Read Baltic Romani Bible 2019 – Библия - Пэ Балтитко Романи чиб (Романэс) 2019 Матфеё 23 Bible Online

Матфеё 23 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Матфеё 23

¹Тэды Ису́со пхэндя́ манушэ́нгэ и Пэ́скирэ сыкляибнытконэ́нгэ:

²“Пэ Мойза́скиро штэ́то сыклякирэ́на лылвари́тка и Фарисе́и;

³палдава́ саро́, со ёнэ пхэнэ́на, кандэ́н и кэрэ́н саро́, а на кэрэ́н, сыр ёнэ кэрэ́на; пал-дова́ со ёнэ на кэрэ́на дова́, со ёнэ сыклякирэ́на,

⁴и ёнэ пхандэна кхэтанэ́ барэ́ пхарипэна и чхувэ́на лэн пэ манушэ́нгирэ псикэ́, а кокорэ́ на камэ́на и ангуштэса тэ дэн васт лэ́нгэ.

⁵Нэ саро́, со ёнэ кэрэ́на, — дава́ ваш дова́, соб (кай) лэн тэ дыкхэ́н мануша́: ёнэ буґлякирэна пхарты (ленты) пэ чикат и пэ васт мангипнытконэ лавэ́нца и барьякирэна брынды (фальбонки),

⁶и выкэдэна най фэдэды́р штэ́ты пал кхардэ́ скаминда и англатунэ́ штэ́ты дрэ синагоги,

⁷соб (кай) мануша́ тэ дэн ‘паклоно’ лэ́нгэ пэ таргитка штэ́ты и тэ кхарэ́н лэн ‘Равви’;

⁸нэ мэк нико́н тэ на кхарэл тумэн ‘Равви’; пал-дова́ со амэ́ндэ исын екх Сыклякирибна́скиро, тумэ́ ж сан пша́ла машки́р пэ́стэ.

⁹И никонэ́с пэ пхув тэ на кхарэ́н ‘дадэ́са’, пал-дова́ со тумэ́ндэ исын екх Дад, Саво́ исын дро Болыбна́скиро Раё.

¹⁰И тэ на кхарэ́н тут ‘сыклякирибна́скиро’; пал-дова́ со исын екх тумэ́ндэ Сыклякирибна́скиро Христо́со.

¹¹И кон барэды́р тумэ́ндыр пир штэ́то машки́р манушэ́ндэ, мэк тэ явэ́л дына́ри тумэ́нгэ.

¹²Нэ дова́, кон ґаздэ́ла пэс, лэс Дэвэ́л чхувэ́ла тэлэды́р, а кон чхувэ́ла пэс тэлэды́р, кодолэ́с Дэвэ́л ґаздэ́ла вучэды́р.

¹³Бида тумэ́нгэ, дуемуитка лылвари́тка и Фарисе́и, савэ́ зачхакирэна вудара́ дро Кралипэ́н дро Болыбна́скиро Раё анги́л манушэ́ндэ; пал-дова́ со тумэ́ кокорэ́ на заджа́на, и тумэ́ сан тэрдэ́ пэ дром одолэ́ндэ, савэ́ камэ́на тэ заджа́н.

¹⁴Бида тумэ́нгэ, дуемуитка лылвари́тка и Фарисе́и, со тумэ́ обхана пивленгирэ (удовэнгирэ) кхэра́ и пэфроми ґара́ (длу́гэс) мангэ́напэ Дэвлэ́скэ: пал дава́ тумэ́нгэ явэ́ла пхари́ ка́ра.

¹⁵Бида тумэ́нгэ, дуемуитка лылвари́тка и Фарисе́и, со тумэ́ проджа́на мо́рё (дэрья́в) и пхув, соб (кай) тэ рискирэ́н екхэ манушэ́с тэ патял Наюдэндыр: и ке́ли ёв прилэ́ла лав, тэды кэрэ́на лэ́стыр кадасавэс, саво́ дрэ дуй мо́лы исын буты́р мол тэ джал дро лю́но (адо), сыр тумэ́ сан.

¹⁶Бида тумэ́нгэ, корорэ́ лыджаибна́скирэ, савэ́ ракирэ́на: ‘Кон совлахала кхангирьяса, дава́ исын нисо́; нэ кон совлахала кхангирья́кирэ сувнака́са, кодова́ ману́ш исын банго́ тэ кэрэ́л пир лав.’

¹⁷Тумэ́ сан бигодякирэ и корорэ́, со исын кучэдыр: сувнака́й ци кхангири́, сави́ свэнцякирэла сувнака́й?

¹⁸И, ‘кон совлахала алтарёса нисо́, нэ кон совлахала свэнтонэ́ дыибнаса, кодова́ исын банго́ тэ кэрэ́л саро́.’

¹⁹Тумэ́ сан корорэ́ мануша́! Со ж исын кучэдыр: свэ́нто дыибэ́н ци алта́рё, кай свэ́нто дыибэ́н свэнцякирэлапэ ваш Дэвлэ́скэ?

²⁰Палдава́, кон совлахала алтарёса, совлахала сарэ́са, со мануша́ чхудэ́ пэ алта́рё;

²¹И кон совлахала кхангирьяса, совлахала ла́са и Кодолэса, Кон дживэ́ла дрэ кхангири́.

²²И кон совлахала Болыбна́скирэ Раёса, совлахала Дэвлэ́скирэ штэтоса, кай Дэвэ́л хулаинэла, и Лэ́са, Саво́ исын бэшто́ пэ дава́ штэ́то.

²³Бида тумэ́нгэ, дуемуитка лылвари́тка и Фарисе́и: пал-дова́ со тумэ́ дэ́на дэ́што ме́ра мятатыр, укропостыр, кминостыр, нэ тумэ́ на кутякирэна дова́, со буты́р трэй дро Зако́но: чачуно́ сэ́ндо и тангипэ́н и патяибэ́н: дава́ трэиндя́ тэ кэрэ́н и адя́кэ-паць тэ на бистрэн пал яви́р.

²⁴Тумэ́ сан корорэ́ лыджаипнарья, савэ́ пирицэдинэна дзындзарис (комарос), нэ накхавэна верблюдос!

²⁵Бида тумэ́нгэ, дуемуитка лылвари́тка и Фарисе́и: пал-дова́ со тумэ́ жужакирэна тахта́й (чаша) и чаро́ яврестыр, нэ андра́л ёнэ сыкавэ́на тумари́ бокх кэ чу́жо миштыпэ́н и сквапныма.

²⁶Ту сан короро́ Фарисеё! Анги́л выжужакир андра́л тахта́й и чаро́, соб (кай) тэ явэ́н жужэ́ яврестыр.

²⁷Бида тумэ́нгэ, дуемуитка лылвари́тка и Фарисе́и: пал-дова́ со тумэ́ сан сыр коплицы, савэ́ исын парнякирдэ и савэ́ исын гожа яврестыр, нэ андра́л ёнэ исын пхэрдэ́ кокалэнца мулэ́ манушэ́ндыр и сарэ́ джунгалыпнаса (брыдкимаса).

²⁸Адя́кэ-паць тумэ́ яврестыр сыкадёна сыр патяибнытка мануша́ манушэ́нгэ, нэ андра́л тумэ́ сан дуемуитка и древа́н грэхи́тка.

²⁹Бида тумэ́нгэ, дуемуитка лылвари́тка и Фарисе́и, пал-дова́ со кэрэ́на коплицы пророкэнгэ и гожакирэна помники патяибнытконэнгэ,

³⁰и ракирэ́на: ‘Ко́ли амэ дживасас дрэ амарэ́ дадэнги́рэ дывэса́, амэ на явасас мала́ одолэ́нгэ, савэ́ мулякирэнас пророкэ́н.’

³¹Пир дая́ причына тумэ́ допхэнэна пэ пэ́стэ, со тумэ́ сан кодолэнгирэ чхавэ́, савэ́ мулякирэнас пророкэ́н:

³²тэды кончынэн дава́, со тумарэ́ прапапы лынэ́ тэ кэрэ́н.

³³Тумэ́ сан сапа, ро́до сапитко, сыр тумэ́нгэ тэ нашэ́н сэндостыр дро лю́но (адо)?

³⁴Акэ, палдава́ Мэ бичхава́ва кэ тумэ́ пророкэ́н и годьварэ́ манушэ́н и лылваритконэн; вари-савэ́н лэ́ндыр тумэ́ мулякирэна и примарэна пэ трушу́л, и явирэ́н явэ́на тэ шулякирэн дрэ синагоги и традэ́н штэто́стыр пэ штэ́то;

³⁵палдава́ мэк тэ гинэлпэ пал тумэ́ндэ саро́ рат патяибнытконэ манушэ́нгиро, со тумэ́ прочхудэ пэ пхув: Авелёскирэ патяибнытконэ ратэстыр кэ Захариёскиро рат, Варахиёскирэ чхавэ́скиро, конэ́с тумэ́ мулякирдэ́, машки́р Кхангири́ и алта́рё.

³⁶Чачэс, Мэ ракира́ва тумэ́нгэ: кадай сари́ ка́ра явэ́ла пэ дава́ ро́до.

³⁷Ерусалимэ! Ерусалимэ! Дро саво́ мулякирэнас пророкэ́н и шулякирэнас барэ́нца кодолэ́н, савэ́н бичхадэ́ кэ ту. Кицы́ мо́лы Мэ кама́м тэ скэдав чхаворэ́н тырэ́н, сыр чириклы скэдэ́ла чириклорэн тэл пхак и тумэ́ на камлэ́!

³⁸Акэ, кхэр тумаро́ мэкэлапэ чхучо́ (пусто) тумэ́нгэ.

³⁹Палдава́ Мэ ракира́ва тумэ́нгэ: тумэ́ на явэ́на тэ дыкхэ́н Ман кадалэ́ дывэсэ́стыр анги́л дова́, сыр тумэ́ пхэнэ́на: ‘Бахтякирдо́ исын Одова́, Саво́ джа́ла ваш Дэвлэ́скиро лав.’”