Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 22 Bible Online

Лука 22 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 22

¹Явэ́лас сыг Свэ́нко Апреснокэнгиро, саво́ кхардэ́ Патради́,

²и раша́нгирэ барыдыра́ и лылвари́тка думиндлэ, сыр тэ мулякирэ́н Исусо́с чораханэ́с, пал-дова́ со ёнэ дара́ндынэ манушэ́ндыр.

³Тэ́ньци на́лачхо (сатана) загия́ дро Юда́скиро ило́, савэ́с кхардэ́ Искариото и ёв сыс екх дэшудуе́ сыкляибнытконэндыр.

⁴И ёв гия́ и ракирдя́ раша́нгирэ барыдырэ́нца и халадытконэ барыдырэ́нца, сыр тэ дэл Исусо́с дрэ васта́ лэ́нгэ.

⁵И ёнэ обрадындлэпэ и дынэ́ лав тэ дэн лэ́скэ ловэ́.

⁶Юда дыя́ лав тэ кэрэ́л дава́ и лыя́ тэ родэ́л лачхи́ ваканцыя (случаё), соб (кай) тэ здэл Исусо́с на анги́л манушэ́ндэ.

⁷Явдя́ Апреснокэнгиро Дывэ́с, ке́ли трэиндя́ тэ чхинэн Патрадитконэ бакрорэс (Патради́).

⁸И бичхадя́ Ису́со Пэтрис и Ианос, пхэни́: “Джа́н и кэрэ́н Патрадитко Хабэ́н ваш амэ́нгэ, соб (кай) амэ тэ хас лэс.”

⁹Нэ ёнэ пхучнэ́: “Кай камэ́са, соб (кай) амэ тэ кэра́с?”

¹⁰Ису́со ж пхэндя́ лэ́нгэ: “Ѓа́да, ке́ли тумэ́ явэ́на тэ заджа́н дро фо́ро, тэды тумэн пирилэла ману́ш, саво́ явэ́ла тэ лыджа́л пири́ пане́са; джа́н пал лэ́стэ дро кхэр, дро саво́ ёв заджа́ла,

¹¹и тумэ́ пхэнэ́н кхэритконэ́ хула́скэ: ‘Сыклякирибна́скиро раки́рла ту́кэ: ‘Кай явэ́ла шту́ба, соб (кай) Мэ Пэ́скирэ сыкляибнытконэ́нца тэ хав Патради́?’

¹²И ёв сыкавэ́ла упратуны бари шту́ба; одо́й кэрэ́н сками́нд ваш амэ́нгэ.’”

¹³И гинэ́ сыкляибны́тка и латхнэ́, сыр лэ́нгэ Ису́со пхэндя́ и кэрдэ́ Патрадитко Хабэ́н.

¹⁴И ке́ли явдя́ мардо́ (часо), Ису́со бэсця́ пал сками́нд кхэтанэ́ дэшудуе́ Апостолэнца.

¹⁵И пхэндя́ Ёв лэ́нгэ: “Мэ древа́н камдём тэ хав дава́ Патрадитко Хабэ́н тумэ́нца анги́л дова́, сыр Ма́нгэ тэ вырикирав мэ́ньки.

¹⁶И Мэ пхэна́ва тумэ́нгэ, со коригэды́р (позжэды́р) далэ́стыр Мэ буты́р на ява́ва тэ хав дава́ хабэ́н, пака дава́ чачуно́ смысло ваш Патради́ кэрэ́лапэ кэ ко́нцо / яго́ро (сполнинэлапэ) дро Дэвлэ́скиро Кралипэ́н дро Болыбна́скиро Раё.”

¹⁷Тэ́ньци Ису́со лыя́ тахта́й, пхэндя́ парикирибэн Дэвлэ́скэ и пхэндя́: “Лэн дава́ и росчхувэн машки́р пэ́стэ.

¹⁸И Мэ пхэна́ва тумэ́нгэ: Мэ на ява́ва сарэ́са тэ пья́в аплодо винаградоскирэ хрустостыр, пака явэ́ла Дэвлэ́скиро Кралипэ́н дро Болыбна́скиро Раё.”

¹⁹Тэ́ньци Ису́со лыя́ маро́, парикирдя Дэвлэ́с (Дэвлэ́скэ), пхагирдя́ лэс, и дыя́ лэ́нгэ; ракири́: ‘Ѓа́да, исын Мирэ́ Маса́, савэ́ отдэнапэ пал тумэ́ндэ; дава́ адя́кэ и тумэ́ кэрэ́н тэ рипирэ́н пал Ма́ндэ.”

²⁰Адя́кэ-паць и тахта́й (чаша) коригэды́р, сыр ёнэ ханэ́ маро́, Ису́со дыя́ лэ́нгэ, пхэни́: “Кадава́ тахта́й исын нэво́ завето дро Миро рат, саво́ чхувэ́лапэ пал тумэ́ндэ.

²¹И дыкхэ́н: ада́й исын васт кодолэскиро, кон исын Ма́нца пал сками́нд, и саво́ бикнэла Ман;

²²и Чхаво́ Манушэ́скиро джа́ла пэ мэрибэ́н, сыр Дэвлэ́скэ исын лачхо́, нэ би́да кодолэ́ манушэ́скэ, саво́ здэла Лэс.”

²³И ёнэ лынэ́ тэ допхучэн екх екхэстыр, кон дава́ могинэ́ла лэ́ндыр тэ явэ́л, соб (кай) тэ кэрэ́л дава́.

²⁴И сыс пхучибэн машки́р лэ́ндэ, конэ́скэ лэ́ндыр трэй тэ гинэлпэ сыр най барэды́р.

²⁵И Ису́со пхэндя́ лэ́нгэ: “Наюдэнгирэ кралье́ндэ исын право пэ лэ́ндэ, и лэ́нгирэ барэ́ рая, савэ́ хулаинэна, ракирэ́на, со ёнэ кэрэ́на лачхипэ́н манушэ́нгэ.

²⁶Нэ тэ на явэ́н адя́кэ машки́р тумэ́ндэ: саво́ исын барэды́р тумэ́ндыр, тэ явэ́л тэрнэдыр; и саво́ исын шэрало́, тэ явэ́л дына́ри (слуга).

²⁷Пал-дова́ со, кон исын барэды́р; кодова́, саво́ исын бэшто́ пал сками́нд, ци кодова́, саво́ подэла пэ сками́нд? Кодова́, саво́ исын бэшто́ пал сками́нд. А Мэ сом машки́р тумэ́ндэ, сыр кодова́, саво́ подэла пэ сками́нд.

²⁸Нэ тумэ́ вытэрдинэ Ма́нца кхэтанэ́ дрэ Мирэ́ пхарипэна.

²⁹И Мэ пиридава тумэ́нгэ крали́тко право, сыр Миро Дад пиридыя ма́нгэ,

³⁰соб (кай) тумэ́ тэ хан и тэ пьен пал сками́нд дро Миро Кралипэ́н, и тэ бэшэ́н пэ троны тэ сэндинэ́н дэшуду́й Израилёскирэ ро́ды.”

³¹[И пхэндя́ Рай Дэвэ́л р.с.]: “Симоне, Симоне! Дыкх жа, на́лачхо древа́н закамдя́ тэ пропатякирэл тумэн сы́рбы тэ просеинэл тумэн пир сито (поризэн), сыр просеинэна парно́ гив,

³²нэ Мэ мангдёмпэ Дэвлэ́скэ пал ту́тэ, соб (кай) тыро́ патяибэ́н тэ на тыкнёл, и ту, ке́ли рисёса палэ кэ Мэ, тэды подрикирэса тырэ́ пшалэ́н.”

³³И Пэ́три отпхэндя́ Лэ́скэ: “Раё Дэ́вла! Мэ сом скэдыно́ тэ джав Ту́са и дрэ штарибэ́н, и пэ мэрибэ́н.”

³⁴И пхэндя́ Ису́со: “Мэ ракира́ва ту́кэ, Пэ́три: башно на пробагала ададывэ́с анги́л дова́, сыр ту трин мо́лы отпхэнэсапэ Ма́ндыр.”

³⁵Тэ́ньци Ису́со пхэндя́ лэ́нгэ: “Ке́ли Мэ бичхадём тумэн би муе́нгиро (капшукоскиро), би саквакиро и би ґэритконэнгиро, ци сыс трэй тумэ́нгэ вари-со?” Ёнэ отпхэндлэ́: “Над.”

³⁶Тэды Ису́со и пхэндя́ лэ́нгэ: “Нэ какана́ конэ́стэ исын муенгиро (капшуко), мэк тэ лэл лэс: адя́кэ-паць и саква, конэ́стэ нанэ курта́ла, мэк тэ бикнэл пэ́скиро урибэ́н и тэ кинэл курта́ла,

³⁷палдава́ Мэ пхэна́ва тумэ́нгэ, со дова́, со исын чхиндло́, трэй тэ сполнинэ́лпэ Ма́нца: “Ёв сыс чхудо машки́р розмарибнарьендэ”: пал-дова́ со саро́, со исын пал Ма́ндэ, сыг кончынэлапэ.”

³⁸Сыкляибны́тка пхэндлэ́: “Раё Дэ́вла! Ада́й исын дуй курталы (сабли).” Ису́со отпхэндя́ лэ́нгэ: “Ухты́лла (до́си).”

³⁹И гия́ Ису́со форо́стыр и сыр Ёв присыклыя, гия́ пэ Оливи́тко бэ́рга, и Лэ́скирэ сыкляибны́тка адя́кэ-паць гинэ́ пал Лэ́стэ.

⁴⁰И ке́ли Ёв явдя́ пэ штэ́то, тэды пхэндя́ лэ́нгэ: “Мангэ́нпэ Дэвлэ́скэ, соб (кай) тумэ́ тэ на пэрэ́н дро пропатякирибэн.”

⁴¹И Ёв отгия́ лэ́ндыр пэ ада́кицы, пэ кицы́ дочхурдэса бар, и тэрдия́ пэ чанга́, и мангдя́пэ Дэвлэ́скэ дасавэ́ лавэ́нца:

⁴²“Да́до! Ко́ли тэ явэ́л Тыри́ во́ля, лы́джа дава́ тахта́й дрэ риг Ма́ндыр; — нэ тэ явэ́л на Мири́, а Тыри́ во́ля.”

⁴³И Янго́ло болыбна́стыр сыкадыя́ Лэ́скэ и зорьякирдя Лэс.

⁴⁴Исусо́стэ сыс пхаро́ пэ ило́ и Ёв зоралэ́с мангдя́пэ Дэвлэ́скэ. Лэ́скири кхамлын (пото) сыс, сыр ратэскирэ капли (чолыня), со пэрэнас пэ пхув

⁴⁵И ке́ли Ёв уштыя́ мангипнастыр, тэды Ёв явдя́ палэ кэ сыкляибны́тка; и латхя́, со ёнэ сыс сутэ́ пэ́скирэ тугатыр

⁴⁶И пхэндя́ Ису́со лэ́нгэ: “Со тумэ́ сан сутэ́? Уштэ́н и мангэ́нпэ Дэвлэ́скэ, соб (кай) тумэ́ тэ на пэрэ́н дро пропатякирибэн.”

⁴⁷И ке́ли Ису́со ишчо (инкэ́) ракирдя́, ґа́да, сыкадынэ бут мануша́, и акэ, ёв, савэ́с кхардэ́ Юда, екх дэшудуедыр сыкляибнытконэндыр, джа́лас анги́л лэ́ндэ, и ёв подги́я кэ Ису́со тэ чамудэл Лэс.

⁴⁸Ису́со пхэндя́ Лэ́скэ: “Ю́дэ! Ту бикнэса Манушэ́скирэ Чхавэ́с чамудыпнаса?”

⁴⁹И сыкляибны́тка, савэ́ сыс пашы́л Лэ́стэ, ке́ли дыкхнэ́, кэ со дава́ догия́, пхучнэ́ Лэ́стыр: “Раё Дэ́вла! Тэ чхинас амэ́нгэ курталэнца?”

⁵⁰И екх лэ́ндыр чингирдя писхари́с раша́нгирэ барыдырэскирэс и отчингирдя лэ́скэ чачо́ (право) кан.

⁵¹Нэ Ису́со пхэндя́: “Мэкэ́н, ухты́лла (до́си)!”, — и Ёв чиладя́ лэ́скиро кан и высастякирдя́ лэс.

⁵²И пхэндя́ тэды Ису́со раша́нгирэ барыдырэ́нгэ и кхангирья́кирэ-халадытконэ барыдырэ́нгэ, годэпхурэнгэ, савэ́ явнэ́ пэ Лэ́стэ: “Сыр пэ розмарибнаристэ тумэ́ выгинэ́ курталэнца и килэнца (конкэнца)?

⁵³Ке́ли Мэ со́мас со дывэ́с тумэ́нца дрэ Кхангири́, тэды тумэ́ наґаздынэ васта́ пэ Ма́ндэ; а какана́ — тумаро́ мардо́ (шту́нда) явдя́ и налачхи зор лэ́ла тэ хулаинэ́л дро калыпэ́н (цямлыпэ́н).”

⁵⁴И ёнэ лынэ́ Исусо́с, лыджинэ́ лэс криг и яндлэ́ дро пэрвонэ́-раша́нгирэ барыдырэскиро кхэр. И Пэ́три ж джа́лас дурипнастыр.

⁵⁵И ёнэ кэрдэ́ яг машки́р грэ́да (дво́ро) и бэшнэ́ кхэтанэ́; Пэ́три ж бэсця́ машки́р лэ́ндэ.

⁵⁶И екх дына́рица, ке́ли дыкхця́ лэс пашы́л яг, придыкхцяпэ ракхунэс пэ лэ́стэ и пхэндя́: “И кадава́ ману́ш сыс Лэ́са.”

⁵⁷Нэ Пэ́три отпхэндяпэ Лэ́стыр, пхэни́: “Джувлие, мэ на джино́м Лэс.”

⁵⁸И сыг яви́р ману́ш, сыр дыкхця́ Пэтрис, пхэндя́: “И ту сан екх лэ́ндыр.” Нэ Пэ́три отпхэндя́: “Морэ, мэ на сом.”

⁵⁹И ке́ли прогия́ (накхця) пашэ́ мардо́, ишчо (инкэ́) вари-кон лыя́ зорья́са тэ допхэнэл: “Чачо́, кадава́ ману́ш адя́кэ-паць сыс Лэ́са, пал-дова́ со ёв исын адя́кэ-паць Галилеянино.”

⁶⁰Нэ Пэ́три отпхэндя́: “Морэ, мэ на джино́м, со ту ракирэ́са.” И ада́й жэ, пака ёв ракирдя́, пробагандя башно.

⁶¹И Рай Дэвэ́л рискирдя́ шэро́, подыкхця́ пэ Пэтристэ; и пририпирдя Пэ́три Исусо́скиро лав, сыр Ёв пхэндя́ Лэ́скэ: “Анги́л, сыр пробагала башно, ту трин мо́лы отпхэнэсапэ Ма́ндыр.”

⁶²И Пэ́три, выгии яври́, рондя́ киркэс.

⁶³И мануша́, кон рикирдя Исусо́с, кэрдэ́ бипатывакиро сабэн (здекиндлэпэ) пэ Лэ́стэ и мардэ́ Лэс;

⁶⁴и ёнэ пхандэнас Лэ́скирэ якха́, пхучнэ́ Лэ́стыр, пхэни́: “Уґалёв, проро́ко, кон пэкадя́ Тут?”

⁶⁵И ёнэ пхэндлэ́ бут кошыбнытка лава́ пэ Лэ́стэ.

⁶⁶И ке́ли яця́ дывэ́с, годэпхурэ́ манушэ́ндыр, раша́нгирэ барыдыра́ и лылвари́тка скэдынэ́пэ, и лыджинэ́ Исусо́с анги́л пэ́скиро Синедрионо и пхэндлэ́:

⁶⁷“Ко́ли Ту сан Христо́со, пхэн амэ́нгэ.” Ёв пхэндя́ лэ́нгэ: “Ко́ли Мэ пхэна́ва тумэ́нгэ, тумэ́ на патя́на;

⁶⁸и ко́ли Мэ пхучава тумэ́ндыр, тумэ́ на явэ́на тэ отпхэнэн Ма́нгэ, и на отмэкэна Ман;

⁶⁹нэ коригэды́р далэ́стыр Чхаво́ Манушэ́скиро явэ́ла тэ бэшэ́л пир чачо́ васт Дэвлэ́стыр.”

⁷⁰И ёнэ сарэ́ пхэндлэ́: “Ту, хай, сан Чхаво́ Дэвлэ́скиро?” И ёв отпхэндя́ лэ́нгэ: “Тумэ́ ракирэ́на миштэ́с, со Мэ сом?”

⁷¹И ёнэ пхэндлэ́: “Савэ амэ́нгэ ишчо (инкэ́) акана́ трэй якхи́тка, пал-дова́ со амэ кокорэ́ шундя́м дава́ Лэ́скирэ мо́стыр?”