Read Baltic Romani Bible 2019 – Библия - Пэ Балтитко Романи чиб (Романэс) 2019 Галатэнгэ 6 Bible Online

Галатэнгэ 6 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Галатэнгэ 6

¹Пшала́лэ, ко́ли ману́ш исын ухтылдо дро вари-саво́ на́лачхо рэ́ндо (де́ло), тэды тумэ́, савэ́ дживэ́на пир ду́хо (фа́но), подэн васт (помогинэн) лэ́скэ тэ тэрдёл палэ пэ чачуно́ дром ковлэ́ илэ́са, и дыкхэ́н пал пэ́стэ, соб (кай) тумэ́ кокорэ́ тэ на пэрэ́н пэ пропатякирибэн.

²Помогинэн екх екхэ́скэ тэ лыджа́н пхарипэ́н, и далэ́са тэды тумэ́ сполнинэна Христосо́скиро Зако́но.

³А ко́ли вари-саво́ ману́ш гинэ́ла пэс вари-конэса, ке́ли ёв кокоро́ ничы́ на мол пэ́стыр, тэды ёв хохавэла пэс;

⁴нэ мэк кажно ману́ш тэ дэл чол (тэ спробинэл пэс) пэ́скэ, тэды ёв явэ́ла тэ радынэ́лпэ кокоро́ пэ́скирэ кэрибнастыр, а на явирэ манушэ́ндыр.

⁵Пал-дова́ со кажно ману́ш лыджа́ла пэ́скирэ джиибна́скиро пхарипэ́н.

⁶Мэк ману́ш, саво́ сыклёла, тэ дэл паш пэ́скирэ миштыпна́стыр кодолэ́скэ, кон сыклякирэ́ла лэс.

⁷На дэнпэ дукха́: Дэвлэ́с нашты́ тэ хохавэ́л; дова́, со ману́ш чхувэ́ла дрэ пхув, дова́-паць ёв и скэдэ́ла.

⁸И кон чхувэ́ла дрэ пхув ваш пэ́скири лоч (плоть), одова́ чхинэла криг аплодостыр Духоскиро мэрибэ́н, а кон чхувэ́ла дрэ пхув ваш Ду́хо (Фа́но), кодова́ счхинэла аплодостыр ве́чно джиибэ́н Свэнтонэ́ Духо́стыр:

⁹ке́ли амэ кэра́са шука́р, тэды амэ́нгэ тэ на кхинёвас, пал-дова́ со амэ ява́са тэ скэдас аплодо дро пэ́скиро часо, ко́ли амэ на пэраса дро ду́хо (фа́но).

¹⁰Палдава́, ко́ли исын часо/саштыпэн, то ява́са тэ кэра́с лачхипэ́н сарэ́нгэ, и древа́н фэды́р кодолэ́нгэ, савэ́ исын пша́ла пир патяибэ́н.

¹¹Дыкхэ́н, савэ́ барэ́ буквэнца мэ чхиндём тумэ́нгэ мирэ́ вастэ́са.

¹²А одолэ́, савэ́ камэ́на тэ сыкавэ́н пэс пир лоч манушэ́нгэ, зачхувэна тумэн тэ обчхинэнпэ, екх ваш дова́, соб (кай) лэн тэ на традэ́н пал Христосо́скиро трушу́л.

¹³И ёнэ кокорэ́, савэ́ исын обчхиндлэ́, на рикирэ́на Зако́но, нэ ёнэ камэ́на, соб (кай) тумэ́ тэ обчхинэнпэ ваш дова́, соб (кай) тэ шарэнпэ, со ёнэ кэрдэ́ обчхиныбэн пэ тумэ́ндэ.

¹⁴Нэ ма́нгэ тэ на шаравпэ нисоса, екх амарэ́ Ра́скирэ-Дэвлэ́скирэ, Исусо́скирэ Христосо́скирэ трушулэса, пир Конэ́стэ свэ́то исын примардо пэ трушу́л ваш ма́нгэ, и мэ адя́кэ-паць ваш дава́ свэ́то.

¹⁵Пал-дова́ со, кон исын дро екхипэ́н Христосо́са, на значинэла нисо́: ни обчхиныбэн, ни наобчхиныбэн, а нэво́ ману́ш.

¹⁶И кодолэ́нгэ, кон дживэ́ла пир дава́ упхэныбэ́н, тэ явэ́л пэ лэ́ндэ рама́нё (миро) и тангипэ́н (ла́ска) и пэ сарэ́ Дэвлэ́скирэ манушэ́ндэ.

¹⁷Палдава́ адя́кэ: мэк нико́н тэ на пхарьякирэл ман, пал-дова́ со ма́ндэ исын Исусо́скиро шрамы (морима) пэ маса́.

¹⁸Мэк бахталыпэ́н амарэ́ Ра́скирэ-Дэвлэ́скирэ, Исусо́скирэ Христосо́скиро тэ явэ́л тумарэ́ Духо́са, пша́ла. Ами́нь!