Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 20 Bible Online

Лука 20 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 20

¹Дро екх дасаво дывэ́с, ке́ли Ису́со сыклякирдя́ дрэ Кхангири́ и пхэндя́ бахтало́ лав, раша́нгирэ барыдыра́ и лылвари́тка кхэтанэ́ годэпхурэнца явнэ́ и пхэндлэ́ Лэ́скэ:

²“Пхэн амэ́нгэ, савэ́ правоса Ту кэрэ́са саро́ дава́? Ци кон дыя́ Ту́кэ дасаво право?”

³И Ису́со отпхэндя́ лэ́нгэ: “И Мэ пхучава тумэ́ндыр пал екх, и пхэнэ́н ма́нгэ:

⁴‘Ианоскиро болдэипэн сыс болыбна́стыр ци манушэ́ндыр?’

⁵Ёнэ ж ракирдэ́ машки́р пэ́стэ: ‘Ко́ли пхэна́са, со болыбна́стыр’, Ёв тэды пхэнэ́ла: ‘Со́скэ ада тумэ́ на патяндынэ́ лэ́скэ?’

⁶нэ ко́ли пхэна́са: ‘Манушэ́ндыр,’ тэды сарэ́ мануша́ явэ́на тэ марэ́н барэ́нца, пал-дова́ со ёнэ джинэ́на миштэ́с, со Иа́но сыс проро́ко!”

⁷И ёнэ отпхэндлэ́: “Амэ на джина́са, каты́р ёв сыс.”

⁸И Ису́со пхэндя́ лэ́нгэ: “И Мэ на пхэна́ва тумэ́нгэ, савэ́ правоса Мэ кэра́ва дава́.”

⁹И Ису́со лыя́ тэ ракирэ́л манушэ́нгэ дасаво приме́ро (сыкаибэ́н): “Екх ману́ш чхудя́ винагра́днико и дыя́ лэс дро наймо винаградарьенгэ, и кокоро́ традыя́ пэ баро́ часо.

¹⁰И дро пэ́скиро часо ёв бичхадя́ писхари́с кэ винаградарья, соб (кай) ёнэ тэ дэн лэ́скэ барьякирдэ́ (пло́ды) винаградникостыр; нэ винаградарья ухтылдэ́ лэс, мардэ́ и отбичхадэ лэс криг нисоса.

¹¹И нэвэ́стыр ёв бичхадя́ явирэ писхари́с: нэ ёнэ адя́кэ-паць мардэ́ лэс, ладжакирдэ́ и отбичхадэ лэс криг нисоса.

¹²И нэвэ́стыр ёв бичхадя́ тритонэ писхари́с; нэ ёнэ домардэ́ лэс кэ рат, и традынэ яври́ лэс.

¹³И тэды винаградникоскиро хула́й пхэндя́: ‘Со тэ кэра́в ма́нгэ? Мэ бичхава́ва Мирэ́ дрогонэ́ чхавэ́с. Со ке́ли ёнэ дыкхэ́на лэс, хай, ёнэ явэ́на тэ ладжан, соб (кай) тэ чилавэн лэс.’

¹⁴Нэ ке́ли винаградарья дыкхнэ́ лэс, пхэндлэ́ екх екхэ́скэ: ‘Ѓа́да, явэ́ла хула́й миштыпнаскиро — явэ́н, замараса лэс и лэ́скиро миштыпэ́н явэ́ла амэ́нгэ’.

¹⁵И ёнэ зорья́са лыджинэ́ лэс яври́ и замардэ́. Со явэ́ла тэ кэрэ́л винаградоскиро хула́й лэ́нца?

¹⁶Ёв явэ́ла и мулякирэ́ла адалэ́ винаградарьен и винагра́днико дэ́ла дро наймо явирэ́нгэ.” И ке́ли ёнэ шундлэ́ дава́, тэды пхэндлэ́: “Мэк тэ на явэ́л!”

¹⁷Нэ Ису́со дыкхи́ пэ лэ́ндэ, пхэндя́: “Со дава́ чхиныбэ́н значынэ́ла: ‘Бар, саво́ на прилынэ́ бутярнэ́, яця́ шэралэ́ барэса ваш упрэчхуибэн кхэрэ́скиро.’”

¹⁸И кажно ману́ш, кон пэрэ́ла пэ дава́ бар, розмарэлапэ пэ кокалы́, нэ пэ конэ́стэ ёв пэрэ́ла, ростасавэла кодолэ́с пэ кокалы́.”

¹⁹И раша́нгирэ барыдыра́ и лылвари́тка дынэ́ годы́ пэ́скэ (думиндлэ) дрэ дова́-паць мардо́ (шту́нда) тэ ухтылэ́н Лэс, нэ ёнэ дара́ндынэ манушэ́ндыр, пал-дова́ со ёнэ ґалынэ́, со Ёв ракирдя́ дава́ приме́ро (сыкаибэ́н) пал лэ́ндэ.

²⁰И ёнэ дыкхнэ́ ракхибны́ткэс пал Исусо́стэ, подбичхадэ чораханэ манушэ́н, савэ́ причхудэпэ чачунэ́ манушэ́нца, соб (кай) тэ ухтылэ́н Лэс дро лав тэ здэн Лэс Римо́скирэ балунитконэскэ (правителёскэ), конэ́стэ сыс зор и право тэ сэндинэл.

²¹И подбичхадэ мануша́ пхучнэ́ Лэ́стыр: “Сыклякирибна́скиро! Амэ джина́са, со Ту ракирэ́са и сыклякирэса чачипэ́н, на дыкхи́, саво́ адава́ ману́ш исын:

²²Ци исын пир Зако́но тэ плэскирас мыто кесарёскэ ци над?”

²³Нэ Ису́со джиндя́ лэ́нгири дуемуиткима и пхэндя́: “Со́скэ тумэ́ Ман пропатякирэна?

²⁴Сыкавэ́н Ма́нгэ динариё: конэ́скиро муй и лав исын вычхиндлэ́ ада́й?” Ёнэ отпхэндлэ́ “Кесарёскирэ.”

²⁵Тэды Ису́со пхэндя́ лэ́нгэ: “Отдэ́н кесарёскиро Кесарёскэ, а Дэвлэ́скиро Дэвлэ́скэ.”

²⁶И ёнэ на могиндлэ́ тэ ухтылэ́н Исусо́с дро лав анги́л манушэ́ндэ, а дивиндлэ́пэ пэ Лэ́скиро отпхэныбэ́н и ячнэ́ штыл.

²⁷И явнэ́ вари-савэ́ Садукеи, савэ́ ракирэ́нас, со нанэ отджидыипэн мэрибна́стыр, явнэ́ кэ Ису́со и пхучнэ́:

²⁸“Сыклякирибна́скиро! Мо́йза чхиндя́ амэ́нгэ, со ко́ли мэрэ́ла пшал манушэ́стэ, ячкирэ́ла ромня́ би чхаворэнгиро, мэк лэ́скиро пшал тэ лэл даля ромня́ палоро́м, соб (кай) тэ рискирэ́л палэ ро́до мулэ́ пшалэскиро.

²⁹Сыс эфта́ (битринэ́нгиро дэш) пша́ла, и пэ́рво пшал лыя́ ромня́ и мыя́ би биятэнгиро;

³⁰и яви́р пшал лыя́ ла палоро́м и мыя́ би биятэнгиро;

³¹и три́то пшал лыя́ ла; и сарэ́ эфта́ пша́ла адя́кэ-паць, и мынэ́, и на ячкирдэ́ чхаворэ́н;

³²сыг пал сарэ́ндэ и джувлы́ мыя́.

³³Дро отджидыипэн мэрибна́стыр, конэ́скири ромны́ явэ́ла кадая́ джувлы́? Пал-дова́ со сарэ́ эфта́ пша́ла сыс ла́кирэ рома́.”

³⁴Ису́со пхэндя́ лэ́нгэ: “Мануша́, савэ́ латхэ́на дро́гима дро екх дава́ свэ́то, лэнапэ и выджа́на палоро́м;

³⁵нэ мануша́, савэ́ исын лачхэ́ тэ дживэ́н пэ дова́ свэ́то и тэ отджидён мэрибна́стыр, на явэ́на тэ лэнпэ и тэ выджа́н палоро́м;

³⁶ёнэ на явэ́на тэ мэрэ́н, пал-дова́ со ёнэ явэ́на шэра́ (ра́внэс) Янголэнгэ; и ёнэ явэ́на Дэвлэ́скирэ чхаворэ́, пал-дова́ со ёнэ явэ́на сы́рбы чхаворэ́, савэ́ отджидинэ мэрибна́стыр.

³⁷Нэ сыр мулэ́ отджидёна, Мо́йза сыкадя́ дрэ пэ́скири лылвари́ пал хру́сто, саво́ хачолас яга́са, ке́ли ёв кхарэ́ла Рас-Дэвлэ́с Дэвлэ́са Авраамоскирэса и Дэвлэ́са Исаакоскирэса и Дэвлэ́са Яковоскирэса;

³⁸нэ Ёв исын на Дэвэ́л мулэнгэ, а Ёв исын Дэвэ́л джидэ́ манушэ́нгиро; сарэ́ исын джидэ́ ваш Лэ́скэ.”

³⁹Вари-савэ́ лылвари́тка пхэндлэ́: “Сыклякирибна́скиро! Ту лачхэ́с отпхэндян!”

⁴⁰И лэ́ндэ буты́р на сыс муршыпэн тэ пхучэл Исусо́стыр, пал вари-со Ёв жа пхэндя́ лэ́нгэ:

⁴¹“Сыр дава́ ракирэ́на, со Христо́со исын Чхаво́ Давидо́скиро,

⁴²Дави́до ж кокоро́ пхэндя́ дрэ Псалмэнгири Лылвари́: ‘Пхэндя Рай Дэвэ́л, Мирэ́ Ра́скэ-Дэвлэ́скэ: ‘Бэш пэ чачо́ васт Ма́ндыр,

⁴³пака Мэ чхува́ва вэргэ́н Тырэ́н тэл ґэра́ тырэ́’.

⁴⁴Дави́до ж Кокоро́ кхардя́ Лэс ‘Рай Дэвэ́л”, каты́р жа Ёв исын чхаво́ Лэ́скиро?’”

⁴⁵И ке́ли сарэ́ мануша́ шундлэ́ Исусо́с, Ёв пхэндя́ Пэ́скирэ сыкляибнытконэ́нгэ:

⁴⁶“Ракхэ́нпэ лылваритконэндыр, савэ́ камэ́на тэ псирэ́н дрэ диндькирдэ урибэна́ и камэ́на, соб (кай) мануша́ тэ дэн ‘паклоно’ лэ́нгэ пэ таргитка штэ́ты; савэ́ камэ́на тэ бэшэ́н пэ англатунэ́ штэ́ты дрэ синагоги и пал кхардэ́ скаминда;

⁴⁷савэ́ обхана пивленгирэ кхэра́ и мангэ́напэ Дэвлэ́скэ ґара́ (длу́гэс), соб (кай) лэн тэ дыкхэ́н. Адасавэн манушэ́н ужакирэ́ла пхаро́ сэндякирибэн.”