Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 1 Bible Online

Лука 1 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 1

¹Пал-дова́ со, сыр бут мануша́ ужэ лынэпэ тэ чхинэн роспхэныбэн пал дова́, со сыс машки́р амэ́ндэ и, со исын древа́н джиндло́ тумэ́нгэ,

²ёнэ уджиндлэ́ манушэ́ндыр, савэ́ пэ́рва дыкхнэ́ дова́ пэ́скирэ якхэ́нца и служындлэ (дынариндлэ́) ваш Дэвлэ́скиро лав, адя́кэ ёнэ пирипхэндлэ амэ́нгэ.

³Палдава́ здыяпэ и ма́нгэ, со явэ́ла мишто́ тэ чхинав ту́кэ, баро́ Теофиле, пало́ дова́, сыр мэ лачхэ́с розґалыём дава́ саро́ англыпна́стыр,

⁴соб (кай) ту тэ джинэ́с чачипэ́н пал дова́, дро со тут сыклякирдэ́.

⁵Дро долэ́ дывэса́, ке́ли Иродо сыс кра́ли пир Юдэ́я, дживдя́ екх раша́й пир лав Заха́рия Авияскирэ раша́нгирэ родо́стыр, пэ́скирэ ромня́са, Ароноскирэ родо́стыр пир лав Елизавета.

⁶Ёнэ ж сыс дуйджинэ́ чачунэ́ анги́л Дэвлэ́стэ, рикирдэпэ кэ Дэвлэ́скирэ припхэныбэна́ и Зако́но.

⁷Лэ́ндэ на сыс чхаворэ́, пал-дова́ со Елизавета на могиндя́ тэ биянэ́л, ёнэ дуйджинэ́ сыс пхурэ́ пир бэрша́.

⁸И сыс адя́кэ: е́кхвар, ке́ли Заха́рия кэрдя́ пэ́скири буты́ сыр раша́й анги́л Дэвлэ́стэ, сыр сыс прилыно пэ́скирэ родо́стыр,

⁹пал раша́нгиро доракирибэ́н пир жре́биё лэ́скэ трэиндя́ тэ заджа́л дрэ Кхангири́ и тэ тхувлякирэл гудлэ́ смолэнца ладаностыр,

¹⁰и сарэ́ мануша́ мангнэпэ Дэвлэ́скэ яври́ дро дава́ часо, ке́ли сыс тхувлякирибэн гудлэ́ смоласа.

¹¹И сыкадыя́ Захарияскэ Дэвлэ́скиро Янго́ло, саво́ сыс тэрдо́ пир чачи́ (право) риг тхувитконэ (кадилытконэ) алтарёстыр.

¹²Заха́рия страхадыя, ке́ли дыкхця́ лэс, и дар пыя́ пэ лэ́стэ.

¹³Нэ Янго́ло пхэндя́ Лэ́скэ: “На андырша, Заха́рия, пал-дова́ со Дэвэ́л шундя́ тыро́ мангипэ́н, и тыри́ ромны́ биянэ́ла чхавэ́с, и ту дэ́са лав Лэ́скэ Иа́но.

¹⁴И явэ́ла ту́кэ бари ра́дыма и весёлыма (лош), и бут мануша́ явэ́на тэ радынэ́нпэ лэ́скирэ бияныпнастыр.

¹⁵Пал-дова́ со ёв явэ́ла баро́ анги́л Растэ-Дэвлэ́стэ, и ёв на явэ́ла тэ пьел мол (вино) и зоралэ́ пибэна, и Свэ́нто Ду́хо (Фа́но) явэ́ла дрэ лэ́стэ ада́й жэ, сыр ёв бияндёла,

¹⁶и ёв рискирэ́ла палэ кэ Лэ́нгиро Рай Дэвэ́л бутэн Израилёскирэ чхавэ́н.

¹⁷И ёв явэ́ла анги́л Растэ-Дэвлэ́стэ, зорья́са и духо́са сыр Или́я, и ёв кэрэ́ла рама́не (миро) машки́р дадэндэ и чхавэ́ндэ, рискирэ́ла пэ чачуно́ дром кодолэ́н, савэ́ на кандэ́на Дэвлэ́с, соб (кай) тэ скэдэл манушэ́н ваш Ра́скэ-Дэвлэ́скэ.”

¹⁸И Заха́рия пхэндя́ Янголоскэ: “Сыр ма́нгэ тэ джина́в, со адя́кэ явэ́ла? Мэ сом пхуро́, и мири́ ромны́ исын ужэ дрэ бэрша́.”

¹⁹И Янго́ло отпхэндя́ Лэ́скэ: “Мэ сом Гавриило, мэ сом тэрдо́ пашы́л Дэвлэ́стэ. Ёв бичхадя́ ман тэ пхэна́в ту́кэ и тэ янав ту́кэ дава́ бахтало́ лав,

²⁰и, ґа́да, ту явэ́са штыл и ту на дэ́са ра́да (на змогинэса) тэ ракирэ́с анги́л дова́ дывэ́с, ке́ли саро́ дава́ кэрэ́лапэ, пал-дова́ со ту на патяндыян Мирэ́ лавэнгэ, савэ́ кэрэ́напэ кэ ко́нцо / яго́ро дро пэ́скиро часо.

²¹И мануша́ ужакирдэ Захарияс и дивиндлэ́пэ пэ дава́, со ёв ґара́ (длу́гэс) на джа́лас яври́ Кхангирья́тыр.

²²Ке́ли ёв выгия́ яври́, ёв на дыя́ ра́да тэ ракирэ́л, и ёнэ ґалынэ́, со сыс лэ́стэ дыкхибэ́н дро Кхангири́; и ёв сыкавэлас вастэ́нца и ёв яця́пэ немо (муто).

²³И ке́ли дывэса́ кончындлэпэ, дрэ савэ́ ёв лыджия́ мангипэ́н Дэвлэ́скэ, ёв рисия́ кхэрэ́.

²⁴И пало́ кадалэ́ дывэса́ э Елизавета, ромны́ лэ́скири яця́ пхари́, и гарадяпэ пандж чхона́ манушэ́ндыр, ракири́ пэ́скэ:

²⁵“Адя́кэ, Рай Дэвэ́л кэрдя́ ваш ма́нгэ”, — пхэндя́ ёй, — “Ёв, ґа́да, кэрдя́ лачхипэ́н ма́нгэ, соб (кай) Ёв тэ лэл криг ма́ндыр ладж анги́л манушэ́ндэ.”

²⁶Дро шо́вто чхон Дэвэ́л бичхадя́ Янголо́с Гавриилос кэ Галилеякиро фо́ро Назарето.

²⁷Кэ Патывалы́ Тэрны́ Джувлы́, сави́ сыс ангрустякирды (доракирды) тэ джал палоро́м пал муршэстэ пир лав Иосифо (Ёза), саво́ сыс Давидо́скирэ родо́стыр; Патываля Тэрня Джувля́ кхардэ́ Мари́я[1].

²⁸И Янго́ло загия́ кэ ёй, и пхэндя́ ла́кэ: “Добридим! Ту сан бахталы́ Дэвлэ́стыр! Дэвэ́л исын Ту́са!”

²⁹Ёй жа страхадыя далэ́ ракирибнастыр, и Ёй дыя́ годы́ пэ́скэ (думиндя) пал дова́; “Со ж далэ́ лава́ значынэна?”

³⁰И Янго́ло пхэндя́ ла́кэ: “На андырша, Мари́я, пал-дова́ со Ту латхян бахталыпэ́н Дэвлэ́стэ.

³¹И Ту явэ́са пхари́, и биянэса Чхавэ́с, и Ту дэ́са лав Лэ́скэ Ису́со.

³²Ёв явэ́ла баро́, и Лэс лэ́на тэ кхарэ́н Чхавэ́са Най Вучэдырэскирэса, и Рай Дэвэ́л дэ́ла Лэ́скэ Давидо́скиро троно, Лэ́скирэ Дадэ́скиро;

³³и Ёв явэ́ла кра́ли пэ Яково́скирэ манушэ́ндэ пэ сарэ́ ве́ки; и Лэ́скиро Кралипэ́н на кончынэлапэ.”

³⁴Нэ Мари́я пхэндя́ Янголоскэ: “Сыр дава́ сашты́ (могинэ́ла) тэ явэ́л, ко́ли мэ на джина́в ромэс?”

³⁵И отпхэндя́ ла́кэ Янго́ло, пхэны: “Свэ́нто Ду́хо (Фа́но) зджа́ла пэ Ту́тэ, и зор Сарэвучэдырэскири учхакирэ́ла Тут; пал-дова́ со Свэ́нто Чхаво́, Саво́ бияндёла, явэ́ла тэ кхарэлпэ Дэвлэ́скиро Чхаво́.

³⁶И ишчо (инкэ́), сэмэ́нца Тыри́, Елизавета, яця́ пхари́ дрэ ла́кирэ пхурэ́ бэрша́; и ёй, савья́ джиндлэ́ сыр бичхаворэнгирья, какана́ исын пхари́ шо́вто чхон,

³⁷пал-дова́ со Дэвлэ́стэ нанэ нисо́, соб (кай) Ёв на дэ́лас бы ра́да (могинэлас) тэ кэрэ́л.

³⁸И пхэндя́ Мари́я: “Ѓа́да, мэ сом Дэвлэ́скири писхарица; мэк тэ явэ́л Ма́нгэ пир Тыро́ лав.” И Янго́ло гия́ криг ла́тыр.

³⁹Дрэ далэ́ дывэса́ Мари́я уштыя́ и гия́ сы́гэс пир бэргитко пхув кэ фо́ро дрэ Юдэ́я,

⁴⁰и ёй загия́ дро Захарияскиро кхэр и дыя́ “добридим” Елизаветакэ.

⁴¹И сыс адя́кэ: ке́ли Елизавета шундя́, сыр Мари́я дыя́ “добридим” ла́кэ, тыкно́ бия́то тринскирдяпэ упрэ́ екх мо́ло дро ла́киро пэр, и тэды Свэ́нто Ду́хо (Фа́но) пхэрдякирдя́ ла, обрадындя пэс

⁴²и ёй зоралэ́с дыя́ го́дла и пхэндя́: “Ту сан бахтякирды машки́р джувлендэ, и бахтякирдо́ явэ́ла бия́то, савэ́с Ту биянэса!

⁴³И каты́р дава́ явдя́ ма́нгэ, со Ра́скирэ-Дэвлэ́скири Дай явдя́ кэ Мэ?

⁴⁴Пал-дова́, ке́ли мэ шундём, сыр Ту дыя́н “добридим” ма́нгэ, миро тыкно́ бия́то обрадындяпэ радыма́тыр дро миро пэр,

⁴⁵со бахталы́ исын Кодоя, Сави́ упатяндыя дро дова́, со дава́ явэ́ла чачунэ́с, сыр Рай Дэвэ́л пхэндя́ ла́кэ.”

⁴⁶И пхэндя́ Мари́я: “Миро ило́ барьякирэ́ла паты́в Ра́скэ-Дэвлэ́скэ,

⁴⁷и Миро ду́хо (фа́но) радынэ́лапэ пал Дэвлэ́стэ, Мирэ́ Зракхибнаристэ.

⁴⁸Со Ёв подыкхця́ ласкаса пэ Пэ́скирэ писхарицатэ, сави́ исын кандуны, пал-дова́ со далэ́ дывэсэ́стыр сарэ́ ро́ды явэ́на тэ кхарэ́н Ман “бахтякирды”;

⁴⁹пал барипэ́н, саво́ со кэрдя́ Ма́нгэ Зоралыпнаскиро Дэвэ́л, мэк тэ явэ́л свэ́нто Лэ́скиро лав,

⁵⁰И Лэ́скиро тангипэ́н явэ́ла пэ сарэ́ ро́ды, кон дарэ́ла Лэ́стыр.

⁵¹Ёв кэрдя́ барэ́ бутя́ Пэ́скирэ мышчаса (вастэ́са), рострадыя одолэ́н, савэ́ исын пхутькирдэ́ и бут камэ́на дрэ пэ́скирэ илэ;

⁵²Ёв радя тэлэ́ зоралэн лэ́нгирэ тронэндыр и ґаздыя́ упрэ́ кандунэ манушэ́н;

⁵³Ёв чалякирдя чалэ́с бокхалэн, и мэкця́ криг барвалэн чхучэ́ вастэ́нца,

⁵⁴Ёв дыя́ васт (помогиндя) Израилёскэ, Лэ́скирэ дынари́скэ, соб (кай) тэ рипирэл Лэ́скиро тангипэ́н,

⁵⁵сыр Ёв дыя́ лав и кэрдя́ амарэ́ дадэ́нгэ, Авраамостыр кэ Лэ́скиро ро́до дрэ ве́ки.”

⁵⁶Мари́я сыс кэ ёй пашэ́ трин чхона́, и тэ́ньчи Ёй рисия́ дро Пэ́скиро Кхэр.

⁵⁷Ке́ли Елизаветакэ явдя́ часо тэ биянэ́л, ёй бияндя́ чхавэ́с.

⁵⁸И шундлэ́ ла́кирэ сусе́ды (кота́рья) и сэмэнцы, со Дэвэ́л сыс лачхо́ кэ ёй, и радындлэпэ кхэтанэ́ ла́са.

⁵⁹И сыс адя́кэ: ке́ли биятоскэ (муршорэскэ) сыс охто́ (бидуе́нгиро дэш) дывэса́, ёнэ явнэ́ тэ обчхинэн лэс, и ёнэ камлэ́ тэ кхарэ́н чхавэ́с “Заха́рия” пир дадэ́стэ,

⁶⁰нэ Елизавета, дай лэ́скири, пхэндя́: “Над, Лэ́скиро лав явэ́ла Иа́но.”

⁶¹Ёнэ пхэндлэ́ ла́кэ: “Нанэ никонэ́с дро саро́ тыро́ ро́до, савэ́стэ исын дасаво лав.”

⁶²Ёнэ пхучнэ́ вастэ́нца лэ́скирэ дадэ́стыр, сыр ёв камдя́ тэ кхарэл чхаворэс.

⁶³Ёв мангдя́ пхалори тэ чхинэл, и чхиндя́ “Иа́но” лэ́скэ лав и сарэ́ ж дивиндлэ́пэ пэ дава́.

⁶⁴И екха́тыр Захарияскиро муй откэрдяпэ, лэ́скири чиб отпхандяпэ, и ёв лыя́ тэ ракирэ́л, и тэ шарэл Дэвлэ́с.

⁶⁵Мануша́, савэ́ дживдэ́ пашы́л одо́й, страха́дынэ, и сари́ бэргитко пхув Юдэ́я ракирдя́ пал дава́.

⁶⁶И сарэ́нгэ, кон шундя́ дава́, запыя дро ило́ и ёнэ ракирдэ́: “Со да явэ́ла долэ́ биятостыр?” Пал-дова́ со Дэвлэ́скиро васт сыс пэ лэ́стэ.

⁶⁷Свэ́нто Ду́хо (Фа́но) пхэрдякирдя́ Захарияс, лэ́скирэ дадэ́с, Саво́ лыя́ тэ ангилпхэнэл, ракири́:

⁶⁸“Бахтало́ исын Рай Дэвэ́л, Израилёскиро Дэвэ́л, Саво́ явдя́ тэ дыкхэ́л Пэ́скирэ манушэ́н и тэ выракхэл лэн,

⁶⁹Ёв дыя́ амэ́нгэ зоралэ́ Зракхибнарис, саво́ исын Дына́ри Давидо́скирэ родо́стыр,

⁷⁰Сыр Дэвэ́л и дыя́ лав бут бэрш палэ пир Пэ́скирэ Свэнтонэ́ пророкэ́ндэ, савэ́ пхэндлэ́,

⁷¹со Ёв зракхэ́ла амэн амарэ́ вэргэ́ндыр и кодолэнгирэ вастэ́ндыр, савэ́ древа́н на вырикирэна амэн,

⁷²и Ёв потангинэла (пожалинэла) амарэ́ дадэн и рипирэла Пэ́скиро Свэ́нто Завето.

⁷³Со пэ дава́ Ёв дэ́ла совла́х амэ́нгэ, сыр Ёв дыя́ амарэ́ прапапускэ Авраамо́скэ,

⁷⁴тэ зракхэ́л амэн вастэ́ндыр амарэ́ вэргэ́ндыр, соб (кай) амэ тэ дынарина́с би дара́киро Лэ́скэ,

⁷⁵пир свэнтыма и патяибэ́н анги́л Лэ́стэ пир сарэ́ амарэ́ дывэса́.

⁷⁶И тут, чхаворо́, явэ́на тэ кхарэ́н пророкоса Най Вучэдырэскирэса, пал-дова́ со ту явэ́са тэ джас анги́л Растэ-Дэвлэ́стэ тэ скэдэс дром Лэ́скэ,

⁷⁷соб (кай) тэ роспхэнэс манушэ́нгэ пал дова́, со ёнэ зракхэнапэ, пал-дава́ со Дэвэ́л отмэкэ́ла лэ́нгирэ грэ́хи,

⁷⁸пал-дова́ со, сыр амаро́ Дэвэ́л тангинэла, и амэн сам дро́га Лэ́скэ, и зачхувэла кхам тэ уштэл вычипнастыр,

⁷⁹тэ свэнцынэл пэ одолэ́ндэ, савэ́ дживэ́на дро калыпэ́н (цямлыпэ́н) и дрэ дар мэрибна́стыр, соб (кай) тэ джа́н амарэ́ ґэра́ пир дром кэ рама́нё (миро).”

⁸⁰О бия́то барьёлас и ячэласпэ зоралэды́р дро ду́хо (фа́но); ёв дживдя́ пэ чхучи́ пхув анги́л дывэ́с, сыр тэ сыкадел Израилёскирэ манушэ́нгэ.