Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 16 Bible Online

Лука 16 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 16

¹И пхэндя́ Ису́со ж и Пэ́скирэ сыкляибнытконэ́нгэ: “Сыс екх барвало́ ману́ш, конэ́стэ сыс кхэрэ́скиро барыдыро́, савэ́с мануша́ бангякирэнас хула́скэ, со ёв розмэкэлас хуласкиро миштыпэ́н.

²И адава́ барвало́ ману́ш выкхардя лэс и пхэндя́: ‘Со да мэ шунава пал ту́тэ? Подэ ма́нгэ розгиныбнытко папиря, сыр ту хулаиндян мирэ́ миштыпнаса, пал-дова́ со буты́р ту́кэ нашты́ тэ ячэспэ кхэрэ́скирэ барыдырэ́са.’

³Нэ кхэрэ́скиро барыдыро́ пхэндя́ пэ́скэ: ‘Со ма́нгэ тэ кэра́в, ке́ли Миро рай отлэла ма́ндыр буты́ пир кхэри́тко миштыпэ́н? Мэ на могина́ва тэ ґанавав, ладжава тэ мангав.

⁴Мэ джино́м (джина́в), со мэ ява́ва тэ кэра́в; соб (кай) мануша́ тэ прилэ́н ман дрэ пэ́скирэ кхэра́, ке́ли ман злэна бутя́тыр пир кхэри́тко миштыпэ́н.’

⁵И ёв выкхардя пир екхэ́стэ кэ пэ кажнонэ́ манушэ́с, кон сыс вужло лэ́скирэ ра́скэ, и пхэндя́ пэрвонэскэ: ‘Кицы́ ту сан вужло мирэ́ ра́скэ?’

⁶И одова́ отпхэндя́: ‘Шэл цэбры (меры) дзэт’ (елеё). И кхэрэ́скиро барыдыро́ пхэндя́ Лэ́скэ: ‘Лэ тыро́ росчхиныбнытко, бэш сы́гэс и чхин пандждэша́’.

⁷Тэ́ньци ёв пхуця́ явирэстыр: ‘А кицы́ ту сан вужло мирэ́ ра́скэ?’ И ёв отпхэндя́: ‘Шэл гонэ́ (меры) парно́ гив.’ И кхэрэ́скиро барыдыро́ пхэндя́ лэ́скэ: ‘Лэ тыро́ росчхиныбнытко и чхин охтодэша́’.

⁸И шардя ж рай пэ́скирэ начачунэ кхэрэ́скирэ барыдырэ́с, со ёв адя́кэ годьварэс кэрдя́. Пал-дава́ со мануша́, савэ́нгэ исын дро́го екх дава́ свэ́то, исын годэдыр манушэ́ндыр, савэ́нгэ исын дро́го духовно (фаноскиро) свэ́то.

⁹И Мэ пхэна́ва тумэ́нгэ: малынэнпэ барвалыпнаса далэ́ свэто́стыр, саво́ могинэ́ла тэ явэ́л биба́хт адя́кэ, сыр исын лачхо́ Дэвлэ́скэ, соб (кай), ке́ли дава́ барвалыпэ́н кончынэлапэ, тумэ́ тэ явэ́н прилынэ́ дро ве́чно кхэр.’”

¹⁰Кодова́, кон исын патяибны́тко дро набаро́ рэ́ндо, явэ́ла чачуно́ дро баро́ рэ́ндо; а кодова́, кон исын начачуно дро набаро́ рэ́ндо, явэ́ла адя́кэ-паць начачуно дро баро́ рэ́ндо.

¹¹И ко́ли тумэ́ на са́нас чачунэ́ дро далэ́ свэтоскиро барвалыпэ́н, кон тумэ́нгэ допатяла Болыбна́скиро чачуно́ барвалыпэ́н?

¹²И ко́ли тумэ́ на са́нас чачунэ́ дро чу́жо барвалыпэ́н, кон тумэ́нгэ дэ́ла пэ́скиро миштыпэ́н?

¹³Ние́кх дына́ри (слуга) на могинэ́ла тэ дынарьел дуе рангэ, ци екхэ́с тэ явэ́ла тэ на камэл, нэ явирэ́с тэ камэл, ци явэ́ла чачуно́ кэ екх, а пэ явирэ́стэ явэ́ла тэ дыкхэ́л вучипна́стыр. Тумэ́нгэ нашты́ тэ дынаринэ́н Дэвлэ́скэ и барвалыпнаскэ.”

¹⁴Шундлэ́ саро́ дава́ и Фарисе́и, савэ́ зоралэ́с традынэпэ пал барвалыпэ́н и ёнэ лынэ́ тэ санпэ Исусо́стыр.

¹⁵Ёв пхэндя́ лэ́нгэ: “Тумэ́ сыкавэ́на пэс, со тумэ́ сан чачунэ́ манушэ́нца анги́л манушэ́ндэ, нэ Дэвэ́л джинэ́ла тумаро́ ило́; со мануша́ гинэ́на пал бари паты́в, исын джунгалыпэ́н (брыткима) анги́л Дэвлэ́стэ.

¹⁶Мойза́скиро Зако́но и пророкэ́нгирэ зачхиныбэна сыс анги́л Ианостэ Болдэипнаристэ: далэ́ часостыр бахталы́ зан (звесь) пал Дэвлэ́скиро Кралипэ́н дро Болыбна́скиро Раё миштопхэнэлапэ, и кажно ману́ш зорья́са заджа́ла андрэ́.

¹⁷Нэ сыгэды́р болыбэ́н и пхув проджа́на, сыр екх тыкны буквица (литэрка) Законо́стыр нашадёла.

¹⁸Кажно ману́ш, кон мэкэ́ла пэскирья́ ромня́ и лэ́ла явирья, одова́ кэрэ́ла биладжаипэ́н; и кажно ману́ш, кон лэ́ла явирья, савья́ ром мэкця́, одова́ кэрэ́ла биладжаипэ́н’.

¹⁹“Гада, сыс екх барвало́ ману́ш и ёв урьеласпэ дрэ порфиритко и най фэдыдыр и́дя, хая и пия со фэдэды́р со дывэ́с.

²⁰И сыс екх чороро́ ману́ш, пир лав Лазарё, кон сыс пашто́ пашы́л барвалэскири по́рта и лэ́скирэ маса́ сыс дрэ фра́нсы,

²¹а адава́ бо́го сыс радо тэ чалёл котэрэнца, со пэрэнас барвалэ́ — манушэ́скирэ скаминдэстыр, и джукэла, ке́ли явэ́нас, чарэнас лэ́скирэ фра́нсы.

²²И сыс адя́кэ: ке́ли мыя́ бо́го Лазарё, тэды Янго́лы залыджинэ лэс тэ явэ́л пашы́л Авраамостэ.

²³И барвало́ ману́ш адя́кэ-паць мыя́ и гарадэ́ лэс. И ёв мэнчындяпэ древа́н дро лю́но (адо) и, ке́ли ёв ґаздыя́ якха́, тэды дыкхця́ дура́л Аврамос и Лазарёс, саво́ сыс пашы́л Лэ́стэ.

²⁴И ёв дыя́ го́дла зоралэ́с: ‘Да́до, Аврааме, потангинэ ман и бичха́в Лазарёс, соб (кай) ёв тэ киндякирэл ангу́шт дро пани́ и тэ киндякирэл мири́ чиб, со мэ адя́кэ мэнчынавапэ дрэ дая́ хачкирды яг’.

²⁵Нэ Авра́мо пхэндя́: ‘Чха́ва, пририпир, со ту́тэ сыс лачхо́ джиибэ́н, ке́ли ту са́нас джидо́, а Лазарёстэ сыс пхаро́ джиибэ́н. А какана́ ёв ада́й радынэ́лапэ, а ту мэнчынэсапэ.

²⁶И апри́ч дава́ саро́, машки́р амэ́ндэ исын бидугноскиро пропэрибэн, со одолэ́, кон камэ́ла тэ пириджал адатхы́р кэ тумэ́, нашты́ тэ пириджан кэ амэ.’

²⁷Тэды барвало́ ману́ш пхэндя́: ‘Мэ мангав тут, Да́до, тэ бичхавэл Лазарёс кэ Мирэ́-дадэ́скиро кхэр;

²⁸одо́й ма́ндэ пандж пша́ла, а ёв тэ патякирэл лэн тэ на явэ́н пэ дава́ штэ́то тэ мэнчынэнпэ.’

²⁹Нэ Авраа́мо пхэндя́ лэ́скэ: ‘Лэ́ндэ исын Мо́йза и проро́ки: мэк тэ шунэ́н лэн’.

³⁰А барвало́ ману́ш пхэндя́: ‘Над, Да́до Аврааме! Нэ ко́ли вари-кон мулэ́ндыр тэ явэ́л кэ ёнэ, ёнэ рискирэнас пэ́скиро джиибэ́н кэ Дэвэ́л’.

³¹Нэ Авраа́мо пхэндя́ лэ́скэ: ‘Ко́ли ёнэ на кандэ́на Мойза́с и пророкэ́н, тэды хоць и вари-кон отджидёлас мулэ́ндыр, ёнэ на упатянас.’”