Read Baltic Romani Bible 2019 – Библия - Пэ Балтитко Романи чиб (Романэс) 2019 Матфеё 3 Bible Online

Матфеё 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Матфеё 3

¹Дрэ долэ́ дывэса́ явэ́ла Иа́но Болдэипнари тэ пхэнэ́л лав пир чхучи́ (пусто) пхув дрэ Юдэ́я,

²и раки́рла: “Приґалён пэ́скирэ грэ́хи (бизы), какана́ явдя́ пашылэды́р Кралипэ́н дро Болыбна́скиро Раё.”

³Пал-дова́ со ёв исын одова́, пал конэ́стэ пхэндя́ проро́ко Исаё: “Дава́ исын зан, сави́ дэ́ла го́дла пир чхучи́ пхув: ‘Кэрэ́н дром Ра́скэ-Дэвлэ́скэ, чхувэ́н Лэ́скэ маму́й (пря́мо) дром.’”

⁴Кокорэстэ Ианостэ сыс урибэ́н верблюдытконэ балэндыр; цыпитко кусты́к пэ лэ́скирэ маса́; лэ́скиро хабэ́н сыс акриды и авги́н (мэда) фэлдытко.

⁵Тэды джа́нас кэ ёв саро́ Ерусалимо и сари́ Юдэ́я и сарэ́ штэ́ты Иорданоскирэ,

⁶и ёв болдя лэн дро Иорда́но, пало́ дова́, сыр ёнэ приґалёнас пэ́скирэ грэ́хи.

⁷Нэ сыр ёв дыкхця́, со бут Фарисе́и и Садукеи джа́нас тэ болэнпэ кэ ёв, пхэндя́ лэ́нгэ: “Тумэ́ сан сапитко ро́до! Кон сыклякирдя́ тумэн тэ нашэ́н Дэвлэ́скирэ холя́тыр, со явэ́ла сыг?

⁸Кэрэ́н вари-со, соб (кай) тэ допхэнэн, со тумэ́ мэкнэ́ тэ кэрэ́н грэ́хи и рисинэ́ кэ Дэвэ́л.

⁹И на думинэн тэ ракирэ́н пэ́скэ: ‘Авраа́мо сыс дад амаро́;’ пал-дова́ со мэ ракира́ва тумэ́нгэ, со Дэвэ́л могинэ́ла далэндыр барэндыр тэ ґаздэл биятэ́н Авраамо́скэ.

¹⁰Акэ, ужэ товэр пашто́ исын пашы́л каштэскиро корнё (рукх): кажно кашт (дрэ́во), со на лыджа́ла лачхо́ барьякирдо́ (пло́до), чингирэна тэлэ́ и чхурдэна дрэ яг.

¹¹Мэ болава тумэн пане́са пал тумаро́ при ґалыибэ́н дрэ грэ́хи, нэ Ёв, Саво́ джа́ла пал ма́ндэ, исын зоралэды́р ма́ндыр, Конэ́скэ ґэритка мэ на сом мол тэ злав; Ёв явэ́ла тэ болэл тумэн Свэнтонэ́ Духо́са (Фаноса) и яга́са.

¹²Лэ́скиро ґанадытко (лопата) исын дрэ Лэ́скиро васт, и Ёв жужакирэла (чыстинэла) Пэ́скиро шу́рна и скэдэ́ла Пэ́скиро парно́ гив дрэ пиралы́, а пхус хачкирэ́ла яга́са, сави́ на мурдёла.”

¹³Тэ́ньци явэ́ла Ису́со Галилеятыр кэ рэка (лэнь) Иорда́но кэ Иа́но, соб (кай) Иа́но тэ болэл Лэс.

¹⁴Иа́но жа тэрдякирэлас Лэс, ракири́: “Ма́нгэ трэй тэ болавпэ Ту́тэ, а Ту явэ́са кэ мэ?”

¹⁵Нэ Ису́со отпхэндя́ лэ́скэ: “Мэк адя́кэ какана́ тэ явэ́л; пал-дова́ со адя́кэ амэ́нгэ трэй тэ кэра́с пир кажно чачипэ́н.” Тэды ёв домэкэла Лэс.

¹⁶И сыр Ису́со болдяпэ, Ёв гия́ яври́ екха́тыр (сра́зу) пане́стыр, и, акэ, болыбэ́н псирадыя (отчхакирдяпэ), и Иа́но дыкхця́ Дэвлэ́скиро Ду́хо (Фа́но), Саво́ джа́лас тэлэ́ сыр голумбо, и мэкэласпэ тэлэ́ пэ Исусо́стэ;

¹⁷И акэ, зан болыбна́стыр, сави́ ракирдя́: “Кадава́ исын Миро дро́го Чхаво́, дрэ Савэ́стэ исын Мири́ бари ра́дыма.”