Read Baltic Romani Bible 2019 – Библия - Пэ Балтитко Романи чиб (Романэс) 2019 Эфесянэнгэ 6 Bible Online

Эфесянэнгэ 6 - Baltic Romani Bible 2019 – Библия - Пэ Балтитко Романи чиб (Романэс) 2019 bible

Эфесянэнгэ 6

¹Чхавора́лэ, кандэ́н пэскирэн дадэн, савэ́ исын Ра́стыр-Дэвлэ́стыр, пал-дова́ со дро дава́ исын чачипэ́н.

²“Кутя́кир (дэ паты́в) пэ́скирэс дадэ́с и да”, дава́ исын англатуно́ запхэныбэн дынэ́ лавэ́са,

³соб (кай) ту явэс бахтало́ и тэ дживэ́с ґара́ пэ пхув.

⁴И тумэ́, дада́, на хан пэ́скирэ чхаворэ́н, нэ барьякирэ́н лэн пир Ра́скирэ-Дэвлэ́скиро сыклякирибэ́н и приракхибэн.

⁵Писхарья́лэ(рабы), кандэ́н пэ́скирэ хулан пэ пхув пир лоч, кутякирибна́са (вага́са) и дара́са сарэ́ тумарэ́ илэ́стыр, сыр Христосо́с;

⁶на кэрэ́н дава́ ваш сыкаибэ́н, ваш манушэ́нгиро шарибэ́н, нэ сыр Христосо́скирэ писха́рья, савэ́ сарэ́ пэ́скирэ илэ́стыр кэрэ́на пир Дэвлэ́скири во́ля,

⁷дынаринэ́н илэ́са сарэ́ илэ́стыр, сыр Ра́скэ-Дэвлэ́скэ, а на, сыр манушэ́нгэ;

⁸джинэ́н тумэ́, со кажно ману́ш, ко́ли саво́ кэрэ́ла лачхипэ́н, то ёв дава́-паць и дорэсэ́ла палэ Ра́стыр-Дэвлэ́стыр, мэк ёв тэ явэ́л писха́ри ци во́льно.

⁹И тумэ́, хулая́лэ, адя́кэ-паць отлыджанпэ шука́р кэ пэ́скирэ писха́рья и на страхакирэн лэн, джинэ́н, со дро Болыбна́скиро Раё исын Хула́й ваш лэ́нгэ и ваш тумэ́нгэ и Ёв кутякирэла шэра́ (ра́внэс) сарэ́ манушэ́н.

¹⁰И дро ко́нцо (дро яго́ро) мирэ́ пша́ла, мэ кама́м тэ пхэна́в тумэ́нгэ, явэ́н зоралэды́р дро екхипэ́н Ра́са-Дэвлэ́са и Лэ́скирэ барэ́ зорья́тыр.

¹¹Урьен пэ пэ́стэ сарэ́ Дэвлэ́скирэ марды́тко, соб (кай) тумэ́ могиндлэ́ тэ тэрдён проти налачхэскирэ фрэнта рэндорэ (делыцы):

¹²пал-дова́ со амэ сам на проти манушэ́ндэ, а проти барыдырэндэ и свэто́скирэ тхагарье́ндэ (князьендэ), савэ́ хулаинэна пэ дава́ цямло́ (тё́мно) свэ́то, проти бэнгланэ́ ду́хи, савэ́ исын дро Болыбна́скиро свэ́то.

¹³Палдава́ урьен сарэ́ Дэвлэ́скирэ мардытка, соб (кай), ке́ли явэ́ла на́лачхо дывэ́с, тумэ́ могиндлэ́ тэ тэрдён проти, и саро́ тэ пиризорьякирэн и тэ вырикирэн.

¹⁴И палдава́ тэрдён сарэ́ зорья́тыр, подпхандэнпэ симири́са чачипнастыр и опхандэ́н пэс патяибна́са сыр саструнэ́ шчытоса,

¹⁵и урьен пэ́скирэ ґэра́, соб (кай) тэ явэ́н скэдынэ́ тэ джа́н и тэ роспхэнэ́н бахталы́ зан пал рама́нё (миро):

¹⁶Нэ фэды́р сарэ́стыр, лэн пэ́са шчы́то патяибнастыр, савэ́са тумэ́ могинэ́на тэ мурдякирэн сарэ́ налачхэскирэ хачкирдэ́ марибны́тка бустя́ (стре́лы).

¹⁷И лэн адя́кэ-паць зракхибнаскиро шлемо, и Духоскири курта́ла, со исын Дэвлэ́скиро лав,

¹⁸и дро кажно часо мангэ́нпэ дро Ду́хо (Фа́но) кажнонэ́ патерьяса (молитваса), адя́кэ-паць саро́ часо мангэ́нпэ Дэвлэ́скэ пал сарэ́ дэвлытконэнэ;

¹⁹адя́кэ-паць мангэ́нпэ Дэвлэ́скэ и пал ма́ндэ, соб (кай) ма́нгэ тэ явэ́н дынэ́ лава́, савэ́ трэй тэ ракира́в муршканэ́с гарадо́ чачипэ́н пал бахталы́ зан,

²⁰ваш дава́ мэ и сом бичхадо́ дрэ састыра́, соб (кай) мэ тэ ракира́в муршканэ́с, сыр и трэй ма́нгэ тэ ракира́в.

²¹Нэ соб (кай) и тумэ́ адя́кэ-паць тэ джинэ́н пал дава́, со отлыджалапэ кэ мэ и пал мирэ́ рэ́нды, дова́ роспхэнэ́ла тумэ́нгэ пал саро́ Тихико, амаро́ дро́го пшал и чачуно́ Ра́скирэ-Дэвлэ́скиро дына́ри;

²²савэ́с мэ и бичхадём кэ тумэ́ ваш дова́-паць, соб (кай) тумэ́ тэ уджинэ́н пал амэ́ндэ, и, соб (кай) ёв тэ подрикирэ́л тумарэ́ илэ.

²³Мэк тэ явэ́л рама́нё (миро) пшалэ́нгэ и паты́в кэ яви́р мануша́ патяибна́са Дэвлэ́стыр Дадэ́стыр и Ра́стыр-Дэвлэ́стыр, Исусо́стыр Христосо́стыр.

²⁴Мэк тэ явэ́л бахталыпэ́н сарэ́нгэ, кон сарэ́ илэ́стыр рикирэ́ла сыр Дро́гима амарэ́ Рас-Дэвлэ́с, Исусо́с Христосо́с дро пэ́скиро ило́. Ами́нь.