Read Baltic Romani Bible 2019 – Библия - Пэ Балтитко Романи чиб (Романэс) 2019 Апостолэнгири Буты́ 13 Bible Online

Апостолэнгири Буты́ 13 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Апостолэнгири Буты́ 13

¹Дрэ Антио́хия, дрэ штэты́тко кхангири́ сыс проро́ки и сыклякирибнаскирэ: Варнава, и Симеоно, савэ́с кхардэ́ Нигеро, и Луцыё Киринеянино, и Манаило, саво́ бария кхэтанэ́ Ирадоса тетрархоса и Савло.

²Екхвар, ке́ли ёнэ мангнэпэ Ра́скэ-Дэвлэ́скэ и постиндлэ, Свэ́нто Ду́хо (Фа́но) пхэндя́ лэ́нгэ: “Отдэ́н Ма́нгэ Варнавас и Савлос пэ рэ́ндо (де́ло), ваш саво́ Мэ лэн кхардём.”

³И ёнэ, пало́ посто и мангипэ́н, чхудэ́ упрэ́ васта́ пэ лэ́ндэ, и отбичхадэ лэн.

⁴Варнава и Савло, савэ́н бичхадя́ Свэ́нто Ду́хо (Фа́но), явнэ́ дрэ Селевкия, а одотхы́р отплывиндлэ (дынэ́ пли́ма криг) пэ Кипро.

⁵Ке́ли ёнэ явнэ́ дро Саламино, одо́й ёнэ роспхэнэнас Дэвлэ́скиро лав дрэ Юдэя́кирэ синагоги. Иа́но сыс кхэтанэ́ лэ́нца и дэ́лас васт лэ́нгэ.

⁶Ёнэ гинэ́ пир саро́ о́строво (джип) и явнэ́ дро Пафосо, одо́й стрэниндлэ манушэ́с, саво́ сыс човахано, хохано́ проро́ко Юдо, лэс кхардэ́ Вариисусо,

⁷ёв сыс мал (дру́го) Римо́скирэ балунитконэскэ Серьгаскэ Павлискэ, годьварэ́ манушэ́скэ. Балунитко кхардя́ Варнавас и Савлос, пал-дова́ со камдя́ тэ шунэ́л Дэвлэ́скиро лав.

⁸Нэ Елимо, човахано (лав лэ́скиро значынэ́ла “човахано”), саро́ кэрдя́ проти лэ́ндэ; ёв камдя́ тэ отрискирэл Римо́скирэ балунитконэс патяибнастыр.

⁹Нэ Савло, савэ́с адя́кэ-паць кхардэ́ Па́вли, сарэ́ Свэнтонэ́ Духо́скирэ зорья́са, дыкхця маму́й пэ лэ́стэ,

¹⁰и пхэндя́: “Ту, сан налачхэскиро чхаво́ и вэ́рго сарэ́ чачипнаскэ: ту сан пхэрдо́ хохаибнаса и калэ́ рэндэ́нца; ци пириячэса ту тэ злыджас манушэ́н чачунэ́ Ра́скирэ-Дэвлэ́скирэ дромэ́стыр?

¹¹И какана́, ґа́да, Дэвлэ́скиро васт исын пэ ту́тэ: Ту явэ́са короро́ и ту на явэ́са тэ дыкхэ́с кхам кэ саво́ трэй часо.” И екха́тыр згия пэ лэ́стэ калыпэ́н, и ёв лыя́ тэ чхурдэлпэ пир сарэ́ рига́, родыи вари-конэ́с тэ лыджа́л лэс пал васт.

¹²Ке́ли балуни́тко (консуло) дыкхця́, со кэрдя́пэ, ёв лыя́ тэ патял, и ёв дивиндяпэ пэ Ра́скирэ-Дэвлэ́скиро сыклякирибэ́н.

¹³Па́вли и лэ́скирэ мала́ отплывиндлэ (дынэ́ пли́ма криг) Пафостыр и явнэ́ дрэ Пергия и Памфилия; нэ Иа́но мэкця́ лэн одо́й и кокоро́ рисия́ дро Ерусалимо.

¹⁴А ёнэ прогинэ́ Пергиятыр и явнэ́ дрэ Писидиякири Антио́хия, саватонэ́ (суботонэ́) ёнэ явнэ́ дрэ синагога и бэшнэ́.

¹⁵Пало́ (после) гиныбэ́н Мойза́скирэ Законо́стыр и пророкэ́нгирэ сыклякирибнастыр, синагогакирэ барыдыра́ бичхадэ́ лав лэ́нгэ: “Мануша́лэ-Пшала́лэ! Ко́ли тумэ́ндэ исын лав ваш сыклякирибэ́н тэ пхэнэ́н манушэ́нгэ, то ракирэ́н.

¹⁶Па́вли уштыя́ и сыкадя́ вастэ́са, соб (кай) ёнэ тэ шунэ́н, пхэни́: “Мануша́лэ Израилёскирэ! Лачхэ́ яви́р мануша́, савэ́ кутякирэна Дэвлэ́с, вышунэн ман:

¹⁷Дэвэ́л Израилёскирэ манушэ́нгиро выкэдыя́ амарэ́ дадэн, Ёв кэрдя́ лэ́ндыр бари и патывалы́ нацыя, ке́ли ёнэ сыс дро Еги́пто, и Ёв барэ́-зорьякирэ вастэ́са лыджия́ лэн одолэ́ рига́тыр,

¹⁸И пашэ́ штардэша́ бэрш Ёв дыкхця́ пал лэ́ндэ пэ чхучи́ пхув.

¹⁹Дэвэ́л пэ Ханаано́скири пхув хасякирдя́ охто́ (бидуе́нгиро дэш) на́цыи и отдыя́ лэ́нгири пхув, сыр мэкно́ миштыпэ́н.

²⁰И пало́ дава́, пашэ́ штаршэла́ пандждэша́ бэрш, кэ/жы́ко проро́ко Самуи́ло, Дэвэ́л дэ́лас лэ́нгэ сэндарьен.

²¹Коригэды́р (позжэ) ёнэ лынэ́ тэ мангэ́н пэ́скэ Крали́с, и Дэвэ́л дыя́ лэ́нгэ Саулос, Кисаскирэ чхавэ́с, Вениамино́скирэ родо́стыр пэ штардэша́ бэрш.

²²Дэвэ́л злыя́ Саулос кралипнастыр и чхудя́ лэ́нгэ Давидо́с сыр крали́с, пал савэ́стэ и пхэндя́ дро допхэныбэ́н: “Мэ латхём Давидо́с, Есеёскирэ чхавэ́с, адава́ ману́ш Ма́нгэ исын пир ило́, саво́ кэрэ́ла саро́ пир Мири́ во́ля.

²³И Давидо́скирэ родо́стыр Дэвэ́л, сыр Ёв дыя́ лав, яндя́ Израилёскэ Исусо́с Зракхибнаскирэс;

²⁴анги́л дава́, сыр Ису́со явдя́, Иа́но пхэнэлас лав тэ рискирэ́н пэ́скиро джиибэ́н кэ Дэвэ́л ваш болдыипэн сарэ́ Израилёскирэ манушэ́нгэ.”

²⁵Дро палатуно́ (последнё) пэ́скиро пхэныбнытко лав, Иа́но ракирдя́: “Пал конэ́стэ тумэ́ ман гинэ́на? Мэ на сом одова́; нэ ґа́да, джа́ла пал ма́ндэ Одова́, Савэ́скэ мэ на сом мол тэ роспхандав Лэ́скирэ ґэритка.”

²⁶Мануша́лэ-Пшала́лэ, Чхавэ́ Авраамо́скирэ, и машки́р тумэ́ндэ исын На́юды, савэ́ кутякирэна Дэвлэ́с! Дава́ зракхибнаскиро лав сыс бичхадо́ амэ́нгэ:

²⁷со мануша́, савэ́ дживдэ́ кэ Ерусалимо и лэ́нгирэ барыдыра́, на уджиндлэ́ Исусо́с, ёнэ сэндиндлэ пхарэ́с Лэс и далэ́са-паць кэрдэ́ дова́, со ракирдэ́ проро́ки, далэ́ лава́ амэ гинаса кажно саватонэ́ (суботонэ́), сы́рбы сэндинаса Лэс.

²⁸Ёнэ на латхнэ́ дрэ Лэ́стэ нисави́ банг ваш мэрибэ́н, и усае́кх мангнэ́ Пилатос тэ мулякирэ́н Лэс.

²⁹Ке́ли ёнэ кэрдэ́ саро́, со сыс чхиндло́ пал Лэ́стэ, ёнэ лынэ́ Лэс трушулэстыр, чхудэ́ Лэс дрэ маґилытко копли́ца.

³⁰Нэ Дэвэ́л отджидякирдя́ Лэс мэрибна́стыр;

³¹И бут дывэса́ Ису́со сыкадёлас кэ одолэ́ мануша́, савэ́ кхэтанэ́ Лэ́са явнэ́ Галилеятыр дро Ерусалимо, савэ́ какана́ исын Лэ́скирэ якхи́тка анги́л манушэ́ндэ.

³²И амэ пиридаса кадая́ бахталы́ зан (звесь) тумэ́нгэ, сыр Дэвэ́л дыя́ лав амарэ́ дадэ́нгэ, Ёв кэрдя́ дава́ ваш амэ́нгэ, лэ́нгирэ чхавэ́нгэ, ке́ли отджидякирдя́ Исусо́с,

³³сыр дава́ исын чхиндло́ дро яви́р пса́лмо: “Ту сан Миро Чхаво́: Мэ ададывэ́с бияндём Тут.”

³⁴Дэвэ́л отджидякирдя́ Лэс мэрибна́стыр адя́кэ, соб (кай) Ёв буты́р тэ на кирнёл дрэ маґила, пал дава́ Ёв пхэндя́ адя́кэ: “Мэ да́ва Ту́кэ свэ́нто и чачуно́ бахтякирибэ́н, саво́ сыс дыно́ Давидо́скэ.”

³⁵Палдава́ Ёв ракирэ́ла и яви́р штэ́то: “Ту на дэ́са Свэнтонэскэ тэ дыкхэ́л мэрибэ́н.”

³⁶Нэ Дави́до кэрдя́ саро́ дро пэ́скиро часо, сыр лэ́скэ пхэндя́ Дэвэ́л, ёв мыя́, и лэс гарадэ́ лэ́скирэ дадэ́нца и тру́по лэ́скиро кирныя.

³⁷Нэ Одова́, Конэ́с Дэвэ́л отджидякирдя́, на кирныя.

³⁸Палдава́, Мануша́лэ-Пшала́лэ, мэ кама́м, соб (кай) тумэ́ тэ джинэ́н, со тумэ́нгэ пхэнэ́лапэ лав пал грэхэнгиро отмэкибэн пир Исусо́стэ Христосо́стэ,

³⁹и дрэ саро́, дрэ со тумэ́ на могиндлэ́ тэ явэ́н зракхнэ́ Мойза́скирэ Законоса, кажно ману́ш, кон патя́ла, ячэ́ла чачипна́скиро пир Исусо́стэ Христосо́стэ.

⁴⁰Дыкхэ́н, соб (кай) и тумэ́нгэ тэ на явэ́л адя́кэ, сыр ракирдэ́ проро́ки:

⁴¹“Ракхэ́нпэ тумэ́, кон дыкхэ́ла бипатывакирэс пэ яви́р манушэ́ндэ, тумэ́ здивинэнапэ и хасёна; пал-дова́ со Мэ кэра́ва дасаво рэ́ндо ваш тумэ́ндэ дрэ тумарэ́ дывэса́, савэ́скэ тумэ́ ние́кхвар на патя́на, ко́ли вари-кон роспхэнэ́ла тумэ́нгэ пал дава́.”

⁴²Ке́ли Па́вли и Варнава джа́нас явирэ синагогатыр, лэн кхардэ́, соб (кай) ёнэ тэ явэ́н дро яви́р са́вато и тэ ракирэ́н дова́-паць.

⁴³Ке́ли мануша́, савэ́ сыс пэ скэдыибэ́н, лынэ́ тэ розджанпэ, тэды бут Юды и яви́р, савэ́ прилынэ́ Юды́тко сыклякирибэ́н, гинэ́ пал Павлистэ Варнаваса, савэ́ ракирдэ́ лэ́нца и мангэнас, упатякирэнас лэн тэ явэ́н дурэды́р дро Дэвлэ́скиро бахталыпэ́н.

⁴⁴Дро яви́р са́вато сарэ́ мануша́ форо́стыр явнэ́ тэ шунэ́н Дэвлэ́скиро лав.

⁴⁵Ке́ли Юды дыкхнэ́, со скэдынэ́пэ ада́кицы бут мануша́, ёнэ лынэ́ тэ зэвлынэн и ракирдэ́ древа́н налачхэ́ лава́ пэ саро́ дова́, со ракирдя́ Па́вли.

⁴⁶А Па́вли и Варнава ракирдэ́ муршканэ́с и бидаракирэс пхэндлэ́: “Амэ́нгэ трэй англэды́р сарэ́ндыр тумэ́нгэ тэ роспхэнас Дэвлэ́скиро лав: нэ сыр тумэ́ на приґалёна лэс, тумэ́ далэ́са сэндинэна кокорэ́ пэс, со тумэ́ндэ на явэ́ла ве́чно джиибэ́н, палдава́ амэ какана́ рискираса Дэвлэ́скиро лав Наюдэ́нгэ;

⁴⁷палдава́, со адя́кэ амэ́нгэ ракирдя́ Рай Дэвэ́л, сыр Ёв пхэндя́: “Мэ кэра́ва Тут, соб (кай) ту тэ явэс дуд Наюдэ́нгэ, соб (кай) пир Ту́тэ мануша́ тэ явэ́н зракхнэ́ пир сари́ пхув.”

⁴⁸На́юды, ке́ли шундлэ́ дава́, радындлэпэ и славиндлэ Дэвлэ́скиро лав, и упатя́ндынэ сарэ́, савэ́ сыс выкэдынэ́ кэ ве́чно джиибэ́н;

⁴⁹И Дэвлэ́скиро лав розджаласпэ пир сари́ доя́ риг.

⁵⁰Нэ Юды, подракирдэ дэвлытконэ́ и барвалэ́ родо́стыр джувле́н и форо́скирэ барыдырэ́н, и ґаздынэ́ манушэ́н проти Павлистэ и Варнавастэ, и традынэ криг лэн пэ́скирэ рига́тыр.

⁵¹Тэды Апо́столы тринскирдэ пэ лэ́ндэ пра́хо пэ́скирэ ґэрэндыр и гинэ́ дрэ Икония.

⁵²Сыкляибны́тка сыс пхэрдэ́ радыма́са и Свэнтонэ́ Духо́са.