Read Baltic Romani Bible 2019 – Библия - Пэ Балтитко Романи чиб (Романэс) 2019 Лука 7 Bible Online

Лука 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Лука 7

¹Ке́ли Ису́со кончындя дава́ саро́ ракирибэ́н манушэ́нгэ, Ёв явдя́ дро Капернаумо.

²Одо́й екхэ шэлэнгирэ-халадытконэ барыдырэстэ сыс насвало́ лэ́скиро дына́ри, саво́ сыс лэ́стэ дрэ паты́в, и ёв сыс насвало́ кэ мэрибэ́н.

³Ке́ли барыдыро́ шундя́ пал Исусо́стэ, ёв бичхадя́ кэ Ёв Юдэ́нгирэ годэпхурэн тэ мангэ́н Лэс тэ явэ́л, и тэ высастякирэл шэлэнгирэ дынари́с.

⁴И годэпхурэ́ явнэ́ кэ Ису́со и древа́н мангнэ́ Лэс, ракири́: “Кадава́ ману́ш исын мол, соб (кай) Ту тэ помогинэс Лэ́скэ.

⁵Пал-дова́ со лэ́скэ исын дро́га амарэ́ мануша́ и ёв чхудя́ синагога ваш амэ́нгэ.”

⁶И гия́ Ису́со лэ́нца; нэ, ке́ли Ёв сыс на́дур лэ́скирэ кхэрэ́стыр, то бичхадя́ пэ́скирэ малэн тэ пхэнэ́н Лэ́скэ: “Раё Дэ́вла! На мэнчын Пэс; пал-дова́ со мэ на сом мол, соб (кай) Ту тэ заджас дро Миро кхэр;

⁷и мэ гинава, со мэ на сом мол тэ явав кэ Ту; нэ Ту пхэн лав, и явэ́ла миро дына́ри нэвэ́стыр састо́.

⁸И мэ адя́кэ-паць сом ману́ш, пэ конэ́стэ исын барыдыро́, и ма́ндэ исын халадэ́, савэ́ кандэ́на ман, и мэ пхэна́ва екхэ́скэ: ‘Джа́’ и джа́ла; и явирэскэ: ‘Яв’ и явэ́ла, и кадалэскэ дынари́скэ мирэ́скэ: ‘Кэр дава́,’ и кэрэ́ла.”

⁹И сыр Ису́со шундя́ дава́, дивиндяпэ лэ́стыр и пхэндя́ манушэ́нгэ, савэ́ гинэ́ пал Лэ́стэ: “Чачо́, Мэ пхэна́ва тумэ́нгэ: Мэ на латхём дасаво патяибэ́н и дро Израилё.”

¹⁰И одолэ́ мануша́, савэ́н барыдыро́ шэлэнгиро бичхадя́, рисинэ́ и дыкхнэ́, со дына́ри сыс састо́.

¹¹И сыс адя́кэ: пало́ дава́ Ису́со явдя́ дро фо́ро Наино и бут Лэ́скирэ сыкляибны́тка и яви́р мануша́ явнэ́ Лэ́са кхэтанэ́.

¹²Ке́ли Ису́со подги́я пашылэды́р кэ форо́скири по́рта, ада́й вылыджанас мулэ́ манушэ́с тэ гаравэн, саво́ сыс екхджино́ пэ́скирэ датэ; бут мануша́ джа́нас ла́са.

¹³Ке́ли Рай Дэвэ́л дыкхця́ ла, Лэ́скэ яця́ танго (жалко) ла и Ёв пхэндя́ ла́кэ: “На ров”

¹⁴И Ёв подги́я и чиладя́ насилки (трага́чы), и мануша́, савэ́ лыджинэ́, тэрдинэ́. Ису́со пхэндя́: “Тэрно́ ману́ш, ушты́, Мэ ту́кэ ракира́ва.”

¹⁵Муло ману́ш бэсця́ и лыя́ тэ ракирэ́л; и Ису́со отдыя́ лэс лэ́скирэ да́кэ.

¹⁶Пэ лэ́ндэ сарэ́ндэ бари дар пыя́ и ёнэ славиндлэ Дэвлэ́с, ракири́: “Баро́ проро́ко явдя́ тэ явэ́л амэ́нца, Дэвэ́л помогинэла Пэ́скирэ манушэ́нгэ.”

¹⁷Адая зан (звесь) гия́ пал Исусо́стэ пир сари́ Юдеякири пхув и сарэ́ пашатунэ́ штэ́ты.

¹⁸И Ианоскирэ Болдэипнарискирэ сыкляибны́тка роспхэндлэ́ лэ́скэ саро́ пал дова́.

¹⁹Иа́но кхардя́ дуе́н пэ́скирэ сыкляибнытконэндыр и бичхадя́ лэн кэ Ису́со тэ пхучэ́н: “Ту сан Кодова́, Савэ́скэ трэй тэ явэ́л, ци явирэ́с амэ́нгэ тэ ужакирас?”

²⁰Ёнэ явнэ́ кэ Ису́со и пхэндлэ́ Лэ́скэ: “Иа́но Болдэипнари бичхадя́ амэн кэ ту тэ пхучас: ‘Ту сан Кодова́, Савэ́скэ трэиндя́ тэ явэ́л, ци явирэ́с амэ́нгэ тэ ужакирас?’”

²¹Дро дова́ часо Ису́со высастякирэлас бутэ́ манушэ́н насвалыпнэндыр и дукхэндыр и налачхэ́ дукхэндыр и Ёв высастякирдя́ якха́ бутэндэ корорэндэ.

²²И отпхэндя́ Ису́со лэ́нгэ: “Джа́н и пирипхэнэн Ианоскэ, со тумэ́ дыкхнэ́ и шундлэ́: корорэ́ мануша́ дыкхэ́на нэвэ́стыр и лангалэ псирэ́на: проказытка ячэ́на жужэ́, и кашукэ мануша́ шунэ́на, мулэ́ отджидёна, и бо́ги роспхэнэна бахталы́ зан (звесь);

²³и бахтало́ исын кодова́, кон на хасякирэ́ла патяибэ́н дрэ Ма́ндэ.”

²⁴Ке́ли Ианоскирэ бичхадэ́ мануша́ гинэ́, Ису́со лыя́ тэ ракирэ́л манушэ́нгэ пал Ианостэ: “Со псирдэ́ тумэ́ пэ чхучи́ пхув тэ дыкхэ́н? Сыр трастинитко кашт тринскирлапэ балвалятыр?

²⁵Ваш со тумэ́ псирдэ́ одори́к тэ дыкхэ́н? Манушэ́с, саво́ сыс уридо́ дрэ шука́р и́дя? Над, мануша́, савэ́ уридэ́ дрэ шука́р и́дя, дживэ́на дрэ кралитка барэ́ фэлатиня́ (колова).

²⁶Нэ, со ж тумэ́ тэды псирдэ́ тэ дыкхэ́н? Пророко́с? Чачо́, ракира́ва тумэ́нгэ: ‘Ёв исын барэды́р пророкостыр.’

²⁷Ёв исын кодова́, пал савэ́стэ исын чхиндло́: “Гада, Мэ бичхава́ва Мирэ́ выкэдынэ́ манушэ́с анги́л Ту́тэ, саво́ приготовинэла дром Тыро́ анги́л Ту́тэ.’”

²⁸Палдава́ Мэ ракира́ва тумэ́нгэ: нанэ барэды́р пророко́с Иано́стыр Болдэипнаристыр машки́р одолэ́ндэ, савэ́н джувля́ биянэна, нэ най тыкнэды́р дро Болыбна́скиро Раё исын барэды́р Иано́стыр.”

²⁹И сарэ́ мануша́, савэ́ шундлэ́ Лэс, и мытоскирэ скэдыибнарья приґалынэ Дэвлэ́скиро чачипэ́н и болдэпэ Ианостэ Болдэипнаристэ.

³⁰А Фарисе́и и Законо́скирэ сыклякирибнарья отпхэндлэпэ Дэвлэ́скирэ лавэ́стыр; ёнэ на болдэпэ Ианостэ Болдэипнаристэ.

³¹И ишчо (инкэ́) пхэндя́ Ису́со: “Кэ кон Ма́нгэ тэ припарував (тэ роўнинав) адалэ́-родоскирэ манушэ́н? Пэ конэ́стэ зджана (подджана) кадалэ́ мануша́?

³²Ёнэ исын сы́рбы чхаворэ́, савэ́ исын бэштэ́ пашы́л тарги и дэ́на го́дла екх екхэ́скэ, ракири́: “Амэ башадям тумэ́нгэ пэ свиролька, а тумэ́ на кхэлдэ; амэ багандям роибнытка гиля́, а тумэ́ на рондлэ́.”

³³И Иа́но явдя́, на ха́ла, на пьела мол (вино), и тумэ́ ракирэ́на: “Лэ́стэ исын на́лачхо ду́хо (фа́но).”

³⁴Явдя́ и Чхаво́ Манушэ́скиро, ха́ла, и пьела, и тумэ́ ракирэ́на: “Гада, ману́ш, саво́ камэ́ла тэ хал, тэ пьел, исын дру́го (мал) мытоскирэ скэдыибнарьенгэ и грэхэнгирэнгэ’.

³⁵Нэ Дэвлэ́скиро годьварипэн сыкавэ́ла Пэ́скиро чачипэ́н манушэ́нгирэ рэндэ́нца (делэнца), сарэ́нца, кон прилэ́ла дава́ чачипэ́н.”

³⁶Екх ману́ш Фарисеендыр мангдя́ Исусо́с тэ хал Лэ́са; и Ису́со загия́ дро кхэр и бэсця́ кэ сками́нд:

³⁷и, ґа́да, екх джувлы́ долэ́ форо́стыр, сави́ дживдя́ сыр грэхи́тко джувлы́, яндя́ алибастрытко кхоро́ (жбанко) кучипнаскирэ — кхандыпнытконэ макхибнаса, ке́ли ёй уджиндя́, со Ису́со халас дро Фарисеёскиро кхэр;

³⁸и ёй тэрдия́ пала́л пал Исусо́стэ пашы́л Лэ́скирэ ґэра́ и лыя́ тэ ровэл и тэ киндякирэл Лэ́скирэ ґэра́ ясвэ́нца и тэ кхосэл ґэра́ ла́кирэ балэнца; и ёй чамудя Исусо́скирэ ґэра́ и макхця лэн далэ́ макхибнаса.

³⁹Ке́ли Фарисеё, саво́ кхардя́ Исусо́с кэ пэ, дыкхця́ дава́, ёв пхэндя́ пэ́скэ: “Ко́ли тэ явэ́л Ёв проро́ко, Ёв джинэлас, кон, и сави́ джувлы́ чилавэ́ла Лэс; ёй жа исын грэхи́тко джувлы́.”

⁴⁰А Ису́со отпхэндя́ Лэ́скэ: “Си́моно, Ма́нгэ трэй тэ пхэна́в ту́кэ вари-со.” “Ра́кир, Сыклякирибна́скиро”, — раки́рла Си́моне.

⁴¹Ису́со пхэндя́: “Екхэ манушэ́стэ, кон дэ́лас ловэ́ дро вужлыпэ́н (длуго), сыс дуй мануша́, савэ́ сыс вужлэ; екх сыс вужло панджшэла́ динарии, яви́р пандждэша́;

⁴²а пал-дова́ со лэ́ндэ на сыс со́са тэ отдэ́н палэ ловэ́, дава́ ману́ш примангдя лэ́нгэ дуенгэ. Пхэн ма́нгэ: “Кон лэ́ндыр буты́р явэ́ла тэ сыкавэ́л паты́в лэ́скэ?”

⁴³И отпхэндя́ Си́моно: “Мэ думинава, со кодова́, конэ́скэ ёв буты́р примангдя.” Ису́со пхэндя́ Лэ́скэ: “Чачэс ту пхэндя́н.”

⁴⁴Тэ́ньци Ису́со порисия кэ джувлы́ и пхэндя́ Симоноскэ: “Ту дыкхэ́са адаля джувля́? Мэ явдём дро тыро́ кхэр, и ту на дыя́н пани́ ма́нгэ ваш ґэра́, а ёй мордя Мирэ́ ґэра́ ясвэ́нца и кхосця лэн пэ́скирэ балэнца.

⁴⁵Ту на чамудян Ман, а ёй на пирияця́ тэ чамудэл Мирэ́ ґэра́ долэ́ часостыр, ке́ли Мэ явдём.

⁴⁶Ту на макхця Миро шэро́ оливитконэ дзэтэса, а ёй макхцян Мирэ́ ґэра́ кучипнаскирэ-кхандыпнытконэ макхибнаса.

⁴⁷И палдава́ Мэ пхэна́ва ту́кэ: ла́кирэ бут грэ́хи отмэкэнапэ пал дова́, со ёй сыкадя́ бари ла́ска кэ Мэ; а конэ́скэ на́бут примангэна, кодолэстэ на́бут исын ла́ска.”

⁴⁸Тэды Ису́со пхэндя́ джувля́кэ: “Тырэ́ грэ́хи исын отмэкнэ.”

⁴⁹И одолэ́ мануша́, савэ́ сыс бэштэ́ пал сками́нд Лэ́са, лынэ́ тэ ракирэ́н машки́р пэ́стэ: “Кон да дасаво исын, Кон и грэ́хи отмэкэ́ла?”

⁵⁰Тэды Ису́со пхэндя́ джувля́кэ: “Тыро́ патяибэ́н зракхця́ тут, джа́ раманёса (миро́са).”