Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 15 Bible Online

Лука 15 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 15

¹И джа́нас пашылэды́р кэ Ису́со мытоскирэ скэдыбнарья и грэхи́тка мануша́ тэ шунэ́н Лэс:

²и Фарисе́и и лылвари́тка ракирдэ́ холя́са адя́кэ: “Кадава́ ману́ш прилэ́ла грэхитконэ́ манушэ́н и ха́ла лэ́нца.”

³И Ёв пхэндя́ лэ́нгэ дасаво приме́ро (сыкаибэ́н):

⁴‘Кон тумэ́ндыр, конэ́стэ исын шэл бакря́, и ко́ли ёв нашавэла екха, на ячкирэ́ла енядэша пэ чхучи́ пхув и на джа́ла тэ родэ́л кодоля, сави́ хасия́, пака латхэ́ла ла.

⁵А ке́ли ёв латхэ́ла ла, ёв чхувэ́ла ла пэ псикэ́ радыма́са;

⁶а сыр ёв явэ́ла кхэрэ́, кхарэ́ла кэ пэ пэ́скирэ другэн (малэ́н) и суседэ́н (котарье́н) и пхэнэ́ла лэ́нгэ: “Радынэ́нпэ Ма́нца, пал-дова́ со Мэ латхём бакря́, сави́ хасия́.”

⁷Чачэс, Мэ пхэна́ва ту́кэ: адя́кэ-паць явэ́ла буты́р ра́дыма дро болыбэ́н пал екхэ грэхитконэ́ манушэ́стэ, саво́ рискирдя́ пэ́скиро джиибэ́н грэхэ́ндыр кэ Дэвэ́л, сыр пал енядэша еня́ чачипнытконэндэ, конэ́скэ на трэй тэ кэрэ́л дава́.

⁸Ци ко́ли екх джувлы́, конэ́стэ сыс дэш рупувэ́ ґаспря (копейки) и ёй нашавэла екх лэ́ндыр; со ёй на захачкирэла момоля и на ячэ́ла тэ шулавэл дрэ шту́ба и тэ родэ́л ракхибны́ткэс, пака ёй латхэ́ла дая́ ґасприн?

⁹А ке́ли ёй латхэ́ла ловэ́, тэды кхарэ́ла кэ пэ подругэ́н (малне́н) и суседкэн (котаркэн) и пхэнэ́ла: ‘Радынэ́нпэ тумэ́ Ма́нца, мэ латхём ґасприн, сави́ нашадём.’”

¹⁰Мэ пхэна́ва тумэ́нгэ: адя́кэ-паць и радынэ́напэ Дэвлэ́скирэ Янго́лы пал екхэ грэхитконэ́ манушэ́стэ, саво́ рискирэ́ла пэ́скиро джиибэ́н грэхэ́ндыр кэ Дэвэ́л.”

¹¹И ишчо (инкэ́) Ису́со пхэндя́: “Сыс екх ману́ш, конэ́стэ сыс дуй чхавэ́;

¹²и пхэндя́ тэрнэдыр чхаво́ дадэ́скэ: ‘Да́до, дэ ма́нгэ какана́ мири́ паш миштыпна́стыр’. И росчхудя́ дад миштыпэ́н машки́р лэ́скирэ дуе чхавэ́ндэ.

¹³Сыг пало́ саро́ дава́, тырнэдыр чхаво́ скэдыя́ саро́ и гия́ пэ дуратуны пхув и одо́й ёв розмэкця пэ́скирэ ловэ́ дро розмэкно джиибэ́н.

¹⁴Ке́ли ёв розмэкця саро́, со сыс лэ́стэ, ґа́да, бари бокх яця́ пир доя́ пхув; ёв лыя́ тэ бокхалёл;

¹⁵тэды ёв гия́ и тэрдия́ пэ буты́ кхэтанэ́ явирэнца кэ екх хула́й пэ доя́ пхув, а кодова́ ману́ш бичхадя́ лэс пэ пэ́скири фэ́лда тэ чаравэл балычэн;

¹⁶и ёв явэ́лас радо тэ хал чалэ́с балычанэ рошки, со балычэ ханэ́, нэ нико́н на дыя́ лэ́скэ.

¹⁷Тэды ёв догия́ кэ пэ́скири годы́ и пхэндя́: ‘Мирэ́ дадэ́стэ исын ада́кицы бутярнэ́, савэ́ ха́на чалэ́с маро́, а мэ ада́й мэра́ва бокха́тыр!

¹⁸Уштава мэ и джа́ва кэ пэ́скиро дад, пхэна́ва лэ́скэ: ‘Да́до! Мэ кэрдём грэ́хо анги́л Дэвлэ́стэ и анги́л ту́тэ.

¹⁹Мэ буты́р на сом мол, соб (кай) ту тэ кхарэс ман чхавэ́са; лэ ман кэ пэ сыр пэ́скирэ бутярнэс.’

²⁰Уштыя́ ёв и гия́ кэ пэ́скиро дад. Ке́ли ёв сыс ишчо (инкэ́) дур пэ́скирэ кхэрэ́стыр, дад дыкхця́ лэс; дадэ́скирэ илэскэ яця́ танго лэс и дад праста́ндыя, обухтылдя чхавэ́с вастэ́нца и обчамудя лэс.

²¹‘Да́до, — пхэндя́ чхаво́, — мэ кэрдём грэ́хо анги́л Дэвлэ́стэ и анги́л ту́тэ. Мэ буты́р на сом мол, соб (кай) ту тэ кхарэс ман чхавэ́са.’

²²Нэ дад кхардя́ пэ́скирэ писхарье́н: ‘Янэ́н сыгэды́р най фэдэды́р урибэ́н и урьявэн пэ лэ́стэ. Урьявэн ангрусты лэ́скэ пэ васт и тривики пэ ґэра́.

²³Янэ́н тхулэ целянтос, чхинэн лэс и ява́са тэ хас и тэ радынаспэ,

²⁴пал-дова́ со кадава́ миро чхаво́ сы́рбы мыя́ ваш ма́нгэ и какана́ отджидыя́, хасия́ и латхяпэ’. И ёнэ лынэ́ тэ веселинэнпэ (тэ лошалён).

²⁵А пхурэды́р лэ́скиро чхаво́ сыс пэ фэ́лда: и ке́ли ёв джа́лас палэ и джа́лас пашы́л кэ кхэр, тэды шундя́ багаибэн и кхэлыбэн.

²⁶Ёв дыя́ го́дла екхэ дынари́с и пхуця́, со дой дасаво сыс?

²⁷А дына́ри отпхэндя́: ‘Тыро́ пшал явдя́ и тыро́ дад зачхиндя́ тхулэ целянтос, пал-дова́ со тыро́ пшал явдя́ састо́’.

²⁸Ёв холя́сыя и на камдя́ тэ заджа́л дро кхэр. Нэ дад лэ́скиро выгия́ и кхардя́ лэс.

²⁹Нэ пхурэды́р чхаво́ отпхэндя́ дадэ́скэ: ‘Мэ ада́кицы бэрш кэра́ва буты́ пэ ту́тэ и ние́кхвар на пхэндём лав проти тырэ́ упхэныбэна́. Нэ ту ние́кхвар на дыя́н ма́нгэ хоць бузнорэс (козлёнкос), соб (кай) мэ тэ веселинавпэ (тэ лошалёвав) пэ́скирэ малэ́нца;

³⁰а кадава́ тыро́ чхаво́ какана́ явдя́, ке́ли розмэкця саро́ пэ́скиро миштыпэ́н налачхэ́ джувле́нца; нэ ту ж зачхиндя́ тхулэ целянтос ваш лэ́скэ’.

³¹Дад отпхэндя́: ‘Мо чхаворо́! Ту сан со дывэ́с Ма́нца, и саро́, со ма́ндэ исын, исын тыро́;

³²нэ палдава́ трэй тэ веселинаспэ (тэ лошалёвас), со кадава́ тыро́ пшал сыс сы́рбы муло́ ваш амэ́нгэ и какана́ отджидыя́, хасия́ и латхяпэ.’”