́ лэ́на тэ броинэн пэ лэ́скирэ га́сы.

⁶Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Ко́ли дава́ ваш народо, саво́ яця́пэ, сыкадёла дивно дрэ дывэса́ далэ́, тэды наушто дава́ исын дивно и ваш Ма́нгэ?’ — ракирэ́ла Рай Дэвэ́л, янголэ́нгирэ-болыбна́скиро.

⁷Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Акэ, Мэ выракхава Мирэ́ манушэ́н вастокоскирэ рига́тыр и рига́тыр, кай пэрэ́ла кхам;

⁸Мэ яна́ва палэ лэн, и ёнэ лэ́на тэ дживэ́н кэ Ерусалимо, и явэ́на Мирэ́ мануша́ (манушэ́нца), и Мэ ява́ва лэ́нгиро Дэвэ́л, пир патяибэ́н и дро чачипэ́н.’

⁹Адя́кэ ракирэ́ла янголэ́нгирэ-болыбна́скиро Рай Дэвэ́л: ‘Зоралякирэн тумэ́ васта́ тумарэ́, кон шунэ́ла акана́ лава́ далэ́ пророкэ́нгирэ вуштэндыр, савэ́ сыс пашы́л, сыр сыс кэрдо́ Кхэр (Кхангири́) янголэ́нгирэ-болыбна́скиро Ра́скирэ-Дэвлэ́скиро, соб (кай) тэ ґаздэлпэ Кхангири́.

¹⁰Пал-дова́ со англэды́р одолэ́ дывэсэ́ндыр на сыс плэскирибэн ваш манушэ́скэ, на сыс плэскирибэн ваш буты́ гурувэнгири, ни одолэ́скэ, кон явэ́ла, ни кодолэ́скэ, кон джа́ла, на сыс рама́нё (миро) вэргэ́ндыр; и домэкавас Мэ, соб (кай) кажно ману́ш тэ явэ́л вэ́рго явирэскэ.

¹¹И кана́ ваш Мирэ́ манушэ́нгэ, савэ́ ячнэ́пэ, Мэ на сом адасаво́, сыр со́мас ґарэдыр,’ — ракирэ́ла Дэвэ́л, янголэ́нгирэ-болыбна́скиро.

¹²Пал-дова́ со сеиндло гив явэ́ла тэ дэл прибарипэн, винаграды́тко хру́сто дэ́ла пэ́скирэ мурицы, нэ пхув дэ́ла, со ёй барьякирдя, и болыбэ́н дэ́ла пахлын (роса) пэ́скири: и саро́ дава́ Мэ да́ва ада́кицы манушэ́нгэ, савэ́ ячэ́напэ.

¹³И явэ́ла: сыр тумэ́, Юда́скиро кхэр и Израилёскиро кхэр, са́нас прокошлэ, машки́р Наюдытконэ́ на́цыи, адя́кэ Мэ зракха́ва тумэн, и тумэ́ явэ́на ваш явирэ́нгэ бахталэ́; на андыршан, мэк тэ явэ́н тумарэ́ васта́ зоралэ́!”

¹⁴Пал-дова́ со адя́кэ ракирэ́ла, янголэ́нгирэ-болыбна́скиро Рай Дэвэ́л: “Сыр Мэ дыём годы́ Пэ́скэ тэ сэндякирав пхарэ́с тумэн, ке́ли тумарэ́ дада́ холякирэнас Ман, — ракирэ́ла Рай Дэвэ́л, — и Мэ на отпхэндёмпэ адалэстыр,

¹⁵адя́кэ нэвэ́стыр задуминдём Мэ дрэ далэ́ дывэса́ тэ кэра́в лачхипэ́н Ерусалимоскэ и Юда́скирэ кхэрэ́скэ; на андыршан!

¹⁶Акэ, бутя́, савэ́ тумэ́ сан бангэ́ тэ кэрэ́н: пхэнэ́н чачипэ́н екх екхэ́скэ, пиро́ чачипэ́н и рама́нё (миро) сэндякирэн кэ по́рта тумари́.

¹⁷Нико́н тумэ́ндыр, мэк тэ на рикирэ́л дро ило́ пэ́скиро холы́ пэ сэмэнцэндэ пэскирэндэ, на кэрэ́н хоханы совэ́л; пал-дова́ со саро́ дава́ Мэ бидыкхава,’ — ракирэ́ла Рай Дэвэ́л.

¹⁸И сыс кэ мэ лав янголэ́нгирэ-болыбна́скирэ, Ра́скирэ-Дэвлэ́скиро:

¹⁹Адя́кэ ракирэ́ла янголэ́нгирэ-болыбна́скиро Рай Дэвэ́л: Посто дро шта́рто чхон и посто дро па́нджто чхон, и посто дро эфта́то чхон и дро дэ́што, мэк тэ явэ́л ваш кхэр Юда́скиро радымакиро и бахтало́ свэ́нко; фэ́ни тумэ́ сан бангэ́ тэ рикирэ́н чачипэ́н и рама́нё.’

²⁰Адя́кэ ракирэ́ла янголэ́нгирэ-болыбна́скиро Рай Дэвэ́л: “Ишчо (инкэ́) явэ́на тэ явэ́н яви́р мануша́ и джиибна́скирэ бутэ́ форье́ндыр;

²¹И явэ́на мануша́ екхэ форо́стыр кэ мануша́ явирэ форо́стыр и пхэнэ́на: “Явэ́н тэ мангаспэ анги́л Растэ-Дэвлэ́стэ и тэ родас янголэ́нгирэ-болыбна́скирэ Рас-Дэвлэ́с”; и кажно пхэнэ́ла: “джа́ва и мэ.”

²²И явэ́на бут на́цыи и зоралэ́ народы, соб (кай) тэ латхэ́н Рас-Дэвлэ́с, янголэ́нгирэ-болыбнаскирэс, дро Ерусалимо и тэ мангэнпэ патер΄яса анги́л муй Растэ-Дэвлэ́стэ.

²³Адя́кэ ракирэ́ла янголэ́нгирэ-болыбна́скиро Рай Дэвэ́л: “Явэ́ла дрэ долэ́ дывэса́, со дэшджинэ явирэ-чибьенгирэ Наюдытконэ́ нацые́ндыр, лэнапэ пал яго́ро (пал по́дя) пэ и́ди Юдаскири и пхэнэ́на: ‘Амэ джа́са ту́са, пал-дова́ со амэ шундя́м, со тумэ́нца исын Дэвэ́л.’”