Read Baltic Romani Bible 2019 – Библия - Пэ Балтитко Романи чиб (Романэс) 2019 1 Коринфянэнгэ 7 Bible Online

1 Коринфянэнгэ 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

1 Коринфянэнгэ 7

¹Пал дова́, со тумэ́ чхиндлэ́ ма́нгэ: манушэ́скэ фэды́р тэ на чилавэл (тэ на джинэ́л) джувля́;

²нэ палдова́, соб (кай) тэ на явэ́л биладжаипэ́н, мэк кажно ману́ш тэ лэл пэ́скэ ромня́, мэк кажнонэ́ (сваконэ) джувля́тэ тэ явэ́л екх ром.

³Ромэскэ трэй тэ явэ́л лачхо́ и тангипны́тко ваш пэ́скирэ ромнякэ; адя́кэ-паць и ромнякэ ваш ромэскэ.

⁴Ромны́ исын на хуланы пэ пэ́скирэ маса́, нэ исын ла́киро ром; адя́кэ-паць и ром исын на хула́й пэ пэ́скирэ маса́, а ромны́.

⁵На отпхэнэнпэ екх екхэстыр, ко́ли фэ́ни (то́ка) екх пир доракирибэ́н екх екхэ́са пэ вари-саво́ часо, соб (кай) тэ́ньчи тэ отдэ́н пэс постоскэ и патерьякэ (молитвакэ) Дэвлэ́скэ ваш дова́, соб (кай) на́лачхо тэ на злыджал тумэн пал дова́, со тумэ́ на рикирэ́на пэс дрэ васта́.

⁶Нэ мэ пхэна́ва дава́ тумэ́нгэ на сыр припхэныбэ́н, а тумэ́ ж кокорэ́ дыкхэ́н.

⁷Мэ кама́м, соб (кай) сарэ́ мануша́ тэ явэ́н адя́кэ, сыр мэ сом: нэ кажнонэ́ (сваконэ) манушэ́стэ исын пэ́скиро тала́но Дэвлэ́стыр, екх исын дасаво, яви́р нанэ дасаво.

⁸Нэ мэ пхэна́ва напалоромитконэ́ джувле́нгэ и пивленгэ (удовэнгэ): дава́ исын шука́р ваш лэ́нгэ тэ ячэ́нпэ адя́кэ, сыр мэ сом.

⁹Нэ ко́ли ёнэ на рикирэ́на пэс дрэ васта́, мэк тэ кэрэ́н бьява; пал-дова́ со фэды́р тэ кэрэ́н бьява, сыр тэ мэнчынэлпэ камибна́стыр тэ джал палоро́м, ци тэ лэлпэ.

¹⁰Нэ одолэ́нгэ, конэ́стэ исын ромны́ ци ром, мэ на припхэнава, а Рай Дэвэ́л; ромнякэ тэ на розджалпэ ромэса;

¹¹а ко́ли ж ёй розджалапэ, тэды мэк ёй тэ ячэ́лпэ биромэскирьяса, ци мэк ёй тэ рисёл кэ пэ́скиро ром; и мэк ром тэ на мэкэл пэ́скирэ ромня́.

¹²Нэ мэ ракира́ва явирэ́нгэ, а на Рай Дэвэ́л: ко́ли вари-савэ́ пшалэ́стэ пир патяибэ́н дрэ Христосо́стэ исын напатяибнаскири ромны́, и ёй камэ́ла тэ дживэ́л лэ́са, тэды мэк ёв тэ на мэкэл ла.

¹³И джувлы́, савьятэ исын напатяибнаскиро ром, и ёв камэ́ла тэ дживэ́л ла́са, тэды мэк ёй тэ на мэкэл лэс.

¹⁴Пал-дова́ со напатяибнаскиро ром сы́рбы освэнцынэлапэ ваш Дэвлэ́скэ пир Лэ́скирэ ромня́тэ, и напатяибнаскири ромны́ сы́рбы освэнцынэлапэ ваш Дэвлэ́скэ пир ла́кирэ ромэстэ; а ко́ли тэ на явэ́л адя́кэ, тэды тумарэ́ чхаворэ́ явэ́нас сы́рбы идолэ-мангипнарьенгирэ; нэ ёнэ ж какана́ освэнцындлэ ваш Дэвлэ́скэ.

¹⁵Нэ ко́ли вари-саво́ напатяибнаскиро уджала, мэк ёв (ёй) тэ джал пэ́скэ, пшал ци пхэн пир Растэ-Дэвлэ́стэ исын на спхандлэ дрэ дасавэ́ ваканцыи (случаи), а Дэвэ́л кхардя́ амэн тэ джива́с дро рама́нё (миро).

¹⁶Палдава́, ту, со джинэ́са, ромние, со ту зракхэ́са тырэ́ ромэс? Ци, ту, со джинэ́са, рома́, со ту зракхэ́са тырэ́ ромня́?

¹⁷Нэ мэк кажно (сва́ко) ману́ш тэ дживэ́л, сыр Дэвэ́л дыя́ кажнонэ́ манушэ́скэ, а сыр Рай Дэвэ́л прикхардя кажнонэ́ манушэ́с: адя́кэ-паць мэ сыклякирдём пир сарэ́ кхангирья.

¹⁸Ци сыс вари-кон прикхардо, саво́ сыс обчхиндло? Мэк ёв тэ на укэдэл обчхиныбнаскири шпэ́ра: ци сыс вари-кон прикхардо, ке́ли сыс наобчхиндло? Мэк ёв тэ на обчхинэлпэ.

¹⁹Обчхиныбэн на мол нисо́, и наобчхиныбэн на мол нисо́; нэ бари зна́чыма исын тэ ракхэ́с Дэвлэ́скирэ припхэныбэна́ (заповеди).

²⁰Мэк кажно ману́ш тэ ячэ́лпэ пэ пэ́скиро штэ́то машки́р манушэ́ндэ, савэ́стыр ёв сыс кхардо.

²¹Ци са́нас ту кхардо писхариса, на ладжа зоралэ́с, а ко́ли тэ могинэ́са тэ ячэс вольнонэ манушэ́са, тэды кэр дава́.

²²Палдава́ писха́ри, савэ́с Рай Дэвэ́л кхардя́ кэ Пэ, исын во́льно ману́ш анги́л Растэ-Дэвлэ́стэ; адя́кэ-паць и во́льно ману́ш, савэ́с Рай Дэвэ́л кхардя́ кэ Пэ, исын Христосо́скиро писха́ри.

²³Тумэн киндлэ пал Христососкири тими́н; на явэ́н манушытконэ́ писхарье́нца.

²⁴Пшала́лэ, мэк кажно ману́ш, сыр ёв сыс кхардо кэ, адя́кэ тэ ячэ́лпэ анги́л Дэвлэ́стэ.

²⁵А со пал патывалэ́ чхаендэ, ма́ндэ нанэ ни саво́ припхэныбэ́н Дэвлэ́стыр; нэ дава́ мэ ракира́ва пир пэ́скири годы́ сыр ману́ш, савэ́скэ Дэвэ́л дыя́ паты́в пир Пэ́скиро тангипэ́н.

²⁶Мэ думинава, со пал дава́ пхаро́ джиибэ́н, со исын какана́, фэды́р ваш манушэ́скэ тэ ячэ́лпэ адя́кэ, сыр ёв исын.

²⁷Исын ту́тэ ромны́? На ро́дэ, соб (кай) тэ розджаспэ. Нанэ ту́тэ ромня́? На ро́дэ пэ́скэ ромня́.

²⁸А ко́ли ту лэсапэ, адя́кэ-паць на кэрэ́са грэ́хо, и ко́ли чхай выджа́ла палоро́м, ёй адя́кэ-паць на кэрэ́ла грэ́хо: нэ кадасавэндэ явэ́на мэ́ньки дро палоромитко джиибэ́н, палдава́ мэ анги́л приракхава тумэн.

²⁹Нэ мэ пхэна́ва, пшала́лэ, со часо нанэ бут. Пал явирэндэ ж; конэ́стэ исын ромны́, явэ́н сы́рбы тумэ́ сан биромненгирэ;

³⁰и одолэ́, кон ровэла, явэ́н сы́рбы тумэ́ на ровэна; и одолэ́, кон радынэ́лапэ, явэ́н сы́рбы на радынэ́напэ; и одолэ́, кон кинэла, явэ́н сы́рбы лэ́ндэ нанэ ничы́;

³¹и одолэ́, кон лэ́ла вари-со далэ́ свэто́скирэ джиибнастыр, явэ́н сы́рбы ёнэ на залынэ пхэрдэ́с далэ́са; пал-дова́ со дава́ свэ́то, саво́ ёв исын какана́, джа́ла криг сы́гэс.

³²Мэ кама́м, соб (кай) тумэ́ тэ явэ́н вольна пиридживипнастыр. А наромандуно ману́ш пэкэлапэ (заботисола) пал дова́, со исын Ра́скиро-Дэвлэ́скиро, сыр тэ явэ́л лачхо́ Ра́скэ-Дэвлэ́скэ;

³³нэ одова́, кон исын романдуно, пэкэлапэ пал далэ́-свэто́скирэ джиибнытка рэ́нды, сыр тэ явэ́л лачхо́ пэ́скирэ ромнякэ.

³⁴Исын рознь машки́р палоромитконатэ и патывалэ́ чхатэ. Напалоромитко пэкэлапэ пал дова́, со исын Ра́скиро-Дэвлэ́скиро, соб (кай) тэ отдэлпэ Дэвлэ́скэ Духо́са и масэнца; а палоромитко пэкэлапэ пал далэ́-свэто́скирэ джиибнытка рэ́нды, сыр тэ явэ́л лачхо́ пэ́скирэ ромэскэ.

³⁵Нэ мэ пхэна́ва дава́ ваш тумаро́ миштыпэ́н, соб (кай) тэ на чхував фэлы́ (петля) анги́л тумэ́ндэ, соб (кай) тумэ́ тэ отдэ́н пэс бутякэ ваш Ра́скэ-Дэвлэ́скэ и тэ на уджан дрэ риг.

³⁶Нэ ко́ли вари-кон думинэ́ла, со ёв нашукар отлыджалапэ кэ пэ́скири патывалы́ чхай, ке́ли ёй исын дрэ бэрша́ и нанэ палоро́м; мэк ёв тэ кэрэ́л, сыр камэ́ла-дава́ нанэ грэ́хо, мэк ёв тэ отдэ́л ла палоро́м.

³⁷А одова́, кон исын твардо дро пэ́скиро ило́ и лэ́стэ нанэ трэ́бима, а пир пэ́скири во́ля ёв кэдыяпэ дро пэ́скиро ило́ тэ ракхэ́л пэ́скирэ чха, ёв шука́р кэрэ́ла.

³⁸Палдава́ одова́, кон отдэ́ла пэ́скирэ чха палоро́м, кэрэ́ла шука́р; а кон на отдэ́ла, одова́ кэрэ́ла фэдэды́р.

³⁹Ромны́ исын сыс спхандлы пэ́скирэ ромэса пэ ада́кицы, пака ла́киро ром исын джидо́; нэ ко́ли ёв мэрэ́ла, тэды ёй исын во́льно тэ джал палоро́м, пал конэ́стэ ёй камэ́ла, нэ фэ́ни пал патяибнаскирэстэ дрэ Растэ-Дэвлэ́стэ.

⁴⁰Нэ ёй исын бахталэдыр, ко́ли ёй адя́кэ ячэ́лапэ би ромэскиро пир мири́ годы́; нэ мэ думинава, со мэ радинава (мэ да́ва годы́) дава́ пир Дэвлэ́скиро Ду́хо (Фа́но), саво́ адя́кэ-паць исын дрэ ма́ндэ.