Read Baltic Romani Bible 2019 – Библия - Пэ Балтитко Романи чиб (Романэс) 2019 Римлянэнгэ 3 Bible Online

Римлянэнгэ 3 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Римлянэнгэ 3

¹Тэды, сави́ льго́та (преимушчэство) исын Юдэ́ндэ явирэ манушэ́ндыр, ци саво́ лачхипэ́н исын обчхиныбнастыр?

²Юдэ́ндэ исын бари льго́та дро саро́: буты́р сарэ́стыр дрэ дова́, со лэ́нгэ сыс допатякирдо Дэвлэ́скиро лав.

³И со ж? Ко́ли бут лэ́ндыр на упатя́ндынэ дрэ Дэвлэ́стэ, тэды ци могинэ́ла лэ́нгиро начачипэ́н тэ хасякирэ́л Дэвлэ́скиро чачипэ́н?

⁴Над, нисыр. Дэвэ́л исын чачуно́, а кажно ману́ш исын хохано́, сыр исын чхиндло́: “Чачунэ́ исын Тырэ́ лава́, и дро сэ́ндо Тыро́ исын чачипэ́н.”

⁵Нэ ко́ли амаро́ начачипэ́н сыкавэ́ла Дэвлэ́скиро чачипэ́н, тэды со амэ пхэна́са? Нау́што явэ́ла Дэвэ́л начачуно пэ амэ́ндэ дрэ Пэ́скири холы́? Мэ ракира́ва пир манушы́тко годы́.

⁶Над, ко́ли адя́кэ дава́ тэ явэ́л, тэды сыр Дэвэ́л явэ́ла тэ сэндякирэ́л свэ́то?

⁷Ко́ли миро начачипэ́н кэрэ́ла бицялэдыр Дэвлэ́скиро чачипэ́н и далэ́са кэрэ́ла барэды́р Лэ́скири сла́ва, тэды пал со ишчо (инкэ́) ман тэ сэндинэ́н, сыр грэхитконэ́ манушэ́с?

⁸Со́скэ амэ́нгэ тэды дурэды́р тэ на кэра́с фуипэ́н, соб (кай) буты́р тэ барьёл лачхипэ́н, сыр вари-савэ́ мануша́ кошэна амэн и ракирэ́на, со амэ адя́кэ сыклякираса? Чачуно́ сэ́ндо явэ́ла пэ кадасавэ́ манушэ́ндэ.

⁹Со ж тэды? Ци исын амэ́ндэ вари-сави́ льго́та анги́л явирэ манушэ́ндэ? Нисави́; палдова́ со амэ какана́ допхэндям, со сыр Юды, адя́кэ-паць и Эли́ны (Гре́ки/Баламэ́), амэ сарэ́ сам тэл грэхи́тко зор:

¹⁰сыр и исын чхиндло́: “Нанэ ние́кх чачуно́ ману́ш;

¹¹нанэ нико́н, соб (кай) тэ ґалёл и тэ родэ́л Дэвлэ́с.

¹²Сарэ́ мардэ́пэ дрэ риг дромэ́стыр, и со кэ екх исын хасибны́тка, нанэ ни екх ману́ш, кон кэрэ́ла лачхипэ́н; нанэ нико́н:

¹³лэ́нгиро кирло исын отчхакирды маґила, ёнэ пэ́скирэ чиба́са (чибьяса) ракирэ́на екх хохаибэ́н; сапитко трута (ядо) исын пэ лэ́нгирэ ушта́:

¹⁴лэ́нгирэ лавэ́ндыр исын екх кошыбэ́н и киркипэн;

¹⁵лэ́нгирэ ґэра́ лыджа́на сы́гэс тэ прочхувэн манушэ́нгиро рат;

¹⁶бизладо и хасибэ́н одо́й, кай ёнэ гинэ́,

¹⁷ёнэ на ґалынэ́ дром кэ рама́нё (миро).

¹⁸И ёнэ на кутякирэна и на дарна Дэвлэ́стыр.”

¹⁹Нэ амэ джина́са, со дова́, со вари-ке́ли Зако́но ракирэ́ла, ёв ракирэ́ла одолэ́ манушэ́нгэ, савэ́ исын тэл Зако́но адя́кэ, соб (кай) кажна лава́ тэ запхэнэн тэ ракирэ́н, и саро́ свэ́то тэ явэ́л банго́ анги́л Дэвлэ́стэ.

²⁰Кон кэрэ́ла пир Зако́но, усае́кх ние́кх на приджинэлапэ чачунэса анги́л Дэвлэ́стэ, пал-дова́ со Зако́но дэ́ла амэ́нгэ тэ джинас, со да дасаво исын грэ́хо.

²¹Нэ какана́ Дэвэ́л отчхакирэла Пэ́скиро чачипэ́н манушэ́нгэ, савэ́ исын вольна Законо́стыр, а дава́ джа́ла чачипнастыр, пал саво́ допхэнэна Зако́но и Проро́ки;

²²дава́ Дэвлэ́скиро чачипэ́н исын пир патяибэ́н дрэ Исусо́стэ Христосо́стэ, саво́ дэ́лапэ сарэ́ манушэ́нгэ би выкэдыибнаскиро, кон патя́ла.

²³Пал-дова́ со сарэ́ мануша́ кэрдэ́ грэ́хо и ёнэ дуринэ Дэвлэ́скирэ славатыр.

²⁴Нэ лэ́нгирэ грэ́хи отмэкэнапэ пир Дэвлэ́скиро бахталыпэ́н, пир выкиныбэ́н Исусо́скирэ Христосо́скирэ ратэ́са;

²⁵Савэс Дэвэ́л чхудя́ анги́л сыр свэ́нто дыибэ́н ваш тангипэ́н пир патяибэ́н дро Лэ́скиро рат, кон патя́ла, адя́кэ Дэвэ́л сыкадя́ пэ́скиро чачипэ́н и примангдя грэ́хи манушэ́нгэ, савэ́ ёнэ кэрдэ́ англэды́р;

²⁶пэ́скирэ ґаратунэ́ (длугонэ) вырикирибнаса саро́ дава́ часо, соб (кай) Ёв какана́ тэ сыкавэ́л пэ́скиро чачипэ́н, и со Ёв кокоро́ исын чачуно́, и приджинэла чачунэнца сарэ́н, кон патя́ла дрэ Исусо́стэ.

²⁷Со́са амэ́нгэ какана́ тэ шараспэ? Нанэ со́са. Ко́ли екхэ Законоса? Над, а патяибна́са пир Зако́но;

²⁸пал-дова́ со амэ гинаса, со ману́ш приджинэлапэ чачунэса пир патяибэ́н, на дыкхи́, сыр ёв ракхэ́ла Зако́но.

²⁹Нау́што Дэвэ́л исын екх ваш Юдэ́нгэ? Ци нанэ Ёв Дэвэ́л и Наюдэ́нгэ? Ёв исын Дэвэ́л адя́кэ-паць ваш сарэ́ манушэ́нгэ пэ свэ́то:

³⁰пал-дова́ со исын екх Дэвэ́л, Саво́ приджинэла чачунэнца одолэ́н, кон кэрдя́ обчхиныбэн пир патяибэ́н и кодолэ́н, савэ́ патя́на, нэ савэ́ исын наобчиндлэ.

³¹Ци дава́ на значынэ́ла, со амэ хасякираса Зако́но патяибна́са? Сарэ́са над, амэ кэра́са Зако́но зоралэды́р.