Read Baltic Romani Bible 2019 – Библия - Пэ Балтитко Романи чиб (Романэс) 2019 Римлянэнгэ 2 Bible Online

Римлянэнгэ 2 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Римлянэнгэ 2

¹Нанэ ту́кэ примангипэн, кажно ману́ш, саво́ сэндинэла явирэ́с, одолэ́-паць сэндоса ту кокоро́ явэ́са сэндиндло, пал-дова́ со, ко́ли ту сэндинэса явирэ манушэ́с, ту кэрэ́са дова́-паць кокоро́ пэ́скэ.

²Нэ амэ джина́са, со пэ адалэ́ манушэ́ндэ, кон кэрэ́ла дасаво-паць, исын чачуно́ Дэвлэ́скиро сэ́ндо.

³Ману́ш, ту со думинэса, со обджала Дэвлэ́скиро сэ́ндо, ке́ли ту сэндинэса манушэ́н, савэ́ кэрэ́на дасавэ́ рэ́нды и кокоро́ дова́-паць кэрэ́са?

⁴Ци ту на гинэса Дэвлэ́скиро лачхипэ́н, вырикирибэн и ужакирибэ́н, и, хай, ту на ґалёса, со Дэвлэ́скэ трэй, соб (кай) ту тэ рискирэс пэ́скиро джиибэ́н кэ Ёв?

⁵А пир тыро́ накандыпэн и напорискирдо кэ Ёв ило́, ту кокоро́ пэ́скэ кэдэса буты́р холы́ пэ дывэ́с ваш Дэвлэ́скири холы́, ке́ли Ёв откэрэла Пэ́скиро сэ́ндо,

⁶ке́ли Дэвэ́л отдэ́ла кажнонэ́ манушэ́скэ пхэнэ́ла пал лэ́скирэ рэ́нды:

⁷одолэ́нгэ, кон саро́ часо кэрэ́ла лачхэ́ рэ́нды и пир дава́ родэ́ла сла́ва, чачипэ́н и бимэрибнаскиро ко́нцо (яго́ро), Ёв дэ́ла ве́чно джиибэ́н.

⁸Нэ одолэ́н, кон кэрэ́ла пир пэ́скири годы́ и на приґалёла чачипэ́н, а кэрэ́ла фуипэ́н, кодолэ́с ужакирэ́ла холы́ и холямипэн Дэвлэ́стыр,

⁹ту́га и калыпэ́н явэ́на кажнонэ́ (сваконэ) манушэ́скирэ илэскэ, саво́ кэрэ́ла фуипэ́н, англэды́р Юдэ́нгэ, и адя́кэ-паць и Элинэ́нгэ (Грекэ́нгэ/Баламэ́нгэ):

¹⁰а сла́ва и паты́в, и рама́нё кажнонэ́ манушэ́скэ, саво́ кэрэ́ла лачхипэ́н, англэды́р Юдэ́нгэ, и адя́кэ-паць и Элинэнгэ (Грекэ́нгэ):

¹¹Пал-дова́ со Дэвэ́л кутякирэла шэра́ (ра́внэс) сарэ́ манушэ́н.

¹²Одолэ́ мануша́, савэ́ на джиндлэ́ Зако́но и кэрдэ́ грэ́хи, ёнэ на пир Зако́но и хасёна; нэ одолэ́, савэ́ джиндлэ́ Зако́но и кэрдэ́ грэ́хи, ёнэ пир Зако́но и явэ́на сэндиндлэ;

¹³пал-дова́ со, на одолэ́ мануша́ исын чачунэ́ анги́л Дэвлэ́стэ, савэ́ шунэ́на Зако́но, а кодолэ́, савэ́ кэрэ́на пир Зако́но, ёнэ явэ́на зракхнэ́.

¹⁴Пал-дова́ со, ке́ли Наюдэ́ндэ нанэ Зако́но, ёнэ кэрэ́на кокорэ́ пэ́стыр, сы́рбы пир Зако́но, тэды ёнэ, савэ́ндэ нанэ Зако́но, исын Зако́но кокорэ́ пэ́скэ;

¹⁵ёнэ и сыкавэ́на, со Зако́но исын сы́рбы чхиндло́ дрэ лэ́нгиро ило́, лэ́нгири паты́в и годы́ допхэнэ́ла пал дава́, екх мо́ло ёнэ затэрдёна екх пал екхэ́стэ, а яви́р мо́ло бангякирэна екх екхэ́с;

¹⁶дро дова́-паць дывэ́с, ке́ли Дэвэ́л пир бахталы́ зан (звесь), сави́ мэ роспхэндём, явэ́ла тэ сэндякирэ́л сарэ́ чораханэ манушэ́нгирэ рэ́нды пир Исусо́стэ Христосо́стэ.

¹⁷Ко́ли ту пэс гинэса Юдоса и розгинэса пэ Зако́но, и шарэсапэ Дэвлэ́са,

¹⁸и джинэ́са Лэ́скири во́ля, и ґалёса, со исын фэдэды́р, сыклыи Законо́стыр;

¹⁹и ту сан твардо, со ту сан лыджаибнаскиро корорэнгэ и ту сан дуд ваш одолэ́ манушэ́нгэ, савэ́ псирэ́на дро калыпэ́н (цямлыпэ́н);

²⁰ту сан сыкляри (наставнико) ваш дылынэнгэ и сыклякирибна́скиро бияторэнгэ, конэ́стэ исын дро Зако́но саро́, со дасаво исын джиныбэ́н и чачипэ́н:

²¹Сыр ту сыклякирэса явирэ манушэ́н, а англэды́р ту кокоро́ на сыклёса?

²²Ту ракирэ́са тэ на кэрэ́н биладжаипэ́н, а ту кокоро́ кэрэ́са биладжаипэ́н? Ту́кэ, хай, древа́н на пир ило́ и́долы, а кокоро́ ту обчорэса лэ́нгирэ кхангирья?

²³Ту, саво́ шарэсапэ, со ту джинэ́са Зако́но, а кокоро́ кэрэ́са на пир Зако́но, — далэ́са ту ладжакирэса Дэвлэ́с?

²⁴Палдава́ исын чхиндло́: “Пал тумэ́ндэ На́юды явэ́на тэ тэлякирэн Дэвлэ́скиро лав.”

²⁵Палдава́ обчхиныбэн янэ́ла ту́кэ лачхипэ́н, ко́ли ту ракхэса Зако́но: нэ ко́ли ту кэрэ́са на пир Зако́но, тэды тыро́ обчхиныбэн нисо́ на мол.

²⁶И ко́ли ману́ш, саво́ исын наобчхиндло, кэрэ́ла саро́, со исын чхиндло́ дро Зако́но, ци на явэ́ла лэ́скиро наобчхиныбэн тэ гинэлпэ лэ́скэ дро обчхиныбэн?

²⁷И мануша́, савэ́ бияныпнастыр на сыс обчхиндлэ́, а кэрэ́на пир Зако́но, ци ёнэ явэ́на тэ сэндинэ́н тут, саво́ на кэрэ́ла пир Зако́но и джинэ́ла Свэ́нто Чхиныбэ́н?

²⁸Пал-дова́ со, на одова́ исын Юдо, кон исын Юдо яврестыр, и на дова́ обчхиныбэн, саво́ исын кэрдо́ пэ маса́ яврестыр;

²⁹нэ одова́ исын чачуно́ Юдо, саво́ андра́л исын дасаво, и дова́ исын обчхиныбэн, саво́ исын дро ило́, пир ду́хо (фа́но), а на пир Зако́но, дасавэскэ манушэ́скэ явэ́ла шарибэ́н на манушэ́ндыр, а Дэвлэ́стыр.