Read Baltic Romani Bible 2019 – Библия - Пэ Балтитко Романи чиб (Романэс) 2019 1 Коринфянэнгэ 11 Bible Online

1 Коринфянэнгэ 11 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Коринфянэнгэ 11

¹Кэрэ́н адя́кэ-паць, сыр и мэ, пал-дова́ со мэ кэра́ва адя́кэ-паць, сыр Христо́со.

²Мэ шарава тумэн, пшала́лэ, со тумэ́ рипирэна пал ма́ндэ; и пал дова́, со тумэ́ рикирэ́на далэ́ упхэныбэна́, сыр мэ и сыклякирдём тумэн.

³Нэ мэ кама́м, соб (кай) тумэ́ тэ джинэ́н, со Христо́со исын Шэрало́ пэ сарэ́ муршэндэ, а ром исын шэрало́ пэ ромня́тэ, и Дэвэ́л Дад исын Шэрало́ пэ Христосо́стэ.

⁴Мурш, саво́ мангэлапэ Дэвлэ́скэ, ци ангилпхэнэла запхандлэ вари-со́са шэрэ́са, сы́рбы подчхувэла лэ́скиро шэро́ ваш Христосо́скиро ладжаипэ́н.

⁵Нэ джувлы́, сави́ мангэлапэ Дэвлэ́скэ, ци ангилпхэнэла назапхандлэ нисоса шэрэ́са сы́рбы подчхувэла пэ́скиро шэро́ ваш Христосо́скиро ладжаипэ́н; пал-дова́ со кадава́ исын адя́кэ, сы́рбы ёй тэ явэ́л мурадэ́ шэрэ́са.

⁶Палдава́, ко́ли джувлы́ на запхандэла нисоса пэ́скиро шэро́, мэк ла́кирэ бала́ тэ явэ́н обчхиндлэ́.

⁷А ко́ли исын ладжаво джувля́кэ, соб (кай) ла́кирэ бала́ тэ явэ́н обчхиндлэ́ ци тэ явэ́н мурадэ́, мэк ёй тэ запхандэл вари-со́са шэро́. Палдава́ муршэскэ на трэй тэ запхандэл шэро́, пал-дова́ со мурш исын сы́рбы Дэвлэ́скири патри́н (о́бразо) дрэ манушэ́стэ, и мурш сы́рбы зяинэла Дэвлэ́скирэ ярконэ слава́са, а джувлы́ сы́рбы зяинэла ла́кирэ-ромэскирэ слава́са.

⁸Пал-дова́ со мурш нанэ создыно́ джувлятыр, а джувлы́ исын муршэстыр.

⁹И мурш нанэ создыно́ ваш джувля́кэ, а джувлы́ исын создыны́ ваш муршэ́скэ.

¹⁰Палдава́ джувля́кэ трэй тэ лыджа́л шпэ́ра (знако) пэ шэро́, со ёй исын вари-конэ́скири ваш Янголэнгэ.

¹¹Нэ усае́кх ромны́ нанэ во́льно ромэстыр, ни ром исын во́льно ромнятыр дро джиибэ́н, саво́ исын дро кхэтаныпэн Исусо́са.

¹²Палдава́, сыр ромны́ исын ромэстыр, адя́кэ-паць ром пир ромня́тэ, нэ усае́кх саро́ исын Дэвлэ́стыр.

¹³Сэндинэн кокорэ́: ци дава́ исын шука́р джувля́кэ тэ мангэ́лпэ Дэвлэ́скэ назапхандлэ́ шэрэ́са?

¹⁴Ци свэ́то кокоро́ на сыклякирэ́ла тумэн со, ко́ли ром барьякирэ́ла бала́, дава́ исын ладж лэ́скэ?

¹⁵Нэ джувлы́, ко́ли барьякирэ́ла бала́, дава́ исын сла́ва ла́кэ; пал-дова́ со длэнгэ бала́ исын сы́рбы дыкхло.

¹⁶А ко́ли вари-кон камэ́ла тэ чингардэлпэ, амэ́ндэ нанэ дасаво присыкляибэн, адя́кэ-паць и пэ Дэвлэ́скирэ скэдыибэна.

¹⁷Нэ, сыр мэ да́ва упхэныбэ́н тумэ́нгэ, мэ на шарава тумэн; пал-дова́ со тумэ́ кэдэнапэ на ваш лачхипэ́н, а сы́рбы буты́р ваш чорипэ́н.

¹⁸Палдава́, дро пэ́рво, ке́ли тумэ́ явэ́на пэ скэдыибэ́н, тумэ́ роспэрэнапэ пир групы тэ чингардэспэ, сыр мэ шундём, и мэ на́бут патя́ва дро дава́.

¹⁹Ваш дава́ трэй, соб (кай) тэ явэ́н ра́зна групы машки́р тумэ́ндэ, соб (кай) тэ сыкавэ́н пэс одолэ́ мануша́, кон исын тэрдэ́ пэ чачуно́ дром машки́р тумэ́ндэ.

²⁰Ке́ли тумэ́ кэдэнапэ дро екх штэ́то, дава́ на подджа́ла, соб (кай) тумэ́ тэ хан Ра́скирэ-Дэвлэ́скири вечэ́ря.

²¹Палдова́ — со кажно ману́ш камэ́ла сыгэды́р тэ хал пэ́скиро хабэ́н англэды́р явирэндыр и екх ману́ш исын бокхало, а яви́р исын мато.

²²Нау́што нанэ тумэ́ндэ кхэра́ тэ хан и тэ пьен? Ци тумэ́ дыкхэ́на вучипна́стыр пэ Кхангирья́киро скэдыибэ́н, со тумэ́ ладжакирэна чорорэ́ манушэ́н. Со ма́нгэ тэ пхэна́в тумэ́нгэ? Тэ шара́в ма́нгэ тумэн? Над, мэ на шарава тумэн.

²³Пал-дова́ со мэ Кокорэстыр Ра́стыр-Дэвлэ́стыр прилыём дова́ сыклякирибэ́н, саво́ мэ пиридава тумэ́нгэ, со Рай Дэвэ́л дрэ кодоя рат, ке́ли Ёв сыс здыно, лыя́ маро́,

²⁴парикирдя Дэвлэ́скэ, пхагирдя́ лэс и пхэндя́: “Дава́ исын Мирэ́ Маса́, савэ́ исын отдынэ́ ваш тумэ́нгэ: кэрэ́н адя́кэ тэ рипирэ́н Ман.”

²⁵Адя́кэ-паць и тахта́й пало́ вечэря и пхэндя́: “Дава́ тахта́й исын нэво́ Дэвлэ́скиро завето пир миро рат: кэрэ́н дава́ ада́кицы мо́лы, кицы́ мо́лы тумэ́ явэ́на тэ пьен лэ́стыр (ла́тыр), соб (кай) тэ рипирэ́н Ман.”

²⁶Пал-дова́ со ада́кицы мо́лы, кицы́ мо́лы тумэ́ явэ́на тэ хан дава́ маро́ и тэ пьен дава́ тахта́й, тумэ́ пирипхэнэна чачипэ́н пал Ра́скирэ-Дэвлэ́скиро мэрибэ́н, пака Ёв явэ́ла.

²⁷Палдава́, ко́ли вари-кон ха́ла маро́ ци пьела Ра́скирэ-Дэвлэ́скиро тахта́й би патыва́киро (би дара́киро) анги́л Лэ́стэ, одова́ ману́ш явэ́ла банго́, со ёв на кутякирэла Ра́скирэ-Дэвлэ́скирэ маса́ и рат.

²⁸А мэк кажно ману́ш тэ пропатякирэл пэс и пир дава́ ха́ла маро́ и пьела тахтастыр.

²⁹Палдава́, кон ха́ла и пьела тахтастыр би дара́киро анги́л Дэвлэ́стэ, одова́ ману́ш сы́рбы ха́ла и пьела Дэвлэ́скиро сэ́ндо пэ пэ́стэ, и сы́рбы отлыджалапэ би патыва́киро кэ Христосо́скирэ Маса́.

³⁰Палдава́ бут тумэ́ндыр исын бизорья́кирэ и насвалэ, и бут мынэ́.

³¹Палдава́, ко́ли амэ сэндинасас пэс, тэды амэн на сэндинэнас.

³²Нэ Дэвэ́л сэндякирэ́ла и чхувэ́ла хась (ка́ра) пэ амэ́ндэ, соб (кай) амэн тэ на сэндинэ́н кхэтанэ́ свэтоса.

³³Палдава́, пшала́лэ мирэ́, ке́ли тумэ́ скэдэ́напэ тэ хан вечэря, ужакирэн екх екхэ́с.

³⁴Ко́ли вари-кон исын бокхало, мэк ёв тэ хал кхэрэ́, соб (кай) тумэ́ тэ на скэдэ́нпэ пэ Дэвлэ́скиро сэ́ндо. А саро́ яви́р мэ кэра́ва, сыр трэй, ке́ли мэ ява́ва кэ тумэ́.