Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 10 Bible Online

Лука 10 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 10

¹Пало́ дава́ Рай Дэвэл выкэдыя́ яви́р эфтадэша́ сыкляибнытконэ́н и бичхадя́ лэн пир дуендэ анги́л Пэ́стэ дро кажно фо́ро и гав, карик Ёв Кокоро́ камдя́ тэ джал.

²Ёв пхэндя́ лэ́нгэ: “Убияндыпэн исын барвало́, а бутярнэ́ исын на́бут; мангэ́н пал дава́ Рас-Дэвлэ́с, Кон исын Хула́й пэ фэ́лды, соб (кай) Ёв тэ бичхавэл бутярнэн пэ Пэ́скиро убияндыпэн.

³Джа́н! Мэ бичхава́ва тумэн, сыр бакрэ́н машки́р рувэндэ.

⁴На лэн пэ́са ни муенгиро (кошэлько), ни саква, ни ґэритка, и никонэ́скэ на дэн ‘добридим’.

⁵И ке́ли тумэ́ заджа́на дро вари-саво́ кхэр, англэды́р пхэнэ́н: “Тэ явэ́л рама́нё (миро) тумарэ́ кхэрэ́скэ.”

⁶И ко́ли одо́й явэ́ла ману́ш, саво́ камэ́ла рама́нё (миро), мэк тэ ячэ́лпэ тумаро́ лав “раманёса” пэ лэ́ндэ, ке́ли тумэ́ дынэ́ ‘добридим’ лэ́нгэ; а ко́ли на адя́кэ, мэк тэ рисёл палэ кэ тумэ́ тумаро́ лав мангипнаса Дэвлэ́скэ;

⁷и ячэ́нпэ дро дова́ кхэр, хан и пьен дова́, со исын лэ́ндэ: пал-дова́ со бутярно исын мол плэскирибнаскэ пал пэ́скири буты́. На псирэ́н кхэрэ́стыр дро кхэр.

⁸И ко́ли тумэ́ явэ́на дро вари-саво́ фо́ро и тумэн прилэ́на, хан, со тумэ́нгэ чхувэ́на пэ сками́нд;

⁹састякирэн насвалэн, савэ́ исын дро кхэр, и ракирэ́н лэ́нгэ: ‘Дэвлэ́скиро Кралипэ́н явдя́ пашылэды́р кэ тумэ́’.

¹⁰А ко́ли тумэ́ заджа́на дро вари-саво́ фо́ро, и тумэн на прилэ́на, тэды, сыр тумэ́ выджа́на яври́, пхэнэ́н:

¹¹‘Пхув, со ячяпэ пэ амарэ́ ґэра́, тумарэ́ форо́стыр амэ тринскираса тумэ́нгэ; нэ джинэ́н, со Дэвлэ́скиро Кралипэ́н явдя́ пашылэды́р кэ тумэ́.’”

¹²Мэ ракира́ва тумэ́нгэ, со явэ́ла локхэды́р дро сэндоскиро дывэ́с Содомоскэ, сыр тумарэ́ фороскэ.

¹³Бида ту́кэ, Хоразино! Бида ту́кэ, Вифсаида! Пал-дова́ со, ко́ли дасавэ́ ди́вы, со сыс кэрдэ́ дрэ тумэ́ндэ, тэ явэ́н кэрдэ́ дро Ти́ро и Сидоно, ёнэ ґара́ рискирэнас пэ́скиро джиибэ́н кэ Дэвэ́л дро урибэ́н балытконэ гонэстыр и дро пепло;

¹⁴а Тироскэ и Сидоноскэ явэ́ла локхэды́р дро сэндоскиро дывэ́с, сыр явэ́ла тумэ́нгэ;

¹⁵и ту, Капернау́ме, кэ болыбэ́н ґаздэсапэ! Кэ лю́но (адо) ту явэ́са чхурдыно́ тэлэ́.

¹⁶Кон шунэ́ла тумэн, одова́ шунэ́ла Ман, и кон на прилэ́ла тумэн, одова́ на прилэ́ла Ман; а кон на прилэ́ла Ман, одова́ на прилэ́ла Одолэ́с, Кон бичхадя́ Ман.”

¹⁷И эфтадэша́ сыкляибны́тка явнэ́ палэ барэ́ радыма́са, ракири́: “Раё Дэ́вла! Кокорэ́ налачхэ́ ду́хи (фаны) кандынэ́ амэн, ке́ли амэ ракирдям Тырэ́ лавэ́са.”

¹⁸Ису́со отпхэндя́ лэ́нгэ: “Мэ дыкхцём налачхэ́с, саво́ пыя́ болыбна́стыр сыр блискавица;

¹⁹акэ, шунэ́н: Мэ да́ва тумэ́нгэ зор тэ тэрдён пэ сапэндэ и скорпионэндэ и тэ пиризорьякирэн сари́ вэргоскири зор и нисаво́ чорипэ́н на явэ́ла тумэ́нгэ;

²⁰и тумэ́ на радынэ́нпэ, со налачхэ́ ду́хи (фаны) кандэ́на тумэн, а тумэ́ радынэ́нпэ долэ́стыр, со тумарэ́ лава́ исын зачхиндлэ́ дро болыбэ́н.”

²¹Дрэ дова́-паць мардо́ (шту́нда) Ису́со яця́ древа́н радо Свэнтонэ́ Духо́стыр и пхэндя́: “Мэ барьякирава Тут, Да́до, Рай Дэвэ́л Болыбна́скиро и пхувья́киро, со Ту ґарадян дава́ годьварэндыр и сыклякирдэндыр и откэрдян дава́ тыкнэ́ чхаворэнгэ. Лачхэ́с, Да́до, мэк тэ явэ́л адя́кэ, сыр Ту камдян.

²²Миро Дад пиридыя Ма́нгэ сарэ́ далэ́ кэрибэна; и кон исын Чхаво́, ние́кх на джинэ́ла, екх Дад, и кон исын Дад, ние́кх на джинэ́ла, екх Чхаво́, и одолэ́, конэ́скэ Чхаво́ камэ́ла тэ роспхэнэл.”

²³Тэ́ньци Ису́со рисия́ кэ сыкляибны́тка и пхэндя́ фэ́ни ваш лэ́нгэ: “Бахталэ́ исын тумарэ́ якха́ тэ дыкхэ́н дова́, со тумэ́ дыкхэ́на!

²⁴Мэ пхэна́ва тумэ́нгэ, со бут проро́ки и кра́лья камлэ́ тэ дыкхэ́н дова́, со тумэ́ дыкхэ́на, нэ ёнэ на дыкхнэ́; и тэ шунэ́н дова́, со тумэ́ шундлэ́, нэ ёнэ на шундлэ́.”

²⁵И, ґа́да, екх Законоскиро сыклякирибнари, уштыя́ и ками тэ пропатякирэл Исусо́с, пхэндя́: “Сыклякирибнарискиро! Со ма́нгэ тэ кэра́в, соб (кай) тэ дорэсав ве́чно джиибэ́н?”

²⁶Ису́со отпхэндя́ Лэ́скэ: “Со исын чхиндло́ дро Зако́но? Со ту гинэса?”

²⁷Ману́ш отпхэндя́: “Рикир дрэ пэ́стэ сыр Дро́гима Рас-Дэвлэ́с тырэ́с сарэ́ илэ́са пэскирэса, и сарэ́ тырэ́ духо́са (фаноса), и сарэ́ тырэ́ зорья́са и сарэ́ тырэ́ годя́са, и сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”

²⁸Ису́со пхэндя́ Лэ́скэ: “Ту чачунэ́с отпхэндян, кэр адя́кэ, и ту явэ́са тэ дживэ́с.”

²⁹Нэ Законоскиро сыклякирибнари, ками тэ сыкавэ́л пэс чачунэса, пхуця́ Исусо́стыр: “Кон исын миро пашатуно ману́ш?”

³⁰Ису́со ж отпхэндя́: “Екх ману́ш гия́ Ерусалимо́стыр дро Ерихо́но и пынэ́ пэ лэ́стэ розмарибнарья; ёнэ злынэ лэ́стыр урибэ́н, домардэ́ лэс и гинэ́; и мэкнэ́ лэс пашджидэс.

³¹И сыс адя́кэ, со екх раша́й гия́ долэ́ дромэ́са и, ке́ли дыкхця́ лэс, гия́ дурэды́р.

³²И Левито адя́кэ-паць сыс пэ дова́ штэ́то, подги́я, подыкхця́ и гия́ дурыдыр.

³³Нэ екх самарянино, саво́ традыя́ долэ́ дромэ́са, латхя́ лэс, ке́ли дыкхця́ лэс, яця́ лэ́скэ танго (жалко) далэ́ манушэ́с;

³⁴и ёв подги́я кэ дава́ ману́ш, пирипхандя лэ́скирэ фра́нсы (раны), чхудя́ дзэт (олеё) и мол (вино) пэ раны; тэ́ньчи ёв ґаздыя́ далэ́ манушэ́с пэ ослостэ, яндя́ лэс дро затрадыпнытко кхэр (гостиница) и дыкхця́ пал лэ́стэ.

³⁵И пэ яви́р дывэ́с, ке́ли ёв традэлас пэ́скэ, ёв вытырдыя дуй динарии, дыя́ хула́скэ затрадыпнытконэ кхэрэ́стыр и пхэндя́ лэ́скэ: ‘Дыкх пал лэ́стэ; и, ко́ли ту́тэ уджана буты́р ловэ́, то мэ выплэскирава ту́кэ, ке́ли ява́ва палэ.’

³⁶Кон далэ́ тринэндыр, ту думинэса, исын пашылэды́р кодолэ́скэ, пэ конэ́стэ пынэ́ розмарибнарья?”

³⁷Законоскиро сыклякирибнари отпхэндя́: “Кодова́, кон яця́пэ пашы́л адалэ́ манушэ́стэ.” Тэды Ису́со пхэндя́ Лэ́скэ: “Джа́ и ту кэр адя́кэ-паць.”

³⁸Ке́ли Ису́со и Лэ́скирэ сыкляибны́тка ишчо (инкэ́) гинэ́ дромэ́са, Ису́со загия́ дро екх гав; одо́й сыс екх джувлы́, савья́ кхардэ́ Марфа, ёй прилыя́ Лэс радыма́са дро пэ́скиро кхэр.

³⁹Ла́тэ сыс пхэн, савья́ кхардэ́ Мари́я, ёй бэсця́ кэ Исусо́скирэ ґэра́ и шундя́ Лэ́скирэ лава́.

⁴⁰А Марфа сыс древа́н залыны (залыми) бутяса пир кхэр, и ёй подги́я и пхэндя́: “Раё Дэ́вла! Со Ту думинэса пал дова́, со пхэн мэкця́ ман екхджиня тэ кэра́в сари́ кхэри́тко буты́? Пхэн ла́кэ тэ дзн васт ма́нгэ!”

⁴¹Ису́со отпхэндя́ ла́кэ: “Марфе! Марфе! Ту думинэса и кэрэ́са пхаро́ пэ ило́ пэ́скэ пал бут бутя́,

⁴²нэ екх трэй. Мари́я выкэдыя́ чачуны́ паш, сави́ нико́н на отлэла ла́тыр.”