Read Baltic Romani Bible 2019 – Библия - Пэ Балтитко Романи чиб (Романэс) 2019 Галатэнгэ 2 Bible Online

Галатэнгэ 2 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Галатэнгэ 2

¹Тэ́ньци пало́ дэшуштар бэрш мэ нэвэ́стыр гиём дро Ерусалимо Варнаваса, и лыём адя́кэ-паць ма́нца Титос;

²и мэ гиём одори́к пир Дэвлэ́скиро упхэныбэ́н и пирипхэндём бахталы́ зан (звесь), сави́ мэ роспхэнавас анги́л Наюдэ́ндэ, нэ екх пэ екх кодолэ́нгэ, кон сыс дрэ паты́в машки́р манушэ́ндэ, пал-дова́ со, ци на ивья́ (напра́снэс) мэ сыклякиравас манушэ́н и ґарэдыр сыклякирдём;

³нэ аж Тито, кон сыс ма́нца, саво́ сыс Гре́ко (Баламо́), на сыс зачхудо тэ обчхинэлпэ;

⁴дава́ сыс пал хоханэ́ пшалэ́ндэ, савэ́ явнэ́ чораханэ́с тэ уджинэ́н пал амари́ вольныма, со амэ́ндэ исын пир екхипэ́н Исусо́са Христосо́са ваш дова́, соб (кай) тэ кэрэ́н амэн писхарье́нца;

⁵а лэ́нгэ амэ на поддыямпэ, ни пэ екх мардоро (штундыца), соб (кай) бахталэ́-занякиро (звесякиро) чачипэ́н тэ ячэ́лпэ ваш тумэ́нгэ.

⁶И кодолэ́, савэ́ сыс дрэ паты́в, — савэ́ ёнэ тэ на явэ́н, — ваш ма́нгэ ёнэ сарэ́ исын сыр екх — Дэвэ́л на дыкхэ́ла пэ манушы́тко муй, — на пхэндлэ́ ни саво́ нэво́ лав кэ миро роспхэныбэн;

⁷а пэфроми (хроми), ке́ли ёнэ дыкхнэ́, со Дэвэ́л дыя́ буты́ ма́нгэ тэ роспхэнав бахталы́ зан (звесь) Наюдэ́нгэ, адя́кэ-паць сыр и Пэтрискэ Юдэ́нгэ;

⁸пал-дова́ со Дэвэ́л чхудя́ Пэ́скирэ зорья́са ман Апостолоса Наюдэ́нгэ, адя́кэ-паць сыр Пэтрис Апостолоса ваш Юдэ́нгэ,

⁹и ке́ли Яково, Пэ́три и Иа́но, конэ́с гиндлэ́ пал шэралэндэ, шундлэ́, со ма́нгэ сыс дыно́ бахталыпэ́н пэ дасави́ буты́, ёнэ подынэ васт ваш кхэтаныпэн ма́нгэ и Варнаваскэ, соб (кай) амэ тэ джас кэ На́юды, а ёнэ тэ джа́н кэ Юды;

¹⁰нэ екх ёнэ помангнэ амэн, соб (кай) амэ тэ на бистрас пал чорорэндэ, со мэ адя́кэ-паць и причхудём зор тэ кэра́в.

¹¹А ке́ли Пэ́три явдя́ дрэ Антио́хия, мэ выштадём маму́й (проти) лэ́стэ, сыр ёв сыс банго́:

¹²пал-дова́ со анги́л дова́, сыр явнэ́ мануша́ Яковостыр, ёв халас Наюдэнца; а ке́ли ёнэ явнэ́, ёв дыяпэ палэ и рикирдя пэс дро риг, пал-дова́ со ёв дарандыя Юдэндыр;

¹³и яви́р Юды адя́кэ-паць сыс кхэтанэ́ лэ́са дрэ дуемуиткима, со аж и Варнава упатяндыя дрэ лэ́нгири фрэнтыма.

¹⁴Нэ ке́ли мэ дыкхцём, со ёнэ кэрэ́на на сыр трэй пир чачипэ́н бахталэ́ занятыр (звесятыр), мэ пхэндём Пэтрискэ анги́л сарэ́ндэ: “Ко́ли ту сан Юдо, со́скэ ту дживэса сыр Наюдо, а на сыр Юдо; со́скэ ту зачхувэса Наюдэн тэ дживэ́н сыр Юдэ́н?”

¹⁵Амэ сам Юды пир рат, а амэ на сам грэхи́тка На́юды,

¹⁶нэ амэ джина́са, со Дэвэ́л приґалёла чачунэса манушэ́с на пир Законо́скирэ бутя́, а пир патяибэ́н дрэ Исусо́стэ Христосо́стэ; амэ адя́кэ-паць упатяндыям дрэ Исусо́стэ Христосо́стэ, со амэ могинаса, соб (кай) Дэвэ́л тэ приґалёл чачунэнца амэн пир патяибэ́н дрэ Христосо́стэ, а на пир Законо́скирэ бутя́, пал-дова́ со пир Законо́скирэ бутя́ Дэвэ́л на приґалёла чачунэса пир лоч (плоть) ни екхэ манушэ́с.

¹⁷Нэ ко́ли амэ родаса саштыпэн (возможность/ваканцыя), соб (кай) Дэвэ́л тэ приґалёл чачунэнца амэн пир Христосо́стэ, нэ выджа́ла, со амэ сам грэхи́тка мануша́, то нау́што Христо́со дынаринэла грэхоскэ? Мэк ние́кхвар дава́ тэ на явэ́л!

¹⁸Пал-дова́ со, ке́ли мэ нэвэ́стыр пирикэрава Законоскиро сыклякирибэ́н, со мэ роспхагирдём, мэ сыкава́ва пэс, со мэ сом проштавибнари (преступнико).

¹⁹Мэ сы́рбы мыём пир Законоскиро сыклякирибэ́н, соб (кай) тэ джива́в дурэды́р пир Зако́но, соб (кай) ма́нгэ тэ джива́в Дэвлэ́са.

²⁰Мэ со́мас примардо пэ трушу́л Христосо́са, и мэ буты́р сы́рбы на джива́ва, нэ дава́ Христо́со дживэ́ла дрэ ма́ндэ; нэ дова́, со мэ джива́ва дрэ лоч (плоть), мэ джива́ва пир патяибэ́н дрэ Дэвлэ́скирэ Чхавэ́стэ, Савэ́скэ яцём дро́го мэ, и Саво́ отдыя́ Пэс пал ма́ндэ.

²¹Мэ на отпхэнавапэ Дэвлэ́скирэ бахталыпнастыр, нэ, ко́ли Дэвэ́л приґалёла амэн чачунэнца пир дова́, со амэ ракхаса Зако́но, тэды ивья́ (напра́снэс) мыя́ Христо́со.