Read Baltic Romani Bible 2019 – Библия - Пэ Балтитко Романи чиб (Романэс) 2019 Матфеё 16 Bible Online

Матфеё 16 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Матфеё 16

¹И Фарисе́и и Садукеи подгинэ́, и, соб (кай) тэ пропатякирэн Исусо́с, палдава́ ёнэ мангнэ́ тэ сыкавэ́л лэ́нгэ ґерты́к (знаме́ниё) болыбна́стыр.

²Нэ, Ёв отпхэндя́ лэ́нгэ, пхэни́: “Ке́ли да бэльвэ́ль, тумэ́ ракирэ́на, ‘Явэ́ла лачхи́ вэдра (погода), пал-дова́ со болыбэ́н исын лоло́;’

³и пэ зло́ко: ‘Ададывэ́с яври́ исын вихура, пал-дова́ со болыбэ́н исын лоло́ и зачхакирдо облокэ́нца.’ Тумэ́ джинэ́на, сыр тэ ґалён пир болыбэ́н, нэ тумэ́ на джинэ́на тэ ґалён ґертыка́ (знаме́нии) пир разно часо.

⁴Тумэ́ сан бибахтало́ и биладжаипнытко ро́до, саво́ родэ́ла ґерты́к, на явэ́ла тумэ́нгэ ґерты́к, апри́ч Ионаскири гертык.” И Ёв мэкця́ лэн и гия́ пэ́скэ.

⁵И ке́ли сыкляибны́тка явнэ́ пэ яви́р брэ́го, ёнэ бистырдэ тэ лэн пэ́са лабы маро́.

⁶И Ису́со пхэндя́ лэ́нгэ: “Дыкхэ́н жа, ракхэ́нпэ Фарисее́нгирэ и Садукеенгирэ сыклякирибнастыр, саво́ исын сы́рбы рошчына (закваска).”

⁷Нэ ёнэ лынэ́ тэ пириракирэн машки́р пэ́стэ: “Амэ на лыям лабы маро́.”

⁸Ису́со джиндя́, со лэ́ндэ сыс пэ годы́, пхэндя́: “Тумэ́ сан мануша́ на барэ́ патяибна́са, со́скэ ж тумэ́ обракирэна машки́р пэ́стэ, со тумэ́ндэ нанэ маро́?

⁹Нау́што тумэ́ ишчо (инкэ́) на ґалёна и на рипирэна пал пандж лабы маро́ ваш пандж тысёнцы, и кицы́ кхудэ́ тумэ́ скэдынэ́?

¹⁰И пал эфта́ (битринэ́нгиро дэш) лабы маро́ ваш штар тысёнцы, и кицы́ кхудэ́ тумэ́ скэдынэ́?

¹¹Сыр тумэ́ на ґалёна, со Мэ пхэндём на пал маро́: ‘Ракхэ́нпэ Фарисее́нгирэ и Садукеенгирэ рошчынатыр?’”

¹²Тэ́ньци ёнэ ґалынэ́, со Ёв пхэндя́ лэ́нгэ тэ ракхэ́нпэ на марунэ рошчынатыр, а Фарисее́нгирэ и Садукеенгирэ сыклякирибнастыр.

¹³И ке́ли Ису́со явдя́ пэ пхувья́ Кесария Филипоскири, Ёв пхучэлас Пэ́скирэ сыклытконэндыр, ракири́: “Пал Конэ́стэ мануша́ гинэ́на Ман, Манушэ́скирэ Чхавэ́с?”

¹⁴И ёнэ пхэндлэ́: “Вари-савэ́ пал Ианостэ Болдэипнаристэ, яви́р пал Илиястэ, яви́р пал Еремеёстэ ци пал екхэ́стэ пророкэндыр”

¹⁵Ёв жа ракирэ́ла лэ́нгэ: “Нэ тумэ́ пал конэ́стэ Ман гинэ́на?”

¹⁶И Си́моно Пэ́три отпхэндя́ и пхэндя́: “Ту сан Христо́со, Чхаво́ Джидэ́ Дэвлэ́скиро, Саво́ дживэ́ла ве́чнэс”

¹⁷И Ису́со отпхэнэ́лас лэ́скэ и пхэндя́: “Бахтало́ ту сан, Си́моно Иониноскиро, пал-дова́ со на ману́ш, конэ́стэ исын рат и маса́, дыя́ дава́ чачипэ́н дрэ тыри́ годы́, нэ Миро Дад, Саво́ исын дро Болыбна́скиро Раё.

¹⁸И Мэ пхэна́ва ту́кэ: Ту сан Пэ́три, пэ дава́ бар Мэ кэра́ва Кхангири́ Мири́, и люноскири зор (мэрибэ́н) на лэ́ла упралыпэ́н пэ ла́тэ.

¹⁹Мэ да́ва ту́кэ клыдына вударэндыр, савэ́ исын Кралипнастыр дро Болыбна́скиро Раё, Савэ́са хулаинэла Дэвэ́л; и со ту запхэнэса пэ пхув, дова́ явэ́ла запхэндло дро Болыбна́скиро Раё, и со домэкэса пэ пхув, дова́ явэ́ла домэкно дро Болыбна́скиро Раё.’”

²⁰Тэ́ньци Ёв припхэндя́ шылалэс сыкляибнытконэ́нгэ ни конэ́скэ тэ на ракирэ́н, со Ёв исын Христо́со.

²¹Долэ́ часостыр лыя́ Ису́со тэ ракирэ́л яснэс Лэ́скирэ сыкляибнытконэ́нгэ, со Лэ́скэ трэй тэ джал дро Ерусалимо и бут мэ́ньки тэ пиридживэл годэпхурэндыр и рашангирэндыр и лылваритконэндыр, и явэ́ла Ёв замардо, и пэ три́то дывэ́с Ёв отджидёла.

²²И кхардя́ Пэ́три Лэс дрэ риг, и лыя́ тэ отракирэл: “Потангинэ Пэс, Раё Дэ́вла! Мэк тэ на явэ́л дава́ Ту́са.”

²³Нэ Ёв рисия́ кэ Пэ́три и пхэндя́: “Джа́ криг Ма́ндыр, на́лачхо; ту Ма́нгэ сан, сыр бар пэ дром, пал-дова́ со ту думинэса на пал Дэвлы́тко, а пал манушы́тко.”

²⁴Тэ́ньци Ису́со пхэндя́ Пэ́скирэ сыкляибнытконэ́нгэ: “Ко́ли вари-конэ́скэ пир ило́ тэ джал Ма́нца, мэк тэ на думинэл буты́р пал пэ́стэ, и мэк тэ лэл трушу́л пэ́скиро, и мэк тэ джал пал Ма́ндэ.”

²⁵Нэ ко́ли вари-кон, савэ́скэ исын дро́го джиибэ́н пэ́скиро тэ зракхэ́л, кодова́ хасякирэ́ла лэс, и вари-кон, саво́ отдэ́ла пэ́скиро джиибэ́н ваш Ма́нгэ, кодова́ латхэ́ла Лэс.

²⁶Саво́ лачхипэ́н исын манушэ́скэ, ко́ли лэ́стэ явэ́ла саро́, со лэ́скэ трэй далэ́ свэто́стыр, а ёв хасякирэ́ла пэ́скиро ве́чно джиибэ́н? Нэ со ману́ш могинэ́ла тэ отдэ́л кучэдыр дро паруибэн пал пэ́скиро джиибэ́н?

²⁷Пал-дова́ со явэ́ла Чхаво́ Манушэ́скиро дрэ зорьякири сла́ва Пэ́скирэ Дадэ́скирэ Янголэнца, и тэды кажно (сва́ко) дорэсэ́ла, со явэ́ла мол пал пэ́скиро дова́, со кэрдя́ ёв дро джиибэ́н.

²⁸Чачэс, Мэ ракира́ва тумэ́нгэ: ада́й исын вари-савэ́ мануша́, савэ́ на мэрэ́на, ко́ли анги́л явэ́на тэ дыкхэ́н Чхавэ́с Манушэ́скирэ, саво́ явэ́ла сыр Кра́ли дро Кралипэ́н Пэ́скиро.”