Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 4 Bible Online

Лука 4 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 4

¹Ису́со сыс пхэрдо́ Свэнтонэ́ Духо́са и рисия́ Иорданостыр и Ду́хо (Фа́но) лыджия́ Лэс пэ чхучи́ пхув,

²кай на́лачхо пропатякирэлас Лэс штардэша́ дывэса́ и Ису́со нисо́ на хая дрэ долэ́ дывэса́; а ке́ли далэ́ дывэса́ прогинэ́, Ёв закамдя́ тэ хал.

³И пхэндя́ Лэ́скэ на́лачхо: “Ко́ли Ту сан Дэвлэ́скиро Чхаво́, пхэн, соб (кай) далэ́ бара́ тэ ячэн марэ́са.”

⁴А Ису́со отпхэндя́ Лэ́скэ: “Исын чхиндло́: ‘На марэ́са екхэ́са дживэ́ла ману́ш, а кажнонэ́ лавэ́са, со выджа́ла Дэвлэ́скирэ уштэндыр.’”

⁵Тэды лыджия́ Лэс на́лачхо пэ вучи́ бэ́рга, и сыкадя́ Лэ́скэ сы́гэс пал мэнта (минута) сарэ́ свэто́скирэ кралипэна́.

⁶И на́лачхо пхэндя́ Лэ́скэ: “Мэ да́ва Ту́кэ право пэ сарэ́ далэ́ кралипэна́, и лэ́нгири сла́ва, пал-дова́ со ёй исын дыны́ ма́нгэ, и мэ да́ва ла одолэ́скэ, конэ́скэ мэ кама́м;

⁷ґа́да, саро́ явэ́ла Тыро́, ко́ли Ту поклонинэсапэ ма́нгэ.”

⁸Ису́со отпхэндя́ Лэ́скэ: “Исын чхиндло́: ‘Дэвлэ́скэ тырэ́скэ клонинпэ и Лэ́скэ екхэ́скэ дынарин (служын)’”

⁹Тэды на́лачхо лыджия́ Лэс дро Ерусалимо, и чхудя́ Лэс пэ Кхангирья́кири стрэ́ха (чхаки́н), и пхэндя́ Лэ́скэ: “Ко́ли Ту сан Дэвлэ́скиро Чхаво́, ухты, Кокоро́, адатхы́р тэлэ́”,

¹⁰пал-дова́ со исын чхиндло́: “Ёв дэ́ла припхэныбэ́н Янголэнгэ Пэскирэнгэ тэ зракхэ́л Тут;

¹¹и пэ васта́ ёнэ лыджа́на Тут, соб (кай) Ту тэ на обштавэспэ пир бар ґэрьяса Пэскирьяса.”

¹²Ису́со отпхэндя́ Лэ́скэ: “Исын пхэндло́: ‘На пропатякир Рас-Дэвлэ́с пэ́скирэс.’”

¹³Ке́ли на́лачхо кончындя сарэ́ пропатякирибэна, ёв гия́ криг Исусо́стыр, ужакири яви́р часо.

¹⁴Одотхы́р Ису́со рисия́ дрэ Галиле́я. Ёв сыс пхэрдо́ Духо́са (Свэнтонэ́ Духо́са); и мавлы́н (малва) пал Лэ́стэ розгия́пэ пир сари́ пхув, кай Ёв сыс.

¹⁵Ёв сыклякирдя́ дрэ синагоги, и сарэ́ шардэ Лэс.

¹⁶Тэ́ньци Ису́со явдя́ дро Назарето, кай Ёв бария, и загия́ дрэ синагога дро са́вато (субо́та) пир Пэ́скиро присыкляибэн, и лыя́ тэ гинэл

¹⁷пророкоскирэ-Исаёскири лылвари́, сави́ Лэ́скэ подынэ; и Ёв откэрдя лылвари́, тэды латхя́ штэ́то, кай сыс чхиндло́:

¹⁸“Дэвлэ́скирэ — Ра́скиро Ду́хо (Фа́но) исын пэ ма́ндэ; пал-дова́ со Ёв выкэдыя́ Ман тэ роспхэнав бахталы́ зан (звесь) богэнгэ и бичхадя́ Ман тэ пхэна́в во́ля одолэ́нгэ, савэ́ исын дро пле́но, тэ дыкхэ́н свэ́то корорэнгэ; тэ отмэкав пэ во́ля и тэ дзн васт одолэ́нгэ, савэ́н вэ́рги притасадэ,

¹⁹тэ роспхэнав манушэ́нгэ пал лачхо́ бэрш, дро саво́ Дэвэ́л сыкавэ́ла Пэ́скири ла́ска и тангипэ́н (жалима) кэ мануша́.”

²⁰Ису́со закэрдя лылвари́, и ке́ли Ёв отдыя́ палэ раша́скэ, бэсця́; и сарэ́, кон сыс дрэ Кхангири́, лынэ́ ракхунэс тэ дыкхэ́н пэ Лэ́стэ,

²¹и ґа́да, Ёв пхэндя́ лэ́нгэ: “Ададывэ́с кэрдя́пэ кэ ко́нцо/яго́ро (сполниндяпэ) Свэ́нто Чхиныбэ́н, ке́ли тумэ́ шундлэ́ лэс пэ́скирэ канэнца.”

²²И ёнэ сарэ́ прилынэ́ дава́ Лэ́стыр и дивиндэпэ пэ бахталыпэ́н лавэ́ндыр, савэ́ Ису́со ракирдя́ и ёнэ ракирдэ́: “Ци на Ёв исын Ёзаскиро Чхаво́?”

²³Ёв пхэндя́ лэ́нгэ: “Мэ (джино́м) джина́в, со тумэ́ Ма́нгэ пхэнэ́на: ‘Састыпна́ре, высастякир Кокоро́ Пэс! Кэр дава́-паць ада́й, пэ Пэ́скири пхув дова́, со Ту кэрдя́н дро Капернаумо, сыр амэ шундя́м.’”

²⁴И Ису́со пхэндя́ лэ́нгэ: “Чачэс, Мэ ракира́ва тумэ́нгэ: Мануша́ на кутякирэна ни савэ́ пророко́с пэ пэ́скири пхув,

²⁵чачипна́са Мэ пхэна́ва тумэ́нгэ: Бут сыс пивля (удовы), ке́ли Или́я дживдя́, сыр болыбэ́н сыс закэрдо пэ трин бэрш и шов чхона́, и на сыс брышы́нд трин пашэ́са бэрш и яця́ бари бокх пэ доя́ пхув;

²⁶и ни кэ екх пивлендыр на сыс бичхадо́ Или́я, а кэ екх пивлы дрэ Сидоноскири Сарента;

²⁷адя́кэ-паць, сыс бут насвалэ проказаза дро Израилё, ке́ли Елисеё дживдя́, и ни екх лэ́ндыр на высастия, апри́ч Нэманостэ Сириятыр.”

²⁸Ке́ли мануша́ дрэ синагога шундлэ́ дава́, ёнэ сарэ́ древа́н холясынэ;

²⁹и ґаздынэ́пэ и вытрадынэ́ Исусо́с форо́стыр, и лыджинэ́ Лэс пэ бэргакири крутыма, соб (кай) тэ чхурдэ́н тэлэ́ Лэс бэрга́тыр,

³⁰нэ Ёв прогия́ машки́р манушэ́ндэ и дурия лэ́ндыр.

³¹И Ису́со явдя́ тэлэды́р дро Капернаумо, Галилеякиро фо́ро, и сыклякирдя́ лэн дро са́вато.

³²Лэ́скиро сыклякирибэ́н дивиндя манушэ́н, пал-дова́ со Лэ́скирэ лавэ́стыр сыс бари зор.

³³И сыс екх ману́ш дрэ синагога, конэ́стэ сыс на́лачхо ду́хо (фа́но), и ёв задыя го́дла зоралэ́с:

³⁴“Со Ту камэ́са амэ́ндыр, Ису́се Назаретостыр? Ту явдя́н тэ хасякирэс амэн? Мы джина́в, кон Ту дасаво-Ту сан Свэ́нто Дэвлэ́скиро!”

³⁵Ису́со зоралэ́с припхэндя́ Лэ́скэ лавэ́нца: “Яв штыл и выджа лэ́стыр.” И на́лачхо ду́хо (фа́но) радя манушэ́с машкира́л дрэ синагога, выгия́ лэ́стыр, и ни саво́ чорипэ́н на кэрдя́ Лэ́скэ.

³⁶И ёнэ сарэ́ зоралэ́с дивиндлэ́пэ и ракирдэ́ екх екхэ́скэ: “Со дава́ значынэ́ла, со Ёв припхэнэла налачхэ́ духэнгэ зорья́са и правоса, и ду́хи (фаны) выджа́на?”

³⁷И розгия́пэ мавлы́н (малва) пал Лэ́стэ пир сари́ пхув и штэ́ты, со сыс пашы́л.

³⁸Ису́со уштыя́ и гия́ синагогатыр и явдя́ дро Симоноскиро кхэр; Симоноскири сасуй (тёшча) сыс пашты хачкирибнаса; и ёнэ мангнэ́ Лэс пал ла́тэ.

³⁹Ёв подги́я кэ ёй и припхэндя́ хачкирибнаскэ тэ мэкэл джувля́; и дукх мэкця́ ла; и джувлы́ ада́й жэ уштыя́ и дынариндя́ Исусо́скэ.

⁴⁰Ке́ли загия́ кхам, сарэ́, конэ́стэ сыс насвалэ разнонэ дукхэнца, янэ́нас лэн кэ Ису́со; и Ёв чхувэлас упрэ́ васта́ пэ кажнонэ́стэ, и высастякирэлас лэн;

⁴¹и бут налачхэ́ ду́хи адя́кэ-паць выджа́нас бутэ́ манушэ́ндыр годла́са и ракирдэ́: “Ту сан Христо́со, Дэвлэ́скиро Чхаво́.” А Ёв припхэндя́ лэ́нгэ тэ на ракирэ́н, со ёнэ джинэ́на, со Ёв исын Христо́со.

⁴²Ке́ли яця́ дывэ́с, Ису́со выгия́ форо́стыр и гия́ пэ штэ́то, кай мануша́ на сыс, а мануша́ родынэ Лэс; и ке́ли ёнэ латхнэ́ Лэс, ёнэ камлэ́ тэ рикирэ́н Лэс, соб (кай) Ёв тэ на джал лэ́ндыр.

⁴³Нэ Ёв пхэндя́ лэ́нгэ: “Ма́нгэ трэй и явирэ форьенгэ тэ миштопхэнав пал Дэвлэ́скиро Кралипэ́н, ваш дова́ Мэ и сом бичхадо́.”

⁴⁴И Ёв роспхэнэлас Дэвлэ́скиро лав дрэ сарэ́ Галилеякирэ синагоги.