Read Baltic Romani Bible 2019 – Библия - Пэ Балтитко Романи чиб (Романэс) 2019 2 Коринфянэнгэ 7 Bible Online

2 Коринфянэнгэ 7 - Baltic Romani Bible 2019 – Библия - Пэ Балтитко Романи чиб (Романэс) 2019 bible

2 Коринфянэнгэ 7

¹Палдава́, ко́ли амэ́нгэ сыс дынэ́ дасавэ́ лава́, мирэ́ дро́га, жужакираса пэс сарэ́стыр, со мэлякирэла амари́ лоч (плоть) и ду́хо (фа́но) и ява́са тэ джива́с сарэ́са свэнтонэс дро дар анги́л Дэвлэ́стэ.

²Откэрэн пэ́скиро ило́ ваш амэ́нгэ: амэ ниекхэ́с на холякирдям, амэ никонэ́скэ на кэрдя́м чорипэ́н, амэ никонэстыр на лыям ко́фо (процэнто) ваш пэ́скэ.

³Мэ на ракира́ва дава́, соб (кай) тэ сэндинав тумэн; пал-дова́ со тумэ́ сан дро́га амарэ́ илэскэ, сыр мэ ґарэдыр пхэндём, соб (кай) тэ джива́с и тэ мэрас кхэтанэ́.

⁴Мэ зоралэ́с патя́ва тумэ́нгэ; мэ зоралэ́с шарава тумэн; мэ чуинава лачхо́ подрикирибэ́н; мэ древа́н радынавпэ, на дыкхи́ пэ сарэ́ амарэ́ пиридживипэна.

⁵Пал-дова́ со, чачэс, ке́ли амэ явдя́м дрэ Македония, амари́ лоч (маса́) на откхиныя, а амэн тасавэнас сарэ́ ригэ́ндыр: чингарда́ яврестыр, дар дро ило́ андра́л.

⁶Нэ Дэвэ́л, Саво́ подрикирэ́ла манушэ́н, савэ́ исын сы́рбы притасадэ, подрикирдя амэн и бичхадя́ Титос амэ́нгэ;

⁷нэ на ада́кицы, со Тито явдя́, а буты́р пир дова́, со ёв подрикирдя амэн и роспхэндя́ амэ́нгэ, со тумэ́ древа́н камэ́на тэ дыкхэ́н амэн; сыр тумэ́ рондлэ́, сыр тумэ́ сан тэрдэ́ пал ма́ндэ, со далэ́стыр мэ буты́р обрадындёмпэ.

⁸Пал-дова́ со мэ хоць и яндём смэнтныма (печаль) тумэ́нгэ мирэ́ лылэса, мэ на́ да́вапэ палэ; ко́ли мэ и да́васпэ палэ, со миро лыл яндя́ смэнтныма, фэ́ни (то́ка) пэ набаро́ часо.

⁹Нэ какана́ мэ радынавапэ на пир дова́, со тумэ́ са́нас дрэ смэнтныма, а пир дава́, со тумари́ смэнтныма зачхудя тумэн тэ парувэн пэ́скиро джиибэ́н (тэ рискирэ́н тумаро́ джиибэ́н кэ Дэвэ́л), пал-дова́ со тумари́ смэнтныма сыс пал Дэвлэ́стэ, адя́кэ со на сыс ни саво́ чорипэ́н амэ́нгэ.

¹⁰Пал-дова́ со смэ́нтныма (ту́га) пал Дэвлэ́стэ лыджа́ла манушэ́с, соб (кай) ёв тэ зракхэлпэ, а смэнтныма, сави́ исын пир годы́ дро дава́ свэ́то, лыджа́ла кэ мэрибэ́н.

¹¹Дыкхэ́н! Дая́-паць смэнтныма пал Дэвлэ́стэ, — со яндя́ тумэ́нгэ? Саво́ илэ́скиро хачкирибэ́н тэ рисён грэхостыр! Саво́ илэ́скиро допхэныбэ́н пал пэ́стэ! Сави́ холы́! Сави́ дар! Сави́ ла́ска илэ́стыр! Саво́ зэвлыныпэ́н! Саво́ сэндякирибэн! Тумэ́ сыкадэ, со тумэ́ сан набангэ дро дава́.

¹²Палдава́, ко́ли мэ чхиндём тумэ́нгэ, дава́ на сыс сы́рбы манушэ́стыр, саво́ кэрдя́ биба́хт, ци одолэ́ манушэ́стыр, савэ́скэ кэрдэ́ биба́хт; нэ ваш дова́, соб (кай) тумэ́ тэ дыкхэ́н анги́л Дэвлэ́стэ, сыр амэ хачкирдэ́ илэ́са отлыджасапэ кэ тумэ́.

¹³Пал дава́ амэ́нгэ сыс лачхо́ подрикирибэ́н. Нэ амэ буты́р радынасапэ Титоскирэ радыма́тыр, пал-дова́ со сарэ́ тумэ́ подрикирдэ лэ́скиро ду́хо (фа́но).

¹⁴Пал-дова́ со ко́ли мэ шардём тумэн лэ́скэ, мэ на со́мас ладжакирдо́, нэ, сыр амэ пхэндям тумэ́нгэ саро́ чачипэ́н, тэды адя́кэ-паць и амаро́ шарибэ́н анги́л Титостэ сыс чачуно́:

¹⁵и лэ́скиро ило́ буты́р пхэрдёла ласкаса, ке́ли ёв пририпирэла, сыр тумэ́ кандынэ́ лэ́скиро лав, сыр тумэ́ дарэнас и издранас, ке́ли тумэ́ прилынэ́ лэс.

¹⁶Палдава́ мэ радынавпэ, со мэ зоралэ́с патя́ва дрэ тумэ́ндэ пир саро́.