Read Baltic Romani Bible 2019 – Библия - Пэ Балтитко Романи чиб (Романэс) 2019 Римлянэнгэ 16 Bible Online

Римлянэнгэ 16 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Римлянэнгэ 16

¹Мэ кама́м тэ пхэна́в тумэ́нгэ лав пал амарьятэ пхэнятэ Фиватэ, ёй исын диакониса дрэ Кенхреенгири кхангири́;

²соб (кай) тумэ́ тэ прилэ́н ла сыр Дэвлэ́скирья манушня́, сыр трэй тэ прилэс свэнтонэн, и помогинэн ла́кэ, дрэ со ёй явэ́ла тэ мангэ́л тумэн, пал-дова́ со ёй кокори помогинэлас бутэнгэ, адя́кэ-паць и ма́нгэ.

³Пиридэ́н “рама́нё” (миро) Прискилоскэ и Акилоскэ, адя́кэ-паць мирэ́ манушэ́нгэ, савэ́ кхэтанэ́ ма́нца кэрдэ́ буты́ ваш Исусо́скэ Христосо́скэ,

⁴савэ́ пал миро джиибэ́н отдэнас кокорэ́ пэ́скиро шэро́; мэ парикирава лэ́нгэ наекхджино нэ и сарэ́ Наюдэнгирэ кхангирья,

⁵адя́кэ-паць пиридэ́н “рама́нё” и кхангирьякэ, сави́ скэдэлапэ дрэ лэ́нгиро кхэр. Пиридэ́н “рама́нё” Епенетоскэ, адя́кэ-паць мирэ́ дрогонэ́ малэ́скэ, саво́ англэды́р сарэ́ндыр упатяндыя дрэ Христосо́стэ дрэ Асия.

⁶Пиридэ́н “рама́нё” Мариякэ, сави́ кэрдя́ адя́кэ бут лачхипэ́н ваш тумэ́нгэ.

⁷Пиридэ́н “рама́нё” Андроникоскэ и Юниёскэ, мирэ́ сэмэнцакэ, савэ́ сыс бэштэ́ кхэтанэ́ ма́нца дро штарибэ́н; ёнэ исын джиндлэ́ машки́р Апостолэндэ и англэды́р ма́ндыр упатя́ндынэ дрэ Христосо́стэ.

⁸Пиридэ́н “рама́нё” Амплияскэ, саво́ исын древа́н дро́го ма́нгэ сыр пшал пир патяибэ́н дрэ Растэ-Дэвлэ́стэ.

⁹Пиридэ́н “рама́нё” Урбаноскэ, саво́ кхэтанэ́ амэ́нца кэрэ́ла буты́ ваш Христосо́скэ, и мирэ́ дрогонэ́ малэ́скэ Стахиёскэ.

¹⁰Пиридэ́н “рама́нё” Апелесоскэ, саво́ сыкадя́, со ёв чачуно́ патяибнаскиро дрэ Христосо́стэ, сарэ́нгэ Аристовулоскирэ кхэрэ́стыр.

¹¹Пиридэ́н “рама́нё” Иродионоскэ, мирэ́ сэмэнцакэ, “рама́нё” патяибнаскирэнгэ дрэ Растэ-Дэвлэ́стэ Наркисоскирэ кхэрэ́стыр.

¹²Пиридэ́н “рама́нё” Трифенакэ и Трифосакэ, савэ́ кэрэ́на буты́ ваш Дэвлэ́скэ. “Рама́нё” дрогонэ́ Персидакэ, сави́ бут кэрдя́ ваш Дэвлэ́скэ.

¹³Пиридэ́н “рама́нё” Руфаскэ, савэ́с Дэвэ́л выкэдыя́, и лэ́скирэ да́кэ, сави́ сыс сыр дай и ваш ма́нгэ.

¹⁴Пиридэ́н “рама́нё” Асинкритоскэ, Флигонтоскэ, Ермаскэ, Патровоскэ, Ермияскэ и явирэ пшалэ́нгэ, савэ́ исын кхэтанэ́ лэ́са.

¹⁵Пиридэ́н “рама́нё” Филологоскэ и Юлияскэ, Ниреёскэ и лэ́скирэ пхэнякэ, и Олимпаноскэ и сарэ́ дэвлытконэнгэ, савэ́ исын кхэтанэ́ Лэ́са.

¹⁶Дэн “добридим” екх екхэ́скэ Свэнтонэ́ чамудыпнаса. Сарэ́ Христосо́скирэ кхангирья пиридэна “рама́нё” тумэ́нгэ.

¹⁷Нэ мэ манга́ва тумэн, пшала́лэ, тэ ракхэ́нпэ одолэ́ манушэ́ндыр, савэ́ кэрэ́на дрэ кхангирья роскэрибэна и пхарипэна, и камэ́на тэ лыджа́н криг тумэн далэ́ сыкляибнастыр, савэ́скэ тумэ́ высыклынэ.

¹⁸Палдава́ адасавэ́ мануша́ дынаринэна на амарэ́ Ра́скэ-Дэвлэ́скэ, Исусо́скэ Христосо́скэ, а пэ́скирэ налачхэ́ камибнаскэ; ёнэ хахавэ́на (дэ́на дукха́) лачхэ́-илытконэ манушэ́н гудлэ́ и хоханэ́ лавэ́нца.

¹⁹Тумаро кандыпэн патяибнаскэ исын джиндло́ сарэ́нгэ; палдава́ мэ сом древа́н радо пал тумэ́ндэ, мэ кама́м, соб (кай) тумэ́ тэ явэ́н годьварэ́ дро лачхипэ́н и тэ на явэ́н бангэ́ дро фуипэ́н.

²⁰Нэ Дэвэ́л, Саво́ дэ́ла рама́нё, хасякирэ́ла налачхэ́с тэл тумарэ́ ґэра́. Мэк тэ явэ́л бахталыпэ́н амарэ́ Ра́скирэ-Дэвлэ́скирэ, Исусо́скиро Христосо́скиро тумэ́нца! Ами́нь.

²¹Пиридэла “рама́нё” тумэ́нгэ Хима (Тимофеё), саво́ кэрэ́ла буты́ кхэтанэ́ ма́нца, и Луцыё, Иасоно, и Сосипатро, мири́ сэмэ́нца.

²²Мэ, Цэрцыё, саво́ чхиндём дава́ лыл, пиридава “рама́нё” тумэ́нгэ, сыр пшал пир патяибэ́н дрэ Растэ-Дэвлэ́стэ.

²³Пиридэла “рама́нё” тумэ́нгэ Гаё, саво́ прилыя́ ман и сари́ кхангири́. Пиридэла “рама́нё” тумэ́нгэ Ерасто, ракхибна́ри пэ фори́тко тыкнори́ (сокровишчы́тко) и пшал Кварто.

²⁴Мэк бахталыпэ́н Ра́скирэ-Дэвлэ́скирэ, амарэ́ Исусо́скирэ Христосо́скиро тэ явэ́л сарэ́нца тумэ́нца. Ами́нь.