Read Baltic Romani Bible 2019 – Библия - Пэ Балтитко Романи чиб (Романэс) 2019 Римлянэнгэ 6 Bible Online

Римлянэнгэ 6 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Римлянэнгэ 6

¹Со ж амэ пхэна́са? Ци тэ ячаспэ амэ́нгэ дро грэ́хо, соб (кай) тэ барьёл Дэвлэ́скиро бахталыпэ́н?

²Над. Амэ мыям ваш грэ́хо, сыр амэ могинаса дурэды́р тэ джива́с дрэ лэ́стэ?

³Ци тумэ́ на джинэ́на, со сарэ́ амэ, кон болдяпэ дрэ Исусо́стэ Христосо́стэ, дрэ Лэ́скиро мэрибэ́н болдямпэ?

⁴И адя́кэ амэ мыям кхэтанэ́ Лэ́са пир болдыипэн дрэ мэрибэ́н, соб (кай), сыр Христо́со сыс отджидякирдо мулэ́ндыр Дэвлэ́скирэ слава́са, адя́кэ и амэ́нгэ тэ джива́с дрэ нэво́ джиибэ́н.

⁵Пал-дова́ со, ко́ли амэ кхэтанякирдямпэ Лэ́са дро Лэ́скиро мэрибэ́н, тэды амэ сам бангэ́ (мусинаса) тэ явас адасавэ́-паць, сыр екх Лэ́са и дро Лэ́скиро отджидыибэн,

⁶и амэ джина́са, со ману́ш, саво́ англэды́р сы́рбы дживдя́ дрэ амэ́ндэ, сыс примардо пэ трушу́л Лэ́са ваш дова́, соб (кай) амарэ́ грэхи́тка маса́ тэ хасякирэ́н пэ́скири зор ваш чорипэ́н, и соб (кай) амэ тэ на явас буты́р дына́рья грэхо́скэ.

⁷Пал-дова́ со, кон мыя́, буты́р на могинэ́ла тэ кэрэ́л грэ́хо.

⁸Ко́ли амэ мыям Христосо́са, тэды амэ патя́са, со и тэ джива́с ява́са Лэ́са,

⁹и амэ джина́са, со Христо́со отджидыя́ мулэ́ндыр, и какана́ буты́р мэрибэ́н на рикирэ́ла зор пэ Лэ́стэ.

¹⁰Пал-дова́ со, ке́ли Ёв мыя́, тэды Ёв мыя́ е́кхвар ваш грэ́хо, нэ Ёв какана́ дживэ́ла ваш Дэвлэ́скэ.

¹¹Адя́кэ-паць и тумэ́ гинэн пэс мулэ́нца ваш грэ́хо, нэ тумэ́ гинэн пэс джидэ́нца ваш Дэвлэ́скэ дрэ Исусо́стэ Христосо́стэ.

¹²Пал-дова́ со, мэк тэ на дживэ́л грэ́хо дрэ тумарэ́ маса́, саво́ дживэ́ла на ве́чнэс, соб (кай) тумэ́нгэ тэ на поддэнпэ лэ́скирэ тырдыпнаскэ.

¹³И на отдэ́н тумарэ́ маса́ грэхо́скэ сы́рбы дрэ васта́ ваш начачипэ́н, а тумэ́ отдэ́н фэды́р пэс Дэвлэ́скэ, сыр тумэ́ сы́рбы отджидынэ мулэ́ндыр дрэ джиибэ́н, и отдэ́н тумарэ́ маса́ дрэ Дэвлэ́скирэ васта́ ваш чачипэ́н.

¹⁴Пал-дова́ со грэ́хо на явэ́ла буты́р пэ тумэ́ндэ тэ хулаинэ́л: пал-дова́ со тумэ́ какана́ сан на тэл Зако́но, а тэл бахталыпэ́н.

¹⁵И тэды, ци ява́са амэ тэ кэра́с грэ́хо, пал-дова́ со какана́ амэ сам на тэл Зако́но, а тэл бахталыпэ́н? Над.

¹⁶Ци на джинэ́на тумэ́, со конэ́скэ тумэ́ отдэна пэс сыр дына́ри дрэ кандыпэн, тумэ́ сан и дына́рья одолэ́скэ, конэ́с тумэ́ кандэ́на: ци тэ явэ́л дава́ грэ́хо, саво́ лыджа́ла кэ мэрибэ́н, ци тэ явэ́л дава́ грэ́хо пир кандыпэн, саво́ лыджа́ла кэ чачипэ́н?

¹⁷Нэ парикираса Дэвлэ́скэ, со тумэ́ ж са́нас англэды́р бутярнэ́ ваш грэ́хо, а тумэ́ какана́ лынэ́ тэ шунэ́н сарэ́ илэ́стыр дова́ сыкляибэн, савэ́скэ тумэ́ отдынэ́ пэс.

¹⁸А ке́ли тумэ́ гинэ́ криг грэхостыр, и тэды тумэ́ ячнэ́ писхарьёнца ваш чачипэ́н.

¹⁹Мэ ракира́ва тумэ́нгэ пал дава́ манушытконэ́ лавэ́нца, ваш дова́, соб (кай) тумэ́ тэ ґалён. Адя́кэ, сыр тумэ́ англэды́р отдэнас тумарэ́ лочакирэ маса́ дрэ магирдо́ писхарибэн и проти Зако́но, то какана́ отдэ́н тумарэ́ маса́ дрэ писхарибэн чачипнаскэ пэ свэ́нта рэ́нды.

²⁰Пал-дова́ со, ко́ли тумэ́ и са́нас грэхоскирэ писха́рья, тэды тумэ́ са́нас вольна чачипнастыр.

²¹Савэ лачхэ́ рэ́нды тумэ́ тэды кэрдэ́? Долэ́, савэ́ндыр тумэ́ какана́ кокорэ́ ладжана, пал-дова́ со лэ́нгиро ко́нцо (яго́ро) исыс мэрибэ́н.

²²Нэ какана́, ке́ли тумэ́ сан вольна грэхостыр и ячнэ́ Дэвлэ́скирэ писхарье́нца, тумэ́ндэ исын свэ́нто отдыибэ́н Лэ́стыр и тумэ́ндэ исын ко́нцо (яго́ро) пэ дава́, саво́ исын ве́чно джиибэ́н.

²³Пал-дова́ со плэскирибэн пал грэ́хо исын мэрибэ́н, а Дэвлэ́скиро тала́но пир бахталыпэ́н исын ве́чно джиибэ́н дрэ Исусо́стэ Христосо́стэ, амарэ́ Растэ-Дэвлэ́стэ.