Read Baltic Romani Bible 2019 – Библия - Пэ Балтитко Романи чиб (Романэс) 2019 Римлянэнгэ 13 Bible Online

Римлянэнгэ 13 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Римлянэнгэ 13

¹Кажно ману́ш исын банго́ (мусинэла) тэ кандэл тхэмэ́скирэ барыдырэ́н, пал-дова́ со нанэ дава́, соб (кай) тэ на явэ́н ёнэ Дэвлэ́стыр, и сарэ́н барыдырэ́н, савэ́ндэ исын право пэ манушэ́ндэ, чхудя́ Дэвэ́л.

²Палдава́ одова́, кон исын проти барыдырэндэ, исын проти одолэ́стэ, савэ́с чхудя́ Дэвэ́л; и кон адя́кэ кэрэ́ла, одова́ кокоро́ янэ́ла сэ́ндо пэ пэ́стэ.

³Пал-дова́ со барыдыра́ исын даранэ на ваш одолэ́нгэ, кон кэрэ́ла лачхипэ́н, на ваш одолэ́нгэ, кон кэрэ́ла фуипэ́н. Ци камэ́са ту тэ на дарэс барыдырэндыр? Кэр лачхипэ́н и ту́кэ явэ́ла лэ́нгиро шарибэ́н;

⁴пал-дова́ со барыдыро́ исын Дэвлэ́скиро дына́ри ваш дова́, соб (кай) ту́кэ тэ явэ́л лачхипэ́н. А ко́ли ту кэрэ́са фуипэ́н, тэды да́ро, пал-дова́ со лэ́стэ на ивья́ (на напра́снэс) исын курта́ла; пал-дова́ со ёв исын Дэвлэ́скиро дына́ри, савэ́с Дэвэ́л чхудя́ ваш ка́ра одолэ́ манушэ́скэ, саво́ кэрэ́ла фуипэ́н.

⁵Палдава́ трэй тэ кандэс на пал екх дар анги́л ка́ра, нэ и пал паты́в.

⁶Палдава́ тумэ́ и плэскирэна намирья (подати): пал-дова́ со ёнэ исын Дэвлэ́скирэ дына́рья, и ґа́да, исын лэ́нгири буты́.

⁷Палдава́ отдэ́н кажнонэ́скэ дова́, со лэ́скэ трэй: конэ́скэ трэй намирья (подати), отдэ́н одолэ́скэ намирья; конэ́стыр трэй мыто (оброко), отдэ́н одолэ́скэ мыто; конэ́стыр трэй тэ дарэ́н, дарэ́н одолэ́стыр; конэ́скэ трэй кутякирибэн, кутякирэн одолэ́с.

⁸На явэ́н дро вужлыпэ́н ни конэ́стэ апри́ч сыр вужлыпэ́н тэ сыкавэ́н паты́в екх екхэ́скэ: пал-дова́ со, кон сыкавэ́ла паты́в пэ́скирэ пашатунэ́ манушэ́скэ, одова́ сполнинэла Зако́но.

⁹Пал-дова́ со припхэныбэна́: “На кэр марки (биладжаипэ́н), на замар, на чор, на хохав, на зэвлын,” и, ко́ли исын вари-саво́ яви́р припхэныбэ́н, то лэ́скиро смысло дрэ далэ́ лава́: “Сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”

¹⁰Кон сыкавэ́ла паты́в, одова́ на кэрэ́ла чорипэ́н пашатунэ́ манушэ́скэ, пал-дова́ со, кон сыкавэ́ла паты́в, одова́ сполнинэла Зако́но.

¹¹Кэрэ́н адя́кэ, сыр тумэ́ тэ джинэ́н часо, со какана́ явдя́ мардо́ (шту́нда) тумэ́нгэ тэ уштэ́н соибнастыр; пал-дова́ со какана́ исын пашэдыр амаро́ зракхибэ́н, сыр тэды, ке́ли амэ лыям тэ патяс.

¹²Рат джа́ла криг сыг и дывэ́с ячэ́ла, палдава́ мэкаса калэ́ рэ́нды и урьясапэ дро парныпэн.

¹³Сыр и дывэсэ́, ява́са тэ лыджас пэс шука́р, на ява́са тэ хас на пир ме́ра, и на ява́са тэ матёвас, на ява́са тэ кэра́с марки и тэ кэра́с ладжавэ рэ́нды, на ява́са тэ выпробинас екх екхэ́с и тэ зэвлынас.

¹⁴Дживэ́н и кэрэ́н саро́ пир Исусо́скиро Христосо́скиро чачипэ́н, амарэ́ Ра́скирэ-Дэвлэ́скиро, на отдэ́н кокорэ́ пэс ваш тумари́ лоч и ла́киро тырдыпэ́н.